1, 2. (1) Masu a Yesu anaphwanyeya va Mateu 24:12 woopaceryani yaapharihelen’ye waani? (2) Liivuru a Saweriwa T’arummwa onooniherya hai wi Akristu akina oopacerya yaahititelela olipiha osivela waya? (Moone eruku yoopacerya.)

VAAVAA Yesu aareiye veelaponi yavathi, owo aahithariha mukhalelo achu yaahaalaaya osuwela ‘omala wa elapo.’ Variyari va ichu ikina, owo aahiloherya: “Okhwelana wa atxhu onanvukuwa.” (Mateu 24:3, 12) Mu nsana noopacerya Ayuta yaahiiseera okhala achu a Muluku nyenya yaaheemererya wi omusivela waya Muluku ovukuwe.

² Nyenya, Akristu ancipale mu elukuluku yeele yaarino moonelo woohiyana. Awo yaari amvai olaleerya “Mutxhaka Waphama wa Kristu Yesu” ni wooniherya omusivela Muluku, waasivela akhwaaya a mu nroromelo, ophiyerya yaale yaahisuwenle eparipari. Akristu yaale yaahititelela olipiha omusivela waya Muluku. (Saweriwa T’arummwa 2:44-47; 5:42) Moothananiha, yaahikhalavo Akristu akina yaawo yeerinhe wi osivela waya ovukuwe. Nnasuwela hai yeela?

3. Tiheeni yeerinhe wi osivela wa Akristu akina ovukuwe?

 ³ Yesu aahiloca wa Akristu oopacerya yaawo yaari o Efeso ariki: “Ntakhara Wòhiya okhwela wà wopatxerya.” (Wupulula 2:4) Ti yawooneya wi Akristu o Efeso yaanavoloweliwa ni achu yaawo yaachunaxa wiihakalaliha. (Éfeso 2:2, 3) Efeso yaari epooma ya muhakhu weiwo achu yaacicimihaaya vancipale okumi waphaama ni muhakhu opwaha echu ekina. Ancipale o Efeso yaaritho acapaheya nave hiyaacicimiha malamulo a Muluku. Awo yaanasiveliwa opuha ohiya omusivela Muluku ni akina.

4. (1) Osivela onavukuwa hai olelo? (2) Makupa taani mararu nnaphwanelaahu otitelela olipiha osivela wahu?

⁴ Masu a Yesu vooloca sa ovukuwa wa osivela annaphariheleyatho wa hiyo olelo. Achu olelo anamusivela Muluku vakhaani. Opwaha onweherya Muluku wi amalihe makacamiho veelaponi, achu ancipale anaroromela marehereryo aachu. Osivela waya onamvira ovukuwaka. Ophiyerya wi osivela wa akapuro a Yehova onanwerya ovukuwa, hiiha ntoko yeeren’yaaya mmuloko wa Efeso. Mwawiihiiha hankooni nthokororye makupa mararu nnaphwanelaahu olipiha osivela wahu: (1) omusivela Yehova, (2) osivela iparipari sa Mpiipiliya ni (3) waasivela annihu.

5. Ntakhara heeni ninnaphwanela omusivela Muluku?

⁵ Taani nnaphwanelaahu omusivela vancipale? Yesu aaloca: “Onarwa-osivelana ni Apwiya Mulukuá ni murimá wothene, nave ni okumiá wothene, nave ni mirikuá yothene. Nla n’ri nlamulo ntokotoko n’nopacherya.” (Mateyu 22:37, 38, Nlakano Nahihano) Omusivela wahu Muluku ennanikhaviherya wiiwelela malamulo awe, ovilela ni othanya yoonanara. (Mwaalakhanye Salumu 97:10.) Nyenya Satana ni elapo awe onneererya oniceecheiha ni onanariha omusivela wahu Muluku.

6. Tiheeni eneereya vaavaa achu anayeleelaaya omusivela waya Muluku?

⁶ Elapo erino moonelo wooheseya vooloca sa osivela. Opwaha omusivela Muluku, achu ancipale ari “awisivela mkhataya.” (2 Timoteo 3:2, NN) Awo anateteiwa ni “minkhela sa mwili, minkhela sa mìtho, ni wikusererya mokhalani.” (1 Yohani 2:16) Murummwa Paulo oolopola vooloca sa yeeyo eni yeereye wakhala wi nniihakalaliha hiyo aneene. Owo aaloca: “Okhwela wa omuchu, okhwá.” Ntakhara heeni? Nthowa nawi yaale aneerano annakhala amwiicani a Muluku. (Aroma 8:6, 7) Achu yaawo aneeteteya wi ekhalano ikhorowa naari omaliha munkhela wa oraruwa annakumanano soowaawa.—1 Korinto 6:18; 1 Timóteo 6:9, 10.

