1, 2. Enataphulela eheeni onweha Yehova?

NNAKHALA mu “ilukuluku sokatxamiha.” (2 Timóteo 3:1) Nave okumi onahaala otepasa okacamiha Yehova ahaakumve otolosa elapo yeela yoonanara ni oruuha murecele weeparipari veelaponi. Wa nthowa nenla, nnaphwanela wiikoha, ‘Taani kinanweheka wi akikhaviherye nave akihoolele?’ Mwawaakuveya nnamuloca wi “Wa Yehova,” nave nla naakhulo naphaama.

² Enataphulela eheeni onweha Yehova? Nave nni nroromele hai wi ninnatitelela onweha yoowo elukuluku nnahoolelaahu makacamiho? Namarepa akhalai a Piipiliya aahithariha ochuneya waya onweha Yehova vaavaa nnachunaahu nikhaviheryo. (Mwaalakhanye Salumu 123:1-4.) Owo aalonce wi vaavaa nnanwehaahu Yehova, nnalikana ni kapuro yoowo onanweha pwiyawe. Mwawiihai? Kapuro onnanweha naari omuroromela, pwiyawe wi amvahe yoolya nave wi amukhapelele. Nto  onaphwanelatho ohimurakamelaka pwiyawe moohihiyererya wi iiwexexe yeeyo pwiyawe onachuneiye wi apake, nave voocharela apake. Mmukhalelo woolikana, nnaphwanela ohuserya Masu a Muluku mwawiiseela nihiku ti nihiku wi niiwexexe yeeyo Yehova onachuneiye wi nipake nave voocharela nipake yeeyo. Voocharela nroromele wi Yehova onahaala onikhaviherya vaavaa nnachunaahu nikhaviheryo.—Éfeso 5:17.

3. Tiheeni eni enaakanyerye mu onweha Yehova?

³ Naamwi nsuwenle wi nnaphwanela onweha Yehova, ikwaha ikina akhweya nnamukhala awuukhuwa. Ti yeeyo yeeren’ye ni Marta nthamwene awaacameleya a Yesu. Owo aahikhala ‘awukhuwa wa itxhu sintxipale.’ (Luka 10:40-42) Wakhala wi muchu oororomeleya ntoko Marta aahikhala awuukhuwa naamwi Yesu aari vaava ni yoowo, hannaphwanela otikhiniheya wawi nnamukhala awuukhuwatho. Nave, tiheeni eni enuukhule mu onweha wahu Yehova? Mmwaha yoola, nnahaala othokororya mukhalelo nneeraahu nuukhuleye wa yeeyo akina anapakaaya. Nave nnahaala ohuserya mukhalelo nneeraahu ntitelele onweha Yehova.

4. Ntakhara heeni ninnatikhiniheya osuwela wi Mose aahiyeleela ekari ya ovolowa mu Elapo ya Nlakano?

⁴ Mweeparipari Mose aananweha Yehova wi amuhoolele. Piipiliya onnanleela wi “àlipisa murima ni akhala ntoko omonne Òhoneya.” (Mwaalakhanye Ahebri 11:24-27.) Piipiliya onnalocatho wi “W’Isarayele honen’yetho mulipa a miririmu mukina ntoko Mose: Apwiya yàhisoneiha wa yowo ethoni ni ethoni.” (Malamulo 34:10) Nyenya naamwi Mose aari nthamwene awaacameleya a Yehova, owo aahiyeleela ekari ya ovolowa mu Elapo ya Nlakano. (Namarepela 20:12) Tiheeni yeeren’ye?

5-7. Tiheeni yeeren’ye Aisarayeli emanle okhuma o Yikuputu, nave tiheeni Mose aapankeiye?

⁵ Waacamela miyeeri miili Aisarayeli emanle okhuma o Yikuputu, ni ehaakumve ophiya o Mwaako Sinai, yaaheereya echu yookacamiha. Achu yaahipacerya wiikhupanyerya woona wi hiyaarivo maahi. Awo yaahipacerya wiikhupanyerya vamiithoni va Mose nave yaahinyeenyeya ophiyerya wi “Mose àhàveka Apwiya nikhaviheryo: ‘Kiwèrele etxhu tani atxhu ala? Ahanle vakhàni okìpha ni maluku!’” (Mukwaha 17:4) Yehova aahimvaha Mose ohoolela wookwakwaleya. Yehova aahimuleela okusa ekopo awe wi amaneno nluku o Horepi. Piipiliya oni: “Mose àhèra yele arummweiye t’Apwiya vamithoni va asitokwene a Isarayele.” Maahi yaahikhuma nave Aisarayeli yaahikhalano maahi mancipale oowurya, nave nikacamiho naahimalihiwa.—Mukwaha 17:5, 6.

