1. Yehova aapatunxe achu ni mavyakelo taani avameekhaaya?

YEHOVA aapatunxe achu ni mavyakelo a vameekhaaya. Owo oonivaha mavyakelo a osuwela, yaawo ananikhaviherya ovootha makacamiho ni wiirehererya ntakhara omwaahiyu. (Masiposipo 2:11) Owo oonivaha owerya, wi nipake yeeyo nnachunaahu ni ophwanya soolakelela sahu. (Filipi 2:13) Owotho oonivaha oleela-wa-murima, mukhalelo wa mpuwa onanikhaviherya osuwela yaphaama ni yoonanara. Oleela-wa-murima ahu onnanikhaviherya osepa yoocheka ni soohesa.—Aroma 2:15.

2. Tiheeni Yehova onaweheryeiye wa hiyo?

² Yehova onaweherya wi nipharihele mavyakelo ahu mmukhalelo waphaama. Ntakhara heeni? Nthowa nawi owo onnanisivela nave oosuwela wi nnahaala ohakalala wakhala wi noopharihela yamahala onivanheiye. Ntoko yootakiherya,  ninnaalakhanya Mpiipiliyani: “Sothene onerawe wereke ni mata à, olipisereke wera phama” nave “nrino hiha elukuluku, niwereleke saphama atxhu othene,” navetho “ntoko yamahala mutxhu ti mutxhu akhenleiye, mwivahe muteko wolapelana.” (Eklesiyaste 9:10; Galasya 6:10; 1 Pedro 4:10) Mwawooneya, Yehova onachuna wi nipake yeeyo nnaweryaahu wi niphure mukhatiihu ni akina.

3. Okotakota taani achu aryaayano?

³ Yehova onachuna wi nipharihele mavyakelo ahu, nyenya oosuwela wi naachu ookotakota. Ntoko yootakiherya, hiyaano hinnawerya oviihavo ohiphaameya, yoocheka ni okhwa. (1 Mamwene 8:46) Navetho, hinnawerya waavareryela achu akina nthowa nawi mmoha ti mmoha ori otaphuwa opaka soothanla sawe. Nave moohipwacha masuwelelo mancipale nryaahuno, hanrwa nikhalano hiiha ntoko Yehova oreiyeno.—Isaiya 55:9.

4. Tiheeni nnahaalaahu othokororya mmwaha yoola?

⁴ Nnaphwanela weemererya wi Yehova anihooleleke, nroromelaka wi owo onahaala onikhaviherya nave onahaala onipakela echu nihinaweryaahu opaka mukhatiihu. Navetho, Yehova onachuna wi nuupuweleke vooloca sa yeeyo nnaweheryaahu opaka wi nimalihe makacamiho ni waakhaviherya akina. (Mwaalakhanye Salumu 37:3.) Mwawiihiiha ninnachuna soopiili, ‘waroromela Apwiya ni wera saphama.’ Nni neereno hai yeela? Hankooni nthokororye sootakiherya sa Nowa, Tavite, ni akapuro akina oororomeleya a Muluku yaawo yaamuroromela Yehova. Nnahaala woona wi saakhalavo ichu yahaaweryaaya opaka nyenya awo  yaathanla othokororya ichu yaaweryaaya opaka.

5. Mutharihe mukhalelo wa Nowa.

⁵ Nowa aakhanle mu elapo yaari “yosareya owali” ni ocapaheya. (Maphatxuwelo 6:4, 9-13) Naamwi aasuwenle wi Yehova aahaala waatoloxa amutakhali, akhweya Nowa aanasooseya ni yeeyo achu yeeraaya. Mmukhalelo yoowo, Nowa aasuwela wi saakhalavo ichu ahaaweryeiye opaka, navetho aasuwela wi saakhalavo ichu aaweryeiye opaka.

6, 7. (a) Tiheeni Nowa ahaawenryeiye opaka? (b) Ti mwawiihai nryaahu mmukhalelo mmohamoha ni Nowa?

