Hiyo Nri a Apwiya
“[Noohakalala] nloko na atchu nenlo Yehova ariye Muluku aya; Nloko nenlo áthanliliye nikhale mukelampa a Yowo mekhiye.” —SALUMU 33:12, Nlakano Nahihano.
MACIPO: 31, 48
1. Ntakhara heeni nnanwerya oloca wi Yehova mwaneene a ichu soothene? (Moone eruku yoopacerya.)
ICHU SOOTHENE sinarweela wa Yehova! “Ti yawaya erimu, elapo ya vathi ni sothene iri mwemmo.” (Malamulo 10:14, Tradução do Novo Mundo; Wupulula 4:11) Woona wi Yehova taapatunxe achu, oothene hiyo nawawe. (Salumu 100:3) Opwaha achu oothene yaakhanle, Muluku ohaathanla akina wi ekhale awawe mmukhalelo wavameekhaaya.
2. Mwawiiwanana ni Piipiliya, taani ori a Yehova mmukhalelo wavameekhaaya?
2 Mwa ntakiheryo, Salumu 135 onnaaloca alapeli oororomeleya a Yehova mu Isarayeli akhalai ntoko “muhakhu awesha.” (Salumu 135:4, NN) Navetho, Oseya aaloherya wi akina yaahiri a Isarayeli yahaala okhala achu a Yehova. (Oseya 2:23) Yooloherya yeela yaapacenrye waakhwanela vaavaa Yehova aapacenryeiye waathanla achu yaawo yaahiri Aisarayeli wi elamulele wirimu vamoha ni Kristu. (Saweriwa T’arummwa 10:45; Aroma 9:23-26) Oothanliwa yaawo ni munepa wa weela aniichaniwa ‘nloko nawela.’ Awo “nloko nawopoliwa” na Yehova. (1 Pedro 2:9, 10) Vano hanka vooloca sa Akristu oothene oororomeleya anakhala olelo, yaawo anaweherya okhala veelaponi yavathi okhala wookhala? Yehova tho onawiichana “atxhu a nloko naka” ni “òthanliwa aka.”—Isaiya 65:22.
3. (1) Taani orino onthamwene wavameekhaaya ni Yehova olelo? (2) Tiheeni nneeraahu nthokororye mmwaha yoola?
3 Olelo, “muhuwo mukhani,” onaweherya okhala wirimu okhala wookhala, nave “iputxeputxhe ikina,” inaweherya okhala veelaponi okhala wookhala, oothene anamulapela Yehova ntoko “muhuwo mmoha.” (Luka 12:32; Yohani 10:16) Nnaphwanela omooniherya Yehova ophiyerya mweeryo taani nnathamalelaahu okhalano onthamwene wavameekhaaya ni yoowo. Mmwaha yoola, nnahaala othokororya mukhalelo nneeraahu nooniherye omuthamalela wahu Yehova ntakhara ncicimiho nenla navameekhaaya.
NIVELEENLE IKUMI SAHU WA YEHOVA
4. Nni nimuthamalele hai Yehova nthowa na oneemererya okhalano onthamwene ni yoowo, nave echu taani yoolikana Yesu aapankeiye?
4 Ninnooniherya omuthamalela wahu Yehova vaavaa nniivelelaahu wa yoowo nave nipatisiwa. Voocharela oothene ananwerya woona wi nri a Yehova nave ninnachuna omwiiwelela. (Ahebri 12:9) Yesu aahipaka echu yoolikana vaavaa aapatisiweiye. Naamwi aapaka makupa a nloko niiveleenle wa Yehova, owo aahiivaha wa Yehova. Eyo yaakhala ntoko wi aalonce ariki: “Werano [okhwela] wanyu onnakisivela Muluku aka.”—Salumu 40:7, 8, NN.
5, 6. (1) Tiheeni Yehova aalonceiye vaavaa Yesu aapatisiweiye? (2) Niphwanaphwaniho taani nnooniherya mukhalelo Yehova onooneiye vooloca sa wiiveleela wahu?
