1, 2. (1) Ntakhara heeni eryaaya yamiruku okhala makupa a Yehova? (2) Tiheeni nnahaalaahu othokororya mmwaha yoola?

TI YAMIRUKU wa hiyo okhala vakhiviru va Yehova. Haavovo ori ooweryaxa, amiruku, ni oosivela ompwaha yoowo! Mwawiihiiha, mahiku oothene ninnachuna okhala oororomeleya wa yoowo ni okhala makupa awe. (Salumu 96:4-6) Nyenya akina yaamurumeela Muluku yaahihesa weerano yeeyo.

² Mmwaha yoola, nnahaala othokororya sootakiherya ikina sa achu yaawo yaaloca wi yaari makupa a Yehova nyenya mu elukuluku emohamoha yeerano ichu seiyo Yehova oniiceiye. Saweereya sookhweleya nneeraahu nihuserye orweela wa sootakiherya saya inamunikhaviherya otitelela okhala oororomeleya wa Yehova.

3. Ntakhara heeni Yehova aaheererya omukhaviherya Kayine, nave tiheeni Owo aamulenleiye?

³ Ntoko yootakiherya, mmuupuwele Kayine. Tahi wi owo aamulapela muluku atheru, naamwi hiiha, Yehova heemerenrye malapelo awe. Ntakhara heeni? Yehova aahoona wi mmurimani  mwawe waakhalamo soochuna soonanara. (1 Yohani 3:12) Yehova aahimulopola Kayine: “Wera yaphàma, txhiri ethoni à enamukhala yohakalala; nto wera yonanara, yotxheka enan’wipithela vamilako và, yothurumelaka, nto weyano onan’werya ovòtha”? (Maphatxuwelo 4:6, 7) Yehova aahihiya vanlakani wi waakhanle wi Kayine oorukunusa murima nave athanla okhala makupa a Muluku, Owo aahaala okhala makupa awe.

4. Tiheeni Kayine aapankeiye vaava aareiyeno ekari ya okhala makupa a Yehova?

⁴ Waakhanle wi Kayine ootoroka muupuwelo awe, Yehova aahaala weemererya malapelo awe wanawiili. Nyenya Kayine haamwiiwelenle Muluku, nave muupuwelo ni nchuno nawe na nrima saahimweeriha opaka yoocheka. (Tiyako 1:14, 15) Elukuluku Kayine aareiye mmiravo, owo hantonko waanyiherya wi aahaala omurukunuwela Yehova. Nyenya vano owo hiiwelenle olopola wa Muluku, aahimmwareela, nave amwiipha munnawe!

5. Mukhalelo taani wa muupuwelo oni oneerihe oyeleela mahala a Yehova?

⁵ Ntoko Kayine, Mukristu olelo akhweya onamuloca wi onnamulapela Yehova nyenya apakaka ichu seiyo Yehova oniiceiye. (Yuda 11) Owo onamukhala amvai mmuteko woolaleerya ni ophwanyeya mmithukumano moohihiyererya. Nyenya mu elukuluku emohamoha, akhweya eemereryaka muupuwelo woocapaheya, wa nrima, naari wa wiica ohoolela okumi awe. (1 Yohani 2:15-17; 3:15) Muupuwelo yoowo onammweeriha opaka yoocheka. Achu akina hanasuwela yeeyo nnuupuwelaahu naari nnapakaahu, nyenya Yehova oosuwela. Owo oosuwela waakhanle wi hanri mmakupa awe moomalela.—Mwaalakhanye Yeremiya 17:9, 10.

6. Yehova onanikhaviherya hai ovootha soochuna soonanara?

⁶ Naamwi nipakaka soocheka, Yehova hanaakuvela onnyanyala. Wakhala wi ninnakusa ephiro yawoopiha, Yehova onnaniwopa: “Mukòkele wa miyano nave miyano kinamukòkela wa nyuwano.” (Malakiya 3:7) Yehova onniiwexexa wi nookhalano sooceecheya seiyo nnawanihaahu. Nyenya onachuna wi nikhale oolipa nave nsepe yeeyo eri yoonanara. (Isaiya 55:7) Wakhala wi noheerano, owo oororomeliha wi onahaala onikhaviherya ni onivaha ikuru nnachunaahu wi nivoothe soochuna soonanara.—Maphatxuwelo 4:7.

