Mukhale Ooreera Murima ni “Atxhu Othene”
VAAVAA Yesu aahusinheiye amuhuserya awe mukhalelo wa olaleerya michaka saphaama, aahaalopola wi tahi wi achu oothene yaahaala waawiriyana. (Luka 10:3, 5, 6) Emohamoha enneereya mmuteko ahu woolaleerya. Achu akina nnaaphwanyaahu annakhala oonyeenyeya naari oowali. Nave vaavaa ananikhalihaaya mmukhalelo yoola, onamukhala woovila wa hiyo okhala ooreera murima ni ochuna waalaleerya.
Muchu oreera murima onnoona makacamiho ni soothowa sa akina, onnamoriwa ikharari ntakhara yaawo, nave onnachuna waakhaviherya. Nto tiheeni enahaala weereya wakhala wi hannamoriwa ikharari ni achu yaawo nnaaphwanyaahu mmuteko ahu woolaleerya? Nnahaala oyeleela mvai ahu, eyo tiwii, hinni nikhaleno nchuno na waalaleerya, nave haniwerya waakhaviherya. Nnaphwanela olikanyiha mvai ahu ni mooro. Wi mooro owerye ovarela phaama, ti woochuneya ohelavo ikhuuni. Moolikana, wi mvai ahu okhale woolipa ti yoochuneya oomoriwa ikharari!—1 Tesalónika 5:19.
Nni nihuserye hai okhala oreera murima, naamwi okhanle woovila? Hankooni nthokororye sootakiherya raru nnaphwanelaahu ochariha: Yehova, Yesu ni murummwa Paulo.
MUTAKIHERYE OREERA MURIMA WA YEHOVA
Mu iyaakha macikhwi, achu annaloca sawootha vooloca sa Yehova. Nyenya onnatitelela okhala “aphama ni atxhu ònanara murima ni òhithamala.” (Luka 6:35) Onooniherya hai ophaama awe? Owo toopisa murima ni oothene. Yehova onachuna wi “atxhu othene” evulusiwe. (1 Timóteo 2:3, 4) Naamwi Muluku iicaka onanara, achu tasisapo wa yene nave hanachuna wi etoloxiwe.—2 Pedro 3:9.
Yehova oosuwela wi Satana ookhalano mavyakelo a ooweeriha achu weemererya sawootha. (2 Korinto 4:3, 4) Ancipale aahusihiwa sawootha vooloca sa Muluku ovinyerya eri anamwane. Mwawiihiiha, mukhalelo anuupuwelaaya onamweeriha okhala woovila wa yaawo weemererya eparipari. Nyenya Yehova ori ooreheryeya wi aakhaviherye. Nnasuwela hai?
Ntoko yootakiherya, muupuwele mukhalelo Yehova aawooneiye achu a epooma yo Ninive. Naamwi yaari oowali, Yehova aahiloca wa Yona: “Nkàphwanela oteteiwa ni atxhu a Nínive, atxhu a epoma etokwene! Atxhu a epoma yeyo àtepa watxa opwaha matxikhwi nsana ni makhumi meli ahisuwenle eri yaphama wa yawo?” (Yona 4:11) Yehova aahimoriwa ikharari ni achu yaale, yahaasuwenle eparipari vooloca sa yene. Mwawiihiiha owo aahimurumiha Yona wi aalopole.
Nnoona mmukhalelo mmohamoha ntoko Yehova onooneleiye vooloca sa achu. Awo tasisapo. Ntoko Yehova, nri ooreheryeya wi naakhaviherye ohuserya vooloca sa yoowo, naamwi okhalaka ntoko wi heni yeemererye eparipari.
MUTAKIHERYE OREERA MURIMA WA YESU
Ntoko Tiithi awe, Yesu aahimoriwa ikharari ni achu “ntakhara a yawo, vawi yári ómwaryeya ni ómwalamwala ókhala ntoko ipuchepuche sohikhala ni mukukhula.” (Mateu 9:36, Nlakano Nahihano) Yesu aahiiwexexa ntakhara heeni yaaryaaya mmukhalelo yoowo. Waari nthowa nawi ahooleli aya a ikerexa hiyaakhaliha phaama nave yaahusiha sawootha. Naamwi Yesu aasuwenle wi ancipale yaawo yaarwa onwiriyana hiyaahaala okhala omuchara awe, nlelo owo aahaahusiha ichu sincipale.—Marko 4:1-9.