5 Yehova oonne hai vaavaa Yesu aapatisiweiye? Piipiliya onnaloca: “Yesu apatisiweiye, àkhumamo mmahini vuhilekela. Va elukuluku ene yele wirimu wàhuleyawo ni ahona Munepa wa Muluku ntoko ekakaiya, omukhuruwelaka Yesu. Navetho nàhiweya nsu nosulu nriki: ‘Ola ti mwanaka òkhweleyasa, kinaphwanyakamo nihakalaliho naka.’” (Mateu 3:16, 17) Yesu nlelo aari a Muluku. Nyenya Yehova aahihakalala vaavaa aamonneiye Yesu iiveleelaka wi apharihele okumi awe wi amurumeele pahiru Yoowo. Yehova onnahakalalatho vaavaa nnaveleelaahu ikumi sahu wa yoowo, nave owo onahaala onireeliha.—Salumu 149:4.
6 Yehova mwaneene a ichu soothene! Vano tiheeni nneeraahu nimvahe? Nkamwaanyiheryeeni mulopwana orino ithutu saphaama mmacani mwawe. Nihiku nimoha mwanawe ori nahano onnakusa ethutu emoha nave onnamvaha. Naamwi ithutu ihe siri sawawe, tiithi oosivela onnahakalala ni yoovaha. Eyo enooniherya wi mwanawe onnamusivela. Ethutu yeeyo ovahiweiye ni mwanawe yookhalano esisapo opwaha ithutu soothene iri mmacani mwawe. Mmukhalelo woolikana, Yehova onnahakalala vaavaa nniilipiseryaahu oveleela ikumi sahu wa yoowo.—Mukwaha 34:14.
7. Malakiya onanikhaviherya hai wiiwexexa mukhalelo Yehova onooneiye vooloca sa yaale aniiveleela omurumeela?
7 Mwaalakhanye Malakiya 3:16, TNM. Ntakhara heeni eryaaya yookhweleyaxa oveleela okumi anyu wa Yehova ni opatisiwa? Eyo ti yookhweleya nthowa nawi ovinyerya elukuluku mukhanlaanyu, timpacenryaanyu okhala a Mpatusa anyu, Yehova. Nto nkuupuwelani mukhalelo Yehova onahaaleiye ohakalala vaavaa muneeraanyu mmweemererye ntoko Mulamuleli anyu nave mwiiveleele wa yoowo! (Masiposipo 23:15) Yehova ohaasuwela yaale aniiveleela wi emurumeele, nave owo onnarepa masina aya mu “nliivuru nawuupuxerya.”
8, 9. Tiheeni Yehova onaweheryeiye wa yaale masina aya arempwe mu “nliivuru nawuupuxerya,” nawe?
8 Wakhala wi ninnachuna wi nsina nahu ntitelele mu “nliivuru nawuupuxerya” na Yehova, yookhalavo echu nnaphwanelaahu opaka. Malakiya ooloca wi nnaphwanela omoova Yehova ni wuupuwelela nsina nawe. Wakhala wi nnamulapela muchu naari echu, nsina nahu nnahaala oviihiwamo mu nliivuru na Yehova!—Mukwaha 32:33; Salumu 69:29.
Nihiku ti nihiku, ophiyerya okumi ahu woothene, nnaphwanela wooniherya moorweela wa meecelo ahu wi ninnamwiiwelela Yehova
9 Henaakhwanela pahiru wa hiyo ororomeliha opaka yookhwela ya Yehova nave voocharela opatisiwa. Iha ichu nnapakaahu etila emoha, nyenya omurumeela Yehova mukhalelo wa okumi. Nihiku ti nihiku, ophiyerya okumi ahu woothene, nnaphwanela wooniherya moorweela wa meecelo ahu wi ninnamwiiwelela Yehova.—1 Pedro 4:1, 2.
NINNAKHOOCA SOOCHUNA SA ELAPO
10. Ohiyana taani wookwakwaleya onahaala okhalavo variyari va yaale anamulapela Yehova ni ahinamulapela?
10 Mmwaha ovirale, noohuserya wi Kayine, Salomoni, ni Aisarayeli yaanaloca wi yaamulapela Yehova, nyenya hiyaari oororomeleya wa yoowo. Sootakiherya seiye sinnanihusiha wi henaakhwana pahiru oloca wi ninnamurumeela Yehova. Nnaphwanela othanyaka yeeyo eri yoonanara ni weeraka yeeyo eri yaphaama. (Aroma 12:9) Yehova ooloca wi waahaala okhala wookwakwaleya woona “ohiyana wa a wokololowa ni wa ònanara murima.”—Malakiya 3:18.
