1. Tiheeni Eklesiyaste 3:1, 7, onanihusiheiye?

AKINA a hiyo annasiveliwa oloca vancipale. Nyenya akina anakhala oomaala. Hiiha ntoko yoorepa ya mwaha ola enooniheryaaya, aakhalavo makupa meeli, elukuluku yooloca ni elukuluku yoomaala. (Mwaalakhanye Eklesiyaste 3:1, 7.) Akhweya naamusiveliwa wi anna ni arokora ahu akina eloceke vancipale. Navetho naamusiveliwa wi akina eloceke vakhaani.

2. Taani orino ophwanelela wa otikitherya malamulo vooloca sa elukuluku ni mukhalelo wa oloca?

² Oloca yamahala yoorweela wa Yehova. (Muk. 4:10, 11; Wup. 4:11) Orweela Mmasu awe, Yehova onnanikhaviherya wiiwexexa mukhalelo wa opharihela moophwanelela yamahala yeela. Mmwaha yoola nnahaala othokororya sootakiherya sa Mpiipiliyani seiho sinahaala onikhaviherya osuwela elukuluku yooloca ni elukuluku yoomaala. Nnahaala ohuseryatho mukhalelo Yehova onooneiye vooloca sa yeeyo nnalocaahu ni akina. Voopacerya, hankooni nthokororye elukuluku nnaphwanelaahu oloca.

3. Mwawiiwanana ni Aroma 10:14, elukuluku taani nnaphwanelaahu oloca?

³ Ilukuluku soothene nnaphwanela okhala ooreheryeya oloca sa Yehova ni Omwene awe. (Mat. 24:14; mwaalakhanye Aroma 10:14.) Vaavaa nneeraahuno, ninnamutakiherya Yesu. Nthowa nimoha noochuneyaxa naamweerinhe Yesu orwa veelaponi yavathi, waari waaleela akina eparipari vooloca sa Tiithi awe. (Yoh. 18:37) Nyenya nnaphwanela wuupuwela wi mukhalelo nnalocaahu ti woochuneya tho. Mwa yeeyo, elukuluku nnalocaahu ni akina sa Yehova, nnaphwanela weerano eyo ‘moopisha murima naacicimihaka,’ nave nnaphwanela othokororya moonelo ni soororomela sa akina. (1 Ped. 3:15, 16) Neerano hiiha nnahaala opaka sincipale ohiya pahiru oloca; nnahaala ohusiha nave akhweya ophiyerya otannya mirima sa achu.

4. Mwawiiwanana ni Masiposipo 9:9, malocelo ahu eni yaakhaviherye hai akina?

 ⁴ Atokweene hanaphwanela woovelela oloca wakhala wi ahoona wi munna naari murokora onnachuneya ovahiwa ekano. Naamwiihiiha, awo anaphwanela othanla elukuluku yoophwanelela ya oloca wi ehimuulihe muru muchu owo. Awo anaphwanela oweherya elukuluku achu akina ahiryaayavo. Ilukuluku soothene atokweene anniilipiserya oloca mmukhalelo yoowo onamucicimiha oowiriyana aya. Naamwiihiiha, awo hanahiyererya owooniherya akina malakiheryo a Mpiipiliyani yaawo anahaala waakhaviherya opaka ichu mwa miruku. (Mwaalakhanye Masiposipo 9:9.) Ntakhara heeni oryaaya woochuneya okhala oolipa murima wi nloce wakhala woochuneya? Muthokororye sootakiherya piili soohiyana. Yootakiherya emoha, ti ya mulopwana yoowo onaphwanela waalaka anaawe, nave ekina, muthiyana aalonce ni mwene yoowo aahaala olamulela ohoolo waya.

5. Elukuluku taani Mutokweene a Anamukucho Eli ahaalonceiye?

⁵ Mutokweene a Anamukucho Eli aahikhalano anaawe apiili yaawo aasiveleiye vancipale. Anamwane awo, hiyaamucicimiha Yehova. Awo yaahikhalano murici mutokweene wa orumeela ntoko anamukucho mu tapernaakulu. Nyenya awo yaahipharihela moonanara owerya waya, yooniheryaka munyemu mutokotoko soovaha seiho aapakeliweiye Yehova, nave yaanapaka ocapaheya mootaphuwa. (1 Sam. 2:12-17, 22) Mwawiiwanana ni Nlamulo na Mose, anamwane a Eli yaaphwanela okhwa, nyenya Eli aalaka mweepewe nave aahiweemererya otitelela orumeela mu tapernaakulu. (Malam. 21:18-21) Yehova oonne hai vooloca mukhalelo Eli aahoolenleiye mwaha ole? Owo aahiloca wa Eli: “Ntakhara sheeni onaacicimihaa anaa okipwaha miyo?” Voocharela Yehova aahilakelela owiipha alopwana ale oonanara murima.—1 Sam. 2:29, 34.

