1, 2. Amanle Yesu okookela wirimu, tiheeni akhweya arummwa yaachunaaya osuwela?

ARUMMWA a Yesu yeemenle va Mwaako wa Olivera, yaahimoona pwiya ni nthamwene aya, Yesu, awelaka wirimu nave neeku nimuhuruwelaka. (Saweriwa T’arummwa 1:9, 10) Mu iyaakha piili, Yesu aahaahusiha, waaceenyerya ni waahoolela. Nyenya vano owo aakhumavo. Tiheeni arummwa yaaphwanelaaya opaka?

² Ahaakumve okookela wirimu, Yesu aaloca wa arummwa awe: “Vanonto munamukhala anamona aka o Yerusalemu, o Yudeya wothene ni o Samariya, ophiyerya okhomoni wa elapo.” (Saweriwa T’arummwa 1:8) Yaahaala owerya hai opaka muteko owo? Yesu aahaaroromeliha wi munepa waweela wa Muluku waahaala waakhaviherya. (Saweriwa T’arummwa 1:5) Nyenya taani aahaala waahoolela ni orehererya muteko woolaleerya veelaponi yoothene? Arummwa yaasuwela wi khalai Yehova aahaapharihela alopwana wi yaahoolele Aisarayeli. Mwawiihiiha akhweya yaaniikoha waakhanle wi Yehova aahaala omuthanla muhooleli muvyaani.

3. (a) Yesu amanle okookela wirimu, yoolakelela taani yookhweleya yaapakiwe ni arummwa oororomeleya? (b) Makoho taani nneeraahu naakhule mmwaha yoola?

 ³ Elukuluku vakhaani Yesu amanle okookela wirimu, oohuserya yaahaalikhela Soorempwa, yaavekela wi Muluku akhaviherye omuthanla Matiya wi amuraceele Yutasi Iskariyoti. (Saweriwa T’arummwa 1:15-26) Ntakhara heeni waari woochuneya omuthanla murummwa muvyaani? Oohuserya yaasuwela wi yaachuneya wi ekhale arummwa 12. * (Moone masu avathi.) Yesu aahaathanla arummwa nave aahaavyakiha wi ekhwaaniherye muteko wookhweleya variyari va achu a Muluku. Muteko taani, nave ti mwawiihai Yehova ni Yesu yaareherenryaaya ntakhara muteko yoowo? Mukhalelo taani woolikana orivo olelo? Nave nni ‘niwupuwele hai aholi ahu’ xaxaxa “mulapeli òroromeleya ni awisuwela”?—Ahebri 13:7; Mateu 24:45.

4. Murici taani arummwa ni atokweene akina yaaryaayano o Yerusalemu?

⁴ Arummwa yaapacenrye ohoolela muloko mu Pentekoste a eyaakha ya 33. Piipiliya onnaloca wi ‘Pedro ahemela vamoha ni ale khumi na mmoha’ ahusiha iparipari soovulusa wa muloko mutokweene. (Saweriwa T’arummwa 2:14, 15) Achu ancipale yaahikhala Akristu. Voocharela, Akristu yaale avyaani “yàri anthìti mmahusihoni a Arummwa.” (Saweriwa T’arummwa 2:42) Arummwa yaakhalano murici wa opharihela phaama ikhorowa sa muloko. (Saweriwa T’arummwa 4:34, 35) Awotho yaanaahusiha achu a Muluku ni waavekelela, eriki: “Wa hiyo nni nikhale anthìti mmavekeloni ni mmuteko wa olaleya nsu.” (Saweriwa T’arummwa 6:4) Nave yaahaaruma Akristu a mavyakelo wi yalaleerye mu ikulucu ivyaani. (Saweriwa T’arummwa 8:14, 15) Ohoolo waya, atokweene oothanliwa yaahikhala vamoha ni arummwa wi ekhale ahooleli mmulokoni. Ntoko nikhuuru noolamulela, awo yaanahoolela miloko soothene.—Saweriwa T’arummwa 15:2.

5, 6. (a) Munepa waweela waalipinhe hai nikhuuru noolamulela? (Moone eruku yoopacerya.) (b) Ankeelo yaakhavihenrye hai nikhuuru noolamulela? (c) Masu a Muluku yaakhavihenrye hai nikhuuru noolamulela?