7. Salomoni aayeleenle hai onthamwene awe ni Yehova?

⁷ Vaavaa Salomoni aareiye mmiravo, owo aahikhalano onthamwene waphaama ni Yehova. Muluku aahimvaha Salomoni miruku mincipale nave amvaha murici woochuneya wa oteka Empa yooreera ya Muluku o Yerusalemu. Nyenya Salomoni aahiyeleela onthamwene awe ni Yehova. (1 Mamwene 3:12; 11:1, 2) Nlamulo na Muluku naanaloca wi mwene “ahatxeno athiyana, wi murima awe ohirakamele w’Apwiya.” (Malamulo 17:17) Salomoni hiiwelenle nlamulo nenla. Mwawooneya owo aakhalano athiyana masana mathanu napiili ni asimpwana awaakhwana masana mararu! (1 Mamwene 11:3) Ancipale a athiyana yaala yaari a ilapo sookhopela yaawo yaalapela amuluku atheru. Mwawiihiiha Salomoni hiiwelenle nlamulo na Muluku moorweela wa waathela athiyana a ilapo sookhopela.—Malamulo 7:3, 4.

8. Salomoni aamunyemunle hai Yehova?

⁸ Vakhaani vakhaani, Salomoni apacerya oyeleela osivela wawe malamulo a Yehova. Chiryene owo aheera ichu soonanara. Owo  aamuteka altare a muluku amwaamuthiyana, nsina nawe Astarte ni muluku nsina nawe Kamosi, nave voocharela aapacerya waalapa amuluku yaala atheru vamoha ni asaariye. Salomoni aahaateka altare yaala va mwaako yoowo wari ohoolo wa Yerusalemu, weiwo aatenkeiyewo Empa ya Yehova! (1 Mamwene 11:5-8; 2 Mamwene 23:13) Akhweya Salomoni aahiiwoka uupuwelaka wi Yehova haahaala opwacha ichu soothene soonanara owo eereiye wakhala wi oovaha ephepa mu Empa ya Yehova.

9. Tiheeni yeeren’ye vaavaa Salomoni ahiiwelenleiye olopola wa Muluku?

⁹ Nyenya Yehova harwa ahipwacha yoocheka. Piipiliya oni: “Apwiya yànyenyeya ni Salomoni, ntakhara murima awe wàhahiya Apwiya.” Muluku aheererya omukhaviherya Salomoni. Apwiya Yehova “yisonin’he wa yowo wili ni yawo yamuhihale owiwelela amuluku akina. Nto Salomoni hatxharin’he yele Apwiya yamurummaya.” Ntoko yookhumelela, owo aahiyeleela mahala ni nikhaviheryo na Muluku. Yehova heemerenrye muyareriwo wa Salomoni olamulela nloko noothene na Aisarayeli, nave awo yaahikhalano makacamiho mancipale mu iyaakha masana.—1 Mamwene 11:9-13.

10. Tiheeni eni enanarihe onthamwene ahu waphaama ni Yehova?

¹⁰ Wakhala wi naathanlile asinthamwene yaawo ahiniiwexexa ni ocicimiha malakiheryo a Muluku, awo anahaala ovolowela muupuwelo ahu ni onanariha onthamwene ahu ni Yehova. Awo akhweya anampaka makupa a muloko, nyenya ehikhanleno onthamwene woolipa ni Yehova. Naari anamukhala asinthamwene, amwaacamani, asinthamwene  oomutekoni, naari oosikola yaawo ahinamulapela Yehova. Wakhala wi achu nnamalihaahuno elukuluku hanakhala mwawiiwanana ni malakiheryo a Yehova, awo ananwerya onivolowela vancipale ophiyerya oyeleela onthamwene ahu waphaama ni Muluku.

11. Tiheeni eni enikhaviherye waathanla asinthamwene?

¹¹ Mwaalakhanye 1 Korinto 15:33. Achu ancipale aakhalano mikhalelo saphaama. Nave yaale ahinamulapela Yehova akhweya hanapaka ichu soonanara wiiliwiili. Nyuwaano akhweya mohaasuwela akina a yaawo. Apwanne eyo enataphulela wi asinthamwene aphaama? Muupuwele ela, awo anavolowela hai onthamwene anyu ni Yehova? Apwanne annookhaviheryaani omwaacamela Muluku? Echu taani eri yookhweleya wa yaawo? Ichu taani inaasivela oloca? Apwanne anasiveliwa oloca sa ophwaneliwa, ikhorowa, ikhankoonya, mathatelo, ni ichu ikina? Apwanne wiiliwiili annaaloca moonanara akina? Apwanne annasiveliwa oloca miyaha sootheiha? Yesu oolopola: “Eyano enalotxa itxhu seiye isaren’ye mmurimani.” (Mateu 12:34) Wakhala wi moosuwela wi achu munamalihaanyuno elukuluku annananariha onthamwene anyu ni Yehova, mweerevo echu! Mukukuce elukuluku munamalihaanyu ni yaawo, nave wakhala wooweryeya, mmalihe onthamwene.—Masiposipo 13:20.