6. Tiheeni nnahuseryaahu orweela wa Eli?

⁶ Ninnahuserya echu yoochuneya orweela wa Eli. Wakhala wi noomoona nthamwene naari Mmusi ahu ananarihaka nlamulo na Muluku, nnaphwanela olocano, nimuupuseryaka malakiheryo a Yehova. Voocharela nnaphwanela ororomela wi ohaakhela nikhaviheryo nenlo onachuneiye orweela wa ahooleli a Yehova. (Tiy. 5:14) Nihirwe nikhale ntoko Eli, omucicimiha nthamwene naari mmusi ahu opwaha omucicimiha Yehova. Onnachuneya olipa murima wi nloce ni muchu yoowo onachuna wookololiwa, nyenya wiilipiserya wahu weerano eyo onamukhalano sookhumelela saphaama. Moone ohiyana orivovo variyari va yootakiherya ya Eli ni muthiyana yoowo aari Muisarayeli iichaniwa Apikayeli.

7. Ntakhara heeni Apikayeli aahiloca ni Tavite?

 ⁷ Apikayeli aari mwaara a Napali, yoowo aari mulopwana ooreela. Elukuluku Tavite vamoha ni alopwana awe yaamuchawaaya Mwene Sawuli, awo yaahimaliha elukuluku ni akukhula a Napali ekhapelelaka muhuwo awe wi ohiiyiwe ni ampava. Apwanne Napali aahithamalela nikhaviheryo naya? Hooye. Elukuluku Tavite aarummeiye alopwana aareiyeno wi yaveke yoolya vakhaani ni maahi, Napali aahinyeenyeya vancipale ophiyerya waaphuca. (1 Sam. 25:5-8, 10-12, 14) Ntoko yookhumelela, Tavite aahilakelela omwiipha Napali ni alopwana oothene aareiyeno. (1 Sam. 25:13, 22) Epahu ntoko yeeyo yaahaala osepiwa hai? Apikayeli aahisuwela wi eyo yaari elukuluku ya oloca, mwawiihiiha moolipa murima owo aacimula wi akumane ni alopwana 400 ooreheryeya yaawo yaavoliwe etala, yaanyeenyen’ye, nave aahiloca ni Tavite.

8. Tiheeni nnahuseryaahu orweela wa yootakiherya ya Apikayeli?

⁸ Vaavaa Apikayeli aakumanneiye ni Tavite, owo aahilocano moolipa murima, mwancicimiho, ni moolekecha. Naamwi ahaari Apikayeli aatannyile mwaha woonanara, aahimveka nikhurumuwelo Tavite. Apikayeli aahiloca mikhalelo saphaama seiyo Tavite aareiyeno, nave owo aahimuroromela Yehova wi amukhaviherye. (1 Sam. 25:24, 26, 28, 33, 34) Moolikana ni Apikayeli, nnaphwanela okhala oolipa murima wi nloce wakhala wi noomoona muchu apakaka echu yaahaala omweeriha opaka yoocheka etokotoko. (Sal. 141:5) Nnaphwanela okhala ancicimiho, nyenya nnaphwanela tho okhala oolipa murima. Vaavaa moosivela nnamvahaahu muchu ekano yoochuneya, ninnooniherya wi na nthamwene eeparipari.—Masi. 27:17.

9-10. Tiheeni atokweene anaphwanelaaya wuupuwela vaavaa anaavahaaya akina ekano?

⁹ Xaxaxa atokweene anaphwanela okhala oolipa murima wi eloce ni yaale anooniherya meecelo ooheseya mmulokoni. (Gal. 6:1) Mwawiiyeviha atokweene annasuwela wi awotho  toohiphaameya nave vanihikuni anamuchuna ekano. Nyenya awo haneemererya wi eyo yaamaalihe owookolola yaale anaphwanela olakiwa. (2 Tim. 4:2; Tito 1:9) Elukuluku anamvahaaya muchu ekano, awo anneererya opharihela yamahala aya ya oloca wi emuhusihe mwaphaama ni moopisa murima. Atokweene annamusivela munna naari murokora aya, nave osivela iwo onnaaceenyerya weeravo echu. (Masi. 13:24) Nyenya echu yoochuneyaxa wa yaawo ori omucicimiha Yehova mu okhaviherya malamulo awe ni okhapelela muloko wi ohinanarihiwe.—Saw. 20:28.

¹⁰ Ophiyerya vaava, noothokororya vooloca sa elukuluku yoophwanela oloca. Nyenya, yookhalavo elukuluku nihinaphwanelaahu oloca echu. Makacamiho taani nnahaalaahu ohoolela mmikhalelo seiyo?