7. Moonelo taani wawoopiha waahaala waavolowela Akristu olelo?

⁷ Ancipale haneemererya, akina annakhwa minikwa waakhanle wi Muluku ookhala, ni yaale aneemererya othatuwa anneererya waalekecha akina ohimusivela Muluku naamwi yeemereryaka wi owo ookhala. Awo anneeriha okhala ntoko wi pahiru muchu ori mulolo naari ohihusenrye tonahaala weemererya wi ookhalavo Mpatusa. Mwawaacererya, achu ancipale annaacicimihaxa masiyentista ompwaha Mpatusa. (Aroma 1:25) Ophiyerya wi Mukristu onanwerya ovoloweliwa ni miruku seiya. Onthamwene ahu ni Yehova onamuceecheya, nave osivela wahu onamvukuwa.—Ahebri 3:12.

8. (1) Mikhalelo taani sahaala waaceecheiha achu a Yehova? (2) Salumu 136 onanihakararya hai?

 ⁸ Woona wi nnakhala mu elapo yeela yoonanara ya Satana, aakhalavo mathowa mancipale anahaala oniceecheiha veelukuluku aya. (1 Yohani 5:19) Nyenya wakhala wi noheemererya okhala oovololaxa, nroromelo nahu nnamuceecheya nave omusivela wahu Muluku onamvukuwa. Ntoko yootakiherya, akhweya nnamukumanano makacamiho nthowa nawi nnamuuluvala, wiiceliwa, naari ohikhalano ikhorowa. Naari nnamukhala oothanana nthowa nawi hannawerya opaka ichu hiiha ntoko naachunelaahuvo. Akhweya nnamukhala awuukhuwa voosuwela wi ichu ikina mookumini hasineeca ntoko naaweheryaahu. Moohipwacha makacamiho nnakumanaahuno, nihirwe nuupuwele wi Yehova ooninyanyala. Muupuwele masu oohakararya anaphwanyeya mu Salumu 136:23 ani: “Monyemuliwani mwahu ànupuwela, ntakhara ikharari saya [osivela] ti sohimala.” Nnaphwanela ororomela wi Yehova onnawiriyana “wikhupanyerya” wahu nave onahaala waakhula.—Salumu 116:1; 136:24-26.

9. Tiheeni yaamvanhe ikuru Paulo otitelela olipiha omusivela wawe Muluku?

⁹ Paulo aari murummwa a Muluku yoowo uupuwelela mwawiiseela vooloca sa mukhalelo Yehova aamukhaviheryeiye, nave eyo yaahimukhaviherya okhala oolipa. Owo aahirepa: “Ti Apwiya anakikhaviherya: nkinova echu! Ti seni atxhu anaweryaya okerela?” (Ahebri 13:6) Paulo omuroromela wawe Yehova yaahimukhaviherya ovilela ni makacamiho a okumi. Vaavaa aakhaleiyeno makacamiho, owo haayeleela omuroromela wawe Yehova. Naamwi aari mukariposo, owo aahaakhaviherya Akristu akhwaawe moorweela wa orepela mmilokoni ikaarata soolipiha. (Éfeso 4:1; Filipi 1:7; Filémone 1) Moohipwacha makacamiho Paulo aakumaneiyeno, owo aahititelela olipiha omusivela wawe Yehova. Owo aanamuroromela ‘Muluku a ohakararya wothene, onanihakararya hiyo mu ohóshiwa wahu wothene.’ (2 Akorinto 1:3, 4, NN) Nni nimutakiherye hai Paulo?

