1. Nthowa taani navameekhaaya nnaneeriha okhala oohakalalaxa?

NINNATEPA ohakalala wiiwa mukhalelo alapeli a Muluku aneerihaaya ekamaamaaya waarya! Eyaakha evirale, achu a Yehova aheeciha soohuserya sa Piipiliya opwaha 10.000.000. Nave amilyawu aachu avyaani yaahirwa va Mukonelo nave yaahihuserya vooloca sa yoovaha yoosivela ya Yehova ya woopola.—1 Yohani 4:9.

2, 3. (1) Tiheeni ehinanihiiha waarya “ntoko mithuko”? (2) Tiheeni nnahaalaahu othokororya mmwaha yoola?

² Orukurerya elapo yoothene, Anamoona a Yehova annaloca ilocelo sincipale soohiyana. Nto ela henanihiiha omuhakalaliha Yehova ntoko emusi emoha yawiiwanana. (Wupulula 7:9) Moohipwacha elocelo taani nnalocaahu naari weiwo nnakhalaahuwo, nnanwerya waarya “ntoko mithuko mwilaponi.”—Filipi 2:15.

³ Muteko ahu woolaleerya, wiiwanana wahu Weekristu, ni mvai ahu, soothene iha sinnaruuha ncicimiho wa Yehova. Nni neerihe hai ekamaama ahu waarya mmikhalelo seiha miraru?—Mwaalakhanye Mateu 5:14-16.

4, 5. (1) Ohiya pahiru olaleerya, nni neerihe hai ekamaama ahu waarya? (2) Sookhumelela taani sinarweela mu ooreera murima? (Moone eruku yoopacerya.)

⁴ Olaleerya ni waapaka amuhuserya mukhalelo wookhweleya wa weeriha ekamaama ahu waarya. (Mateu 28:19, 20) Mu eyaakha ya 1925 mwaha, “Ekamaama mu epiiphi” waahithariha wi mmahiku ookuchula, haavovo onahaala okhala oororomeleya wa Apwiya aniiha ahipharihelaka “ekari ya weeriha ekamaama awe waarya.” Voocharela mwaha owo waahiloca: “Muchu onaphwanela weerano yeela moorweela wa waaleela achu michaka yaphaama veelaponi, navetho weeca mwawiiwanana ni ephiro ya ekamaama.” (Mulipeleli 1 a Yunyu a 1925 a Enklesi) Ohiya pahiru olaleerya, meecelo ahu annaruuha ncicimiho wa Yehova. Achu ancipale annanoona vaavaa nnalaleeryaahu. Vaavaa nnatheyaahu wa yaawo ni oloca moohakalala nriki mooni, ela ennaakhaviherya wuupuwela moophwanelela vooloca sa hiyo ni Muluku nnamulapelaahu.

⁵ Yesu aahaaleela amuhuseryaawe: “Mwavolowaka mpa mulotxele empa yeyo.” (Mateu 10:12) Mmakupa Yesu aalaleeryeiyewo, yaari yookhovelela achu waawopela anamarwa mmawannyaya. Mmapuro mancipale olelo, yookhovelela ela tahi yawunlaanaxa. Achu ancipale anakhala oonyeenyeya naari oonanariwa vaavaa anamoonaaya muchu ahimusuwenlaaya aphiyaka vaate vaya. Nto wakhala wi naachu oonthamwene ni ooreera murima, awo anamukhala ootaphuwa. Vaavaa munapakaanyu onamoona wa vanlakani mpharihelaka ekarinya, apwanne hamutonko woona wi wakhala wi munnatheya wa achu ni waalocela mmukhalelo woonthamwene, awo annakhala ootaphuwa orwa ni okusa yoolaleeryiwa? Awo anamphiyerya ochuna opacerya ovaanela!