⁶ Piipiliya onnanleela wi Mose aahiichana nipuro nenle Masa, yeeyo enataphulela “Wererya,” ni Meripa, yeeyo enataphulela “Ovànyihana.” Nthowa taani? “Ntakhara atxhu a Isarayele yàmwàpa Mose ni yàwèrerya Apwiya eriki: ‘Apwiya ari veri vahu, nari hoye?’”—Mukwaha 17:7.

⁷ Yehova oonne hai wa yeeyo yeeren’ye o Meripa? Owo onne wi Aisarayeli yaammwarenle vaiye ni otokweene awe, ohiya Mose. (Mwaalakhanye Salumu 95:8, 9.) Yeeyo Aisarayeli yaapankaaya yaatepa onanara. Nyenya Mose aahipaka yawookololowa. Owo aahinweha Yehova nave voocharela achara ohoolela wawe.

8. Tiheeni yeeren’ye waacamela omakuchuwelo wa mukwaha wa Aisarayeli mutakhwani?

 ⁸ Nave echu taani yoolikana yeeren’ye iyaakha makhumi masese ohoolo waya? Aisarayeli yaari omakuchuwelo wa mukwaha aya wa mutakhwani. Awo yaahiphiya nipuro waacamela o Katesi, waacamela omunlaanoni wa Elapo ya Nlakano. Nipuro nlo naahisuweliwatho ntoko Meripa. * (Moone masu avathi.) Ntakhara heeni? Nthowa nawi Aisarayeli yaahivaanyihana woona wi hiyaarivo maahi. (Namarepela 20:1-5) Nto ekwaha ela Mose aahipaka yoocheka etokweene.

9. Sooleeliherya taani Yehova amvanheiye Mose, nave tiheeni Mose aapankeiye? (Moone eruku yoopacerya.)

⁹ Tiheeni Mose aapankeiye vaavaa achu yaamwaren’yaaya? Wanawiili, owo aahinweha Yehova wi amuhoolele. Nyenya ekwaha ela Yehova haamulenle Mose wi amane nluku. Owo aamulenle Mose wi akuse ekopo awe, aaruuhe achu waacamela nluku, nave voocharela aloce variyari va nluku. (Namarepela 20:6-8) Apwanne Mose aahipaka yeela? Hooye. Owo aahitepa wuukhuwa ni onyeenyeya ophiyerya okhuwela variyari va achu: “Mukiwe, nyuwano atxhu òkhoma! Akhweya hiyano nnawerya wi vamwala va ephutuwevo màhi?” Voocharela owo aahimana nluku naari mwala, ohiya etila emoha, nyenya itila piili.—Namarepela 20:10, 11.

10. Yehova oonne hai wa yeeyo Mose aapankeiye?

¹⁰ Yehova aahitepa onyeenyeya ni Mose. (Malamulo 1:37; 3:26) Ntakhara heeni Yehova ayaaka onyeenyeya mmukhalelo yoola? Nthowa nimoha ti nawi Mose hiiwelenle ohoolela ovyaani Yehova amvanheiye.

11. Moorweela wa omana nluku, ntakhara heeni Mose aahiweeriha Aisarayeli wuupuwela wi Yehova haapanke yootikhiniha?

¹¹ Nookhalavo nthowa nikina ntakhara heeni Yehova ayaaka onyeenyeya. Nluku noopacerya o Meripa, nluku noolipa na kranitu. Moohipwacha mukhalelo muchu omanneiye, haavo onaweherya wi maahi anahaala okhumavo. Nyenya maluku o Meripa anawiili toohiyana. Mancipale a yaawo maluku aniichaniwa limestone. Woona wi limestone mukhalelo wa nluku noohilipa, maahi annavolowa mwemmo nave annakhala vathi vaya. Voocharela, achu annawerya orika maahi moorweela wa othorola nluku nenlo. Mwawiihiiha vaavaa Mose aamanneiye nluku opwaha oloca masu, apwanne eyo yaahaala oweeriha Aisarayeli wuupuwela wi maahi akhumme meekhaaya nihikhanle nthowa nawi Yehova opanke yootikhiniha? * (Moone masu avathi.) Hiyaano hinnasuwela.

