1. Tiheeni muchu aaphwaneleiye weera wi aloce ni mwene o Persiya?

MWAANYIHERYE wi munakhala mu olamulelo wo Persiya, iyaakha 2.500 ivirale. Mookhalano mwaha munachunaanyu oloca ni mwene. Nave munnapaka mukwaha muyaaka mu epooma yo Susani weiwo mwene onakhaleiyewo. Nyenya wi muloceno munaphwanela weemereryiwa ni yene. Nto aahiweemereryaani, munahaala wiiphiwa.— Est. 4:11.

2. Nnaphwanela wiisoona hai vaava nnalocaahu ni Yehova?

² Ti yoohakalaliha woona wi Yehova, hari ntoko mwene yoole o Persiya! Yehova mutokweene ompwaha mulamuleli ori oothene oomuchu; naamwi hiiha, nnanwerya oloca ni yoowo elukuluku eri yoothene. Nave Yehova onachuna wi nikhaleke ootaphuwa olocano. Yawooniherya ya yeeyo ti yawi, naamwi arino masina ancicimiho ntoko Mpatuxa Mutokotoko, Aikuru Soothene, naari Apwiya Awirimurimu, Yehova onnanceenyerya wi nimwiichaneke ‘Tiithi’, masu yaawo anooniherya osivela. (Mat. 6:9) Yehova hanakhwela wooniwaka ntoko muchu awoopiha naari oorakamela, nyenya ntoko Tiithi awaacameleya. Moohikhwa minikwa ti yoohakalaliha osuwela yeela, hamuneemererya?

3. Ntakhara heeni ninnaphwanela omwiichana Yehova ntoko ‘Tiithi’ nave tiheeni Nnahaalaahu ohuserya mmwaha yoola?

³ Ninnaphwanela omwiichana Yehova ntoko ‘Tiithi’ woona wi owo Ehime ya ekumi ahu. (Sal. 36:9) Nave woona wi Yehova Tiithi ahu, ninnaphwanela omwiiwelela. Wakhala wi noheerano yeeyo Yehova onavekeiye, nnamwaakhela mareeliho oohimala. (Ahe. 12:9) Mamoha a yaawo ti okumi woohimala, wirimu naari veelaponi yavathi. Navetho nnanwerya ophwanya mareeliho hiihaano waakhala wi ninnamwiiwelela Muluku. Mmwaha yoola, nnahaala woona ti mwawiihai Yehova oreiye ntoko Tiithi oosivela nave ntakhara heeni nnaphwanelaahu ororomela wi muhoolo harwa anihiya. Nyenya voopacerya,  hankooni noone ichu inooniherya wi Tiithi ahu awirimu onnanisivela nave wi onnakhwela onikhaviherya.

4. Ntakhara heeni achu akina anoona okhala woovila omoona Muluku ntoko Tiithi?

⁴ Apwanne munuupuwela wi ti woovila omweera Muluku okhala Tiithinyu? Achu akina aniisoona ohikhala echweenevo yaawiilikanyihaka ni Yehova. Wa nthowa na yeeyo, anoona okhala woovila weemererya wi Muluku a Owerya Woothene onnamuthokororya mmoha ti mmoha a yaawo. Nyenya tahi hiiha Tiithiihu oosivela onuupuweleiye. Owo oonivaha ekumi nave onakhwela wi nikhale asinthamwene awe. Murummwa Paulo, aahiceenyerya yeela wa achu yaamuwiriyana o Atena nave aahaaceererya ariki, Yehova ‘hari ociiwene wa mmoha ni mmoha a hiyo.’ (Saw. 17:24-29) Apwanne munnawerya woona mukhalelo mwaana onakhaleiye ootaphuwa ovaanela ni Tiithi awe, wakhala wi tiithi owo toosivela? Moolikana, Yehova onachuna wi nikhaleke ootaphuwa oloca ni yene.

5. Tiheeni nnahuseryaahu orweela wa yaweereya ya murokora mmoha?

⁵ Achu akina anoona okhala woovila omoona Muluku ntoko Tiithi nthowa nawi Asitiithi aya hiyoonihenre osivela wa yaawo. Moone yeeyo murokora mmoha olonceiye: “Atiithaaka yaanatepa okihooxa. Vaavaa kaapacenryaaka omuhuserya Piipiliya, koona okhala woovila omwaacamela Tiithi a wirimu. Nyenya kimanle omusuwela Yehova, ichu soothene saatorokeya.” Apwanne murino nikacamiho nimohamoha? Waakhanle wi munoona hiihaa, munaphwanela ororomela wi nyuwaano tho munanwerya omoona Yehova ntoko Tiithi oophwanelela a achu oothene.