⁶ Yeeyo Nowa ahaawenryeiye opaka: Nowa moororomeleya aalaleerya muchaka woolopola wa Yehova, nyenya owo haawenrye waakhinyererya achu wi yeemererye. Nave haawenrye waakuviha orwa wa Maahi Mancipale. Nowa aaphwanela ororomela wi Yehova aahaala okhwaaniherya yoolaiherya Awe ya waamaliha amutakhali, asuwelaka wi Muluku aahaala weerano hiiha mu elukuluku yoophwanelela.—Maphatxuwelo 6:17.

⁷ Hiyaanotho nnakhala mu elapo esaren’ye amutakhali, nave noosuwela wi Yehova oolaiherya waamaliha. (1 Yohani 2:17) Moolikana, hannawerya waakhinyererya achu wi yeemererye “Mutxhaka ola wa omwene.” Hannawerya opaka echu vyakala wi naakuvihe ophiya wa “ekoi etokotoko”. (Mateu 24:14, 21) Ntoko Nowa, nnaphwanela okhalano nroromelo noolipa, nsuwelaka wi moohilekela Muluku onahaala waamaliha amutakhali oothene. (Salumu 37:10, 11) Nri oolekecheya wi Yehova hani eemererye wi  elapo yeela yoonanara etitelele okhala hiiha.—Habakukhi 2:3.

8. Tiheeni Nowa aateteiweiyeno? (Moone eruku yoopacerya.)

⁸ Yeeyo Nowa aawenryeiye opaka: Ohiya oceecheya ni yeeyo ahaaweryeiye opaka, owo aateteiwe ni yeeyo aaweryeiye opaka. Nowa, moororomeleya aalaleerya muchaka woolopola wa Yehova. (2 Pedro 2:5) Muteko yoola waamukhaviherya otitelele olipiha nroromelo nawe. Ohiya pahiru olaleerya, owo aahichara sooleeliherya sa Yehova sa ompaka mwaaceya.—Mwaalakhanye Ahebri 11:7.

9. Nni nimutakiherye hai Nowa?

⁹ Ntoko Nowa, nnakhala ooweiwa “ophara muteko wa Apwiya.” (1 Korinto 15:58) Ntoko yootakiherya, nnanwerya okhaviherya muteko wooteka ni orehererya Ipa sa Omwene ni Ipa sa Muthukumano wa Ekulucu, wiiveleela mmuteko wa muthukumano wa ekulucu ni wa muceche, ni olapa o efiliyale naari o ekupweete ya muteko wootaphulela. Echu yoochuneyaxa, nnakhala ooweiwa mmuteko woolaleerya, yoowo onalipiha ewehereryo ahu yoomwaahiyu. Murokora mmoha oororomeleya ooloca wi vaavaa onaaleeleiye akina sa mareeliho a Omwene wa Muluku, owo onnasuwela wi chiryene achu haanono ewehereryo nave anoona wi makacamiho aya herwa emala. Ntoko murokora ola, nookhalano ewehereryo, nave enakhala yoolipa vaavaa nnaaleelaahu akina. Ewehereryo ela ennanikhaviherya otitelela ochimaka mu ephiro ya okumi!—1 Korinto 9:24.

10. Mutharihe mukhalelo wa Tavite?

¹⁰ Mwene Tavite ari mulopwana oororomeleya, nave Yehova aanamusivela vancipale. (Saweriwa T’arummwa 13:22) Naamwi hiiha, Tavite aararuwa ni Patesepa, eyo yaari yoocheka etokotoko. Voopwahaxa, owo aheererya ovitha yoocheka awe moorweela wa waavya mukhalelo wa omwiipha Uriya, iyawe Patesepa, okhoconi. Ophiyerya wi Tavite aamunnya Uriya ekaarata yaarino sooleeliherya sa okhwa wawe! (2 Samuwele 11:1-21) Veelukuluku aya, soocheka sa Tavite saasuweliwa. (Marko 4:22) Vaavaa ela yeeren’yaaya, tiheeni Tavite aapankeiye?

11, 12. (a) Tiheeni Tavite ahaawenryeiye opaka amanle ocheka? (b) Tiheeni Yehova onahaaleiye opaka wakhala wi noocharuwa?

