1. Tiheeni muchu onaphwaneleiye opaka ahaakumve opacerya oteka empa awe?

MWAANYIHERYE wi muchu oolakelela oteka empa. Owo onnasuwela mukhalelo wa empa onachuneiye oteka. Apwanne eyo enataphulela wi onaphwanela ovolowa mu elooxa yoopacerya, athume sootekano wi apacerye oteka? Hooye. Ahaakumve opacerya muteko, yookhalavo echu yoochuneyaxa onaphwaneleiye weera—onaphwanela ocokocela ikhorowa kavi empa eyo enahaalaaya omaliha. Ntakhara heeni? Nthowa nawi onaphwanela osuwela waakhanle wi ookhalano ikhorowa sawaakhwanela wi amaliheno empa. Wakhala wi oocokocela woosiilo ikhorowa inahaala ochuneya, owo onahaala okhumelela phaama ophiyerya omaliha empa awe.

2. Mwawiiwanana ni Luka 14:28-30, tiheeni munaphwanelaanyu wuupuwelela phaama muhaakumve opatisiwa?

² Apwanne munnuupuwela opatisiwa? Akhweya omusivela ni omuthamalela wanyu Yehova wohooceenyeryaani wiiveleela wa Yehova. Mweeparipari, yoolakelela ya opatisiwa enalikana ni muchu onachuna oteka empa. Mwawiihai? Muthokororye masu a Yesu anaphwanyeya mu Luka 14:28-30. (Mwaalakhanye.) Yesu aaloca yeeyo enataphulela okhala oohuserya awe. Wakhala wi ninnachuna omuchara, nnaphwanela okhala ooreheryeya ovilela makacamiho ni ohiya muculi ichu ikina. (Luka 9:23-26; 12:51-53) Mwawiihiiha muhaakumve opatisiwa, munaphwanela wuupuwela moopwacha ichu soothene inavolowelavo okhala oohuserya a Kristu. Eyo enahaala wookhaviheryaani okhala ooreheryeya phaama otitelela omurumeela Muluku ntoko Mukristu oopatisiwa.

3. Tiheeni nnahaalaahu othokororya mmwaha yoola?

³ Apwanne ti yoophwanelela ovilela makacamiho ni ohiya ichu ikina wi mukhale oohuserya a Kristu? Chiryene ti yoophwanelela! Opatiso onnahula mikhora sa mareeliho mancipale—hiihaano ni muhoolo. Mmwaha yoola, nnahaala othokororya makoho makina ookhweleya vooloca sa opatiso. Weerano hiiha onahaala wookhaviheryaani waakhula nikoho nla nnacharela: “Apwanne kooreheryeya wi kipatisiwe?”

4. (1) Wiiveleela tiheeni? (2) Nsu nawi ‘wiikhooca’ nnataphulela eheeni, hiiha ntoko elociwaaya mu Mateu 16:24?

⁴ Wiiveleela tiheeni? Muhaakumve opatisiwa, munaphwanela wiiveleela wa Muluku. Wiiveleela tiheeni? Nri nivekelo nookhuma vathi va murima munampakelaanyu Yehova mmuleelaka wi munachuna opharihela ekumi anyu wi mmurumeele okhala wookhala. Vaavaa muniiveleelaanyu wa Muluku, ‘munniikhooca mukhatiinyu.’ (Mwaalakhanye Mateu 16:24.) Mweerano hiiha munakhala makupa a Yehova, yeeyo eri ekari etokweene. (Aro. 14:8) Nyuwo munamuleela Muluku wi, ovinyerya nihiku nenlo oya ohoolo, echu yoochuneya wa nyuwaano enahaala okhala omurumeela yene, ohiya wiihakalaliha nyuwo aneene. Wiiveleela wanyu nri nlakano— yoororomeliha etokotoko munapakaanyu wa Muluku. Yehova hananikhinyererya opaka yoororomeliha yeela. Nyenya vaavaa nnapakaahu, owo onaweherya wi naakhwaniherye.—Sal. 116:12, 14.

