YAWEEREYA YA OKUMI
Ohiiwa Hiwaakihiihale Waahusiha Akina
Kipatisiwe mu 1941, kirino iyaakha 12. Nyenya ti eyaakha ya 1946 kiiwexenxaaka eparipari ya Mpiipiliya. Ntakhara heeni? Kinachuna wooleelaani yaweereyaaka.
VARIYARI va eyaakha ya 1910, asitiithi aka yaahithaama o Tibilisi, o Xeyorxiya, eyaaka o Kanata. Awo yaakhala mu empa ekhaani waacamela o Pilli, Saskatchewan, o Kanata. Kiyariwe mu eyaakha ya 1928, nave kamukhaani a annaka athanu nammoha. Apapa aka akhwile miyeeri mithanu nammoha kihaakumve oyariwa, nave amama aka akhwile nlelo kiri mwaana. Moohilekela murokora aka mutokweene Lucy arino iyaakha 17 aahikhwa. Mwawiihiiha ataata Niki yaahikikhapelela vamoha ni asinnaka.
Nihiku nimoha vaavaa kapaceryaka weeca, amusi aka yaahikoona kicuchaka mwiila wa ekavalo ahu. Awo yaahisareya woova yuupuwelaka wi ekavalo yaahaala okikhumula, mwawiihiiha yaahikhuwela wi kihiye. Nyenya, nkaarukununwe, nave nkiiwale okhuwela waya. Moohakalaliha, ekavalo hiyaakikhumunle. Nyenya nlo naari nihiku amusi aka yaasuwenlaaya wi nkaawerya wiiwa.
Nthamwene a emusi aka aahiloca wi yaahaala okhala yaphaama okerihiwa osikola vamoha ni anamwane akina yahaawerya wiiwa. Ataata Niki yaahikikeriha osikola ya achu ahinawerya wiiwa o Saskatoon, Saskatchewan. Esikola eyo yaari ocai wa amusi aka, nave woona wi kaarino iyaakha thanu pahiru, kaanatepa woova. Kaawerya waasekurya amusi aka pahiru mmahiku awiichuuwa ni mu elimwe. Voocharela, kaahihuserya elocelo ya ineneeryo nave kaanawerya ochekula ni anamwane akina yahaawerya wiiwa.
OHUSERYA EPARIPARI YA PIIPILIYA
Mu 1939, murokoraka Marion yoowo aari awunnuwelavo aahitheliwa ni Bill Danylchuck, nave yaahipacerya okikhapelela vamoha ni murokoraka Franses. Awo yaari achu oopacerya a veemusini vaka ohuserya ni Anamoona a Yehova. Variyari va elukuluku ya wiichuuwa mu elimwi, awo yaaniilipiserya ophiyerya anaweryelaayavo wi ekawane ni miyo yeeyo yaahuseryaaya orweela Mpiipiliya. Hiwaakhala wookhweya wa miyo olocihana nthowa nawi hiyaasuwenle elocelo ya ineneeryo. Nyenya awo yaanawerya woona wi mweeparipari kaanasiveliwa ni yeeyo kaahuseryaaka vooloca sa Yehova. Kaahiiwexexa wi yeeyo yaapakaaya yaaniiwanana ni yeeyo Piipiliya onaloceiye, mwawiihiiha kaanakhuma ni yaawo vaavaa yaalaleeryaaya. Ohoolo waya, kaahikhalano nchuno na opatisiwa, nave mu 5 a Setempuru a 1941 amulamu yaahikipatisa mmukoroni wa aasu yoowo waasaren’yemo maahi yaarikiwe veehimeni. Maahi awo yaatepa oriirya!
Ni nikhuuru na achu ahinawerya wiiwa o muthukumano wa muceche o Cleveland, Ohio, mu 1946
Mu 1946, vaavaa kaakookenlaaka owaani mu elimwi, kaahiya o muthukumano wa muceche o Cleveland, Ohio, E.U.A. Nihiku noopacerya, arokoraka yaahirepa masu wi kiwerye ochariha muthukumano. Nyenya mu nihiku nanawiili, kaahihakalala osuwela wi naakhalavo nikhuuru na yaale yahaawerya wiiwa ntaphulelaka muthukumano wa muceche. Mwawiihiiha, kaahiwerya opuha muthukumano, nave eyo yaari echu yoohakalaliha owerya wiiwexexa moomalela yeeyo Piipiliya onahusiheiye!
