1, 2. (1) Echu taani enaakhaviherya amiravo ni asimwali ari Akristu ovootha ekhoco ni Satana ni masololo? (Moone eruku yoopacerya.) (2) Tiheeni nnahaalaahu othokororya?

MURUMMWA Paulo aahaalikanyiha Akristu ni akhoco. Hiyaano nri mu ekhoco nave amwiicani ahu teeparipari! Nto ekhoco ahu tahi ni achu; nnawaniha ni Satana ni masololo. Awo annawaniha mu iyaakha macikhwi nave annawaniha phaama. Mwawiihiiha enakhala wi hinni niwerye ovootha ekhoco, xaxaxa wakhala wi na amiravo ni asimwali. Apwanne amiravo ni asimwali ananwerya waavootha amwiicani yaala ooweryaxa? Aai awo ananwerya, nave awo annavootha! Mwawiihai? Nthowa nawi annaakhela ikuru inarweela wa Yehova. Navetho, hiiha ntoko mukhoco ovyakihiwe phaama, awo ‘annisakiha ni mavaka Apwiya anavahaya’ mwawiihiiha wi ewerye orehereryeya ntakhara ekhoco.—Mwaalakhanye Éfeso 6:10-12.

² Elukuluku Paulo aapharihenleiye niphwanaphwaniho nenla, owo akhweya uupuwela vooloca sa mavaka mukhoco o  Roma aawareiye. (Saweriwa T’arummwa 28:16) Mmwaha yoola, nnahaala othokororya niphwanaphwaniho nenla naphaama. Nnahaalatho othokororya mukhalelo amiravo ni asimwali aloncaaya sa makacamiho ni mphurelo wa owara nikupa ti nikupa na mavaka ahu oomunepani.

3, 4. Ti mwawiihai eparipari ya Piipiliya eryaaya ntoko nrampa na mukhoco o Roma?

³ Mwaalakhanye Éfeso 6:14. Nrampa na mukhoco o Roma naahikhalano mithipo naakiha eyuunu awe ni okhapelela yawiisaakihano yoolimela mmapuroni mwaya. Marampa yaahikhalanotho mikoi soolipa seiyo saawerya okhapelela nsipaaca. Ni nrampa noomakeya phaameene, mukhoco aanakhala ookhapeleleya vaavaa aayeiye okhoconi.

⁴ Ntoko nrampa, iparipari nihusenryaahu orweela wa Masu a Muluku sinnanikhapelela orweela wa mahusiheryo atheru. (Yohani 8:31, 32; 1 Yohani 4:1) Wakhala wi ninnasivela vancipale iparipari sinarweela Mmasu a Muluku, onahaala okhala wookhweya wa hiyo okhala mwawiiwanana ni malakiheryo a Muluku, naari owara “yawisakihano.” (Salumu 111:7, 8; 1 Yohani 5:3) Navetho wakhala wi ninniiwexexa phaama iparipari seiya, nnahaala owerya waakiha phaama iparipari iho variyari va amwiicani ahu.—1 Pedro 3:15.

5. Ntakhara heeni ninnaphwanela elukuluku yoothene oloca eparipari?

⁵ Woona wi iparipari soorweela mu Masu a Muluku ti sookhweleya wa hiyo, ninniiwelela yeeyo Piipiliya onaloceiye nave elukuluku yoothene ninnaloca eparipari. Wootha ekaruma emoha enamukumiherya Satana mphurelo wawaaca. Sawootha sinnampahula muchu yoowo onaloca ni muchu yoowo oneemererya seiyo. (Yohani 8:44) Naamwi nihiri achu oophaameya, ninneererya wiilipiherya ohiloca yawootha. (Éfeso 4:25) Ela enanwerya okhala yoovila. Apikayeli, orino iyaakha 18 ooloca: “Oloca eparipari wiiliwiili honakhala wookhweya, xaxaxa vaavaa oloca yawootha enamweerihaaya muchu woopowa mu nikacamiho.” Vano ntakhara heeni owo wiiliwiili onneererya oloca eparipari? Owo ooloca: “Elukuluku kinakhalaaka oororomeleya, kinnakhalano yawuupuxerya-ya-murima yaphaama vamiithoni va Yehova. Nave asitiithi aka ni asinthamwene aasuwela wi ananwerya okiroromela.” Vitoriya, orino iyaakha 23 ooloca: “Vaavaa onalocaawe eparipari ni onakhala mwawiiwanana ni soororomela saa, onamphiyerya ohoosiwa. Nto wiiliwiili muchu onnaakhela mphurelo: Onnaroromeliwa, omwaacamela Yehova, ni okhalano ncicimiho wa yaale anoosivela.” Apwanne munnoona ntakhara heeni oryaaya wookhweleya owara “nrampa [na] eparipari” mu ilukuluku soothene?