6. Tiheeni emukhavihenrye mutheli awuuluvala otitelela mmuteko woolaleerya?

⁶ Mutheli mmoha awuuluvala o Inklatera hanawerya olaleerya empa ni empa ntoko yeerelaaya khalai woona wi ekumi aya heneeca phaama. Mwawiihiiha anneemesa meesa a soolaleeryiwa vaate vaya. Awo anakhala waacamela va esikola, nave annakuha soolaleeryiwa iho vaate wi ewerye waalekecha alipa ooyara yaawo anarwa wi yaakuse anaaya. Alipa ooyara akina annakusa soolaleeryiwa iho ophitaanyerya Os Jovens Perguntam—Respostas Práticas, Volume 1 ni volume 2. Wiiliwiili murokora yoowo ori piyoneera onnakhala ni mutheli yoola. Alipa ooyara ahoona wi murokora owo onnooniherya onthamwene navetho wi mutheli onnachuna chiryene waakhaviherya akina. Mulipa ooyara mmoha oopacerya omuhuserya Piipiliya.

7. Muni nwerye hai waakhaviherya alipa oochawa mu ekulucu anyu?

⁷ Hiihaanoru, achu ancipale aachawa mu elapo aya nave vano anakhala mu ilapo ikina ntoko alipa oochawa. Tiheeni munaphwanelaanyu opaka wi mwaakhaviherye alipa oochawa mu ekulucu anyu ohuserya vooloca sa Yehova? Yoopacerya, munaphwanela ohuserya waamwenyerya mu elocelo aya. Mu waaceererya, moorweela wa ompharihela  aplikativo JW Language, nyuwo munanwerya ohuserya masu avakhaani yaawo anahaala oweeriha ochuna oloca ni nyuwo. Voocharela, nwoonihe ixilema ni soolaleeryiwa seiho sinaphwanyeya mu elocelo aya mu jw.org.—Malamulo 10:19.

8, 9. (1) Mithukumano sahu sa veeri va esumana sinanikhaviherya hai? (2) Alipa ooyara eni yaakhaviherye hai anaaya ovaha maakhulo mmithukumano?

⁸ Yehova onnanivaha soothene nnachunaahu wi nikhumelele phaama mmuteko ahu woolaleerya. Ntoko yootakiherya, yeeyo nnahuseryaahu mmuthukumano Okumi ni Muteko Ahu Weekristu ennanikhaviherya woona okhala woochuneya opaka oxekurya ni opaceryiha soohuserya sa Piipiliya.

⁹ Elukuluku akina anarwaaya mmithukumano sahu wi enixekurye, annatannyeya murima ni maakhulo anamwane ahu anapakaaya. Nyuwo munanwerya waahusiha anamwane anyu waakhula mmasu aya. Akina aavolowa mu eparipari vaavaa yaawinwaaya anamwane elocaka sa nroromelo naya mookhweya ni ovinyerya vathi va murima.—1 Korinto 14:25.

10. Malapelo eechoko eni ekhaviherye hai imusi olipiha wiiwanana?

¹⁰ Vaavaa nneereryaahu moowetha ovyakiha emusi ahu olapa vamoha mwawiiwanana ni mwa murecele, ninnaruuha ncicimiho wa Yehova. Ntoko yootakiherya, waakhanle wi mwa mulipa ooyara, mpake marehereryo wi mukhaleno malapelo eechoko moohihiyererya. Imusi sincipale sinnamoona JW Broadcasting vamoha, nave emanle woona exilema annathokororya mukhalelo anahaalaaya opharihela seiyo ahusenryaaya. Muupuwele  wi ohoolela ponkwe naari nahano onachuneiye ti woohiyana ni ohooleela mmiravo naari mwali onachuneiye. Mpake soothene munaweryaanyu wi mmukhaviherye muchu ti muchu a emusi anyu okumiha mphurelo orweela wa malapelo eechoko.—Salumu 148:12, 13.

11-13. Nni nikhaviherye hai muloko ahu okhala wawiiwanana moopwaha?

