1, 2. (1) Ntakhara heeni ninnalipiheya orweela wa anna ni arokora yaawo anatitelela olaleerya mu ikulucu achu ancipale ahinaawiriyanaaya? (Moone eruku yoopacerya.) (2) Tiheeni Yesu otharinheiye vooloca sa muchu olaleerya “mwelaponi” mwawe? (Moone masu avathi.)

SERXIYU NI MWAARIYE OLINTA mapiyoneero o Estatu Unitu. Oopiili arino iyaakha opwaha makhumi mathanu namararu. Nthowa na wiicela wa meco saya onakhala woovila weeca. Hiiha ntoko yeeraaya mu iyaakha sincipale, awo annaya oneemesiwavo ikaaro waawaaciwavo mu epooma aya ewora ya neethanu napiili ya wooxixelo. Mpuro aya onakhala waacamela oneemesiwavo ikaaro nave annavaha soolaleeryiwa sahu wa achu aneeca makupa yaale. Achu ancipale hanaapwacha, koma Serxiyu ni Olinta annatitelela okhala vanipuroni vaya nave annatheya wa achu yaale anaaweha. Othana vakhaani vakhaani annakookela owaani. Woosiiselo wa nihiku noocharela, saakhwanaka iwora thanu napiili, awo annakookela vanipuroni oneemesiwavo ikaaro. Awo annatitelela olaleerya mahiku mathanu nammoha woosiiselo wa esumana ti esumana, variyari va eyaakha.

² Moolikana ni Serxiyu ni Olinta, aakhalavo anna ni arokora ancipale oororomeleya yaawo analaleerya mu ekulucu  aya mu iyaakha sincipale, naamwi achu ancipale ehaawiriyanaka. Akhweya nyuwaano munalaleerya mu ekulucu ntoko yeeyo. Yaari hiiha, ninnoothamalelaani, nthowa na ovilela wanyu ni otitelela olaleerya naamwi okhalaka woovila. * (Moone masu avathi.) Yootakiherya anyu ennaalipiha anna ni arokora ancipale, ophiyeryatho yaale amalinhe iyaakha elaleeryaka. Moone yeeyo ooweherya a ikulucu akina aloncaaya: “Vaavaa kinalapaaka vamoha ni anna ni arokora ancipale mmuteko woolaleerya, kinnalipiheya moorweela wa yootakiherya aya.” “Ororomeleya waya onnakilipiha okhala oovilela ni okhala oolipa murima mmuteko woolaleerya.” “Yootakiherya aya ennalipiha murima aka.”

3. Makoho taani mararu nnahaalaahu othokororya, nave ntakhara heeni?

³ Mmwaha yoola nnahaala waakhula makoho mararu: Ntakhara heeni ninnakhala ooceecheya mu ilukuluku ikina? Ovaha sawiima onataphulela eheeni? Tiheeni eni enikhaviherye otitelela ovaha sawiima nuuvilela? Osuwela maakhulo a makoho yaala enahaala onilipiha otitelela opaka muteko woolaleerya yoowo Yesu onivanheiye.

4. (1) Moonelo woonanara wa Ayuta ancipale, waamvolowenle hai Paulo? (2) Ntakhara heeni ayaaka woona mmukhalelo yoola?

⁴ Mohintoko okhala ooceecheya nthowa nawi achu mu ekulucu anyu hanachuna owiriyana muchaka wa Omwene? Waakhanle wi ti hiiha, munanwerya wiiwexexa mukhalelo murummwa Paulo onneiye. Yene aahimaliha iyaakha makhumi mararu alaleeryaka, nave aahaakhaviherya achu ancipale okhala Akristu. (Saweriwa T’arummwa 14:21; 2 Korinto 3:2, 3) Nlelo, haawenrye waakhaviherya Ayuta ancipale okhala Akristu. Ohiya yeeyo, ancipale a yaawo yaahikhooca onwiriyana Paulo, nave akina yaahimwiikara. (Saweriwa T’arummwa 14:19; 17:1, 4, 5, 13) Paulo oonne hai mukhalelo yoola woonanara? Owo aahiloca: “Murima aka wòtepa okìna ni kòkhalano witxela murima ohinakihiya.” (Aroma 9:1-3) Ntakhara heeni ayaaka okhala mmukhalelo yoola? Nthowa nawi mweeparipari aanasiveliwano olaleerya nave aanaasivela achu. Paulo aanaapwacha Ayuta nave owo aahithanana owoona awo ekhoocaka ikharari sa Muluku.

5. (1) Tiheeni enanceenyerya olaleerya? (2) Ntakhara heeni ti wookhweya okhala ooceecheya mu ilukuluku ikina?