6, 7. Ntakhara heeni wookololowa olikanyihiwaaya ni yawiisaakihano?

⁶ Yawiisaakihano ya mukhoco o Roma wiiliwiili yaapakiwa ni mithipo sookhuneya seiyo saavira veerukuluni ikhuneelaka makupa a vaneekhoopeni vawe. Mithipo saamakiwa ni esapala ya enama yeeyo yaamakeleliwa  makupa makina a muthipo. Makhata awe yaanakhuneeleya ni mikoi mincipale sa muthipo seiyotho saaluceleliwa ni esapala ya enama. Yawiisaakihano yaanavukula weeca wawe, nave eyo yaanamweeriha waalikhela wiiliwiili wi aroromele waakhanle wi echu ti echu eri vanipuroni vaya. Nyenya yawiisaakihano yaanakhapelela murima awe ni makupa makina a mwiili wi ehiphwanyiwe ni nsipaaca naari mavaka!

⁷ Malakiheryo awookololowa a Yehova, yaawo anakhapelela “murima” ahu naari omuchu ahu wampuwa, ananwerya olikanyihiwa ni yawiisaakihano. (Masiposipo 4:23, Tradução do Novo Mundo) Mukhoco haaphwanela otoroka yawiisaakihano ya mithipo ni ekina epakiwe ni muchove. Mmukhalelo woolikana, hannaphwanela otoroka malakiheryo a Yehova wa yeeyo eri yaphaama ni miruku sahu wa yeeyo eri yaphaama. Hinaanono miruku sawaakhwanela wi niwerye okhapelela murima ahu. (Masiposipo 3:5, 6) Ti nthowa nene nnaphwanelaahu wiiliwiili waalikhela waakhanle wi “yawisakihano” ahu nlelo ennakhapelela murima ahu.

8. Ntakhara heeni ninnaphwanela wiiwelela malakiheryo a Yehova?

⁸ Apwanne ikwaha ikina munnuupuwela wi malakiheryo a Yehova aawaakhaani otaphuwa wanyu naari annoohiihaani opaka ichu munachunaanyu? Taniyeli yoowo orino iyaakha 21, ooloca: “Ahusiha ni asinthamwene oosikola annakitheya nthowa nawi kinakhala mwawiiwanana ni malakiheryo a Piipiliya. Mu elukuluku, kaayeleela nroromelo naka nave kinakhala awuukhuwa mmuupuweloni.” Nto onoona hai vano? Owo ooloca: “Vookuchulani, kohoona mphurelo wa okhala mwawiiwanana ni malakiheryo a Yehova. Asinthamwene aka akina yaahipacerya olya mirece; akina yaahihiya esikola. Yaari yoothananiha woona mukhalelo ikumi saya saanananraaya. Mweeparipari Yehova onnanikhapelela.” Matison yoowo orino iyaakha 15, ooloca: “Enakhala ekhoco wa miyaano okhapelela malakiheryo a Yehova ni ohipaka yeeyo asinthamwene aka anuupuwelaaya wi ti yaphaama naari yoohakalaliha.” Vano, tiheeni owo opankeiye? “Kinniisuupuserya wi kookhalano nsina na Yehova nave yaweeha mukhalelo wa Satana weererya okiipha. Elukuluku kinavoothaaka ekhoco, kinnoona phaama vooloca wa miyo mukhataaka.”

9-11. (1) Isapatu taani soosiphela seiyo Akristu anawaraaya? (2) Tiheeni eni enikhaviherye okhala oohuukhuwa vaava nnalaleeryaahu?

⁹ Mwaalakhanye Éfeso 6:15. Mukhoco o Roma haaphwanela oya okhoconi ahiwanre isapatu. Iho saapakiwa ni esapala ya enama, mwawiihiiha saanatepa olipa. Nto isapatu iho saakhalatho soophwanelela, wi mukhoco aweryeke weeca mookhapeleleya nave mwaweemeleleya.

¹⁰ Woona wi isapatu mukhoco o Roma aawareiye saanamukhaviherya okhumelela phaama okhoconi, isapatu soosiphela nnawaraahu sinnanikhaviherya olaleerya “Mutxhaka Waphama wa muretxele.” (Isaiya 52:7; Aroma 10:15) Naamwi hiiha, ikwaha ikina onnachuneyaxa olipa murima wi nlaleerye.  Po, yoowo orino iyaakha 20, ooloca: “Kaanoova waalaleerya asinthamwene aka oosikola. Kinnuupuwela wi kaari oohaleeliheya. Kaawuupuwelaka yeeyo yeeren’ye, nkinasuwela ntakhara heeni yeeren’yaaya. Vano kiri oohakalala waalaleerya asinthamwene aka.”