⁵ Akristu a nsana noopacerya yaanasuwela wi Yehova taahoolela nikhuuru noolamulela moorweela wa Yesu. Yaasuwenle hai? Voopacerya, munepa waweela waanavaha ikuru nikhuuru noolamulela. (Yohani 16:13) Akristu oothene oothanliwa yaanaakhela munepa waweela, nyenya waalipiha xaxaxa arummwa ni atokweene o Yerusalemu wi eyeno vahoolo murici aya ntoko ooweherya. Ntoko yootakiherya, mu eyaakha ya 49, munepa waweela waahaahoolela anna a nikhuuru noolamulela wi  epake yoolakelela vooloca sa wiineliwa. Miloko saanachariha ohoolela yoola. Ntoko yookhumelela, awo ‘yànalipa munroromeloni ni wànatxereryeya watxa waya nihiku nnihiku.’ (Saweriwa T’arummwa 16:4, 5) Orweela wa ekaarata yaarumihiwe mmilokoni vooloca sa wiineliwa, ninnawerya woona wi nikhuuru noolamulela naakhalano munepa waweela nave naahooniherya mikhalelo ntoko osivela ni nroromelo.—Saweriwa T’arummwa 15:11, 25-29; Galasya 5:22, 23.

⁶ Yanaawiili, ankeelo yaahikhaviherya nikhuuru noolamulela. Ntoko yootakiherya, munkeelo aaloca wa Korneliyu wi amphwanye murummwa Petro. Petro amanle omulaleerya Korneliyu ni amusi awe, awo yaahaakhela munepa waweela, naamwi yaarivo alopwana yahiineliwe. Mwawiihiiha, Korneliyu aari Mukristu oopacerya yoowo ahiineliwe. Vaavaa arummwa ni anna akina yiiwalaaya sa yeela, awo yaaheemererya yookhwela ya Muluku nave yaanawaakhela achu yahaari Ayuta mmuloko Weekristu. (Saweriwa T’arummwa 11:13-18) Ninnoona wi ankeelo yaahikhaviherya muteko woolaleerya yoowo waahooleliwa nnikhuuru noolamulela. (Saweriwa T’arummwa 5:19, 20) Yaneeraru, Masu a Muluku yaanahoolela nikhuuru noolamulela. Alopwana yaale yaanapharihela Soorempwa wi saakhaviherye opaka soolakelela sookhweleya vooloca sa soororomela sa Akristu ni ohoolela miloko.—Saweriwa T’arummwa 1:20-22; 15:15-20.

7. Nnasuwela hai wi Yesu aanaahoolela Akristu oopacerya?

⁷ Naamwi nikhuuru noolamulela naakhanleno olamulelo mmulokoni, anna a nikhuuru nenlo yaaniiwexexa wi ti Yesu aari Muhooleli aya. Nnasuwela hai? Murummwa Paulo aaloca wi ti Kristu yoowo “avan’he wi akina ekhele arummwa.” Owotho aaloca wi ti Kristu aari “muru” naari Muhooleli, a muloko. (Éfeso 4:11, 15) Arummwa hiyathanlana yaawo yaawo wi ekhale arummwa. Moohiyana Muluku teeriha wi ethanliwe ni “witxhaniwa ni nsina na akristu.” (Saweriwa T’arummwa 11:26) Paulo aanasuwela wi waari wookhweleya ochariha mahusiheryo a Mpiipiliya, yaawo yaavahiwa ni arummwa ni alopwana akina yaahoolela. Naamwi hiiha, Paulo aaloca: “Nto kinnakhwela wosuwelihani wi muru wa atxhu othene ti Kristu.” Sooloca iha saanamvolowela muchu ti muchu a nikhuuru noolamulela. Paulo aahaaceererya: “Muru wa Kristu ti Muluku.” (1 Korinto 11:2, 3) Chiryene, Yehova aahimuthanla Mwanawe, Kristu Yesu, wi ahoolele muloko.

8, 9. Muteko taani wookhweleya Munna Russell aareiyeno?