¹¹ Yeeyo Tavite ahaawenryeiye opaka: Tavite haawenrye okookiherya muculi yeeyo aapankeiye. Mweeparipari, aahaala okumanano makacamiho muukumini mwawe ntoko yookhumelela ya yoocheka awe. (2 Samuwele 12:10-12, 14) Mwawiihiiha aanachuna nroromelo. Owo aaphwanela ororomela wi vaavaa eereiye acharuwe, Yehova aahaala omulevelela ni omukhaviherya ovilela sookhumelela sa meerelo awe.

¹² Woona wi naachu ohiphaameya, oothene ahu ninnacheka. Nyenya soocheka ikina itokotoko opwaha ikina, nave haniwerya  okookiherya muculi soocheka sahu. Hiyaanotho nnamuhooxeya ntakhara meerelo ahu. (Galasya 6:7) Nyenya ninnaroromela yoolaiherya ya Muluku yawi wakhala wi noolapha naari noocharuwa, owo onahaala onikhaviherya mu ilukuluku sookacamiha, naamwi makacamiho awo nri nthowa na yoohesa ahu.—Mwaalakhanye Isaiya 1:18, 19; Saweriwa T’arummwa 3:19.

13. Tavite aareherenrye hai onthamwene awe ni Yehova?

¹³ Yeeyo Tavite aawenryeiye opaka: Tavite aanachuna orehererya onthamwene awe ni Yehova. Owo eenreno hai? Tavite aaheemererya wi Yehova amukhaviherye. Ntoko yootakiherya, owo aheemererya olaka orweela wa Natani, mulipa miririmu a Yehova. (2 Samuwele 12:13) Tavite aavekelatho wa Yehova nave aalokoha soocheka sawe, ooniheryaka wi aanachuna weemereryiwa wanaawiili ni Yehova. (Salumu 51:3-19) Opwaha ovoothiwa ni moonelo wa okhalano nthowa, Tavite aahuserya orweela wa soocheka sawe. Owo hantonko wuuluulela soocheka seiye itokotoko. Iyaakha ohoolo waya, owo aakhwile moororomeleya, nave ti yeeyo enamweeriha Yehova omuupuwelela.—Ahebri 11:32-34.

14. Tiheeni nnahuseryaahu orweela wa yootakiherya ya Tavite?

¹⁴ Tiheeni nnahuseryaahu orweela wa yootakiherya ya Tavite? Wakhala wi noopaka yoocheka etokotoko, nnaphwanela olapha mweeparipari, omuleela Yehova yoocheka ahu, ni omveka nikhurumuwelo. (1 Yohani 1:9) Nnaphwanelatho waaleela atokweene, woona wi awo ananwerya onikhaviherya orehererya onthamwene ahu ni Yehova. (Mwaalakhanye Tiyako 5:14-16.) Vaavaa nneemereryaahu nikhaviheryo na Yehova, nnooniherya wi ninnaroromela yoolaiheryaawe ya onilevelela. Mwawaacererya, ti woochuneya ohuserya orweela wa soocheka sahu ni otitelela omurumeela Yehova ni nroromelo.—Ahebri 12:12, 13.

15. Tiheeni nnahuseryaahu orweela wa yootakiherya ya Ana?

¹⁵ Akhweya munnawuupuwela akapuro akina oororomeleya analociwa Mpiipiliyani yaawo yaamuroromenle Yehova naamwi ekumanakano ilukuluku sookacamiha. Ntoko yootakiherya, yaahiviravo elukuluku Ana ahirino anamwane. Owo haawenrye otoroka mukhalelo awe. Nyenya aanaroromela wi Yehova aahaala omuhakararya. Mwawiihiiha owo aatitelela olapela mu tapernaakulu nave aanavekela wa Yehova amuleelaka moonelo awe. (1 Samuwele 1:9-11) Ela yootakiherya yaphaama wa hiyo! Vaavaa nnakhalaahuno makacamiho a okumi ni makina yaawo nihinaweryaahu otoroka, ninnamukuherya Yehova oteteiwa wahu nave ninnaroromela wi owo onannikhapelela. (1 Pedro 5:6, 7) Nave ninnapaka yeeyo nnaweryaahu wi nikumihevo mphurelo mithukumano Seekristu ni soovaha ikina marehereryo a Yehova anavahereryaaya.—Ahebri 10:24, 25.