12. Tinivi akhweya naari nthowa nikina naamweerinhe Yehova onyeenyeya ni Mose vamoha ni Aroni?

¹² Akhweya nookhalavo nthowa nikina  naamweerinhe Yehova okhala oonyeenyeya ni Mose ni Aroni. Mose aahiloca wa achu: “Akhweya hiyano nnawerya wi vamwala va ephutuwevo màhi?” Vaavaa Mose aalonceiye “hiyano,” enakhala ntoko wi owo iiloca mukhateiye ni Aroni. Yeeyo Mose aalonceiye hoonihenrye ncicimiho woona wi hamvanhe Yehova ophwanelela woothene ntakhara yootikhiniha. Salumu 106:32, 33 ooloca: “Yàmunyenyeiha murima Muluku mmahini a Meriba, nave wa nthowa naya, Mose avàhiwa ekoi. Txhiri awo yàmusòsiha murima Mose nave àlotxa masu òlolo.” * (Moone masu avathi.) (Namarepela 27:14) Mose hamvanhe Yehova ncicimiho Owo onaphwaneleiye. Yehova aahimuleela Mose ni Aroni: “Himwiwelenle malamulo aka omàhini o Meriba.” (Namarepela 20:24) Ela yaari yoocheka etokweene!

13. Ntakhara heeni waari wawookololowa ni woophwanelela mukhalelo Yehova aamulankeiye Mose?

¹³ Yehova aanaweherya sincipale wa Mose ni Aroni woona wi ti yaawo yaahoolela achu Awe. (Luka 12:48) Elukuluku muculi Yehova heemerenrye wi nloko noothene na Aisarayeli nivolowe mu Elapo ya Nlakano woona wi yaahimmwareela. (Namarepela 14:26-30, 34) Mwawiihiiha yaari yawookololowa ni yoophwanelela vaavaa Mose aamwaren’yeiye, Yehova aamulaka mmukhalelo woolikana. Hiiha ntoko alipa oomwaryeya akina, Mose heemereryiwe ovolowa mu Elapo ya Nlakano.

14, 15. Tiheeni yaamweerinhe Mose ommwaryeela Yehova?

¹⁴ Tiheeni yaamweerinhe Mose ommwaryeela Yehova? Moone wanawiili yeeyo Salumu 106:32, 33 olonceiye: “Yàmunyenyeiha murima Muluku mmahini a Meriba, nave wa nthowa naya, Mose avàhiwa ekoi. Txhiri awo yàmusòsiha murima Mose nave àlotxa masu òlolo.” Naamwi Aisarayeli yaammwarenle Yehova, aari Mose aasoosen’ye murima, naari onyeenyeya. Owo hoonihenrye wiihiiha nyenya aahiloca ahuupuwelenle sookhumelela.

¹⁵ Mose aahihiya onweha Yehova nthowa nawi aaheemererya wi meerelo a akina emuukhule. Ekwaha yoopacerya vaavaa achu yaavaanyihannaaya vooloca sa maahi, Mose aahipaka yeeyo yaari yawookololowa. (Mukwaha 7:6) Nyenya akhweya aahitepa onyeenyeya nthowa nawi Aisarayeli yaahimwaryeya mu iyaakha sincipale. Akhweya Mose vano uupuwela pahiru vooloca sa moonelo awe opwaha mukhalelo wa omucicimiha Yehova.

16. Ntakhara heeni ninnaphwanela wuupuwela yeeyo Mose aapankeiye?

¹⁶ Waakhanle wi mulipa a miririmu oororomeleya ntoko Mose aahiphiyerya wuukhuwa ni ocheka, emohamoha enamweereya ni hiyo. Mose aahala vakhaani ovolowa mu Elapo ya Nlakano, nave hiyaanotho nihanle vakhaani ovolowa mu elapo evyaani. (2 Pedro 3:13) Mweeparipari hiyaano  hinnachuna oyeleela ekari yeela yavameekhaaya. Nyenya wi nivolowe mu elapo yahiihaano, nnaphwanela otitelela onweha Yehova ni omwiiwelela moohihiyererya. (1 Yohani 2:17) Tiheeni nnahuseryaahu orweela wa yoocheka ya Mose?

