1. Tiheeni eni etannye wuukhuwa, nave enahaala oniruuhela muupuwelo taani?

APWANNE mohintoko okhala awuukhuwaxa? * Akhweya munnakhala awuukhuwa nthowa na masu naari saweera sa akina. Naari akhweya munamukhala awuukhuwa nthowa na masu mwaaloncaanyu naari echu mwaapankaanyu. Ntoko yootakiherya, akhweya moohesa nave munoona wi Yehova harwa ookhurumuwelaani. Nave ohiya yeeyoru, munanwerya wuupuwela wi, woona wi mootepa wuukhuwa, himwaano nroromelo nawaakhwanela nave wi mwa muchu oonanara murima. Apwanne ti yeeyo?

2. Sootakiherya taani sa Mpiipiliyani sinooniherya wi okhala awuukhuwa honataphulela oyeleela nroromelo?

² Moone sootakiherya savakhaani sa Mpiipiliyani. Ana yoowo ohoolo waya aamuyanre mulipa miririmu Samuwele, aari muthiyana a nroromelo noolipa. Nyenya aahitepa wuukhuwa vaavaa eereliweiye yoonanara ni mmoha a veechokoni vawe. (1 Sam. 1:7) Murummwa Paulo aahikhalano nroromelo noolipa, nto ‘aaniipiwa murima’ nthowa na miloko. (2 Kor. 11:28) Mwene Tavite aahikhalano nroromelo noolipa, nave Yehova aanamusivela vancipale. (Saw. 13:22) Naamwiihiiha, Tavite aahipaka soocheka seiho saamweerinhe okhala awuukhuwa vatokovene. (Sal. 38:4) Yehova aahimuhakararya ni omulipiha mmoha ti mmoha a yaawo. Hankooni nthokororye echu nnaweryaahu ohuserya orweela wa sootakiherya saya.

3. Masu oonanara a akina ananivolowela hai?

³ Wakhala wi akina annanilocela naari oneerela ichu soonanara, ninnakhala awuukhuwa. Ennatepa wiicela wakhala wi muchu  oneerenle yoonanara eyo nthamwene naari mmusi ahu. Ninnoova wi waataana wahu ni muchu owo onahaala omala. Ilukuluku ikina, tahi wi yaari yoolakelela ya muchu owo oloca masu oohiphwanelela, nnya naamwi hiiha, yeeyo olonceiye enawerya oniphoreiha. (Masi. 12:18) Vakina vaya, achu aneerano mwaayiini oloca masu oophoreiha. Murokora mmoha ori mwali, aahoolela makacamiho yaala. Owo oriye: “Mu iyaakha vakhaani ivirale, muchu yoowo kaamoonaka wi aari nthamwene aka aphaama aahipacerya okootherya mu interneti. Kaatepa osooseya ni wuukhuwa. Woona wi aari nthamwene aka, nkaawerya wiiwexexa mathowa yaamweerinhe okeerela yeele.” Wakhala wi mohintoko weereliwa yoonanara ni nthamwene naari mmusi anyu, munanwerya ohuserya sincipale orweela wa Ana.

4. Makacamiho taani oovila Ana aahoolenleiye?

⁴ Ana aaphwanela ovilela ni makacamiho oovila. Mu iyaakha sincipale owo haawerya okhalano anamwane. (1 Sam. 1:2) Mu sookhovelela sa Aisarayeli, muthiyana yoowo aahiyara ooniwa okhala awuulumeleya. Ela yaari yawuuliha muru wa Ana. (Map. 30:1, 2) Echu yaaceererya wuukhuwa wa Ana, tiwi, aiyawe yaakhalano muthiyana mukina iichaniwa Penina, yoowo ayara. Penina aari mwiicani a Ana ophiyerya “aanamuroha ni omuhoosha namaaceiwa awe Haana” wi amuthananihe. (1 Sam. 1:6) Woopaceryani, Ana haawenrye ovootha mwaphaama nikacamiho nenla. Owo aatepa wuukhuwa ophiyerya wi “aanasarasareya murima . . . ahinalya.” Owo aahitepa “osoosiwa murima.” (1 Sam. 1:7, 10) Vano Ana aaphwannye hai nihakararyo?