16. Tiheeni asitiithi anahuseryaaya orweela wa yootakiherya Samuwele?

 ¹⁶ Hanka vooloca sa asitiithi oororomeleya yaawo anamwanaaya anahiya omurumeela Yehova? Mulipa miririmu Samuwele haawenrye waakhinyererya anaawe atokweene otitelela okhala oororomeleya wa Muluku. (1 Samuwele 8:1-3) Aahin’ye mwaha owo mmatatani mwa Yehova. Nyenya, Samuwele aapaka yeeyo aaweryeiye wi atitelele okhala oororomeleya ni omuhakalaliha Tiithawe awirimu. (Masiposipo 27:11) Olelo, asitiithi ancipale Eekristu ari mmukhalelo mmohamoha. Awo annaroromela wi ntoko tiithi a niphwanaphwaniho na Yesu na mwaana oohuwela, Yehova ori ooreheryeya wi awaakhele anamacheka anacharuwa. (Luka 15:20) Mu elukuluku emohamoha, asitiithi anaphwanela otitelela okhala oororomeleya wa Yehova, ewehereryaka wi yootakiheryaaya enahaala waaceenyerya anamwanaaya omukookela Yehova.

17. Ntakhara heeni yootakiherya ya naamukhweli oohaawa ti yoolipiha?

¹⁷ Yootakiherya ekina yaphaama ti ya naamukhweli oohaawa mmahiku a Yesu. (Mwaalakhanye Luka 21:1-4.) Owo haawenrye apaka echu vooloca sa mukhalelo woonanara weereya mu empa ya Muluku, nave owo haawenrye otoroka oohaawa wawe. (Mateu 21:12, 13) Nyenya omuroromela wawe Yehova waamuceenyerya okhaviherya malapelo eeparipari. Owo aari a mahala nave aavaha “ikhorowa pili,” soothene aareiyeno. Muthiyana yoola aahooniherya nroromelo nawaakhwanela mwa Yehova. Aasuwela wi wakhala wi oohela muteko wa Yehova voopacerya, owo aahaala omvaha yeeyo yaamuthowa. Mmukhalelo mmohamoha, ninnaroromela wi nahela Omwene wa Muluku va nipuro noopacerya, Yehova onahaala onivaha yeeyo enanthowa.—Mateu 6:33.

18. Mvahe yootakiherya ya munna aarino moonelo waphaama.

¹⁸ Anna ancipale ni arokora ahu annooniherya omuroromela Yehova moorweela wa oteteiwa ni yeeyo anaweryaaya opaka ohiya yeeyo ahinaweryaaya opaka. Muupuwele vooloca sa munna Malcolm, yoowo aatitelenle ovilela ophiyerya okhwa wawe mu eyaakha ya 2015. Variyari va iyaakha sincipale owo ni mwaariye yamurumeelaaya Yehova, yaanakhalano ilukuluku saphaama ni sookacamiha. Owo aaloca: “Mu elukuluku okumi onnatorokeya, ohikhumelela phaama, ophiyerya okhala woowalamela. Nyenya Yehova onnaareeliha yaale aniixeerya mwa yoowo.” Ekano taani Malcolm ovanheiye? “Mvekele wi mukhale amphurelo ni oowetha mmuteko wa Yehova ophiyerya munaweryelaanyu. Mwiilipixerye wa yeeyo munaweryaanyu opaka, ohiya yeeyo muhinaweryaanyu opaka.” *—Moone masu avathi.

19. (a) Ntakhara heeni yoorepaahu ya eyaakha ya 2017 yoothanla yaphaama? (b) Muni mpharihele hai mu okumi anyu yoorepa ya eyaakha ya 2017?

¹⁹ Elapo ela “enanvira etepaka” onanara, mwa yeeyo ninnaweherya okumanano makacamiho mancipale. (2 Timóteo 3:1, 13) Ti woochuneya ohikhala ooweiwa ni makacamiho ahu. Moohiyana, nnaphwanela okhalano nroromelo noolipa mwa Yehova ni oteteiwa ni yeele nnaweryaahu weera. Ti nthowa nene yoorepaahu ya eyaaka ya 2017 eryaaya yoothanla yaphaama: “Waroromeleke Apwiya ni wereke saphama”!—Salumu 37:3.