10. Nni niwerye hai olipiha omusivela wahu Yehova?

 ¹⁰ Paulo aahithariha mukhalelo mmoha nneeraahu ntitelele olipiha omusivela wahu Muluku, vaavaa aarempeiye: “Muhihiyererye ovekela.” Ohoolo waya aarepa: “Òpatxhanyerya mmavekeloni.” (1 Tesalónika 5:17; Aroma 12:12) Ntakhara heeni nivekelo ninnanaacameliha wa Muluku? Vaavaa nnavekelaahu, nnaloca ni Yehova. Ela enneeriha okhala wooweryeya wa hiyo okhalano onthamwene ni yene. (Salumu 86:3) Vaavaa nnamuleelaahu Tiithi ahu awirimu vooloca sa muupuwelo ni moonelo ahu siri sawiiseela, ninnakhala vakhiviru vawe. (Salumu 65:3) Navetho, omusivela wahu Yehova onnannuwa vaavaa nnoonaahu mukhalelo owo onaakhuleiye mavekelo ahu. Nri oolekecheya wi “Apwiya ari vakhiviru va yale anawitxhana.” (Salumu 145:18) Olekecheya wahu mu nikhaviheryo ni osivela wa Yehova sinahaala oneeriha ovilela nikacamiho vyakala nneeraahu nikumaneno hiihaano ni muhoolo.

11, 12. Nni naaceererye hai osivela wahu eparipari ya Mpiipiliya?

¹¹ Ntoko Akristu, ninnasivela eparipari. Nnahaala ophwanya eparipari Mmasu a Muluku. Yesu aahiloca wa Tiithi awe: “Nsu nà nri eparipari.” (Yohani 17:17) Wi nsivele eparipari ya Mpiipiliya, nnaphwanela osuwela yeeyo eri Mpiipiliyani. (Kolosi 1:10) Nyenya sookhalavo sincipale. Moone mukhalelo namarepa a Salumu 119 onanikhaviheryeiye wiiwexexa echu nnaphwanelaahu opaka. (Mwaalakhanye Salumu 119:97-100.) Nihiku nnihiku, nnaphwanela wuupuwelela mwawiiseela, yeeyo nnaalakhanyaahu Mpiipiliyani. Vaavaa nnuupuwelelaahu mukhalelo nnaphuraahu opharihela muteko eparipari ya Mpiipiliya mookumini mwahu, nnahaala osivelaka vancipale.

¹² Namarepa a Salumu oolocatho: “Mwano mwaka, masu anyu t’osiva òsiva opwaha oravo.” (Salumu 119:103) Soolaleeryiwa inathipeleya Mpiipiliya seiyo marehereryo a Muluku anapakaaya, inalikana ni yoolya yoosiva. Vaavaa nnalyaahu yoolya enansivela, ninnamaliha elukuluku nipuhaka. Moolikana, nnachuna omaliha elukuluku nihuseryaka. Voocharela nnahaala chiryene opuha “masu òrèra” a eparipari, nave onahaala okhala wookhweya wuupuwelela yeeyo naalakhannyaahu ni opharihela wi naakhaviherye akina.—Eklesiyaste 12:10.

13. Tiheeni yaamukhavihenrye Yeremiya osivela masu a Muluku? Eyo yamvolowenle mwawiihai?

¹³ Mulipa miririmu Yeremiya aanasivela masu a Muluku. Owo aaloca: “Kànatxhuna olya masu anyu, nave elukuluku kàphwanyaka murima aka wànatepa ohakalala, nave kànakhala awitxhàla ntakhara kiri mmatani mwanyu, nyuwano, Pwiya, a owerya wothene.” (Yeremiya 15:16) Yeremiya aahuupuwelela mwawiiseela esisapo ya masu a Muluku, nave aanasivela. Owo aanathamalela ekari ya omweemelela Yehova ni olokoha michaka sawe. Wakhala wi ninnasivela eparipari ya Mpiipiliya, nnahaala osuwela wi nookhalano ekari yavameekhaaya ya okhala Anamoona a Yehova ni olaleerya vooloca sa Omwene mmahiku yaala oomaliherya.