5. Nivekelo naamukhavihenrye hai Ana?

⁵ Ana aaveleela wa Yehova wuukhuwa wawe, moorweela wa nivekelo. Amanle ovekela, owo aaloca makacamiho awe wa Namukucho Mutokweene Eli. Voocharela Eli aahimuleela Ana ariki: “Rowa mmureceleni nave Muluku aIsarayeli oovahe yooveka aa.” Teevi yaari yookhumelela? Ana “aarowa ahakalalaka.” (1 Sam. 1:17, 18) Nivekelo naahimukhaviherya Ana okookela okhalano murecele.

6. Vooloca sa ovekela ichu taani nnahuseryaahu orweela wa Ana? Echu taani ekina nnahuseryaahu mu Filipi 4:6, 7?

⁶ Nnanwerya okookela okhalano murecele natitelela ovekela. Ana aahimaliha elukuluku yincipale alocaka ni Tiithi awe awirimu. (1 Sam. 1:12) Hiyotho nnanwerya oloca ni Yehova mu elukuluku yincipale nimuleelaka  sawuukhula sahu, woova wahu, ni sooceecheiha sahu. Tahi woochuneya oloca echu eri yoothene mmukhalelo woophaameya naari woophwanelela. Ophiyerya wi mu ilukuluku ikina nnanwerya ohihimerya ninlaka vaavaa nnamuleelaahu Yehova sawuukhula sahu. Naamwi hiiha, Yehova harwa akhala oophweeleya oniwiriyana. Ohiya pahiru ovekela ntakhara makacamiho ahu, nnaphwanelatho wuupuwela ekano yeeyo Paulo onivanheiye mu Filipi 4:6, 7. (Mwaalakhanye.) Paulo oonileela wi nnaphwanela omuthamalela Yehova mu nivekelo. Nookhalano mathowa aphaama a omuthamalela Yehova. Ntoko yootakiherya, nnanwerya omuthamalela ntakhara yoovaha ya ekumi, ichu sooreera onapakeiye, osivela wawe woororomeleya, ni ewehereryo yoohakalaliha onivanheiye. Echu taani ekina nnahuseryaahu orweela wa Ana?

7. Ana vamoha ni iyawe tiheeni yaapakaaya moohihiyererya?

⁷ Moohipwacha makacamiho awe, Ana vamoha ni iyawe yaanaya moohihiyererya o Silowe nipuro na omulapawo Yehova. (1 Sam. 1:1-5) Muupuwele wi, waari o tapernaakulu weiwo Mutokweene a Anamukucho Eli aamulipinheiyewo Ana, alocaka wi aaweherya wi Muluku aahaala waakhula mavekelo awe.—1 Sam. 1:9, 17.

8. Mithukumano sini sinikhaviherye hai? Mutharihe.

⁸ Nnamukhalano murecele naatitelela ophiya mmithukumano Seekristu. Nivekelo noohulela mithukumano, ilukuluku soothene nnaphitaanyerya oveka munepa waweela wi okhale ni hiyo. Murecele onnapaka makupa a sawiima sa munepa. (Gal. 5:22) Elukuluku nnaphiyaahu mmithukumano sahu naamwi nri awuukhuwa, ninnamvaha ekari Yehova vamoha ni anna ni arokora ahu wi enikhaviherye ophwanya murecele wa mmuupuweloni ni mookumini. Ovekela ni mithukumano mikhalelo soochuneyaxa seiyo Yehova onaphariheleiye wi anilipihe. (Ahe. 10:24, 25) Vano hankooni nthokororye echu ekina nnaphwanelaahu ohuserya orweela wa yaweereya ya Ana.