⁸ Opacerya 1870, Charles Taze Russell ni asinthamwene awe yaapacerya omulapela Muluku mwawiiwanana ni Piipiliya ni waakhaviherya akina weerano emohamoha. Eyo yaaphitaanyerya waakhaviherya achu a ilocelo soohiyana hiyana. Mwawiihiiha nikhuuru na Zion’s Watch Tower Tract Society naareheryiwa mu 1884, nave Munna Russell taari muhooleli. * (Moone masu avathi.) Owo aanamuhuserya Piipiliya mwawiiseela nave hoova waaleela akina wi mahusiheryo a ikerexa vooloca sa amuluku araru mu  mmoha ni okumi woohikhwa hiyaari a Mpiipiliyani. Owo aahihuserya wi okooka wa Kristu waahaala okhala woohooneya nave wi okhwaanela wa “mahiku aya” waahaala weereya mu 1914. (Luka 21:24) Munna Russell aahipharihela ikuru sawe, elukuluku, ni ikhorowa wi aahusihe akina iparipari seiya. Ti wawooneya wi Yehova ni Yesu yaahimpharihela Munna Russell wi akhale muhooleli mu elukuluku yookhweleya.

⁹ Munna Russell haachuna ovahiwa ncicimiho navameekhaaya. Mu 1896, owo aahirepa wi yene ni alopwana akina oophwanelela hiyaachuna wi ecicimihiweke vancipale. Awo hiyaachuna ovahiwa nsina navameekhaaya, nave hiyaachunatho wi makhuuru makina ekuxeke masina aya. Owo aaloca “Ola tahi muteko wa achu.”

10. (a) Ti liini Yesu aamuthanlileiye “mulapeli òroromeleya ni awisuwela”? (b) Mutharihe ohiyana orivovo variyari va Nikhuuru Noolamulela ni Sociedade Torre de Vigia.

¹⁰ Munna Russell okhwile mu 1916. Iyaakha chaaru ohoolo waya, mu 1919, Yesu aahimuthanla “mulapeli òroromeleya ni awisuwela.” Ni yoolakelela taani? Wi aavahe oomuchara awe “yolya mwa elukuluku yophwanelela.” (Mateu 24:45) Variyari va iyaakha seiye, nikhuuru nikhaani na anna oothanliwa o nipuro ntokweene o Brooklyn, Nova York, yaanaavaha oomuchara a Yesu yoolya yoomunepani. Masu awi “nikhuuru noolamulela” naapacenrye ophwanyeya mu soolaleeryiwa sahu ohoolo wa 1940. Mu elukuluku yeele, nikhuuru noolamulela naaniiwanana vakhiviru khiviru ni Sociedade Torre de Vigia de Bíblias e Tratados. Nyenya, mu 1971, waari wawooneya wi Nikhuuru Noolamulela naari noohiyana ni Sociedade Torre de Vigia, nenlo naarino murici pahiru wa orehererya miyaha. Ovinyerya elukuluku yeeyo, anna oothanliwa yaanapaka makupa a Nikhuuru Noolamulela ehikhanle ahooleli a Sociedade Torre de Vigia. Mwahiihaanoru, anna oophwanelela a “iputxeputxhe ikina” annarumeela ntoko ahooleli a Sociedade Torre de Vigia ni mapuro makina anaphariheliwa ni achu a Muluku. Ntoko yookhumelela, Nikhuuru Noolamulela nnateteiwa mu ovahererya mahusiheryo a Mpiipiliya ni ohoolela. (Yohani 10:16; Saweriwa T’arummwa 6:4) Mulipeleli 15 a Yulyu a 2013 a ekunya, aahithariha wi “mulapeli òroromeleya ni awisuwela” nikhuuru nikhaani na anna oothanliwa nnapaka makupa a Nikhuuru Noolamulela.

11. Nikhuuru Noolamulela nnapaka hai soolakelela?

¹¹ Nikhuuru Noolamulela nnapaka soolakelela sookhweleya vaavaa nnathukumanaaya vamoha esumana ti esumana. Othukumana wa mukhalelo yoola onnaakhaviherya ovaanela ni okhala awaataana. (Masiposipo 20:18) Haavo mmoha a Nikhuuru Noolamulela ori ookhweleyaxa waapwaha akina, nyenya eyaakha ti eyaakha onnakhalavo munna mmoha onahoolela mithukumano seiyo. (1 Pedro 5:1)  Eyotho enneereya wa makhuuru mathanu nammoha a Nikhuuru Noolamulela. Haavo mmoha a Nikhuuru Noolamulela oniisoona wi muhooleli a annawe. Mmoha ti mmoha ori ntoko munna vyakala nave onnaakhela yoolya yoomunepani ni ochara ohoolela wa mulapeli oororomeleya ni awiisuwela.