6. Mwawiiwanana ni Mateu 11:27, Yehova onanikhaviherya hai omoonaka ntoko Tiithi oosivela?

⁶ Mukhalelo mmoha Yehova onanikhaviheryeiye omoonaka ntoko Tiithi, ori weemererya wi ichu Yesu olonceiye ni enreiye irempwe Mpiipiliyani. (Mwaalakhanye Mateu 11:27.) Yesu aahimutakiherya Tiithi awe mmukhalelo woophaameya. Owo ooloca: “Yoowo onakoona miyo, onnawoona Atiithi.” (Yoh. 14:9) Yesu ooloca ikwaha sincipale mmukhalelo Yehova oriye Tiithi. Mu aliivuru axexe a Michaka Yesu ooloca ikwaha 165 ariki “Atiithi.” Ntakhara heeni Yesu olonceiye ikwaha sincipale vooloca sa Yehova? Nthowa nimoha naari nawi achu eroromele wi Yehova Tiithi oosivela.—Yoh. 17:25, 26.

7. Tiheeni nnahuseryaahu vooloca sa Yehova mmukhalelo aamukhalinheiye Mwanawe?

⁷ Nnanwerya ohuserya sincipale vooloca sa Yehova moorweela wa wuupuwelela mukhalelo aamukhalinheiye Mwanawe, Yesu. Ilukuluku soothene Yehova anawiriyana mavekelo a Yesu, nyenya ohiya pahiru owiriyana nto aanaakhula. (Yoh. 11:41, 42) Mu sookacamiha sawe soothene, Yesu anoona oosivela nnikhaviheryo na Tiithi awe.—Luka 22:42, 43.

8. Mmikhalelo taani Yehova aamukhaviheryeiye Yesu?

⁸ Yesu aanasuwela wi Yehova aari ehime ya okumi awe nave wi aaphwanela omuroromela yoowo wi atitelele okhala ni okumi. Yesu ooloca: “Miyo kinakhala mwa Atiithi.” (Yoh. 6:57) Yesu aanaaroromela Atiithi awe moomalela, nave Yehova aanamukhaviherya Mwanawe ni soothowa soomwiilini. Nyenya echu yookhweleyaxa, Yehova aanamukhapelela Yesu mmukhalelo woomunepani.—Mat. 4:4.

9. Yehova oonihenrye hai wi aari Tiithi oosivela wa Yesu?

⁹ Nthowa na okhala Tiithi oosivela, Yehova aaheeriha wi Yesu asuwele wi owo aanamukhaviherya. (Mat. 26:53; Yoh. 8:16) Naamwi  aahaamukhaviherya mu sookacamiha soothene, Yehova aahimukhaviherya Mwanawe ovilela ni makacamiho. Yesu anaroromela wi nikacamiho vyakala aakumaneiyeno naari na elukuluku yavakhaani. (Ahe. 12:2) Yehova aahooniherya wi aanamusivela Yesu orweela wa omuwiriyana, amukhapelela mu ichu saamuthowa, omuvyakiha, ni omukhaviherya. (Yoh. 5:20; 8:28) Nave Tiithiihu awirimu onneerano emohamoha wa hiyaano tho. Nnahaala othokororya mukhalelo oneereiyeno eyo.

10. Mwawiiwanana ni Salumu 66:19, 20, Yehova onooniherya hai wi onnanisivela?

¹⁰ Yehova onnawiriyana mavekelo ahu. (Mwaalakhanye Salumu 66:19, 20.) Yehova hanahelela mphimo mavekelo ahu. Moohiyana, owo onnanceenyerya wi nivekeleke moohihiyererya. (1 Tes. 5:17) Mwa ncicimiho, nnawerya omwaacamela Muluku elukuluku eri yoothene, moohipwacha nipuro nryaahuvo. Yehova harwa akhala oweiwaxa ophiyerya wi ahiwerye oniwiriyana, ilukuluku soothene owo ori ooreheryeya. Vavaa nnoonaahu wi Yehova onnawiriyana mavekelo ahu, ninnawerya omwaacamela moopwahaxa. Mulipa Masalmo ooloca: “Kinnakhwela Apwiya [Yehova], ntakhara anniiwa masu aka.”—Sal. 116:1.