5. Ohiyana taani orivovo variyari va wiiveleela ni opatiso?

⁵ Ohiyana taani orivovo variyari va wiiveleela ni opatiso? Wiiveleela muchu onapaka mu nipuro noovitheya; oneereya variyari va muchu ni Yehova. Nave opatiso oneereya vanlakani; oneereya ohoolo wa achu akina, wiiliwiili va muthukumano wa ekulucu naari wa muceche. Mu opatiso anyu, munnooniherya wa akina wi mohiiveleela wi mmurumeele Yehova. * Mwawiihiiha, opatiso onnaweeriha akina osuwela wi munnamusivela Yehova, Muluku, ni murima anyu woothene, ekumi anyu yoothene, ni ikuru sanyu soothene, navetho wi moolakelela omurumeela yoowo okhala wookhala.—Mar. 12:30.

6-7. Mwawiiwanana ni 1 Pedro 3:18-22, mathowa taani meeli aneeriha opatiso okhala woochuneyaxa?

⁶ Apwanne ti woochuneya chiryene opatisiwa? Muthokororye masu anaphwanyeya mu 1 Pedro 3:18-22. (Mwaalakhanye.) Mwaaceya aanooniherya wa achu oothene wi Nowa aahikhalano nroromelo. Mmukhalelo woolikana, opatiso anyu onnooniherya wa achu wi mohiiveleela wa Yehova. Apwanne opatiso ti woochuneya chiryene? Aai ti woochuneya. Petro oothariha mathowa ene. Noopacerya, ti nawi opatiso “onnoovulushaani.” Nyenya wi opatiso onivuluse, nnaphwanela wooniherya wi nookhalano nroromelo mwa Yesu Kristu. Nnaphwanela wooniherya wi ninneemererya wi owo ookhwa ntakhara hiyo, ooviihiwa mookhwani wi akhale wirimu, nave hiihaano ori o moono woolopwana wa Muluku.

⁷ Yanaawiili, opatiso onnaneeriha okhalano “eleela murima yaphaama.” Vaavaa nniivelelaahu wa Muluku ni opatisiwa, ninnapaceriha onthamwene wavameekhaaya ni Yehova. Moorweela wa ocharuwa wahu ni murima woothene ni nroromelo nahu mu yawoopola, Muluku onnalevelela soocheka sahu. Eyo ennaneeriha okhalano yawuupuserya ya murima yaphaama vamiithoni vawe.

8. Tiheeni enaphwanela okhala mathipelo a yoolakelela anyu ya opatisiwa?

⁸ Yoolakelela anyu ya opatisiwa enaphwanela othipeleya mu eheeni? Ni yoohuserya anyu yawiiseela ya Piipiliya, moohuserya ichu sincipale vooloca sa Yehova—omuchu awe ni meerelo awe. Eyo yootannya murima anyu nave yooweerihaani omusivela vancipale. Mwa yeeyo, omusivela wanyu Yehova onaphwanela okhala mathipelo a yoolakelela anyu ya opatisiwa.

9. Enataphulela eheeni opatisiwa mu nsina na Atiithi na Mwaana ni na Munepa waweela, hiiha ntoko elociwaaya mu Mateu 28:19, 20?

⁹ Echu ekina enoocenyeryaani opatisiwa iri iparipari sa Piipiliya seiyo mweemerenryaanyu. Muthokororye yeeyo Yesu olonceiye vaavaa aavanheiye nlamulo na waapaka oohuserya. (Mwaalakhanye Mateu 28:19, 20.) Mwawiiwanana ni Yesu, oohuserya anaphwanela opatisiwa mu “nsina na Atiithi na mwaana ni na munepa  waweela.” Ela enataphulela eheeni? Wi nyuwo munaphwanela weemererya ni murima woothene iparipari sa Mpiipiliyani vooloca sa Yehova, Yesu, ni munepa waweela. Iparipari seiya ti sakuru nave inanwerya otannya murima anyu mwawiiseela. (Ahe. 4:12) Hankooni nuupuwelele ikina sa seiho.

