MU Maphatxuwelo ecima 22, onnaloca wi Muluku aamuleela Aparahamu oya nipuro noorakamela wi avahe mukucho. Piipiliya oni: “Abrahamu àkusa ikhùni sa mukutxho akuha v’etxhuri va mwanawe Isakhi. Owo àpharela mwàlo ni . . . moro. Yetxaka vamoha.”—Maphatxuwelo 22:6.

Piipiliya hanathariha mukhalelo achu mu ilukuluku sakhalai yaaweryaaya okhalano mooro. Vano apwanne Aparahamu ni Isaki yaaparinhe mooro nave eteesa nikalume neni? Mulipa ooloca miyaha sa Piipiliya olonce wi hiwaahaala oweryeya okhalano nikalume na mooro “vaavaa waapakiwaaya mukwaha woorakamela.” Opwaha yeeyo, Aparahamu ni mwanawe akhweya yaakunxe echu vyakala yaahaalaaya opharihela wi epariheno mooro.

Nyenya achu akina analoca wi hiwaari wookhweya opariha mooro mu ilukuluku seiye. Mwawiihiiha moohipwacha mukhalelo ene, achu yaanwerya okhalano mooro moorweela wa ovala makhala a mooro yoowo waaparihiwe, akhweya wa amwaacamani. Alipa oohuserya ancipale anneemererya wi Aparahamu mmukwaha awe aakunse makhala moorweela wa mooro waaparihiwe. Owo akhweya aahenle mu epiya, yeeyo yaakhalano mukoi, nave owo aanateesa epiya yeeyo vaavaa aapakeiye mukwaha. (Isaiya 30:14) Voocharela owo akhweya aanapharihela makhala ni ikhuuni sawuuma vaavaa aachuneiye opariha mooro.