⁵ Moolikana ni Paulo, ninnaalalerya achu nthowa nawi ninnaapwacha nave ninnachuna waakhaviherya. (Mateu 22:39; 1 Korinto 11:1) Ninnasuwela orweela wa yaweereya ahu wi omurumeela Yehova mukhalelo waphaama wa okhala. Nave nnachuna waakhaviherya akina woona ophiyerya mweeryo taani okumi aya waahaalaaya okhala waphaamaxa! Ti nthowa nene nnatitelelaahu waaceenyerya ohuserya eparipari vooloca sa Yehova ni yookhwela awe ntakhara achu. Eyo eri ntoko wi nnaaruuhela yamahala yaphaama naaleelaka wi: ‘Khwoo akhelani ela.’ Mwawiihiiha vaavaa anakhoocaaya yamahala yeela, ti wookhweya okhala ‘awitxeliwa murima’ hiiha ntoko Paulo aakhanleiye. Ninnoona wiicela yoola, ohiya nthowa nawi nooyeleela nroromelo, koma nthowa nawi chiryene ninnaasivela achu. Mwawiihiiha naamwi ilukuluku ikina nikhalaka ooceecheya, ninnatitelela olaleerya. Nnanwerya weemererya masu a Elena, ori piyoneera mu iyaakha makhumi meeli  ni iyaakha thanu, yoowo olonce: “Kinoona muteko woolaleerya okhala woovila. Naamwi hiiha, hiwaavovo muteko mukina kaahaalaaka ophara opwaha yoola.”

6. Nikoho taani nnahaalaahu waakhula hiihaano?

⁶ Ntakhara heeni ninnaphwanela ororomela wi nnamukhumelela phaama mmuteko ahu woolaleerya moohipwacha weiwo nnalaleeryahuwo? Wi naakhule nikoho nenla nookhweleya, hankooni nthokororye maphwanaphwaniho meeli a Yesu yaawo owo aalonceiye ochuneya waya ‘wimiha’ mmiso. (Mateu 13:23) Niphwanaphwaniho noopacerya nnaloca sa mwiri.

7. (1) Mu niphwanaphwaniho na Yesu taani onamweemelela “namalima,” “mwiri” ni “mirai”? (2) Nikoho taani nlelo nnachunaahu waakhula?

⁷ Mwaalakhanye Yohani 15:1-5, 8. Mu niphwanaphwaniho nenla, Yesu aahithariha wi Yehova tori “namalima” Yesu tori “mwiri” nave amuhuserya awe tari “mirai.” * (Moone masu avathi.) Voocharela Yesu aahaaleela amuhuserya awe: “Nyuwo mwavahaka sawima sintxipale, Atithi aka annavuwihiwa, nave hiha muneranyu mukhale amuhuseryaka.” Vano ovaha sawiima enataphulela eheeni? Mu niphwanaphwaniho nenla, Yesu halonce mooluluwanya yawiima eyo, koma owo oovaha yawooniherya enanikhaviherya ophwanya naakhulo na nikoho nla.

8. (1) Mu niphwanaphwaniho na Yesu, ntakhara heeni ‘ovaha sawima’ honataphulela waapaka amuhuserya avyaani? (2) Teevi eri echu yookhweleya wa soothene Yehova onanivekeiye opaka?

⁸ Yesu oothariha vooloca sa Tiithi awe: “Awo annakwasa murai ori mwa miyo ohinavaha sawima.” Mmasu makina, nnanwerya okhala alapeli a Yehova pahiru wakhala wi ninnavaha sawiima. (Mateu 13:23; 21:43) Mwawiihiiha, mu niphwanaphwaniho nenla ovaha sawiima honataphulela waapaka amuhuserya avyaani. (Mateu 28:19) Waakhanle wi ti hiiha, Anamoona oororomeleya yaawo ahintoko omukhaviherya muchu okhala muhuserya a Kristu yaahaala okhala ntoko mirai sihinavaha sawiima. Nto ela tahi eparipari! Ntakhara heeni? Nthowa nawi hannaakhinyererya achu okhala amuhuserya. Yehova toosivela. Owo hananiveka opaka echu nihinaweryaahu. Owo onaniveka pahiru yeeyo nnaweryaahu opaka.—Malamulo 30:11-14.

9. (1) Mmukhalelo taani nnavahaahu sawiima? (2) Niphwanaphwaniho taani nnahaalaahu othokororya voocharela?

⁹ Vano, ovaha sawiima onataphulela eheeni? Eyo eri echu oothene ahu nnaphwanelaahu opaka. Muteko taani Yehova aavanheiye alapeli awe oothene? Olaleerya michaka saphaama sa Omwene wa Muluku. * (Moone masu avathi.) (Mateu 24:14) Niphwanaphwaniho na Yesu na mmiso ninnahiya vanlakani mwaha yoola. Hankooni nthokororye niphwanaphwaniho nla voocharela.