Muhivolole wakhala wi woopaceryani muchu hoowiriyanneeni
Vaavaa mikhalelo sa okumi sinatorokeyaaya, achu ananwerya waakhulela eparipari mmikhalelo soohiyana
Wakhala wi achu hanaakhela phaama michaka sahu, nnaphwanela wiiwexexa ntakhara heeni awo annakhooca. Akhweya awo aakhalano moonelo woonanara vooloca sa Piipiliya naari vooloca sa Akristu nthowa nawi aawoona akina yaawo aniiseera Akristu yeeraka ichu soonanara. Akina akhweya ahiiwa sawootha vooloca sa soororomela sahu. Nlelo akina annakhala awoova wi amusi aya naari achu a muceche anahaala waanyemula wakhala wi annaloca ni hiyo.
Achu akina nnaaphwanyaahu aahoolela makacamiho yaawo aavolowenle mwawiiseela. Misiyonaariyo amwaamuthiyana nsina nawe Kim ooloca wi achu ancipale mu ekulucu awe ooponwe mu ekhoco nave aayeleela echu vyakala yaaryaayano. Awo haanono ewehereryo yeeparipari vooloca sa omwaahiyu. Awo ari awuukhuwa nave hanamuroromela muchu. Achu mu ekulucu yeeyo wiiliwiili anneererya waamaaliha Anamoona a Yehova mmuteko woolaleerya. Ekwaha emoha Kim aahihoosiwa mmuteko woolaleerya.
Kim aawenrye hai otitelela okhala ooreera murima, naamwi achu yaamukhalinhe moonanara? Wiiliwiili owo onneererya wuupuwelela Masiposipo 19:11, analoca: “Namiruku t’ule òhinanariwa.” Vaavaa onuupuweleiye mukhalelo wa achu a ekulucu awe, eyo ennamukhaviherya waamorela ikharari. Nave tahi wi achu oothene onaaphwanyeiye hanooniherya onthamwene. Mu ekulucu emohamoha, owo ookhalano oxekurya waphaama.
Nnaphwanela wiikoha: ‘Waakhanle wi nkisuwenle eparipari, kahaala waakhaliha hai Anamoona a Yehova waakhanle wi aarwa wi ekilaleerye?’ Ntoko yootakiherya, hanka waakhanle wi nohiiwa sawootha vooloca sa Anamoona a Yehova? Akhweya hiyaano tho nahaala waakhaliha mmukhalelo woonanara nave naahaala ochuna omoreliwa ikharari. Yesu ooloca wi nnaphwanela waakhaliha akina hiiha ntoko nnachunaahu okhalihiwa. Mwawiihiiha, nnaphwanela weererya wiiwexexa mukhalelo akina anuupuwelaaya nave nikhale oopisa murima ni yaawo, naamwi ekhalaka yoovila weerano.—Mateu 7:12.
MUTAKIHERYE OREERA MURIMA WA PAULO
Murummwa Paulo ahooniherya oreera murima wa achu yaawo yaamukhalinhe moonanara mmuteko awe woolaleerya. Ntakhara heeni? Nthowa nawi owo ahuupuwela mukhalelo awe wa khalai. Owo ooloca: “Miyo khalai kàri òruwana, awikara ni owali. Nto kòmoreliwa ikharari, wona wi kera kihisuwelaka, ntakhara kàri òhiroromela.” (1 Timóteo 1:13) Paulo aasuwela wi Yehova ni Yesu, yaahimooniherya ikharari. Owo aanawiiwexexa achu yaachuna omaaliha muteko awe woolaleerya, nthowa nawi ekwaha ekina owo aheerano yeeyo.