11. Yehova onaakhula hai mavekelo ahu?

¹¹ Tiithi ahu tahi wi onamoona owiriyana mavekelo ahu pahiru, nyenya onnaakhula. Murummwa Yohani ooniroromeliha wi: “Navekaru echu ntoko mwa okhwela wawe, [Muluku] onnaniiwa.” (1 Yoh. 5:14, 15) Nyenya tahi wi ilukuluku soothene Yehova onahaala onaakhula mmukhalelo nnaanyiheryaahu. Owo oosuwela yeeyo eri yoophwanelela wa hiyaano. Nthowa na yeeyo, elukuluku ekina akhweya naakhulo nawe nnamukhala “hooye,” naari tho onamuupuwela wi niwehererye vakhaani.—2 Kor. 12:7-9.

12-13. Mmikhalelo taani Tiithiihu a wirimu onanikhapeleleiye?

¹² Yehova onnanivahererya ichu soochuneya mookumini. Yehova onneerano yeele onakhweleiye wi asitiithi epakeke. (1 Tim. 5:8) Owo onnapwacha soothowa soothene sa anamwane awe. Yehova hanakhwela wi nikhale awiipiwa murima vooloca sa yeeyo nnahaalaahu olya, owara naari mpuro nnahaalaahu okhalavo. (Mat. 6:32, 33; 7:11) Nthowa na okhala Tiithi oosivela, Yehova oororomeliha wi muhoolo onarwa anikhapelela ni onipwacha mu ichu soothene sinanthowa.

¹³ Nave echu yookhweleyaxa, Yehova onnakhapelela soothowa sahu soomunepani. Moorweela wa Masu awe, owo oonileela omuchu awe, echu onachuneiye weera, yoolakelela ya okumi ni ichu sa muhoolo. Ooniheryaka mukhalelo onampwacheiye mmoha ti mmoha a hiyo, Yehova ohaapharihela asitiithiihu naari anna ni arokora akina wi enikhaviherye omusuwela. Nave ninnaakhela nikhaviheryo na atokweene a muloko oosivela ni anna vamoha ni arokora akina amavyakelo. Opwaha yeeyo, Yehova onnanivaha mahusiheryo moorweela wa mithukumano, mummo nnahuseryaahumo sincipale vamoha ni emusi ahu yoomunepani. Ala makhalelo makina yaawo Yehova onooniheryeiye wi onnanisivela ntoko Tiithi.

14. Ntakhara heeni Yehova onnanivyakiha, nave oneerano hai?

¹⁴ Yehova onnanivyakiha. Hiyaano hanri oophaameya ntoko Yesu. Nthowa na yeeyo, vaavaa onakhalaaya woophwanelela, Tiithiihu oosivela onnanlaka wi anivyakihe. Piipiliya onnanuupuserya: “Tiwi Apwiya annamulaka yoowo anamukhwelaaya.” (Ahe. 12:6, 7) Yehova onanwerya onlaka mmikhalelo soohiyanahiyana. Ntoko yootakiherya,  owo onanwerya onookolola orweela wa echu vyakala naalakhannyaahu Mpiipiliyani naari niiwalaahu mmithukumano. Naari akhweya nikhaviheryo nnachunaahu nnarweela wa atokweene a muloko. Moohipwacha mukhalelo Yehova onanlakeiye, ilukuluku soothene oneerano moosivela.—Yer. 30:11.

15. Mmikhalelo taani Yehova onanikhapeleleiye?

¹⁵ Yehova onnanikhaviherya ovilela ni saweeha. Hiihaa ntoko tiithi onamukhaviheryeiye mwanawe mu ilukuluku sookacamiha, Tiithiihu awirimu onnanivaha ikuru wi niwerye ovilela ni makacamiho. Owo onnapharihela munepa awe waweela wi onikhapelele mu echu vyakala yeeyo enahaala onanariha mukhalelo ahu woomunepani. (Luka 11:13) Navetho Yehova onnakhapelela muupuwelo ahu. Ntoko yootakiherya, owo onnanivaha eweheryeryo yoohakalaliha. Ewehereryo yeela ya muhoolo ennanikhaviherya ovilela ni makacamiho. Muupuwele ela: moohipwacha echu vyakala enahaala onikhumelela, Yehova onahaala omaliha sookacamiha soothene inanuukhula. Makacamiho nnakumanaahuno ta elukuluku ya vakhaani, nyenya mareeliho a Yehova toohimala.—2 Kor. 4:16-18.

