1. Ichu taani saphaama woopola onahaalaya weera wa hiyaano?

MUKUCHO wa woopola wa Yesu Kristu woheeriha okhala wooweryeya mareeliho mancipale. Ntoko yootakiherya, woopola woohula mukhora wi muhoolo anamwane oothene a Atamu anasivela ekhaikhai epake makupa mu emusi ya Muluku. Mareeliho makina tawi ninnaweheryatho okhala moohakalala elukuluku yoothene. Ohiya yeeyoru pahi, woopola mwaha woochuneya wa muchu ti muchu wirimu ni vathiva.—Ahebri 1:8, 9.

2. (a) Mwaha taani wookhweleya Yesu aalonceiye mu nivekelo nawe onavolowela wirimu ni vathiva? (Moone eruku yoopacerya.) (b) Tiheeni nnahaalaahu ohuserya mmwaha yoola?

² Mu iyaakha piili Yesu ahaakumve okhwa, owo aahaahusiha ohuserya awe ovekela: “Atithihu muri wirimu, nsina nanyu nèlihiwe. Omwene anyu orwe. Okhwela wanyu wereye, ntoko wirimu hiha vathiva.” (Mateu 6:9, 10) Hankooni naalikhele mukhalelo woopola oniiwananaaya ni weelihiwa nsina na Yehova, olamulelo wa Omwene wa Muluku, ni weereya wa yookhwela ya Muluku.

3. Nsina nawi Yehova nneemelela eheeni? Nave Satana aavolowenle hai nsina na Yehova?

³ Yoopacerya wa soothene, Yesu aahivekela wi nsina na Yehova neelihiwe, naari wi nooniweke okhala naweela. Nsina na Yehova nnamweemelela Yehova mwaneene, omuchu awe. Owo toowerya woothene, nave Muchu awookololowa a elapo yoothene. Yesu tho aamwiichana owo “Atithi awéla.” (Yohane 17:11, Nlakano Nahihano) Woona wi Yehova taweela, soothene onapakeiye nave malamulo awe oothene taweela. Nyenya mu Eteni, Satana aahaakaaha ophwanelela wa Muluku wa otikitherya malamulo wa achu. Owo aahimootherya Yehova nave aahivolowela nsina na Muluku, naari omuchu awe.—Maphatxuwelo 3:1-5.

4. Yesu oonihenrye hai wi nsina na Muluku ti naweela?

⁴ Moohiyana, Yesu aanasivela chiryene nsina na Yehova nave aapaka soothene wi eelihe nsina nlo. (Yohani 17:25, 26) Mwawiihai? Moorweela wa meecelo ni mahusiheryo awe, Yesu aahaakhaviherya achu akina osuwela wi malakiheryo a Yehova taphaama nave wi soothene owo onanivekeiye tisamphurelo ahu. (Mwaalakhanye Salumu 40:9-11.) Naamwi Satana aatannyile makacamiho ni okhwa, Yesu aatitelela okhala oororomeleya. Owo ohooniherya wi ti wooweryeya muchu oophaameya omwiiwelela Yehova moomalela.

5. Nni noonihenrye hai wi nsina na Yehova ti naweela?

⁵ Nnooniherya hai wi ninnasivela nsina na Yehova? Moorweela wa meecelo ahu. Yehova onakhwela wi nikhale aweela. (Mwaalakhanye 1 Pedro 1:15, 16.) Ela enataphulela wi nimulapele yooworu pahi ni omwiiwelela ni murima ahu woothene. Naamwi niikariwaka, nipake owetha wahu wi nikhale mmukhalelo Yehova onanihusiheiye. Moorweela wa okhala mwawiiwanana ni malakiheryo a Yehova, ninnaruuha ncicimiho wa nsina nawe. (Mateu 5:14-16) Ninnooniherya wi malamulo awe taphaama nave Satana mulipa awootha. Hiyaano hanri oophaameya, mwawiihiiha nnahaala ohesaka. Nto wakhala wi noohesa, ninnacharuwa nave ninnawetha wi nihiye weera ichu seiyo sinanyemula nsina na Yehova.—Salumu 79:9.