12. (1) Tiheeni Yehova aaleenleiye Aisarayeli emanle okhuma o Yikuputu? (2) Tiheeni Aisarayeli yaaloncaaya vaavaa Muluku aaleenleiye wi ekhale oororomeleya?

¹² Nnanweryatho ohuserya orweela wa yeeyo yeeren’ye Yehova amanle owoopola Aisarayeli o Yikuputu. Vaavaa achu yaathukumannaya ohoolo wa Mwaako Sinai, Yehova aahiisooneiha wa yaawo mmukhalelo wootikhiniha! Awo yaahoona neeku nooripa, waarya, ni mwiisi, nave yaahiiwa oruma otokotoko wa nipeca. (Mukwaha 19:16-19) Voocharela awo yaahimwiiwa Yehova alocaka wi owo ti ‘Muluku a ehatxe, ohinàvilela amuluku akina.’ Owo aahiroromeliha wi aahaala okhala oororomeleya wa yaale anamusivela ni aniiwelela malamulo awe. (Mwaalakhanye Mukwaha 20:1-6.) Yehova aaheeriha wi Aisarayeli esuwele wi wakhala wi ari makupa awe, owo aahaala okhala makupa aya. Waakhanle wi muri va nikhuuru nenlo, mwaahaala woona hai vaavaa mweeraanyu nwiriyane nsu na Yehova? Akhweya mwaahaala waakhula hiiha ntoko Aisarayeli, yaawo yaalonce: “Hiyano nnamwèra itxhu sòthene Apwiya anrummaya!” (Mukwaha 24:3) Hiyaavinrevo elukuluku yincipale ophiyerya vaavaa yeeren’yaaya echu yeeyo yenhe ororomeleya wa Aisarayeli ntakhara Muluku. Tiheeni yeeren’ye?

13. Tiheeni yeenhe ororomeleya wa Aisarayeli?

¹³ Aisarayeli yaahisareya woova nthowa na sootikhiniha vaavaa Muluku oonihenryeiye owerya wawe, ophiyerya wi Mose awela va Mwaako Sinai nave aloca ni Yehova ntakhara yaawo. (Mukwaha 20:18-21) Nyenya elukuluku yaahivira Mose aahikookenle va nikhuuru na muloko. Eyo yaakhala wi achu yaahaala orimeela mutakhwani ehirino muhooleli. Tiheeni yaaphwanelaaya opaka? Enakhala wi Aisarayeli yaaroromelaxa ohoolela wa muchu, ntoko wa Mose. Awo yaahitepa wuukhuwa nave eloca ni Aroni: “Haya, onipakele muluku wi anètxiheke. Vano hiyano hinnasuwela etxhu emphatxuwenle Mose owo onivinyihalewo w’Egipitu.”—Mukwaha 32:1, 2.

14. Aisarayeli yiiwonke hai, nave Yehova aakhulenle hai?

 ¹⁴ Aisarayeli yaahisuwela wi yaari yoonanara olapela soophwaniherya. (Mukwaha 20:3-5) Moohilekela awo yaahipacerya olapela eruku ya ewooro ya mwaasana a emope! Naamwi awo yahiiwelenle malamulo a Yehova, awo yaahiiwoka yuupuwelaka wi nlelo yaari makupa a Yehova. Aroni aahiphiyerya oloca wi olapela eruku ya mwaasana a emope yaari “efesta ya watxitximihano Apwiya”! Tiheeni Yehova aapankeiye? Owo aahimuleela Mose wi achu “àtxheka vatokovene” nave “àhiya ephiro karummaka otxhara.” Yehova aahitepa onyeenyeya ophiyerya alakelela otolosa nloko noothene.—Mukwaha 32:5-10.

15, 16. Mose ni Aroni yoonihenrye hai wi yaari mmakupa a Yehova moomalela? (Moone eruku yoopacerya.)

¹⁵ Nyenya Yehova, Muluku aikharari. Owo aahilakelela ohitolosa nloko noothene. Opwaha yeeyo, aahaavaha Aisarayeli ekari wi yooniherye wi yaanachuna okhala makupa awe. (Mukwaha 32:14) Vaavaa Mose aawonneiye achu ekhuwelaka, yiipaka, nave yiinaka ohoolo wa eruku ya mwaasana a emope, owo aahipwesa eruku eyo nave asila. Voocharela aahikhuwela: “Taani ori makupa a Yehova? Arwe wa miyo!” Achu a nihimo na Levi yaahithukumana emurukurerya Mose.”—Mukwaha 32:17-20, 26, TNM.