¹¹ Amiravo ni asimwali ancipale ari Akristu ahoona wi annakhala oohuukhuwa vaavaa analaleeryaaya wakhala wi ahiirehererya woosiilo. Tiheeni munaphwanelaanyu opaka wi mwiirehererye? Yuliya yoowo orino iyaakha 16, ooloca: “Kinnahela soolaleeryiwa mmurupani mwaka woosikola, nave kinnawiriyana moonelo ni soororomela sinalociwa ni asinthamwene aka oosikola. Voocharela kinnuupuwela yeeyo eni yaakhaviherye. Vaavaa kinakhalaaka ooreheryeya, kinnawerya wuupuwela vooloca sa yeeyo kinahaalaaka oloca wi yaakumiherye mphurelo.” Makensi yoowo orino iyaakha 23, ooloca: “Wakhala wi muchu teepewe ni onnawiriyana phaama, onahaala osuwela yeeyo enaakacamiha asinthamwene. Kinniilipiserya waalakhanya soolaleeryiwa soothene vooloca sa amiravo ni asimwali. Weerano hiiha ennakikhaviherya waahoolela amiravo ni asimwali mu Piipiliya naari mu jw.org wa yeeyo eni yaakhaviherye.” Okhala ooreheryeya phaama wi muchu alaleerye eri ntoko owara “isapato” seiyo inookhalaani phaama.

12, 13. Tisivi siri “inyakara sovarela” sa Satana?

¹² Mwaalakhanye Éfeso 6:16. Mukhoco o Roma aanapharela eyaakiha. Eyo yaaniipithiha makhataawe ni meco nave yaanamukhapelela orweela wa miyaalo, mavaka ni minra.

¹³ Tisivi siri “inyakara sovarela” Satana aahaaleiye owiiphanno? Akhweya onamoohiphelaani ni sawootha vooloca sa Yehova. Satana onachuna oweerihaani wuupuwela wi Yehova hanoosivelaani nave wi hanoopwachaani. Ita, yoowo orino iyaakha 19, ooloca: “Wiiliwiili kaanuupuwela wi Yehova haakaacamela nave wi haachuna okhala Nthamwene aka.” Tiheeni opankeiye vaavaa ooneiye mmukhalelo yoola? “Mithukumano nikhaviheryo ntokweene wa nroromelo naka. Kaanayawo nave nkaakhula, kuupuwela wi haavovo aachuna owiriyana yeeyo kaahaalaaka oloca. Vano, kinniirehererya ntakhara mithukumano nave kinneererya waakhula ikwaha piili naari raru. Ti yoovila, nto kinnatepa woona phaama kimanle weerano. Nave anna ni arokora annakilipiha. Wiiliwiili kinakookela owaani kisuwelaka wi Yehova onnakisivela.”

14. Tiheeni nihusenryaahu orweela wa yaweereya ya Ita?

¹⁴ Eyaakiha ya mukhoco wiiliwiili yaakhalano mannuwelo oolikana. Koma ntoko nihusenryaahu orweela wa yaweereya ya Ita, nroromelo nahu tahi hiiha. Nroromelo nahu nnanwerya wunnuwa naari oyeva, okhala noolipa naari nooceecheya. Eyo yoothanlaahu. (Mateu 14:31; 2 Tesalónika 1:3) Wi “eyakiha ya wemererya” wahu enikhapelele, nnaphwanela otitelela wunnuwiha ni olipiha!

15, 16. Ti mwawiihai ewehereryo ahu enalikanaaya ni kapasete?

¹⁵ Mwaalakhanye Éfeso 6:17. Mukhoco o Roma aananwara kapasete wi akhapelele muru awe, esiko ni ethoi. Ikwaha ikina kapasete aanakhalano mukoi wi mukhoco awerye ompharela mmatani mwawe.

¹⁶ Hiiha ntoko kapasete onakhapeleleiye ocoopare wa nakhoco, “owehererya wa nivuluso” onnakhapelela muupuwelo ahu. (1 Tesalónika 5:8; Masiposipo 3:21) Ewehereryo ennanikhaviherya okhapelela soororomeliha sa Muluku ni ohikhala ooceecheya nthowa na makacamiho ahu. (Salumu 27:1, 14; Saweriwa T’arummwa 24:15) Koma wakhala wi ninnachuna wi ewehereryo ahu enikhapelele, eyo enaphwanela okhala yeeparipari wa hiyo. Nnaphwanela onwara “kapesete” mmuruni mwahu, ohiya ompharela mmatani!