6. Ntakhara heeni Yehova onnanoona okhala awookololowa, naamwi nri oohiphaameya?

⁶ Moohipwacha naakhanle oothanliwa, naari a “iputxeputxhe ikina,” Yehova onnalevelela soocheka sahu wakhala wi nookhalano nroromelo mu woopola. Owo onnaweemererya ntoko alapeli awe, yaale aniiveleela wa yoowo. Owo onnawiichana Akristu oothanliwa ntoko anaawe nave “iputxeputxhe ikina,” sawookololowa ntoko asinthamwene awe. (Yohani 10:16; Aroma 5:1, 2; Tiyako 2:21-25) Naamwi hiihaano, woopola onneeriha wi nikhaleno onthamwene waphaama ni Tiithi ahu ni weeliha nsina nawe.

7. Woopola onahaala oruha mareeliho taani?

⁷ Mu nivekelo na ntakiheryo, Yesu aariye: “Omwene anyu orwe.” Woopola oniiwanana hai ni omwene wa Muluku? Anapaka makupa mu Omwene wa Muluku, naari olamulelo, ti Yesu vamoha ni achu oothanliwa awaakhwana macikhwi nsana nimoha ni macikhwi makhumi masese ni masese. Woopola onneeriha okhala wooweryeya oviihiwa achu yaala wi eye wirimu. (Wupulula 5:9, 10; 14:1) Awo anahaala okhala mamwene ni anamukucho nave anahaala olamulela vamoha ni Yesu elapo ya vathi mu iyaakha sincipale. Variyari va elukuluku yeeyo, Yehova onahaala opharihela Omwene awe wi apake elapo okhala parataiso  ni waakhaviherya achu okhala oophaameya. Alapeli a Yehova a wirimu ni a veelaponi yavathi anahaala okhala emusi emoha. (Wupulula 5:13; 20:6) Yesu onahaala ompahula Satana ni omaliha makacamiho oothene yaawo Satana onatannyeiye.—Maphatxuwelo 3:15.

8. (a) Yesu aakhavihenrye hai oohuserya awe wiiwexexa wi Omwene wa Muluku ti wookhweleya? (b) Olelo nnakhaviherya hai Omwene?

⁸ Yesu aahaakhaviherya oohuserya awe wiiwexexa ochuneya waya Omwene wa Muluku. Mwawiihai? Amanle opatusiwa, Yesu mwawaakuveya aammora olaleerya “Mutxhaka Waphama wa omwene wa Muluku” mmapuro oothene aayeiyewo. (Luka 4:43) Owotho aaloca ni oohuserya awe wi ekhale anamoona awe “ophiyerya okhomoni wa elapo.” (Saweriwa T’arummwa 1:6-8) Olelo, moorweela wa muteko wa olaleerya Omwene, achu akhalano ekari ya ohuserya vooloca sa woopola ni okhala anamurala a Omwene wa Muluku. Ninnooniherya wi na anamurala oororomeleya a Omwene moorweela wa waakhaviherya oothanliwa olaleerya michaka saphaama elapo yoothene.—Mateu 24:14; 25:40.

9. Ntakhara heeni ninnalekecheya wi Yehova onahaala okhwaaniherya yookhwelaawe ntakhara achu?

⁹ Tiheeni Yesu aachuneiye oloca vaava aalonceiye: “Okhwela wanyu wereye”? Vaavaa Yehova onaloceiye wi echu enahaala weereya, eyo enneereya. (Isaiya 55:11) Omwareya wa Satana honammaaliha Yehova. Tiivi yaari yookhwela ya Yehova ntakhara elapo yavathi? Owo aachuna wi elapo yavathi esareye ni anamwane oophaameya a Atamu ni Eva. (Maphatxuwelo 1:28) Waakhanle wi Atamu ni Eva yaakhwile ehirino anamwane, yookhwela ya Muluku ya osara elapo yavathi ni anamwane aya hiyaahaala okhwaaniheryeya. Mwawiihiiha, Yehova aaweemererya okhalano anamwane. Woopola onnaavaha oothene yaale anooniherya nroromelo ekari ya okhala oophaameya ni okhalano ekumi yoohimala. Yehova onnaasivela achu nave onachuna wi nikhaleno ekumi yoohakalaliha yeeyo aachuneiye wi nikhaleno.