16. Tiheeni yeeren’ye vaavaa Atamu aamuchekenleiye Yehova?

¹⁶ Yawooniherya emoha ya osivela wa Yehova ntakhara hiyo ori mukhalelo aakhulenleiye makacamiho oopacerya a emusi awe ya veelaponi yavathi. Atamu haamwiiwelenle Yehova, wa nthowa na yeeyo, owo vamoha ni anamwane awe aahiya opaka makupa a emusi yoohakalala ya Yehova. (Aro. 5:12; 7:14) Nyenya Yehova aaheeravo echu mwawaakuveya.

17. Tiheeni Yehova aapankeiye Atamu amanle ocheka?

¹⁷ Naamwi Yehova aamulanke Atamu, owo haahin’ye anamwane awe ehirino ewehereryo. Mwawaakuveya Yehova aahilaiherya wi achu a wiiwelela yaahaala okookela opaka makupa mu emusi awe. (Map. 3:15; Aro. 8: 20, 21) Wi eyo ekhale yooweryeya, Yehova oomurumiha Mwanawe oosiveliwa, Yesu, wi akhwe ntakhara hiyo. Yawoopola yohooniherya osivela otokotoko Yehova oreiyeno ntakhara hiyo.—Yoh. 3:16.

18. Naamwi nimuhin’ye Yehova, ntakhara heeni nnaphwanela ororomela wi nlelo onachuna wi akhale Tiithiihu?

¹⁸ Naamwi nri achu oohiphaameya, Yehova onachuna wi nipake makupa mu emusi awe, nave vaavaa onanikhaviheryeiye hanoona okhala murici woolimela. Eparipari wi elukuluku ekina nnawerya omuhiciha Yehova naari omuhiya, nyenya owo hanavelavela ni hiyo. Achunaka ophwanaphwaniha ophiyerya mweeryo taani Yehova onaasiveleiye anaawe, Yesu aahiloca yaweereya ya mwaana omwareya. (Luka 15:11-32) Mu nniphwanaphwaniho Tiithi a mwaana ole haayelenle ewehereryo wi mwanawe aahala okooka. Vavaa mwaana aalakelenleiye okookela owannyawe, Tiithi awe aahimwaakhela ni ohakalala otokotoko. Wakhala wi noomuhiya Yehova wa nthowa vyakala, nyenya ncharuwa, nroromele wi Tiithi ahu onahaala onaakhela ni mata meeli.

19. Yehova oni arehererye hai ichu Atamu onanarinheiye?

¹⁹ Tiithiihu onahaala orehererya ichu soothene Atamu onanarinheiye. Atamu amanle omwaryeya, Yehova aahilakelela waathanla achu 144.000 wi yakhale mamwene ni alipa a mukucho wirimu vamoha ni Mwanawe. Yesu ni a 144.000 anahaala waakhaviherya achu awiiwelela okhala oophaameya mu elapo evyaani. Wakhala wi aavootha yaweeha yookuchula ya nroromelo naya, Yehova onahaala waavaha ekumi yoohimala. Voocharela, Tiithiihu onahaala okhala oohakalala owoona anaawe aasilopwana ni aasithiyana eri oophaameya. Moohikhwa minikwa enahaala okhala elukuluku yoohakalaliha!

20. Yehova ooniherya hai wi onanisivela, nave ti heeni nnahaalaahu othokororya mmwaha onacharela?

²⁰ Chiryene, Yehova onnooniherya wi onnanisivela. Owo Tiithi oophwanelela. Owo onnawiriyana mavekelo ahu nave onnanikhapelela, mmakhalelo omwiilini ni oomunepani. Yehova onnanivyakiha ni onikhaviherya. Nave owo olaiherya onivaha mareeliho ohakalaliha. Ti yoohakalaliha osuwela wi Tiithiihu, Yehova, onnanisivela ni onnanikhapelela! Nave woona wi na anamwane awe, nnaphwanela wooniherya oosivela yoowo onooniheryeiye. Nyenya nni neereno hai? Nnahaala othokororya mmwaha onacharela.