10. (1) Ichu taani ineemelela mmiso ni echaya mu niphwanaphwaniho na Yesu? (2) Tiheeni mwiri wa tiriku onavahaaya?

¹⁰ Mwaalakhanye Luka 8:5-8, 11-15. Mu niphwanaphwaniho na Yesu vooloca sa mmiso, owo aahithariha wi mmiso ti “nsu na Muluku,” naari michaka vooloca sa Omwene wa Muluku. Echaya ti mirima sa achu. Mmiso yoole waamorenle vachayani yawuucelana waamela, waahinnuwa phaama, nave waahikhala mwiri. Voocharela, mwiri ‘wavaha  sawima sintxipale.’ Waakhanle wi mwiri waari wa tiriku, sawiima sa mukhalelo taani owo waahaalaaya ovaha? Apwanne waahaala ovaha miri mikhaani sa tiriku? Hooye, owo waahaala ovaha mmiso, yoowo ohoolo waya waahaala wunnuwa ni okhale miri sa tiriku. Mu niphwanaphwaniho nenla, mmiso mmoha waavaha sawiima sincipale. Tiheeni ela enanihusihaaya vooloca sa muteko ahu woolaleerya?

11. (1) Niphwanaphwaniho na mmiso tiheeni nnanihusihaaya vooloca sa muteko ahu woolaleerya? (2) Mukhalelo taani nnavahaahu mmiso muvyaani?

¹¹ Elukuluku asitiithi ahu Eekristu naari Anamoona akina yaanihusinhaaya wuupaceryani vooloca sa Omwene wa Muluku, yaari ntoko wi awo yanle mmiso va echaya yawuucelana. Awo yaahitepa ohakalala woona wi naahaakhela muchaka. Mmiso ole waahititelela wunnuwa moohihiyererya ophiyerya waakhwanela ovaha sawiima. Nave hiiha ntoko mwiri wa tiriku olociwe ohinavahaaya miri mivyaani, nto mmiso muvyaani, hiyaano hinnaapaka amuhuserya avyaani, koma mmiso muvyaani. * (Moone masu avathi.) Nneerano hai yeela? Elukuluku eri yoothene nnaaleelaahu achu vooloca sa Omwene wa Muluku, eyo eri ntoko wi nnaaceererya ni wunnuwiha mmiso yoowo waaliwe mmurimani mwahu. (Luka 6:45; 8:1) Mwawiihiiha elukuluku nnatitelelaahu olaleerya Omwene wa Muluku, ninnavaha “sawima nuvilela.”

12. (1) Tiheeni nnahuseryaahu orweela wa niphwanaphwaniho na Yesu vooloca sa mwiri ni mulipa oomisa? (2) Nihusiheryo nla nnaweerihaani woona hai?

¹² Tiheeni nnahuseryaahu orweela wa niphwanaphwaniho na Yesu vooloca sa mwiri ni mulipa oomisa? Ninnahuserya wi “ovaha sawima” honataphulela waakhanle wi achu annawiriyana muchaka. Ovaha sawiima onarweela mu otitelela olaleerya. Paulo aahiloca echu yoolikana ni yeela vaava aatharinheiye: “Mutxhu ti mutxhu onamwakhela nlivelo ntoko malapelo awe.” (1 Korinto 3:8) Yehova onahaala onchuwela ntakhara muteko ahu, ohiya nthowa na sookhumelela sa muteko ahu. Matilta yoowo onarumeela ntoko piyoneera mu iyaakha makhumi meeli, ooloca: “Osuwela wi Yehova onnareeliha wiilipiserya wahu, ela ennakivaha ohakalala.”

13, 14. Mwawiiwanana ni Aroma 10:1, 2, taavi yaari mathowa yaamweerinhe Paulo otitelela olaleerya?

¹³ Tiheeni eni enikhaviherye ‘ovaha sawima nuvilela’? Hankooni nivareryele yootakiherya ya Paulo moopwacha. Noosuwela wi  Paulo aahikhala ooceecheya nthowa na Ayuta okhooca muchaka vooloca sa Omwene. Naamwi hiiha, Paulo haahin’ye waalaleerya. Owo aahithariha mukhalelo ooneiye vooloca sa Ayuta vaava aalonceiye: “Etxhu kinakhwelaka ni murima wothene ni kinanvekaka Muluku mmavekeloni mwaka ti wi Ayuda evuluwe. Miyo kinnawerya ohelela onamona wi yawo àtepa oteteiwa ni itxhu sa Muluku, nto oteteiwa waya honathaleleya phama.” (Aroma 10:1, 2) Vano ntakhara heeni Paulo ayaaka otitelela olaleerya?