10. Woopola onaakhaviherya hai achu yaawo akhwile?

¹⁰ Hanka vooloca sa macikhwi aachu akhwile ehaakumve omusuwela Yehova? Yehova onachuna wi ekhale. Mwawiihiiha owo onahaala waakookiherya ekumi oothene yaale akhwile. Woopola onneeriha okhala wooweryeya awo okookela okhala. Voocharela anahaala owerya ohuserya sa Yehova ni okhalano ekumi yoohimala. (Saweriwa T’arummwa 24:15) Yehova Naacuucu a ekumi. Vaava Yehova oneereiye aakookiherye ekumi ale akhwile, owo onahaala okhala Tiithi aya. (Salumu 36:10) Mu nivekelo na ntakiheryo, Yesu ooloca wi Yehova ‘Tithihu a wirimu.’ (Mateu 6:9) Yehova omvaha Yesu muteko woochuneya wa waaviha achu ookhwa. Yesu aaloca: “Miyo ka ovinya mokhwani ni ekumi.”—Yohani 6:40, 44; 11:25.

11. Teevi eri yookhwela ya Muluku ntakhara “muloko mutokwene”?

¹¹ Yesu tho aaloca: “Mutxhu ti mutxhu onera okhwela wa Muluku, yowo ti munnaka, murokoraka ni amai aka.” (Marko 3:35) Ela ti yookhwela ya Muluku yawi achu a maloko oothene, mahimo ni ilocelo ekhale alapeli awe. Awo analociwa ntoko “muloko mutokwene wohalikhanyeya.” Awo annaroromela woopola nave annachuna omwiiwelela Muluku. Awo annakhuwela nave annaloca: “Nivuluso ti na Muluku ahu okiranthe vehitxeni ni ti na eputxeputxhe.”—Wupulula 7:9, 10.

12. Orweela wa nivekelo na Yesu, tiheeni nihusenryaahu vooloca sa yookhwela ya Yehova ntakhara achu?

 ¹² Noohuserya sincipale vooloca sa Yehova ni yookhwelaawe ntakhara achu orweela wa nivekele na ntakiheryo na Yesu. Yoopacerya, nnaphwanela opaka soothene nnaweryaahu wi neelihe nsina na Yehova ni omucicimiha. (Isaiya 8:13) Mukucho wa woopola wa Yesu, yoowo weerinhe okhala wooweryeya ovulusiwa wahu, onnacicimihatho nsina na Muluku. Mweeparipari, nsina na Yesu nnataphulela “Yehova ti Mvulusa.” Yanaawiili, Yehova onahaala opharihela Omwene awe wi aruuhe mphurelo woothene wa woopola ntakhara achu awiiwelela. Nave yaneeraru, noolekecheya wi hiyaavo eni emaalihe waakhwanela wa yookhwela ya Yehova.—Salumu 135:6; Isaiya 46:9, 10.

13. Ntakhara heeni ninnapatisiwa?

¹³ Mukhalelo mmoha wookhweleyaxa nnooniheryaahu wi ninnathamalela woopola ori oveleela okumi ahu wa Yehova ni opatisiwa. Weerano hiiha, ninnooniherya wi nookhalano nroromelo mu woopola nave wi “hiyo nri a Apwiya.” (Aroma 14:8) Vaava nnapatisiwaahu, ninnamveka Yehova wi anivahe “yawupusherya-yaphama-ya-murima.” (1 Petro 3:21, NN) Yehova onnaakhula moorweela wa opharihela miphurelo sa woopola ntakhara hiyaano. Nave hiyaano ninnaroromela wi owo onahaala onivaha soothene olaihenryeiye.—Aroma 8:32.