11. Niphwanaphwaniho taani Yakopo opharihenleiye, nave ntakhara heeni nryaaya noophwanelela?

¹¹ Onamukhala woovila ovareryela malocelo ahu. Mulipa oomurepa Piipiliya Yakopo oopharihela niphwanaphwaniho noophwanelela wi ooniherye nikacamiho nene. Owo oriye: “Muchu aahikwaculiwa mu sooloca sawe, ori awaakhwanela, oowerya weeciha mwiili awe woothene.” (Tiy. 3:2, 3) Nrampa ninnaheliwa va muru nave mukoi onaheliwa mwaano wa kavalo. Moorweela wa opharela yoohoolela, muchu owenle ekavalo onanwerya weecano ni okookiherya mu nipuro naya. Wakhala wi mulipa onwenle kavalo ooyeleela yoohoolela, kavalo onamuya otakhwani ophiyerya ophoreya vamoha ni mulipa onwela. Mmukhalelo woolikana, wakhala wi hanniikasoopa ni malocelo ahu, eyo enamuruuha ipahu sincipale. Hankooni nthokororye ilukuluku seiho nnaphwanelaahu “opharela yoohoolela” ni ohiloca echu.

12. Elukuluku taani nnaphwanelaahu “opharela yoohoolela” ni ohiloca echu?

¹² Tiheeni munapakaanyu vaavaa munna naari  murokora onasuweleiye mwaha yoowo aakina ahinaphwanelaaya osuwela? Ntoko yootakiherya, wakhala wi moomusuwela muchu yoowo onakhala elapo weiwo muteko ahu owatiihiwaayawo, apwanne munneererya omukoha owo wi ooleeleeni mukhalelo muteko ahu onapakiwaaya weiwo? Moohikhwa minikwa mathowa taphaama. Ninnaasivela anna ni arokora ahu nave ninnachuna osuwela yeeyo eneereya ni yaawo. Ninnachunatho okhala ooluluwanya vaavaa nnavekelaahu ntakhara yaawo. Naamwiihiiha, eyo eri elukuluku nnaphwanelaahu “opharela yoohoolela” ni ohiloca echu. Wakhala wi ninnamukhinyererya muchu oloca ichu soovitheya, nnooniherya wi nooyeleela osivela—wa muchu owo vamoha ni anna ni arokora yaawo anamuroromela wi ahiloce sa muteko aya. Mweeparipari, haavo mmoha a hiyo aahaala ochuna waaceererya makacamiho wa anna ni arokora ahu yaawo anakhala mu ilapo seiho muteko ahu onawatiihiwaayawo. Moolikana, haavo munna naari murokora onarumeela mu ilapo sintoko seiho aahaala ochuna wuupulula ichu vooloca sa mukhalelo Anamoona anakhala weiwo analaleeryaaya naari anathukumanaaya.

13. Hiiha ntoko elociwaaya mu Masiposipo 11:13, tiheeni atokweene anaphwanelaaya weera nave ntakhara heeni?

¹³ Xaxaxa atokweene anaphwanela opharihela nlakiheryo na Piipiliya nenlo nnaphwanyeya mu Masiposipo 11:13 moorweela wa ohiloca miyaha soovitheya. (Mwaalakhanye.) Ela enanwerya okhala yoovila, xaxaxa wakhala wi mutokweene owo oothela. Atheli annalipiha onthamwene aya moorweela wa olocihana moohihiyererya ni oleelana ichu sookhuweya, moonelo, ni sawuukhula saya. Nyenya mutokweene onnasuwela wi hanaphwanela oloca miyaha soovitheya vooloca sa achu a mmulokoni. Wakhala wi owo oheerano, anahaala oyeleela nroromelo naya nave onamunanariha ophwanelela wawe. Yaale anathanliwa wi ekhaleno mirici mmulokoni hanaphwanela okhala achu “oohiireeriha mwaha.” (1 Tim. 3:8) Eyo enataphulela wi awo hanaphwanela waahuweliha akina naari osiveliwa waapa. Wakhala wi mutokweene onnamusivela mwaariye, hanaphwanela omuleela mwaariye miyaha seiho ohinaphwaneleiye osuwela.

14. Mwaara a mutokweene onamukhaviherya hai iyawe okhapelela ophwanelela wawe waphaama?

¹⁴ Muthiyana onanwerya omukhaviherya iyawe okhapelela ophwanelela wawe waphaama moorweela wa ohimukhinyererya wi amuleele miyaha soovitheya. Vaavaa muthiyana onaphariheleiye ekano yeela, tahi pahiru onamukhaviherya iyawe nyenya tho yaale amuleenle iyawe miyaha soovitheya. Nave echu yoochuneyaxa, muthiyana owo onnamuhakalaliha Yehova woona wi onnannuwiha murecele ni wiiwanana mmulokoni.—Aro. 14:19.