17. Nni nsepe hai oyeleela wiihiiha wahu vaavaa nnayeenyeyaahu?

¹⁷ Muhiyeleele wiihiiha wanyu mwakhala oonyeenyeya. Ikwaha ikina ninnahooseya ni makacamiho mamohamoha wiiliwiili. Nyenya Piipiliya ooloca: “Nihivelaveleno wera saphama, wona wi, nahivololà, nnamuhepha mwa elukuluku aya.”(Galasya 6:9; 2 Tesalónika 3:13) Elukuluku echu naari muchu onannyeenyeiheiye wiiliwiili, apwanne ninnuupuwela nihaakumve oloca? Apwanne ninnavareryela omuchu ahu? (Masiposipo 10:19; 17:27; Mateu 5:22) Vaavaa akina ananlikaaya, nnaphwanela ohuserya ‘othekela esara,’ naari omvaha Yehova nipuro wi ooniherye esara awe. (Mwaalakhanye Aroma 12:17-21.) Eyo enataphulela eheeni? Ohiya okhala oonyeenyeya, moovilela ninweherye Yehova wi apake echu vooloca sa nikacamiho nahu vaavaa onooneiye wi ti yoophwanelela. Wakhala wi noheererya wunla ikuhu ohiya onweherya Yehova, hinnahaala omucicimiha.

18. Tiheeni nnaphwanelaahu wuupuwela vooloca sa ochariha ohoolela?

 ¹⁸ Mucharihe phaama ohoolela ovyaani. Apwanne ninnachariha moororomeleya ohoolela yoowo Yehova onivanheiye? Hinnaphwanela otitela opaka ichu mmukhalelo naapakelaahu khalai pahiru nthowa nawi ti yeeyo naakhovelenlaahu opaka. Opwaha yeeyo, nnaphwanela waakuvela ochariha ohoolela vyakala ovyaani Yehova onanivaheiye moorweela wa marehereryo awe. (Ahebri 13:17) Navetho nnaphwanela okhalano ephoole wi ‘nihipwahe ihe irempwe.’ (1 Korinto 4:6) Elukuluku nnacharihaahu mweephoole ohoolela wa Yehova, ninnatitelela onweha yoowo.

19. Nni nsepe hai weemererya wi soohesa sa akina inanarihe onthamwene ahu ni Yehova?

¹⁹ Muheemererye soohesa sa akina onanariha onthamwene anyu ni Yehova. Wakhala wi nootitelela onweha yene, hinnahaala onanariha onthamwene ahu ni Yehova naari okhala oonyeenyeya wa nthowa na yeeyo akina anapakaaya. Eyo ti yookhweleya xaxaxa wakhala wi, hiiha ntoko Mose, nookhalano mirici mmarehereryo a Muluku. Mwawiihiiha, muchu ti muchu a hiyo onaphwanela wiilipiserya ni omwiiwelela Yehova wi avulusiwe. (Filipi 2:12, Nlakano Nahihano) Mwawiihiiha, wakhala wi nookhalano mirici mincipale, Yehova onnaweherya sincipale wa hiyo. (Luka 12:48) Nyenya wakhala wi chiryene ninnamusivela Yehova, hiyaavovo echu enahaala onikwaculiha naari onimwalanya ni osivela wawe.—Salumu 119:165; Aroma 8:37-39.

20. Tiheeni nnaphwanelaahu olakelela opaka?

²⁰ Hiyaano nnakhala mu ilukuluku soovila ni sookacamiha. Mwawiihiiha ti yookhweleyaxa otitelela onweha Yehova, yoowo ‘omanke wirimu,’ wi niiwexexe yeeyo owo onachuneiye wi nipake. Hinnaphwanela weemererya wi saweera sa akina inanarihe onthamwene ahu ni Yehova. Yeeyo yeeren’ye ni Mose ennanihusiha echu yookhweleyaxa. Opwaha wuukhuwaka vancipale vaavaa akina anapakaaya soohesa, hankooni “nnàweha Apwiya, ophiyerya onimorela waya ikharari.”—Salumu 123:1, 2.