10-11. Iparipari taani vooloca sa Tiithi muhusenryaanyu ni mweemererya?

¹⁰ Munnuupuwela elukuluku mwaahusenryaanyu eparipari vooloca sa Tiithi? Ntoko yootakiherya, wi ‘nsina nawe ti Yehova,’ owo ti “Awirimurimu velaponi yothene ya vathi,” nave wi yooworu tori “Muluku eeparipari.” (Sal. 83:18, NN; Yer. 10:10) Owo tori Mpatuxa ahu, nave wi “ovulusha ti wa Yehova.” (Sal. 3:8; 36:9) Owo oophwanya mukhalelo wa onivuluxa mu yoocheka ni okhwa nave onnanivaha ewehereryo ya okhala wookhala. (Yoh. 17:3) Waakhala wi mohiiveleela ni opatisiwa, munahaala osuweliwa ntoko Namoona a Yehova. (Isa. 43:10-12) Nyuwaano munahaala opaka makupa a emusi ya elapo yoothene ya alapeli a Muluku. Mu emusi yeeyo, muchu ti muchu onniirumiha nthowa na wiichaniwa ni nsina na Muluku ni waakhaviherya tho akina osuwela nsina nenla.—Sal. 86:12.

¹¹ Nkuupuwelani ekari muryaanyuno: owerya wiiwexexa yeeyo Piipiliya onaloceiye sa Tiithi! Vaavaa muneemereryaanyu iparipari seiha sasisapo, murimaanyu onamooceenyeryaani wiiveleela wa Yehova ni opatisiwa.

12-13. Iparipari taani vooloca sa mwaana muhusenryaanyu ni mweemererya?

¹² Monne hai vaavaa mwaahusenryaanyu iparipari sinacharela vooloca sa Mwaana? Yesu muchu anaawiili ookhweleyaxa mu soopatuxiwa soothene. Owo Moopoli ahu. Ni wiiveleela, oovaha ekumi awe ntakhara hiyo. Vaavaa nnooniheryaahu mu saweera wi nookhalano nroromelo mu woopola, nnanwerya oleveleliwa soocheka sahu, okhalano onthamwene waphaama ni Muluku ni ophwanya ekumi yoohimala. (Yoh. 3:16) Yesu Namukucho ahu Mutokotoko. Owo onachuna onikhaviherya waakhela mareeliho a woopola ni okhalano onthamwene waphaama ni Muluku. (Ahe. 4:15; 7:24, 25) Owo Mwene a Omwene wa Muluku navetho ti yoowo Yehova oneereiye ampharihele wi eelihe nsina nawe, omaliha sootakhala ni oruuha mareeliho oohimala mu Parataiso. (Mat. 6:9, 10; Wup. 11:15) Yesu yootakiherya yaphaama nnaphwanelaahu ochariha. (1 Ped. 2:21) Owo oonihusiha ni yootakiherya awe yootaphulela ya opharihela okumi wi nipake yookhwela ya Muluku.—Yoh. 4:34.

¹³ Vaavaa muneemereryaanyu yeeyo Piipiliya onahusiheiye vooloca sa Yesu, nyuwo munnahuserya omusivela mwaana oosiveliwa a Muluku. Osivela yoowo onnooceenyeryaani opharihela ekumi anyu wi mweere yookhwela ya Muluku, hiiha ntoko Yesu enreiye. Weerano hiiha, ennaweerihaani okhalano nchuno na wiiveleela wa Yehova ni opatisiwa.

14-15. Iparipari taani vooloca sa Munepa waweela muhusenryaanyu ni mweemererya?