¹¹ Naamwi muri mmiravo, munanwerya omweeriha muchu ti muchu mmulokoni wiisoona okhala ookhweleya. Mukhalelo mmoha ori opaka onthamwene ni anna ni arokora awunnuwelavo. Mwaakohe tiheeni yaakhavihenrye otitelela omurumeela Yehova mu iyaakha sincipale. Awo anamoohusihaani ichu sincipale sookhweleya. Eyo enahaala waalipiha awo navetho enahaala woolipihaani! Nave oothene ahu moohipwacha waakhanle wi na amiravo naari awunnuwelavo, nnanwerya owaakhela phaama ale anarwa o Empa ya Omwene. Nyuwaano munaphwanela oloca mooni, mutheye wa yaawo, mwaakhaviherye ophwanya mpuro wookiraathivo, ni waasuweliha akina. Nweerihe wiisoona ntoko wi ari owaani.

¹² Wakhala wi moothanliwa ohoolela mithukumano sa muteko woolaleerya, munaphwanela waakhaviherya awuuluvala weeriha ekamaama aya waaryaxa. Muroromele wi aakhalano ekulucu yoophwanelela. Nwaavye amiravo naari asimwali wi alapeke ni yaawo. Anna ni arokora awuuluvala, ni yaale arino makacamiho a ekumi annakhala ooceecheya woona wi hanawerya olaleerya hiiha ntoko yeerelaaya khalai. Nto awo anamwiisoona phaama vaavaa anasuwelaaya wi munnaapwacha, navetho wi munniiwexexa mukhalelo aya. Moohiphwacha wuuluvala wa mukhalelo taani awo aryaaya naari elukuluku akhanlaaya mu eparipari, oreera wanyu murima onanwerya waakhaviherya otitelela olaleerya mwamvai.—Onamukutxho 19:32.

¹³ Aisarayeli yaanahakalala omulapela Yehova vamoha. Mulipa a masalumu oorepa: “Onani, ti worera ni wohakalaliha tchiri; Wi anna ekhaleke vamoha” mwawiiwanana! (Mwaalakhanye Salumu 133:1, 2, Nlakano Nahihano.) Owo aahilikanyiha wiiwanana yoola ni makhurwa awiicikichelano, yaawo anareeriha mwiili navetho aninkhela phaama. Mmukhalelo woolikana, nnanwerya waareeriha anna ni arokora ahu moorweela mwa okhala oohakalaliha ni ooreera murima. Ela enneeriha muloko okhala wawiiwanana. Apwanne mwanwerya waasuwela phaama anna ni arokora mmulokoni?—2 Korinto 6:11-13.

14. Muni mweerihe hai ekamaama anyu waarya mu ekulucu munakhalaanyuwo?

¹⁴ Ekamaamaanyu enanwerya waaryaka moohipwacha weiwo munakhalaanyuwo. Oreera wanyu murima onanweeriha amwaacamani anyu okhwela ohuserya sincipale vooloca sa Yehova. Mwiikohe: ‘Tiheeni amwaacamani aka anuupuwelaaya vooloca sa miyo? Apwanne vaate vaka ti vooreeravo ni voophwanelela? Apwanne ela ennaweeriha amwaacamani osiveliwa ni vaate vaka? Apwanne kinnaakhaviherya amwaacamani aka?’ Mwaakohe anamoona akina mukhalelo oreera murima ni yootakiheryaaya yaphaama yaavolowenlaaya amusi aya, amwaacamani  aya, asinthamwene aya oomutekoni, naari asinthamwene aya oosikola.—Éfeso 5:9.

15. Ntakhara heeni ninnaphwanela otitelela olipelela?

¹⁵ Wakhala wi ninnachuna wi ekamaamaahu etitelele waarya, nnaphwanela osuwela elukuluku nnakhalaahu. Ikwaha sincipale, Yesu aahaaleela amuhuserya awe: “Vano mulipeleleke.” (Mateu 24:42; 25:13; 26:41) Wakhala wi nnuupuwela wi “ekoi etokotoko” yootepa orakamela, hinnahaala okhala awiilipelela vooloca sa opharihela ekari yoothene wi naakhaviherye akina ohuserya vooloca sa Yehova. (Mateu 24:21) Opwaha ekamaamaahu waarya phaama, vakhaani vakhaani enahaala ovukuwa ophiyerya ocakanela.

16, 17. Tiheeni munaphwanelaanyu opaka wi mutitelele okhala awiilipelela?