11. Ntakhara heeni enaphwanelaaya okhala yookhweya wa oothene woona wi nnamulapela pahiru Yehova?
11 Ninnamuthamalela Yehova onithanla okhala achu awe! Eyo enaphwanela okhala yawooneya wa oothene wi nri makupa a Yehova. (Mateu 5:16; 1 Timóteo 4:15) Mwiikohe: ‘Apwanne akina annoona wi kiri oororomeleya wa Yehova moomalela? Apwanne kinniirumiha waaleela achu wi ka Namoona a Yehova?’ Nkaanyiheryani mukhalelo Yehova onahaaleiye othanana wakhala wi ninnuuliwa muru waaleela akina wi nri makupa awe.—Salumu 119:46; mwaalakhanye Marko 8:38.
Apwanne mukhalelo anyu wa okumi onnooniherya vanlakani wi mwa a Anamoona a Yehova? (Moone iparakrafo 12, 13)
12, 13. Akina aneeriha hai okhala woovila akina waasuwela ntoko Anamoona a Yehova?
12 Moothananiha, Anamoona akina annatakiherya “munepa wa elapo.” Ntoko yookhumelela, awo tahi oohiyana ni yaale ahinamurumeela Yehova. (1 Korinto 2:12) “Munepa wa elapo” onnaweeriha achu othokororya soochuna saya mwa nrima. (Éfeso 2:3) Ntoko yootakiherya, moohipwacha ikano soothene nnaakhelaahu, akina annathanla owara soowara soohiphwanelela. Awo anawara soowara soowomaanya ni sawooneela, ophiyerya mmithukumano sa Akristu. Naari anathanla mukhalelo woomaka miihi woopwaha mphimo. (1 Timóteo 2:9, 10) Ntoko yookhumelela, eyo enamukhala yoovila wa akina osuwela waakhanle wi awo Anamoona a Yehova naari hooye.—Tiyako 4:4.
13 Sookhalavo mikhalelo mikina seiyo Anamoona akina ahinooniheryaaya ohiyana ni elapo. Ntoko yootakiherya, mu ochekula, akina anniina nave anniikhaliha mmukhalelo ohiri waweemereryeya wa Akristu. Akina annahela iruku saya nave enaloca mu interneti mmukhalelo yoowo onooniherya muupuwelo aya woomwiilini. Awo akhweya hatonko olakiwa mmuloko Weekristu ntakhara opaka yoocheka etokotoko, nyenya ananwerya okhala ovolowela woonanara wa anna ni arokora aya yaawo aneererya okhala oohiyana ni elapo.—Mwaalakhanye 1 Pedro 2:11, 12.
Muhivoloweliwe ni yaale ahiri mu makupa a Yehova
14. Tiheeni nnaphwanelaahu opaka wi nikhapelele onthamwene ahu ni Yehova?
14 Ichu soothene sa mulaponi irino yoolakelela ya oneeriha okhalano “minkhela sa mwili, minkhela sa mìtho, ni wikusererya mokhalani.” (1 Yohani 2:16) Hiyaano nri a Yehova, mwawiihiiha nri oohiyana. Hiyaano ninnakhooca “ohemererya ni minkhela sa elapo yavathi,” wi “nikhale awisuwela, awokolola ni òmulapa Muluku,” (Tito 2:12) Mukhalelo ahu woothene wa okumi, ophitaanyerya malocelo, olya, owurya, mawarelo, ni muteko, sinaphwanela wooniherya vanlakani wa muchu ti muchu wi nri a Yehova.—Mwaalakhanye 1 Korinto 10:31, 32.
‘NIKHWELANEKE VATOKOVENE’
15. Ntakhara heeni ninnaphwanela okhala eepewe ni oosivela wa Akristu akina?
15 Ninnooniherya wi ninnacicimiha onthamwene ahu ni Yehova moorweela wa mukhalelo nnaakhalihaahu anna ni arokora ahu. Awo ari a Yehova, hiiha ntoko hiyaano. Wakhala wi ninnuupuwela eparipari yeela, elukuluku yoothene nnahaala waakhalihaka mweepewe ni moosivela. (1 Tesalónika 5:15) Ntakhara heeni eryaaya yookhweleya? Yesu aahiloca wa oomuchara awe: “Mwa yeyo atxhu othene anamusuwela wi muri a muhuserya aka, nyuwo mwakhwelanà mukina ni mukhweiye.”—Yohani 13:35.