12. Makoho taani nnahaalaahu waakhula?

¹² Nikhuuru Noolamulela tahi noophaameya. Ninnahesa vaavaa nnamutharihaaya Piipiliya ni ohoolela marehereryo a Yehova. Ntoko yootakiherya, Índice das Publicações da Torre de Vigia ookhalano mwaha onaloca “Esclarecimento de Crenças,” orivovo matorokelo a omwiiwexexa Piipiliya ovinyerya mu 1870. Yesu halonce wi mulapeli awe oororomeleya aahaala opakaka yoolya yoomunepani yoophaameya. Vanonto, nni naakhule hai nikoho na Yesu: “Tani mulapeli òroromeleya ni awisuwela?” (Mateu 24:45) Tiheeni enooniherya wi Nikhuuru  Noolamulela mulapeli oororomeleya? Hankooni nthokororye ichu raru seiyo saakhavihenrye nikhuuru noolamulela mmahiku a arummwa.

13. Munepa waweela waakhavihenrye hai Nikhuuru Noolamulela?

¹³ Munepa waweela onnakhaviherya Nikhuuru Noolamulela. Munepa waweela waahikhaviherya Nikhuuru Noolamulela wiiwexexa iparipari sa Mpiipiliyani seiyo khalai sahiiwexexiwa. Ntoko yootakiherya, muthokororye soororomela itharihiwe seiyo sinaphwanyeya mu Índice oromoliwe muculi. Haavo muchu aahaala owerya wiiwexexa ni othariha mukhateiye ichu seiya “sawisha . . . sa Muluku”! (Mwaalakhanye 1 Akorinto 2:10, Nlakano Nahihano.) Nikhuuru Noolamulela nri ntoko murummwa Paulo, yoowo orempe: “Hiyo hinnalotxa sa mahala seiho ni masu a miruku sa atxhu, nto nnalaleya ni masu Munepa onihusin’haya.” (1 Korinto 2:13) Sivinre iyaakha sincipale erino mahusiheryo atheru ntakhara heeni waacereryiwaaya wiiwexexiwa wa Piipiliya ovinyerya mu 1919? Nthowa nene ti nla: Muluku onnakhaviherya ni munepa awe waweela!

14. Mwawiiwanana ni Wupulula 14:6, 7, ankeelo anakhaviherya hai Nikhuuru Noolamulela?

¹⁴ Ankeelo annakhaviherya Nikhuuru Noolamulela. Nikhuuru Noolamulela nookhalano muteko wa waahoolela alaleeryi opwaha 8.000.000 mmuteko wa olaleerya veelaponi yoothene. Ntakhara heeni muteko ola onnakhumelela phaama? Nthowa nimoha ti nawi onakhaviheryiwa ni ankeelo. (Mwaalakhanye Wupulula 14:6, 7.) Ikwaha sincipale, ankeelo tanamuhoolela mulaleeryi omphwanya muchu yoowo ovekenle wi Muluku amukhaviherye! * (Moone masu avathi.) Muteko wa olaleerya ni ohusiha onnatitelela oya vahoolo naamwi orivo wiica otokotoko. Nlatho nthowa nikina nnooniherya wi nikhaviheryo nnarweela wa ankeelo.

15. Nikhuuru Noolamulela nnahiyana hai ni ahooleli a ikerexa? Mvahe yootakiherya.

¹⁵ Masu a Muluku annahoolela Nikhuuru Noolamulela. (Mwaalakhanye Yohani 17:17.) Muthokororye yeeyo yeeren’ye mu 1973. Mulipeleli 1 a Yunyu aahikoha waakhanle wi “muchu yoowo ohihin’ye yookhovelelaawe ya omulya soona aanaphwanela opatisiwa.” Naakhulo naavahiwe wa nikoho nla naathipeleya mmalakiheryo a Piipiliya, nave naakhulo naari hooye! Mulipeleli aaromola soorepa sincipale nave aathariha ntakhara heeni muchu yoowo ahaahiya omulya soona aanaphwanela wiikariwa mmulokoni. (1 Korinto 5:7; 2 Korinto 7:1) Owotho aahiloca wi nlamulo nla hinnarweela mwa achu nyenya “mwa Muluku, yoowo onaloca moorweela wa Masu awe oorempwa.” Haavo malapelo makina anachariha ni ororomela Masu a Muluku naamwi esuwelaka wi onahaala okhala woovila wa akina a muloko aya. Liivuru mmoha o Estatu Unitu yoowo onathokororya miyaha sa malapelo ooloca: “Ahooleli Eekristu annarehererya mahusiheryo aya wi yiiwananihe soororomela ni sooloca sa achu ni okhalano nikhaviheryo na achu a ikerexa saya vamoha ni achu ancipale.” Nikhuuru Noolamulela hannahooleliwa ni yeeyo achu ancipale anasiveliwaayano. Moohiyana, mmoha ti mmoha onahooleliwa ni Masu  a Muluku, enooniherya wi Yehova tonaahoolela achu awe olelo.