¹⁶ Nnaphwanela otitelela wiilipelela hiihaano opwaha khalai. Mikhalelo veelaponi inamvira itepa onanara. Nto noosuwela wi makuchuwelo anahaala ophiya mu elukuluku Yehova olakelenleiye. (Mateu 24:42-44) Mu elukuluku emohamoha, nnaphwanela okhala oovilela ni othokororya omwaahiyu ahu. Mmwaalakhanyeke Piipiliya mahiku oothene, nave muhicompele ovekela wa Yehova. (1 Pedro 4:7) Muhuserye orweela wa anna ni arokora yaawo anamurumeela Yehova mu  iyaakha sincipale. Ntoko yootakiherya, munanwerya waalakhanya yaweereya ya okumi, hiiha ntoko mwaha Setenta anos ‘agarrando a aba da veste de um judeu’ olaleeryiwe mu Mulipeleli 15 a Apirili a 2012, ipaaxina 18-21.

¹⁷ Mukhale ooweiwa mmurumeelaka Yehova. Mpake ichu saphaama ntakhara akina, nave mmalihe elukuluku ni anna ni arokoraanyu. Voocharela munahaala okhala oohakalala, nave eyo enahaala okhala wi elukuluku enavira mwawaakuveya. (Éfeso 5:16) Akapuro a Yehova aakhwaaniherya sincipale moovira wa iyaakha nsana. Nave vano, hiyaano nri oweiwa opwaha khalai. Muteko wa Yehova onamvira waaceereryeyaka opwaha naanyiheryaahu. Ekamaamaahu enamvira yaaryaka!

18, 19. Atokweene ananikhaviherya hai omurumeela Yehova mwamvai? Mvahe yootakiherya.

¹⁸ Naamwi nipakaka soohesa sincipale, Yehova onnaneemererya omurumeela. Wi anikhaviherye, owo oovahererya “samahala wa atchu,” atokweene a mmulokoni. (Mwaalakhanye Éfeso 4:8, 11, 12 NN.) Mwawiihiiha vaavaa atokweene anoosekuryaayaani, mukumihevo mphurelo elukuluku munakhalaanyuno ni yaawo wi muhuserye orweela wa miruku ni ekano aya.

¹⁹ Ntoko yootakiherya, mutheli o Inklatera aahikhalano makacamiho mu othela waya, nave awo yaahiveka nikhaviheryo wa atokweene eeli. Muthiyana oona wi iyawe haakhaviherya emusi mu omulapela Yehova. Mulopwana oona wi haari muhusiha aphaama nave aaheemererya wi haapaka marehereryo vooloca sa malapelo eecheko. Atokweene yaahaakhaviherya wuupuwela vooloca sa yootakiherya ya Yesu. Awo yaahimulipiha mulopwana otakiherya mukhalelo Yesu aakhapelenleiye amuhuseryaawe. Awo yaahimulipiha muthiyana okhala oovilela ni iyawe. Yaahivahererya sooleeliherya vooloca sa mukhalelo mutheli eereiye awerye okhalano malapelo eecheko ni anamwanaaya apiili. (Éfeso 5:21-29) Mulopwana aahiilipiserya wi akhale muhooleli aphaama a echoko. Atokweene yaahimulipiha ohikookela muculi nave otitelela ororomela munepa wa Yehova. Osivela ni oreera murima atokweene yoonihenryaaya chiryene yaakhaviherya emusi yeele!

20. Tiivi enahaala okhala yookhumelela vaavaa muneerihaanyu ekamaamaanyu waarya?

²⁰ “[Oohakalala] mutchu yowo anamova Yehova, Awecha mwiphiro sawe.” (Salumu 128:1, NN) Munamukhala oohakalala vaavaa muneerihaanyu ekamaamaanyu waarya. Mwawiihiiha mwaahusihe akina vooloca sa Muluku, mpake soothene munaweryaanyu wi mukhaviherye emusi anyu ni muloko okhala wawiiwanana, nave mutitelele wiilipelela. Akina anahaala woona yootakiheryaanyu yaphaama nave anahaalatho ochuna omvaha ncicimiho Tiithiihu awirimu, Yehova.—Mateu 5:16.