14. Ntakhara heeni Yehova onnanilamulela waasivela akina?

¹⁴ Ichu Soothene Yehova onapakeiye, nthowa na osivela. Yookhwela awe ti yawi alapeli awe emutakiherye nave esivelaneke mukina ni mukhwawe. (1 Yohani 4:8-11) Vaava nnaasivelaahu achu, ninnooniherya vanlakani wi ninnachuna okhala ‘ana a Atithihu ari wirimu.’ (Mateu 5:43-48) Malamulo meeli matokweene taala: Noopacerya omusivela Yehova, nave nanaawiili, waasivela akina. (Mateu 22:37-40) Mukhalelo mmoha nnooniheryaahu wi ninnaasivela achu ori waahusiha michaka saphaama sa Omwene wa Muluku. Wakhala wi ninniiwelela nlamulo na Yehova na waasivela akina, xaxaxa annihu, omusivela wahu onahaala okhala “wowakhwanela.”—1 Yohani 4:12, 20.

15. (a) Mareeliho taani a Yehova nnaakhelaahu hiihaano? (b) Mareeliho taani nnahaalaahu waakhela omwaahiyu?

¹⁵ Yehova onnaniroromeliha wi woona wi nookhalano nroromelo mu woopola, soocheka sahu ‘inamuleveleliwa.’ Owo onanwerya olevelela soocheka sahu moomalela. (Mwaalakhanye Saweriwa T’arummwa 3:19-21.) Ntoko nthokoronryaahu woopaceryani, woopola onneeriha okhala wooweryeya wa Yehova oweemererya achu avakhaani wi yakhale anaawe wirimu. Ala ti oothanliwa. (Aroma 8:15-17) Owo onnaawopa yaale ari a “iputxeputxhe ikina” wi ekhale makupa a emusi awe veelaponi yavathi. Emanle okhala oophaameya, onahaala okhalavo weehiwa wookuchula. Wakhala wi ari oororomeleya wa Yehova, owo onahaala oweemererya okhala ntoko anaawe tho. (Aroma 8:20, 21; Wupulula 20:7-9) Yehova onahaala waasivelaka anamwane awe oothene. Woopola onahaala otitelela oruuha mareeliho oohimala. (Ahebri 9:12) Yehova onnanivaha yamahala yeela yasisapo, nave haavo ani awerye onihiiha waakhela.

16. Woopola onanikhaviherya hai okhala awaakiheya?

¹⁶ Wakhala wi noocharuwa soocheka sahu, hiyaavo echu vyakala Musaserya oneereiye apake wi anihiihe opaka makupa a emusi ya Yehova. Yesu ookhwa “etila emoha” wa soothene. Woopola wooliva moomalela. (Ahebri 9:24-26) Atamu ooniwiiherya okhwa, nyenya mukucho wa Yesu onarwa onruuhela ekumi yoohimala. Woopola onanwerya onaakiha orweela wa elapo ya Satana ni ohoova okhwa.—Ahebri 2:14, 15.

17. Osivela wa Yehova onataphulela eheeni wa nyuwo?

¹⁷ Soolaiherya sa Muluku sinahaala okhwaanela. Moolikana ni malamulo a maphacuwelo ahinatorokeya, Yehova harwa atorokeya. Owo onampaka soothene nnachunaahu. (Malakiya 3:6) Yehova oonivaha sincipale opwaha yamahala ya ekumi. Owo oonivaha osivela wawe. “Nòsuwela ni nòhemererya okhwela Muluku oriyeno ni hiyo. Muluku ti okhwela.” (1 Yohani 4:16) Mahiku oothene soolaiherya sawe sinnaakhwanela. Moohilekela, elapo enahaala okhala parataiso ooreera. Oothene eni ekhale, anahaala omutakiheryaka Yehova ni osivelana mukina ni mukhwaawe. Voocharela, Alapeli awe oothene wirimu ni veelaponi yavathi enarwa eloca eriki: “Nrèliho, ovuwa, miruku, mathamalelo, ntxitximiho, ikuru ni owerya ti sa Muluku ahu mwa ilukuluku sothene! Amém.”—Wupulula 7:12.