¹⁴ Monne hai vaavaa mwaahusenryaanyu iparipari sinacharela vooloca sa munepa waweela? Munepa waweela tahi muchu, nyenya ikuru soophara muteko sa Muluku. Yehova aahipharihela munepa waweela wi aaveerele alipa oomurepa Piipiliya, nave munepa yoowo onnanikhaviherya wiiwexexe ni opharihela muteko yeeyo nnaalakhanyaahu Mpiipiliyani. (Yoh. 14:26; 2 Ped. 1:21) Moorweela wa munepa awe waweela, Yehova onnanivaha “owerya wene woopwaha.” (2 Kor. 4:7) Munepa waweela onnanivaha ikuru wi nlaleerye michaka saphaama, owaniha ni saweeha, ovilela ni wuukhuwa ni ovootha makacamiho. Munepa waweela onnanikhaviherya wooniherya mikhalelo sooreera seiyo inapaka makupa a “yawiima ya munepa.” (Gal. 5:22) Yaale anamuroromela Muluku nave anaveka munepa waweela annaakhuliwa mwa mahala.—Luka 11:13.

¹⁵ Ti yoohakararya osuwela wi alapeli a Yehova ananwerya ororomela nikhaviheryo na munepa  waweela wi emurumeele Muluku! Vaavaa muneemereryaanyu yeeyo Piipiliya onahusiheiye vooloca sa munepa waweela, munnaceenyeryeya wiiveleela wa Muluku ni opatisiwa.

16. Tiheeni nihusenryaahu mmwaha yoola ophiyerya vaava?

¹⁶ Yoolakelela ya wiiveleela wa Muluku ni opatisiwa mwaha mutokweene. Ntoko nonnaahu, vaavaa muneeranyuno eyo, munaphwanela okhala ooreheryeya weemererya ichu soothene inavolowelavo—ovilela makacamiho ni ohiya muculi ichu ikina. Nyenya mareeliho munahaalaanyu waakhela annavirelela ichu soothene munahaalaanyu ohiya muculi. Opatiso onanwerya woovuluxaani ni wookhaviheryaani okhalano yawuupuxerya-ya-murima yaphaama vamiithoni va Muluku. Nthowa nookhweleya na olakelela opatisiwa onaphwanela okhala omusivela wanyu Yehova Muluku. Navetho munaphwanela weemererya ni murima woothene iparipari muhusenryaanyu vooloca sa Tiithi, Mwaana, ni munepa waweela. Yeeyo nimanlaahu woona ophiyerya vaava, mwaahaala waakhula hai nikoho: “Apwanne kooreheryeya wi kipatisiwe?”

17. Ichu taani inahoolela opatiso?

¹⁷ Wakhala wi munoona wi mooreheryeya wi mpatisiwe, moohikhwa minikwa moopaka sincipale wi muteke onthamwene waphaama ni Yehova. * Moorweela wa yoohuserya anyu yookilaatheya ya Piipiliya, moosuwela sincipale vooloca sa Yehova ni Yesu. Nyuwo mohunnuwiha nroromelo. (Ahe. 11:6) Nyuwaano mookhalano nroromelo nawaakhwanela mu soolaiherya sa Yehova seiyo siri Mpiipiliya, nave munnaroromela wi nroromelo mu mukucho oveleeliwe ni Yesu onanwerya woovuluxaani mu yoocheka ni okhwa. Nyuwo moocharuwa soocheka sanyu, mookhalano ekeerelani soocheka mpankaanyu khalai nave momveka Yehova nikhurumuwelo wa seiyo. Nyuwo moorukunusa ekumi anyu; moohiya oculi meerelo ookumi yaawo mwaaraanyuno nave moopacerya okhala mmukhalelo yoowo onamuhakalaliha Muluku. (Saw. 3:19) Nyuwo mwaahikhalano nchuno waaleela akina vooloca sa nroromelo nanyu. Mwa yeeyo, moheerano yeeyo yaari yookhweleya wi mukhale mulaleeryi oohipatisiwa nave mpacerya olaleerya vamoha ni muloko. (Mat. 24:14) Yehova ootepa wiirumiha ni nyuwaano nthowa na weerano soothene seiha. Mootepa ohakalaliha murima awe.—Masi. 27:11.