¹⁶ Naamwi Aroni aapanke eruku ya mwaasana a emope, owo aahirukunusa murima nave vamoha ni Alevi, aahithanla okhala makupa a Yehova. Achu yaala oororomeleya yaahihiya vanlakani wi hiyaachuna okhala makupa aalipa oocheka. Eyo yaari yoothanla yamiruku, nthowa nawi nihiku nenle, macikhwi a yaawo yaalapenle eruku ya mwaasana a emope yaahikhwa. Nyenya yaale yaari makupa a Yehova yaahoopowa, nave Muluku aahiroromeliha waareeliha.—Mukwaha 32:27-29.

17. Tiheeni nnahuseryaahu wa yeeyo Paulo orempeiye vooloca sa eruku ya mwaasaana a emope?

¹⁷ Tiheeni nnahuseryaahu wa yeela? Murummwa Paulo aahiloca: “Sothene seiho seren’ye wa yawo wi ikhale nthonyeryo wa hiyano ni irempwa wi ikhale ikano sahu, hiyo nnaphwanyeya mwa ilukuluku sokutxhula. Hiha yowo onupuwela wi ori òlipa, ikosope wi ahuwe.” (1 Korinto 10:6, 7, 11, 12) Hiiha ntoko Paulo olonceiye, naamwi yaale anamurumeela Yehova anamvoloweliwa mu opaka yeeyo eri yoonanara. Akhweya anamphiyerya wuupuwela wi nlelo Yehova onnaweemererya. Nyenya nthowa na muchu ochuna okhala nthamwene a Yehova naari ochuna okhala oororomeleya tahi wi wiiliwiili enataphulela wi Yehova onnamweemererya.—1 Korinto 10:1-5.

18. Tiheeni yaahaala oneeriha omuhiya Yehova, nave tiivi yaahaala okhala yookhumelela?

¹⁸ Vaavaa Mose aalekenleiye o Mwaako Sinai opwaha vaavaa Aisarayeli yaaweheryaaya, awo yaahikhala awuukhuwa. Wakhala wi makuchuwelo a elapo yeela annalekela opwaha vaavaa naaweheryaahu, nnamukhalatho awuukhuwa. Akhweya nnampacerya wuupuwela wi omwaahiyu wootikhiniha yoowo  Yehova ororomelinheiye wootepa orakamela naari honi ophiye, nave nnampacerya otikitherya muupuwelo ahu wa yeeyo nnachunaahu opwaha wa yeeyo Yehova onachuneiye. Wakhala wi hinaanono ephoole, nnammuhiya Yehova nave nipacerye opaka ichu seiyo nihintonko ahu waanyiherya wi naahaala opaka.

19. Tiheeni nnaphwanelaahu wuupuwela wiiliwiili, nave ntakhara heeni?

¹⁹ Yehova onachuna wi nimwiiwelele owo moomalela nave nimulapele yooworu pahi. (Mukwaha 20:5) Ntakhara heeni onachuneiye wi nipake yeeyo? Nthowa nawi onnanisivela. Wakhala wi hannapaka yeeyo Yehova onachuneiye, nnahaala opakaka yeeyo Satana onachuneiye, nave eyo enamunihoosa. Paulo ooloca: “Nyuwo himunawerya owurya ekahi ya Apwiya ni ekahi ya asatana Himunawerya olya ni Apwiya ni olya w’asatana.”—1 Korinto 10:21.

20. Yehova onanikhaviherya hai naamwi nipanke yoocheka?

²⁰ Kayine, Salomoni, ni Aisarayeli oothene yaala yaahikhalano ekari ya ocharuwa ni otoroka meecelo aya. (Saweriwa T’arummwa 3:19) Mwawooneya, Yehova hanaakuvela waahiya achu nthowa na opaka soocheka. Muupuwele mukhalelo aamulevelenleiye Aroni. Olelo, Yehova onnanivaha olopola woosivela wi onikhapelele ohipaka yeeyo eri yoonanara. Owo onnampharihela Piipiliya, soolaleeryiwa sahu, ni Akristu akina. Vaavaa nniiwelelaahu olopola wa Yehova, nnaphwanela ororomela wi onahaala onooniherya ikharari.

21. Tiheeni nnaphwanelaahu opaka vaavaa ororomeleya wahu wa Yehova oneehiwaaya?

²¹ Mahala a Yehova aakhalano yoolakelela. (2 Korinto 6:1) Awo annanivaha ekari ya “ohiya ohemererya ni minkhela sa elapo yavathi.” (Mwaalakhanye Tito 2:11-14.) Mu elapo yeela, wiiliwiili nnahaala okhalakano makacamiho yaawo anahaala weehaka ororomeleya wahu wa Yehova. Mukhale oolakelela okhala makupa a Yehova moomalela, nave muupuwele wi “munaphwanela omoovaka Yehova Muluku anyu, wa yoowo munaphwanela omurumeela, wa yoowo munaphwanela omwiiwelela”!—Malamulo 10:20, TNM.