KIHUSIHAKA EPARIPARI
Mu elukuluku yeeyo, Ekhoco Etokweene Yanawiili, yeera erikimmalaru, nave achu yaanachuna wooniherya wi yaari oororomeleya wa elapo aya. Nyenya vaavaa kaakhummaaka o muthukumano ni kikookela osikola, kaahilakelela otitelela okhala oororomeleya wa Yehova. Mwawiihiiha kaahimaala opaka makupa mu weemelela nipantera, omwiipa ino, ni opaka makupa mmahiku awiichuuwa. Navetho kaahimaala oya okerexa ni asinthamwene aka osikola. Nikhuuru na osikola hinaahakalanle, nave yaaheererya okoopopiha ni oloca sawootha wi ekeerihe otoroka muupuwelo aka. Asinthamwene aka ooxikola yaahoona yeeyo yeereya, nave wa nthowa na yeeyo, kaahikhalano ikari sa waalaleerya. Akina a yaawo, ophitaanyerya Androsoff, Norman Dittrick, ni Emil Schneider, yaaheemererya eparipari, nave nlelo awo annamurumeela Yehova.
Vaavaa kaaxekuryaaka ipooma ikina, wiiliwiili kaaniilipiserya waalaleerya achu yahaawerya wiiwa. Ntoko yootakiherya, o Montreal kaahiya vanipuro vaava yaathukumannaayavo achu yahaawerya wiiwa. Weiwo kaahimulaleerya Eddie Tager, yoowo ari a nikhuuru na ampava. Ophiyerya okhwa wawe eyaakha evinre, owo aari muloko wa elocelo ya ineneeryo o Laval, Quebec. Navetho kaahimusuwela mmiravo Juan Ardanez. Ntoko achu o Pereya akhalai, owo aahipaka otholathola wi asuwele waakhanle wi yeeyo aahuseryeiye yaathipeleya Mpiipiliya. (Saweriwa T’arummwa 17:10, 11) Owotho aaheemererya eparipari nave aahirumeela ntoko mutokweene o Ottawa, Ontario, ophiyerya okhwa.
Kilaleeryaka mphironi omapacereryo wa 1950
Mu 1950, kaahithaamela o Vancouver. Naamwi kaasiveliwa waalaleerya achu yahaawerya wiiwa, nkirwa kichuwala yaweereya yeeyo kaaryaakano ya omulaleerya muramphani muthiyana aawerya wiiwa nsina nawe Chris Spicer. Owo aaheemererya orepela yooveka ya irevista nave aanachuna wi kakumane ni iyawe, Gary. Kaahaasekurya owannyaya, nave naahimaliha elukuluku yincipale nivaanelaka
moorweela wa orepelana ikaarata. Ovinyerya nihiku nenle hinoonanneru ophiyerya iyaakha vakhaani ohoolo waya vaavaa mootutusa, aaruuleiye okilocela o muthukumano wa muceche o Toronto, Ontario. Nihiku nenle Gary aaya opatisiwa. Yaweereya yeela ennakuupuserya okhweleya waya otitelela olaleerya, woona wi hansuwenle waakhanle wi muchu nimulalenryaahu onahaala weemererya eparipari.Ohoolo waya, kaahikookela o Saskatoon. Weiwo kaahimusuwela muthiyana yoowo aakivenke waahusiha anaawe apiili aasithiyana, Jean ni Joan Rothenberger vooloca sa Piipiliya. Awo yaahusenrye mu esikola emohamoha ya achu yahaawerya wiiwa weiwo kaahusenryaakawo. Voocharela, asimwali oopiili yaanaaleela asinthamwene aya vooloca sa yeeyo yaahuseryaaya. Athanu a asinthamwene aya yaahikhala Anamoona a Yehova. Mmoha a yaawo aari Eunice Colin. Kaahimusuwela Eunice mu eyaakha yookuchula ya esikola ya achu ahinawerya wiiwa. Mu ekwaha yeele osikola, owo aahikivaha etoosi nave aahikiveka wi waweryeya nikhale asinthamwene. Ohoolo waya owo aahikhala muchu ookhweleya mu okumi aka. Eunice aahikhala mwaaraka!
Ni mwaaraka mu 1960 ni 1989
Vaavaa amannya Eunice yaasuwenlaaya wi aanamuhuserya Piipiliya, yaahimveka muhooleli osikola wi amulekeche Eunice wi amaale. Naamwi owo eerenrye nave aarinhe ikaruma sawe sa ohuserya, Eunice aahilakelela otitelela okhala oororomeleya wa Yehova. Vaavaa aachuneiye opatisiwa, asitiithi awe yaahiloca wa yoowo eriki: “Wakhala Namoona a Yehova, onahaala okhuma vaate vahu!” Mwawiihiiha vaavaa areiyeno iyaakha 17, Eunice aahipwahavo vaate nave anakhala ni emusi yaari Namoona a Yehova. Aahititelela omuhuserya Piipiliya nave ohoolo waya aahipatisiwa. Vaavaa naapankaahu othela mu 1960, asitiithi awe hiyaaruule. Nyenya vaavaa iyaakha saaviraaya, ncicimiho naya wa hiyo naanannuwa nthowa na soororomela sahu ni mukhalelo naaphuwaahu aniihu.