18. Ichu taani ikina munaphwanelaanyu opaka muhaakumve opatisiwa?

¹⁸ Muhaakumve opatisiwa, munaphwanela weera ichu ikina. Ntoko nonnaahu, nyuwaano munaphwanela wiiveleela wa Muluku. Wiiphini, mpake nivekelo nookhumela vathi va murima ntakhara Yehova nave mmuroromelihe wi munahaala opharihela ekumi anyu wi mweereno yookhwela awe. (1 Ped. 4:2) Voocharela, mmuleele oohoolela a nikhuuru na atokweene a muloko anyu wi munachuna opatisiwa. Owo onahaala waaveka atokweene akina wi ethukumane ni nyuwaano. Nyenya hamunaphwanela woova. Atokweene  awo oosivela ahoosuwelaani nave annoosivelaani. Awo anahaala wuuluulela ni nyuwaano mahusiheryo ari mathipelo a Piipiliya yaawo muhusenryaanyu. Atokweene pahiru anachuna weerela onamoona wi nyuwaano munniiwexexa mahusiheryo a Piipiliya nave wi moosuwela okhweleya waya wiiveleela ni opatiso. Wakhala wi aheemererya wi moophwanelela, awo anahaala wooleelaani wi munaphwanela opatisiwa o muthukumano wa ekulucu naari wa muceche onoorwa.

19-20. Tiheeni munaphwanelaanyu weera mmanle opatisiwa, nave muni mweereno hai eyo?

¹⁹ Mmanle opatisiwa, tiheeni munaphwanelaanyu opaka? * Muupuwele wi wiiveleela nlakano, nave Yehova onaweherya wi mukhwaaniherye. Nthowa na yeeyo, mmanle opatisiwa, munaphwanela okhalaka mwawiiwanana ni wiiveleela wanyu. Muni mweereno hai?

²⁰ Echu yoopacerya, mutitelele othukumana ni muloko anyu. Mwamala opatisiwa, munahaala opaka makupa a onna wa elapo yoothene. (1 Ped. 2:17) Anna ni arokora a mmulokoni anahaala okhala amusi anyu oomunepani. Mwaahinacompela mithukumano, munahaala okhalano onthamwene woolipa ni yaawo. Yanaawiili, mwaalakhanyeke masu a Muluku mahiku oothene ni wuupuwelela. (Sal. 1:1, 2) Mmanle waalakhanya nikupa nimoha na Piipiliya, mwiivahe elukuluku wi muupuwelele mwawiiseela yeeyo mwaalakhannyaanyu. Mmukhalelo yoola, masu a Mpiipiliyani anahaala ovolowa mmurimani mwanyu. Yaneeraru, “mvekeleke [moohihiyererya].” (Mat. 26:41) Vaavaa munavekelaanyu ni murima woothene, munnamwaacamela Yehova. Yaneexexe, “mutitelele waavya woopaceryani Omwene wa Muluku.” (Mat. 6:33, TNM) Munanwerya weerano eyo moorweela wa ohela muteko woolaleerya mu nipuro noopacerya mu okumi anyu. Vaavaa munayaanyu mmuteko woolaleerya moohihiyererya, nroromelo nanyu ninnakhala noolipa. Nave munnakhalano ekari ya waakhaviherya akina ophwanya ephiro ya wookumini woohimala.—1 Tim. 4:16.

21. Opatiso anyu onahaala ohula mikhora sa eheeni?

²¹ Yoolakelela ya wiiveleela wa Yehova ni opatisiwa echu yookhweleyaxa munayaanyu opaka muukumini mwanyu. Eparipari wi sookhalavo ichu ikina inavolowelavo. Nyenya apwanne ti yoophwanelela? Moohikhwa minikwa! Makacamiho munahaalaanyu okumanano mu elapo yeela yawuuluvala ti “ooveya [ni] eelukuluku tonto.” (2 Kor. 4:17) Mmakupa makina, opatiso anyu onahaala ohula milako sa okhalano ekumi yoohakalala hiihaano ni “okumi weeparipari” muhoolo. (1 Tim. 6:19) Mwa yeeyo, muupuwele phaama nave mvekele wi musuwele mukhalelo munahaalaanyu waakhula nikoho: “Apwanne kooreheryeya wi kipatisiwe?”