15. Yehova oonne hai vooloca sa asinthamwene araru a Yupu, nave ntakhara heeni?

¹⁵ Nnanwerya ohuserya sincipale orweela wa liivuru a Yupu vooloca sa mukhalelo wa oloca ni elukuluku ya oloca. Yupu amanle ohooseya ni ipahu sawoopiha, alopwana asese yaahirwa wi emuhakararye ni omvaha ekano. Alopwana ale yaahimaliha elukuluku yincipale eri moona omaala. Nyenya masu yaalociwe ni alopwana araru ntoko Elifasi, Pilitati, ni Sofari, annooniherya wi hiyaamalinhe elukuluku yeele wi yuupuwelele mukhalelo yaahaalaaya omukhaviherya Yupu. Ohiya yeeyo, awo yuupuwela mukhalelo yaahaalaaya wooniherya wi Yupu aahipaka echu yoonanara. Masu makina yaaloncaaya yaari eeparipari, nyenya masu mancipale yaaloncaaya vooloca sa Yupu ni Yehova hiyaari eeparipari. Awo yaahimuthoriha Yupu moonanara. (Yobi 32:1-3) Tiheeni Yehova aapankeiye vooloca sa yeela? Owo aatepa onanariwa ni alopwana ale araru. Aahiwiichana awo ntoko alolo nave aahimveka Yupu wi avekele ntakhara yaawo.—Yobi 42:7-9.

16. Tiheeni nnahuseryaahu orweela wa sootakiherya soonanara itikitheryiwe ni Elifasi, Pilitati, ni Sofari?

 ¹⁶ Ninnahuserya sincipale orweela wa sootakiherya soonanara itikitheryiwe ni Elifasi, Pilitati, ni Sofari. Echu yoopacerya, hannaphwanela waathoriha annihu. (Mat. 7:1-5) Ohiya yeeyo, nnaphwanela waawiriyana moopwacha nihaakumve oloca. Pahiru orweela mwa weerano yeela nnahaala wiiwexexa mukhalelo aya. (1 Ped. 3:8) Yanaawiili, vaavaa nnalocaahu, nnaphwanela ororomela wi masu ahu toosivela navetho wi yeeyo nnalocaahu ti yeeparipari. (Éfe. 4:25) Nave yaneeraru, Yehova onnatepa opwacha yeele nnalocaahu wa mukina ni mukhwaawe.

17. Tiheeni nnahuseryaahu orweela wa yootakiherya ya Elihu?

¹⁷ Mulopwana aneexexe aamusekunrye Yupu aari Elihu, mmusi a Aparahamu. Owo aanawiriyana vaavaa Yupu ni alopwana ale asese yaalocaaya. Woonaru owo aanawiriyana moopwacha yeeyo yaalociwa, woona wi aahiwerya omvaha Yupu ekano mwa niphwanya nave mooluluwanya yeeyo yaamukhavihenrye otoroka muupuwelo awe. (Yobi 33:1, 6, 17) Echu yoochuneyaxa wa Elihu yaari omucicimiha Yehova, ohiya wiicicimiha yene naari muchu mukina. (Yobi 32:21, 22; 37:23, 24) Orweela wa yootakiherya ya Elihu noohuserya wi yookhalavo elukuluku ya omaala ni owiriyana. (Tiy. 1:19) Noohuserya tho wi vaavaa nnavahaahu ekano, echu yoochuneyaxa wa hiyo enaphwanela okhala oruuha ncicimiho wa Yehova, ohiya wa hiyo aneene.

18. Nni nooniherye hai wi ninnavaha esisapo yamahala ya oloca?

¹⁸ Nnanwerya wooniherya wi ninnavaha esisapo yamahala ya oloca moorweela wa ochariha ekano ya Piipiliya vooloca sa elukuluku ni mukhalelo wa oloca. Mwene a miruku Solomoni aahiveereliwa orepa: “Yawiima ehochiwe ya eworo etikitheryiwe mu eparata, ti masu alociwe moophwanelela.” (Masi. 25:11) Vaavaa nnawiriyanaahu moopwacha yeeyo akina analocaaya ni wuupuwelela nihaakumve waakhula, masu ahu anamukhala ntoko yawiima ehociwe ya ewooro—mmakupa oomeeli asisapo ni ooreera. Voocharela, moohipwacha waakhanle wi ninnaloca vancipale naari vakhaani, masu ahu ananwerya waalipiha akina, nave nnammweeriha Yehova wiirumiha ni hiyo. (Masi. 23:15; Éfe. 4:29) Ola mukhalelo woophwanelela nnahaalaahu wooniherya othamalela wahu ntakhara yamahala ya oloca yeeyo enarweela wa Muluku!