YEHOVA ONNAKIKHAPELELA
Mwanaka Nicholas ni mwaariye Deborah, anarumeela Opeteli ya o Lonton
Ntoko asitiithi yahaawerya wiiwa, waari woovila waaphuwa anamwane athanu napiili yaawerya wiiwa. Nyenya naahiilipiserya wi awo ehuserye elocelo ya ineneeryo wi niweryeke ovaanela phaama ni waahusiha eparipari. Anna ni arokora a mmulokoni yaahinikhaviherya vancipale. Ntoko yootakiherya, tiithi mmoha aanrepela ekaarata wi anileele wi mmoha a anamwane ahu aanaloca masu oonanara mu Empa ya Omwene. Naahiwerya othokororya mwaha yoowo mwawaakuveya. Anamwane ahu asese, James, Jerry, Nicholas, ni Steven, anarumeela ntoko atokweene nave annamurumeela Yehova moororomeleya vamoha ni asaaraya ni imusi saya. Navetho Nicholas ni mwaariye Deborah, anakhaviherya otaphulela elocelo ya ineneeryo ofiliyale yo Krapretanya, nave Steven ni mwaariye Shannan anapaka makupa a otaphulela elocelo ya ineneeryo ofiliyale ya Estatu Unitu.
Anaaka James, ni Steven ni asaaraya anakhaviherya muteko woolaleerya mu elocelo ya ineneeryo mmikhalelo soohiyanahiyana
Moothananiha, mwaaraka okhwile nthowa na ereca ya kanser ohalaka mweeri mmoha wi naakhwanihe iyaakha 40 sa othela wahu. Mu elukuluku yoothene ya makacamiho, nroromelo areiyeno na ovinya mookhwani naahimulipiha. Kinnaweherya nihiku kineeraaka kimoone owo wanawiili.
Faye ni James, Jerry ni Evelyn, Shannan ni Steven
Mu Fevereru a 2012, kaahuuwa nave iparari saka saahinteeya. Kaahisuwela wi kaahaala Salumu 10:14) Kinnaathamalela oothene yaale yiivaha orepa ikaarata, ohuserya elocelo ya ineneeryo, ni okhaviherya otaphulela phaama ntakhara miyo ophiyerya yaaweryelaayavo.
ochuna nikhaviheryo, mwawiihiiha kaahithama wi kanakhala ni mwanaka ni mwaariye. Vano hiyaano nnapaka makupa a Muloko Calgary wa Elocelo ya Ineneeryo, weiwo kinnatitelela orumeela ntoko mutokweene. Ela ekwaha yoopacerya kinapakaaka makupa a muloko wa elocelo ya ineneeryo! Mano, kiwenrye hai otitelela olipiha onthamwene aka ni Yehova mu iyaakha soothene kaathukumanaaka mmuloko wa elocelo ya Enklesi? Yehova ookikhaviherya. Owo ookhwaaniherya nlakano nawe na waakhapelela anamwane ari ikwaasuni. (Mu esikola ya opiyoneero mu elocelo ya ineneeryo kirino iyaakha 79
Saanakhalavo ikwaha kahiiwexexaaka yeeyo yaataphuleliwa naari koonaaka wi haavo iwexexa mukhalelo wa omukhaviherya muchu ohinawerya wiiwa. Mu ikwaha ntoko seiya, vaavaa kaakhalaaka awuukhuwa nave kinachuna okookela muculi, kaanuupuwela masu Petro aamulocenleiye Yesu ariki: “Pwiya nni n’ye wa wani? Weyano orino masu a ekumi.” (Yohani 6:66-68) Ntoko anna ni arokora ancipale ahinawerya wiiwa yaawo ari mu eparipari mu elukuluku yincipale, miyaano koohuserya okhala oopisa murima. Koohuserya omuroromela Yehova ni marehereryo awe, nave eyo ennakumiherya miphurelo mincipale. Vano sookhalavo soolaleeryiwa sincipale mu elocelo aka, nave kiri oohakalala woona wi kinnaphwanyeya mmithukumano sa muloko ni sa muceche mu Elocelo ya Ineneeryo ya Amerika. Chiryene, kookhalano okumi woohakalaliha ni wa mphurelo omurumeela Yehova, Muluku ahu mutokotoko.