9. Echu taani yahaatoroken’ye mmukhalelo wa Ana, nave tiheeni yaamukhavihenrye?

⁹ Tahi wi makacamiho a Ana yaavinre mwawaakuveya. Vaavaa aakookeleiye owannyawe akhumaka o tapernaakulu, nlelo aakhala vamoha ni achu amohamoha aveechokoni vaava Penina aakhaleiyevo. Nave Piipiliya hanaloca wi Penina aahitoroka muupuwelo awe. Mwawiihiiha, enooneya wi Ana aaphwanela otitelela ovilela ni masu oohoma murima a namwaaceiwaawe. Nyenya Ana aahikookela okhalano murecele awe wampuwa ni akhapelela. Muhicuwale wi Ana amanle oveleela mwaha awe mmatani mwa Yehova, owo haari tho awuukhuwa. Yene aaheemererya wi Yehova amuhakararye ni omulipiha. Mu elukuluku ekina ohoolo waya, Yehova aahaakhula nivekelo na Ana nave aahiwerya waayara anamwane!—1 Sam. 1:19, 20; 2:21.

10. Tiheeni nnahuseryaahu orweela wa yootakiherya ya Ana?

¹⁰ Nnanwerya okhalano murecele naamwi nlelo nrino makacamiho. Naamwi nivekelaka ni ophiya mmithukumano moohihiyererya, makacamiho makina nlelo anamutitelela weereya. Nyenya orweela wa yootakiherya ya Ana, noohuserya wi Yehova onamunilipiha. Yehova harwa anicuwala, nave moohilekela onahaala onivaha nchuwelo na ororomeleya wahu.—Ahe. 11:6.

11. Mathowa taani Paulo aareiyeno a okhala awuukhuwa?

¹¹ Paulo aahikhalano mathowa a okhala awuukhuwa. Ntoko yootakiherya, woona wi aanaasivela anna ni arokora awe, makacamiho  aya yaahimweeriha okhala awuukhuwa. (2 Kor. 2:4; 11:28) Elukuluku Paulo aalaleeryeiye, achu yaawo yaamwaakaaha wiiliwiili yaanammana ni omukeriha mukalaposo. Owotho aaphwanela ovilela ni makacamiho yaawo yaamweeriha okhala awuukhuwa, ntoko “ohaawa.” (Fil. 4:12) Nave muupuwele wi owo aahihooxeya ni opwina wa pophoro ikwaha raru. Chiryene Paulo aanoova elukuluku aapakeiye mukwaha ni pophoro. (2 Kor. 11:23-27) Tiheeni yaamukhaviherya Paulo elukuluku aakhaleiye awuukhuwa?

12. Tiheeni yaamukhavihenrye Paulo ohikhalaxa awuukhuwa?

¹² Paulo aanuukhuwa ntakhara anna ni arokora awe vaavaa yaahoolelaaya makacamiho, nave owo heererya omaliha makacamiho awo meekheiye. Paulo aari awiiyeviha. Owo aahaaveka akina wi emukhaviherye okhapelela muloko. Ntoko yootakiherya, owo aahaavaha mirici alopwana oororomeleya ntoko Timoteo ni Tito. Moohikhwa minikwa, muteko anna ala yaapakaaya waahivukula othanana wa Paulo.—Fil. 2:19, 20; Tito 1:1, 4, 5.

13. Atokweene a muloko eni emutakiherye hai Paulo?

¹³ Mwaaveke akina wi yookhaviheryeeni. Moolikana ni Paulo, atokweene ancipale a mmulokoni oosivela, annakhala awuukhuwa ntakhara yaale a mmulokoni anahoolela saweeha. Nyenya mutokweene mmoha hani awerye waakhaviherya oothene mmulokoni. Wiiyeviha onahaala omuceenyerya mutokweene oteexa murici owo ni alopwana akina oophwanelela, ni waavyakiha amiravo wi emukhaviheryeke okhapelela muhuwo wa Muluku.—2 Tim. 2:2.