17, 18. (1) Satana onaneeriha hai omurula kapasete ahu? (2) Nni nooniherye hai wi hanneemererya ohuwelihiwa ni Satana?

¹⁷ Mmukhalelo taani Satana oneereiye aneerihe omurula kapasete ahu? Nkuupuwelani vooloca sa yeeyo eerenryeiye ompakela Yesu. Satana aahisuwela wi Yesu aahaala okhala mulamuleli a achu. Koma voopacerya, Yesu aaphwanela ohooseya ni okhwa. Voocharela aaphwanela oweherya wi akhale Mwene ophiyerya elukuluku Yehova aathanlileiye. Mwawiihiiha Satana aahimvaha Yesu ekari wi alamulele mwawaakuveya. Satana aahiroromeliha wi wakhala wi Yesu oopaka mukhalelo mmoha wa olapela, owo aahaala okhala mulamuleli a elapo mwawaakuveya. (Luka 4:5-7) Satana oosuwelatho wi Yehova oonilaiherya onivaha ichu saphaama mu elapo evyaani. Koma nnaphwanela owehererya yoororomeliha yeela wi yaakhwanele, nave mu elukuluku emohamoha nnamukhalano makacamiho mancipale. Mwa yeela Satana onnanivaha ekari wi nikhaleno okumi wookhapeleleya hiihaano. Owo onachuna wi nihele soochuna sahu soomwiilini va nipuro noopacerya nave Omwene wa Muluku vanipuro nanaawiili.—Mateu 6:31-33.

 ¹⁸ Amiravo ni asimwali ancipale haneemererya ohuwelihiwa ni Satana. Ntoko yootakiherya, Kiyana, yoowo orino iyaakha makhumi meeli ooloca: “Koosuwela wi pahiru Omwene wa Muluku toni omaliha makacamiho ahu oothene.” Ewehereryo awe enavolowela hai mukhalelo onuupuweleiye ni onakhaleiye? Eyo ennamukhaviherya wuupuwela wi ichu mu elapo yeela tiseelukuluku vakhaani. Ohiya opaka owetha woothene wi akhaleno muteko wavasulu mu elapo yeela, Kiyana onnapharihela elukuluku awe ni ikuru wi amurumeele Yehova.

19, 20. Nni niwerye hai okhalano mavyakelo mu opharihela Masu a Muluku?

¹⁹ Akhoco o Roma yaanapharihela nsipaaca noorakama emeya ya meeturu nimoha. Akhoco awo yaanakhalano mavyakelo a opharihela nsipaaca naya nthowa nawi yaanapharihela nlo nihiku ti nihiku.

²⁰ Murummwa Paulo aahiloca wi Masu a Muluku ari ntoko nsipaaca. Yehova oonivaha Masu awe. Nto nnaphwanela ohuserya mukhalelo wa opharihela phaama wi niwerye waakiha nroromelo nahu naari otoroka mukhalelo nnuupuwelaahu. (2 Korinto 10:4, 5; 2 Timóteo 2:15) Muni nwerye hai orehererya mavyakelo anyu? Sepastiyau yoowo orino iyaakha 21 ooloca: “Kaanarepela eciciri emoha mu ecima ti ecima mu omwaalakhanya waka Piipiliya. Kaahirepela iciciri saakisivela.” Eyo ennamukhaviherya wiiwexexa phaama mukhalelo Yehova onuupuweleiye. Taniyeli onnaaceererya: “Elukuluku kinamwaalakhanyaaka Piipiliya, kinnarepela iciciri seiyo kinuupuwelaaka wi inahaala waakhaviherya achu kinaaphwanyaaka mmuteko woolaleerya. Kinnoona wi achu annaakhulela phaama vaavaa anawoonaaya wi onnooniherya oreera murima vooloca sa Piipiliya nave onnapaka owetha waa wi waakhaviherye.”

21. Ntakhara heeni hannaphwanela omoova Satana ni masololo?

²¹ Hiiha ntoko nihusenryaahu orweela wa sootakiherya sa amiravo ni asimwali mmwaha yoola, hannaphwanela omoova Satana ni masololo. Eparipari wi awo toowerya, koma tahi ooweryaxa ompwaha Yehova. Nave heni ekhale okhala wookhala. Awo anahaala owaleliwa nave heni ewerye onihoosa variyari va Iyaakha Masanaru Khumi sa Olamulela wa Kristu, nave voocharela awo anahaala otolosiwa. (Wupulula 20:1-3, 7-10) Hiyaano noomusuwela mwiicani ahu, soohuweliha sawe, ni soolakelela sawe. Nnikhaviheryo na Yehova nnanwerya okhala aweemeleleya!