Elukuluku ekina, Paulo aahaaphwanya achu yaawo yeemererya mahusiheryo atheru. Owo oonne hai? Ninnaalakhanya mu Saweriwa T’arummwa 17:16, wi vaavaa aareiye o Atena, “murima wàmwipa wa nthowa na wona vapoma itxhu sawepesiwa ntoko Muluku.” Nyenya Paulo aahipharihela ichu seiyo saamwiipinhe murima ntoko mukhalelo wa waahusiha achu. (Saweriwa T’arummwa 17:22, 23) Owo aahitoroka mukhalelo awe wa olaleerya, nave aahiloca mmukhalelo woohiyana ni achu a mukhalelo woothene wi ‘nuvelavela wawe wothene avuluse akina.’—1 Korinto 9:20-23.
Elukuluku nnaalaleeryaahu achu yaawo ahinaakhulela phaama naari arino soororomela soonanara, nnanwerya opaka yeeyo Paulo aapankeiye. Nnanwerya opharihela yeeyo nsuwenlaahu vooloca sa yaawo wi naakhaviherye ohuserya vooloca sa “michaka sa echu yaphaama.” (Isaiya 52:7, Tradução do Novo Mundo) Murokora oniichaniwa Toroti ooloca: “Mu ekulucu ahu, ancipale ahusihiwe wi Muluku toohoosa nave toothoriha. Kinnaathamalela achu yaawo nthowa na okhalano nroromelo noolipa mwa Muluku nave voocharela kinnaakhaviherya ni yeeyo Piipiliya onaloceiye sa osivela wa Yehova ni soororomeliha sawe vooloca sa omwaahiyu.”
“OVOTHE YONANARA NI YAPHAMA”
Vaavaa nryaahu omakuchuwelo, niweherye wi miyoonelo sa achu akina inahaala ‘wimunanararu okhala wokhala.’ (2 Timóteo 3:1, 13, NN) Nyenya hannaphwanela oyeleela oreera wahu murima nthowa na mukhalelo anaakhulelaaya. Yehova onamunivaha ikuru wi niwerye ‘ovotha yonanara ni yaphama.’ (Aroma 12:21) Piyoneera oniichaniwa Yesika ooloca wi wiiliwiili owo onnaaphwanya achu yaawo ari awiirumiha nave ananloca moonanara vamoha ni muchaka ahu. Owo onnaaceererya: “Enanwerya okhala yoosokonyerya. Vaavaa kinapaceryaaka ovaanela, kinnavekela moomaaleleya wa Yehova nave kinnamveka nikhaviheryo wi kimoone muchu hiiha ntoko owo onamooneleiye.” Eyo ennamukhaviherya Yesika ohithokororya moonelo awe nyenya wuupuwelela mukhalelo wa omukhaviherya muchu owo.
Ntitelele owaavya yaale anachuna ophwanya eparipari
Moovira wa elukuluku achu akina anahaala weemererya nikhaviheryo nahu nave ehuserye eparipari
Nnaphwanelatho weererya waalipiha anna ni arokora ahu vaavaa nnalaleeryaahu ni yaawo. Yesika ooloca wi elukuluku onalaleeryeiye ni akina nave mmoha ahaakheliwa phaama, owo onneererya ohithokororya yeeyo. Opwaha yeeyo, onnaloca echu yaphaama, ntoko sookhumelela sa muteko ahu woolaleerya oryaayano naamwi akina yaakhulelaka mmukhalelo woonanara.
Yehova oosuwela phaameene wi ikwaha ikina ti woovila wa hiyaano olaleerya. Nyenya owo onnahakalala vaavaa nnatakiheryaahu ikharari sawe! (Luka 6:36) Nave Yehova hanii akhale ooreera murima ni achu mu elukuluku yoothene. Nnaphwanela ororomela wi owo oosuwela phaameene vaavaa onahaaleiye oruuha makuchuwelo. Ophiyerya elukuluku yeeyo, olaleerya wahu ti wawaakuveya. (2 Timóteo 4:2) Mwawiihiiha, hankooni ntitelele olaleerya ni mvai nave nikhale ooreera murima ni “atxhu othene.”