14. Echu taani Paulo ahooveiye, nave tiheeni nnahuseryaahu orweela wa yootakiherya awe?

¹⁴ Mweemererye wi akina yoohakararyeeni. Paulo aari awiiyeviha, mwawiihiiha owo aahisuwela wi aanachuna nlipiho noorweela wa asinthamwene awe. Woonaru owo haari awuukhuwa uupuwelaka wi akina yaahaala omoonaka ntoko muchu ooceecheya nthowa na olipihiwa ni asinthamwene awe. Mu ekaarata aamurepenleiye Filemoni, Paulo aariye: “Osivela waa onnakivaha ohakalala otokweene ni okilipiha.” (Filé. 7) Paulo aahaaromola anamuteko akhwaawe akina yaawo yaamulipinhe vancipale variyari va elukuluku yoosoosiha murima. (Kol. 4:7-11) Elukuluku nniiyevihaahu ni osuwela wi ninnachuna nlipiho, anna ni arokora ahu anahaala osiveliwa onivaha nikhaviheryo nnachunaahu.

15. Tiheeni Paulo aapankeiye elukuluku aahooleleiye mikhalelo sawuukhula?

 ¹⁵ Muroromele masu a Muluku. Paulo aanasuwela wi Soorempwa saahaala omukhaviherya. (Aro. 15:4) Soorempwa iho saahaala omvaha miruku wi ahoolele saweeha. (2 Tim. 3:15, 16) Elukuluku aawaleliweiye mukalaposo o Roma mu ekwaha yanaawiili, Paulo aanasuwela wi okhwa wawe waanaacamela. Mikhalelo seiha soosoosiha murima, tiheeni Paulo eenreiye? Owo aahimveka Timoteo wi amuruuhele mwawaakuveya ‘aliivuru yaawo yaarempwe mushapalani.’ (2 Tim. 4:6, 7, 9, 13) Ntakhara heeni? Nthowa nawi, aliivuru awo a exapala yaakhala ntoko wi yaari makupa a Soorempwa sa Ehepiri seiyo Paulo aahaaleiye opharihela mu yoohuserya awe ya Piipiliya ya muchu mukhateiye. Vaavaa nnamutakiheryaahu Paulo mu waalakhanya Masu a Muluku moohicompela, Yehova onahaala ompharihela Piipiliya wi anilipihe, naamwi nri mmikhalelo soovilaxa.

16. Tavite oonne hai vaavaa aapankeiye soocheka itokotoko?

¹⁶ Tavite aahipaka echu yoonanara. Owo aahipaka mararuwo ni Patesepa, apaka marehereryo wi iyawe iiphiwe, nave aaheererya okhuwa yeeyo aapankeiye. (2 Sam. 12:9) Wuupaceryani, Tavite hiiwelenle yawuupuserya-ya-murima awe. Ntoko yookhumelela, owo aahinanariha onthamwene awe ni Yehova nave eyo yaahimweeriha okhala awuukhuwaxa ophiyerya wiiceliwa. (Sal. 32:3, 4) Tiheeni yaamukhavihenrye Tavite ovilela ni wuukhuwa yoowo aareiyeno nthowa na soocheka aapankeiye, nave tiheeni nnahuseryaahu wakhala wi noopaka yoocheka etokotoko?

17. Ocharuwa ni murima woothene wa Tavite wooniheryiwe hai mmasu anaphwanyeya mu Salumu 51:1-4?

¹⁷ Mvekele mvekaka nikhurumuwelo. Veelukuluku aya Tavite aahivekela wa Yehova. Owo aahicharuwa ni murima woothene, nave aahilokoha soocheka sawe wa Yehova. (Mwaalakhanye Salumu 51:1-4.) Eyo yaahimukhaviherya okhala oomaaleleya ni oohakalala! (Sal. 32:1, 2, 4, 5) Wakhala wi moopaka yoocheka, muheererye ovitha. Ohiya yeeyo, mvekele wa Yehova nave mmuleele yeeyo mpankaanyu. Voocharela, munahaala okhala oomaaleleya nave hamuni mukhale oothanana. Nyenya wakhala wi munachuna oreherya onthamwene anyu ni Yehova, munaphwanela opaka sincipale opwaha ovekela.