16. Tiheeni nnahuseryaahu orweela wa Nlamulo na Mose vooloca sa osivela wa Yehova ntakhara achu awe?
16 Yootakiherya enarweela mu Nlamulo na Mose enanwerya onikhaviherya wiiwexexa mukhalelo nnaphwanelaahu waakhaliha akina mmulokoni. Mu empa ya Yehova, saakhalamo ikaruma saaphariheliwa muteko pahiru mu malapelo. Nlamulo naahithariha mookwakwaleya mukhalelo Alevi yaaphwanelaaya okhapelelaka ikaruma seiyo, nave muchu yoowo ahaachariha sooleeliherya aaphwanela wiiphiwa. (Namarepela 1:50, 51) Wakhala wi Yehova aanathokororya vancipale mukhalelo achu yaakhalihaaya ikaruma seiye saaphariheliwa mmalapelo awe, onoona hai vooloca sa mukhalelo achu anaakhalihaaya alapeli awe awiiveleela ni oororomeleya! Owo oonisuweliha mukhalelo nryaahu asisapo wa yoowo vaavaa aalonceiye: “Muchu yoole oni ootannyeeni, onatannya niitho naka.”—Zakariya 2:8, TNM.
Yehova onnoona vaavaa nnakhalaahu oowaakhela aleco, amahala, ookhurumuwela, ni eepewe
17. Ntakhara heeni Yehova “aahititelela ovareryela ni owiriyana”?
17 Malakiya ooloca wi Yehova “aahititelela ovareryela ni owiriyana” mukhalelo achu awe yaakhalihanaaya mukina ni mukhwaawe. (Malakiya 3:16, TNM) Apwiya Yehova “àhasuwela yale ari awaya.” (2 Timóteo 2:19) Owo onnoona echu vyakala nnapakaahu ni nnalocaahu. (Ahebri 4:13) Vaavaa nihinakhalaahu eepewe ni anna ni arokora ahu, Yehova onnoona eyo. Nyenya nnaphwanelatho ororomela wi Yehova onnoona vaavaa nnakhalaahu oowaakhela aleco, amahala, ookhurumuwela, ni eepewe.—Ahebri 13:16; 1 Pedro 4:8, 9.
“MULUKU HANANYANYALA NLOKO NAWE”
18. Nni nimuthamalele hai Yehova nthowa na onithanla okhala achu awe?
18 Ninnachuna omooniherya Yehova mukhalelo nnathamalelaahu okhala ntoko achu awe. Noosuwela wi elukuluku yeele naavelenlaahu ikumi sahu wa yoowo, yaari yoothanla yamiruku naaphwanelaahu opaka. Naamwi nikhalaka “veri va nloko notakhala, [ni] nonanara,” nlelo nnanwerya ‘waryaka va nenlo ntoko mithuko mwilaponi.” (Filipi 2:15) Mwawiihiiha nnaphwanela olakelela osepa echu vyakala yeeyo Yehova oniiceiye. (Tiyako 4:7) Nave ninnaasivela ni waacicimiha anna ni arokorahu ahu nthowa nawi awotho ari a Yehova.—Aroma 12:10.
19. Yehova onaareeliha hai ale ari achu awe?
19 Piipiliya onnaroromeliha: “Muluku hananyanyala nloko nawe.” (Salumu 94:14) Ela yoororomeliha. Moohipwacha echu eni yeereye, Yehova onahaala okhala ni hiyaano. Naamwi nikhwile, owo hanii anicuwale. (Aroma 8:38, 39) “Nakhalakano ekumi, nnakhalano wa Apwiya, nave nakhwaka, nnakhwa wa Apwiya. Nari nikhale nari nikhwe, hiyo nri a Apwiya [Yehova].” (Aroma 14:8) Ninnaweherya elukuluku yeeyo Yehova onahaaleiye waaviiha mookhwani asinthamwene awe oothene ororomeleya. (Mateu 22:32) Nave naamwi hiihaano ninnapuha samahala sincipale sinarweela wa Tiithahu. Ntoko Piipiliya olonceiye: “[Noohakalala] nloko na atchu nenlo Yehova ariye Muluku aya; Nloko nenlo áthanliliye nikhale mukelampa a Yowo mekhiye.”—Salumu 33:12, NN.