16. Tuuvi ori mukhalelo mmoha wa wuupuwela Nikhuuru Noolamulela?

¹⁶ Mwaalakhanye Ahebri 13:7. Piipiliya onnaloca ariki: “N’wupuwele aholi anyu.” Mukhalelo mmoha wa weerano yeeyo, ori oromola Nikhuuru Noolamulela mmavekeloni mwahu. (Éfeso 6:18) Awo aakhalano mirici, seiyo sinaphitaanyerya ovahererya yoolya yoomunepani, ohoolela muteko woolaleerya elapo yoothene ni opharihela phaama sooveleela sinapakiwa ntakhara marehereryo. Mwawiihiiha, ti woochuneya waavekelela!

17, 18. (a) Nnachara hai ohoolela wa Nikhuuru Noolamulela? (b) Olaleerya wahu onakhaviherya hai Nikhuuru Noolamulela ni Yesu?

¹⁷ Nnanweryatho wuupuwela Nikhuuru Noolamulela moorweela wa ochara mahusiheryo ni ohoolela waya. Nikhuuru Noolamulela ninnanivaha ohoolela moorweela wa soolaleeryiwa sahu, mithukumano sa muloko, sa muceche ni sa ekulucu. Nnotho ninnaathanla ooweherya aweeceeca, yaawo tho anaathanla atokweene. Moorweela wa ochara ohoolela anavahiwaaya, ooweherya aweeceeca ni atokweene annooniherya wi annuupuwela Nikhuuru Noolamulela. Nave oothene ahu ninnooniherya ncicimiho wa Muhooleli ahu, Yesu, moorweela wa owiiwelela alopwana onaaphariheleiye olelo.—Ahebri 13:17.

¹⁸ Mukhalelo mukina nneeraahu nuupuwele Nikhuuru Noolamulela, ori owetha mmuteko woolaleerya. Ahebri 13:7 onnaaceenyerya Akristu oothene otakiherya weemererya naari nroromelo na ahooli ahu. Nikhuuru Noolamulela ninnooniherya nroromelo ntokweene ni mvai mmuteko woolaleerya ni ovuwiha michaka yaphaama. Apwanne ninnaakhaviherya anna yaawo muteko yoola wookhweleya? Wakhala wi ninneerano, nnahaala ohakalala vaavaa nneeraahu nimwiiwe Yesu alocaka: “Yeyo mmwerenlanyu munnaka mmoha wa yala akhani, mukerenle miyo.”—Mateu 25:34-40.

19. Ntakhara heeni muryaanyu oolakelela omuchara Muhooleli ahu, Yesu?

¹⁹ Vaavaa Yesu aakookenleiye wirimu, owo haahin’ye oomuchara awe. (Mateu 28:20) Owo aanasuwela wi munepa waweela, ankeelo ni Masu a Muluku yaahimukhaviherya ohoolela vaavaa aareiye veelaponi yavathi. Owo onnamvaha mulapeli oororomeleya nikhaviheryo nimohamoha. Nikhuuru Noolamulela ninnatitelela ‘otxhara eputxeputxhe,’ ti wi Yesu, ‘mmapuro othene enayayawo.’ (Wupulula 14:4) Mwawiihiiha vaavaa nnacharaahu ohoolela wa Nikhuuru Noolamulela, nnamuchara Muhooleli ahu, Yesu. Moohilekela, owo onahaala onihoolela wi nikhaleno ekumi yoohimala. (Wupulula 7:14-17) Nave haavo muhooleli oomwiilini onawerya ororomeliha yeela!