18. Tavite aakhulenle hai olaka?

 ¹⁸ Mweemererye olakiwa. Vaavaa Yehova aamurummeiye mulipa miririmu Natani wi aloce ni Tavite sa yoocheka awe, Tavite heerenrye wiikuphelela naari oloca wi echu aapakeiye yaari ekhaani. Mwawaakuveya owo aaheemererya wi haamuchekenle pahiru iyawe Patesepa, nyenya opwaha soothene aahimuchekela Yehova. Tavite aaheemererya olaka wa Yehova, nave Yehova aahimulevelela. (2 Sam. 12:10-14) Wakhala wi noopaka yoocheka etokotoko, nnaphwanela waaleela yaale Yehova aathanlileiye wi enihooleleke. (Tiy. 5:14, 15) Nave hannaphwanela wiisaakiha. Wakhala wi ninneemererya ni opharihela mwawaakuveya olaka yoowo naakhenlaahu, moohilekela nnahaala okhalano murecele ni ohakalala.

19. Tiheeni nnaphwanelaahu olakelela opaka?

¹⁹ Mukhale oolakelela ohuuluulela yoocheka emohamoha. Mwene Tavite aahisuwela wi aariki asepe okookela opaka yoocheka emohamoha, waanachuneya nikhaviheryo na Yehova. (Sal. 51:7, 10, 12) Yehova amanle omulevelela, Tavite aari oolakelela ohikookela okhalano muupuwelo woonanara. Ntoko yookhumelela, aahikhalano murecele wa mpuwa.

20. Nni nooniherya hai wi ninnathamalela vancipale olevelela wa Yehova?

²⁰ Ninnooniherya wi ninnathamalela olevelela wa Yehova vaavaa nnamvekaahu wi anilevelele, weemererya olaka ni wiilipiserya osepa okookela soocheka imohamoha. Vaavaa nnacharihaahu meerelo yaala, nnamukhalano wanaawiili murecele wampuwa. Yakopo, munna yoowo aapanke yoocheka, aahoona wi ela eparipari. Owo ooloca: “Vaavaa kaalokonhaaka yoocheka wa atokweene a muloko, koonne ntoko wi murici woohokola waahiviihiwamo mmakhatani mwaka. Kaahipacerya ophwanya murecele wa mmuupuweloni mwaka.” Ti yoolipiha vancipale osuwela wi “Apwiya [Yehova] ari vakhiviru va yaawo ookhulumuwa nave annaavulusha yaawo oothanana mmunepani”!—Sal. 34:18.

21. Nni nimweemererye hai Yehova wi anilipihe?

²¹ Woona wi nootepa waacamela omakuchuwelo, sinahaala waaceereryeyaka ichu sinatannya wuukhuwa. Wakhala wi munnuukhuwa, mwawaakuveya mveke nikhaviheryo na Yehova. Mmuhuserye Piipiliya mwawiiseela. Muhuserye orweela wa yootakiherya ya Ana, Paulo, ni Tavite. Mumveke Tiithinyu a wirimu wi ookhaviheryeeni wiiwexexa mathowa anaweerihaani okhala awuukhuwaxa. (Sal. 139:23) Mumvonyerye Yehova wuukhuwa wanyu, xaxaxa sawuukhula seiyo munakhwaanyu minikwa waakhanle wi munahaala omaliha. Wakhala wi moheerano yeela, munanwerya okhala ntoko mulipa masalmo yoowo aamwiipenle Yehova ariki: “Saancaaya sawuukhula mpuwa mwaka, mwaakihakalaliha [ni okilipiha].”—Sal. 94:19.