¹⁴ Yoopacerya, Paulo olonce wi aahititelela waalaleerya Ayuta nthowa na ‘okhwela ni murima wothene.’ (Aroma 11:13, 14) Mweeparipari Paulo aanachuna wi Ayuta evuluwe. Yanawiili, owo aaloca echu ‘amvekiye Muluku mmavekeloni mwawe’ ntakhara yaawo. Paulo aahimveka Yehova wi amukhaviherye muchu ti muchu a yaawo waakhela muchaka vooloca sa Omwene. Yaneeraru, Paulo ooloca: “Àtepa oteteiwa ni itxhu sa Muluku.” Paulo aahoona saphaama mwa achu ni ophwanelela waya omulapela Yehova. Owo aahisuwela wi Ayuta yaala ooteteiwa yaanwerya okhala amuhuserya a Kristu amvai, hiiha ntoko Paulo.

15. Nni niwerye hai omutakiherya Paulo? Mvahe yootakiherya.

¹⁵ Nni nimutakiherye hai Paulo? Yoopacerya, ninnachuna chiryene waphwanya ‘atxhu othene athanleliwe ekumi yohimala.’ Yanawiili, nimveke Yehova wi aakhaviherye achu arino nchuno wi ewiriyane vaavaa nnaalaleeryaahu. (Saweriwa T’arummwa 13:48; 16:14) Ela ti yeeyo Silvana yoowo onarumeela ntoko  piyoneera waacamela iyaakha makhumi mararu onapakeiye. Owo ooloca: “Kihaakumve ophiya mu ipa sa ekulucu aka, kinnavekela wa Yehova, kimvekaka wi akivahe muupuwelo woophwanelela.” Ninnavekela tho wi ankeelo enikhaviherye waaphwanya achu yaawo anahaala oniwiriyana. (Mateu 10:11-13; Wupulula 14:6) Ropertu yoowo onarumeela ntoko piyoneero mu iyaakha opwaha makhumi mararu, ooloca: “Olapa vamoha ni ankeelo yaawo asuwenle echu eneereya wa akaneene a ichoko ti yoohakalaliha.” Yaneeraru, ninneererya woona makupa aphaama mwa achu ni ophwanelela waya omulapela Yehova. Karlo, mutokweene mmoha yoowo opatisiwe mu iyaakha opwaha makhumi mathanu ivirale, ooloca, “Kinnavarerya eneneeryo ekhaani eri yoothene enooniherya nchuno na muchu, akhweya otheya, oweha weepewe, naari nikoho noorweela vathi va murima.” Wakhala wi ninneerano ichu seiya, nnanwerya ‘ovaha sawima nuvilela’ hiiha ntoko Paulo enreiye.

16, 17. (1) Tiheeni nnahuseryaahu orweela mu Eklesiyaste 11:6? (2) Olaleerya wahu onaavolowela hai achu ananoona?

¹⁶ Hannaphwanela ocuwala ophiyerya mweeryo taani olaleerya wahu onaavolowelaaya achu, naamwi okhalaka wi haavo onaniwiriyana. (Mwaalakhanye Eklesiyaste 11:6, Tradução do Novo Mundo.) Achu annanoona. Awo aasuwela wi ninnawara moophwanelela navetho wi naachu a mukhalelo waphaama ni oochekuleyano. Ela enanwerya waatannya murima, nave veelukuluku aya, ophiyerya tho yaale yuupuwela moonanara ntakhara hiyo akhweya anampacerya wuupuwela moophwanelela ntakhara hiyaano. Serxiyu ni Olinta ahoona wi ela ti yeeparipari.

¹⁷ Serxiyu ooloca: “Nthowa na wiiceliwa vano hannawerya oya oneemesiwavo ikaaro naari mano. Elukuluku naakookaahu, alipa oovira yaananikoha eriki, ‘Tiheeni yeeren’ye? Hiniwonneeni.’” Olinta onnaaceererya ni otheya: “Alipa aweeciha ikaaro yaananuuvela mata nave akina yaanakhuwela nlelo eri mmipaco saya mukaaroni eriki, ‘muteko waphaama!’ Ophiyerya wi yaanaveka tho irevista sahu.” Serxiyu ni Olinta yaahitepa otikhina vaavaa yaamonnaaya mulopwana mmoha arwaaka va nipuro yaarivo ekarinya aya ya onamoona, Aavaha mpuphuru wa ithutu, nave aahaathamalela ntakhara muteko yaapakaaya.

18. Ntakhara heeni mulakelenlaanyu ‘ovaha sawima nuvilela’?

¹⁸ Vaavaa nyuwaano ‘muhiniichuwihaanyu mata anyu’ moorweela mwa waaleela akina vooloca sa Omwene wa Muluku, mookhalano nikupa noochuneya mu ovaha “onamona maloko othene.” (Mateu 24:14) Opwaha soothene nyuwaano munanwerya okhalano ohakalala otokotoko nthowa nawi moosuwela wi munnamuhakalaliha Yehova. Owo onnaasivela oothene yaale ‘anavaha sawima nuvilela’!