14. Echu taani ekina eni enikhaviherye waaceererya osivela wahu eparipari ya Mpiipiliya?

¹⁴ Echu taani ekina eni enikhaviherye waaceererya osivela wahu eparipari ya Mpiipiliya? Nnaphwanela ophwanyeyaka mmithukumano sahu moohihiyererya, mwemmo nnahusihiwaahumo ni Yehova.  Omuhuserya Piipiliya esumana ti esumana ephariheliwaka erevista Mulipeleli mukhalelo woochuneya nnahusihiwaahu. Vano wakhala wi ninnachuna ophura moomalela muthukumano yoola, nnaphwanela orehererya woosiilo ene. Ntoko yootakiherya, nnanwerya ovarerya soorepa sa Piipiliya siromoliwe. Olelo, achu ancipale onnaakhweela omwaalakhanya naari omukumiha Mulipeleli mu ekhankoonya woona wi onnaphwanyeya mu ilocelo sincipale mu site jw.org ni mu JW Library app. Ikaruma ikina (mu ekunya eniichaniwa aplicativos) sinnanikhaviherya ophwanya soorempwa mwawaakuveya. Nyenya ninnathanla ohuserya mwaha ti mwaha, nave wakhala wi ninnaalakhanya soorempwa moomaaleleya ni wuupuwelela, osivela wahu eparipari ya Mpiipiliya onahaala wunnuwa.—Mwaalakhane Salumu 1:2.

15, 16. (1) Mwawiiwanana ni Yohani 13:34, 35, nlamulo taani Yesu ovanheiye? (2) Omukhwela wahu Muluku ni Piipiliya oniiwanana hai ni waakhwela annihu?

¹⁵ Mu ohiyu awe wookuchula veelaponi, Yesu aahaaleela amuhuserya awe ariki: “Kinnohiyeryani nlamulo nsyani: mukhwelaneke! Ntoko miyo kokhwenlakani, hihatho nyuwo mukhwelaneke. Mwa yeyo atxhu othene anamusuwela wi muri amuhuseryaka mwakhwelanà mukina ni mukhweiye.”—Yohani 13:34, 35.

¹⁶ Waakhwela anna ni arokora ahu onniiwanana ni omukhwela Yehova. Wakhala wi hannamukhwela Muluku, haniwerya omukhwela munnihu. Nave wakhala wi hannaakhwela annihu, haniwerya omukhwela Muluku. Murummwa Yohani ooloca: “Eparipari, yole ohinamukhwela munnawe onamooneiye, hanaweryatho omukhwela Muluku ohinamoneiye.” (1 Yohani 4:20) Omukhwela wahu Yehova ni waakhwela wahu annihu onniiwananatho ni omukhwela Piipiliya. Ntakhara heeni? Nthowa nawi wakhala wi ninnakhwela yeeyo nnaalakhanyaahu Mpiipiliyani, nnahaala ochuna wiiwelela malamulo nnaphwanyaahu mwemmo vooloca sa omukhwela Muluku ni annihu.—1 Pedro 1:22; 1 Yohani 4:21.

17. Mmikhalelo taani nneeraahu nooniherye osivela?

 ¹⁷ Mwaalakhanye 1 Tesalónika 4:9, 10. Tiivi siri mikhalelo soophara muteko nneeraahu nooniherye osivela wa yaale a mmulokoni mwahu? Akhweya munna naari murokora awuuluvala onamuchuna nikhaviheryo wi aphiye mmithukumano sa muloko. Naamukhwele onamuchuna orehererya echu owannyawe. (Tiyako 1:27) Anna ni arokora yaawo ari ooceecheya, oohaleeliheya, naari anakumanano nikacamiho vyakala anamuchuna nikhaviheryo, nceenyeryo ni ohakararya wahu. (Masiposipo 12:25; Kolosi 4:11) Ninnooniherya wi ninnaasivela “yale ari annihu munroromeloni” moorweela mwa yeeyo nnalocaahu ni nnapakaahu.—Galasya 6:10.

18. Tiheeni eni enikhaviherye omaliha ohiiwanana ni annihu?

¹⁸ Piipiliya aahiloca wi “mahiku òmaliherya” a elapo yeela yoonanara, achu ancipale yaahaala okhala a miiko ni anrima. (2 Timóteo 3:1, 2) Ntoko Akristu, nnachuna olapa moowetha wi ntitelele wunnuwiha omusivela wahu Yehova, Masu awe ni mukina ni mukhwaawe. Woona wi naachu oohiphaameya, ikwaha ikina akhweya nnamukhala oohiiwanana ni annihu. Nyenya woona wi ninnakhwelana, nnahaala weererya omaliha ohiiwanana vyakala moophaameya nave mwawaakuveya wakhala wooweryeya. (Éfeso 4:32; Kolosi 3:14) Nihirwe neemererye wi osivela wahu ovukuwe! Moohiyana, hankooni ntitelele omusivela vancipale Yehova, Masu awe, ni annihu.