1. Echu taani enanihiyaniha ni asinama?

YEHOVA ohaavaha achu echu yavameekhaaya. Echu eyo ti yawuupuxerya-ya-murima ahu. Eyo echu emoha enanihiyaniha ni asinama. Nnasuwela hai wi Atamu ni Eva yaahikhalano yawuupuxerya-ya-murima? Emanle ommwareela Muluku, yaahiipitha. Yawuupuxerya-ya-murima aya yaahaahoosa.

2. Yawuupuxerya-ya-murima ahu enalikana hai ni epuusula? (Moone eruku yoopacerya.)

² Yawuupuxerya-ya-murima ahu ori moonelo wampuwa vooloca sa yeeyo eri yoonanara ni yawookololowa, yeeyo eni enihoolele mookumini. Muchu yoowo yawuupuxerya-ya-murima awe ehivyakihiwe phaama onalikana ni pophoro orino Epuusula yoophweeya. Macumuca ni echeku enanwerya omukeriha makupa awoopiha. Nto epuusula enalapa phaama, enahaala omukhaviherya mulipa oomweeciha pophoro okhala mu ephiro yoophwanelela. Mmukhalelo woolikana, wakhala wi noovyakiha yawuupuxerya-ya-murima ahu moophwanelela, eyo enahaala onihoolela mwaphaama.

3. Tiheeni eni yeereye wakhala wi hanivyakinhe yawuupuxerya-ya-murima ahu moophwanelela?

 ³ Wakhala wi yawuupuxerya-ya-murima ahu hevyakihiwe moophwanelela, heni enilopole vooloca sa opaka echu yoonanara. (1 Timóteo 4:1, 2, Nlakano Nahihano) Enamphiyerya onilekecha wi “yonanara, [ti] yaphama.” (Isaiya 5:20) Yesu aahaaleela oomuchara awe: “Enamphiya elukuluku wi mutxhu oni awiphekeni, upuwelaka wera etxhu yomulapano Muluku.” (Yohani 16:2) Ti yeeyo yuupuwelaaya achu yaamwiiphale oohuserya Estevau. (Saweriwa T’arummwa 6:8, 12; 7:54-60) Moovira wa elukuluku, achu awaaca aapaka soonanara sincipale, ntoko wiipha, nave yaanaloca wi awo apanke hiiha ntakhara wi yookhwela ya Muluku. Mweeparipari, yeeyo yaapankaaya yaari yoovuhana ni malamulo a Muluku. (Mukwaha 20:13) Mwawooneya, yawuupuxerya-ya-murima aya hiyaahoolela moophwanelela!

4. Nni nroromele hai wi yawuupuxerya-ya-murima ahu ennalapa moophwanelela?

⁴ Vanonto, nni neerihe hai yawuupuxerya-ya-murima ahu olapa moophwanelela? Malamulo ni malakiheryo anarweela Mpiipiliyani “muteko aya ori ohusiha, ovanya sawotha, otxharusa ni ohusiha n’wokololani.” (2 Timóteo 3:16) Nnaphwanela omuhuserya Piipiliya moohihiyererya, wuupuwela mwawiiseela vooloca sa yeeyo owo onaloceiye, ni opharihela mookumini mwahu. Neerano yeeyo, nnahaala ohuserya wuupuwela hiiha ntoko Yehova onuupuweleiye. Voocharela nnahaala ororomela wi yawuupuxerya-ya-murima ahu ennanihoolela phaama. Hankooni nthokororye mukhalelo nneeraahu nipharihele malamulo ni malakiheryo a Yehova wi nivyakihe yawuupuxerya-ya-murima ahu.

5, 6. Malamulo a Muluku ananikhaviherya hai?

⁵ Wakhala wi ninnachuna wi malamulo a Muluku enikhaviherye, nnaphwanela opaka sincipale opwaha waalakhanya naari osuwela wi aakhala. Nnaphwanela osivela ni ocicimiha. Piipiliya onnanleela: “Muthanyeke yonanara nave mutxhuneke yaphama.” (Amosi 5:15) Vano nni neereno hai? Nnaphwanela ohuserya woona ichu mmukhalelo Yehova onooneleiye. Muupuwele eyo mmukhalelo ola. Mwaanyiherye wi nyuwaano hamunarupa phaama, nave mulipa murece onnoleelani olya yoolya yaphaama, ovyakiha mwiili ni opaka matorokelo makina mookumini mwanyu. Nyuwaano munnachariha ekano awe, nave ennaphara muteko! Munoona hai vooloca sa ekano ya mulipa murece?

⁶ Mmukhalelo woolikana, Mpatusa ahu oonivaha malamulo wi enikhapelele orweela wa sookhumelela sa yoocheka ni okhumelela phaama mookumini. Ntoko yootakiherya, Piipiliya onnanihusiha wi hannaphwanela wootha, wiiya, opaka ocapaheya, meerelo oowali, naari echu vyakala eniiwanana ni masololo. (Mwaalakhanye Masiposipo 6:16-19; Wupulula 21:8) Vaavaa nnoonaahu sookhumelela saphaama sa omwiiwelela Yehova, omusivela wahu ni osivela wahu malamulo awe onnannuwa.

7. Saweereya sa Mpiipiliyani inanikhaviherya hai?

⁷ Hannaphwanela ohooseya ni sookhumelela sa ohiiwelela malamulo a Muluku wi nihuserye yeeyo eri yoophwanelela ni yoonanara. Nnanwerya ohuserya orweela wa soohesa akina yaapankaaya khalai. Sootakiherya iho soorempwa Mpiipiliyani. Masiposipo 1:5 onnaloca: “Mutxhutho òsuwela, . . . onnatxererya miruku.” Yooleeliherya ela enarweela wa Muluku nave ti yaphaama! Ntoko yootakiherya, muupuwele mukhalelo Tavite aahoosen’yeiye amanle ohimwiiwelela Yehova ni opaka ocapaheya ni Patesepa. (2 Samuwele 12:7-14)  Vaavaa munaalakhanyaanyu yaweereya yeela, mwiikohe: ‘Tavite ii asepe hai makacamiho yaala? Kaari miyaano kaahaala opaka eheeni? Wakhala wi koheehiwa wi kipake ocapaheya, apwanne kaahaala okhala ntoko Tavite naari ntoko Yosefe?’ (Maphatxuwelo 39:11-15) Wakhala wi ninnuupuwela mwawiiseela vooloca sa sookhumelela soowaawa sa yoocheka, nnahaala ‘othanyaka yonanara.’

8, 9. (1) Yawuupuxerya-ya-murima ahu enanikhaviherya opaka eheeni? (2) Yawuupuxerya-ya-murima ahu enalapa hai ni malakiheryo a Yehova?

⁸ Ninnakhala ocai wa ichu seiyo Muluku oniiceiye. Nto tiheeni nnaphwanelaahu opaka wakhala wi nri mmukhalelo yoowo nihirivo nlamulo nooluluwanya Mpiipiliyani? Nni nsuwele hai yeeyo Muluku onachuneiye wi nipake? Wakhala wi nomweemererya Piipiliya ovyakiha yawuupuxerya-ya-murima ahu, nnahaala opaka yoolakelela mwa miruku.

⁹ Woona wi Yehova onnanisivela, owo oovahererya malakiheryo yaawo anahoolela yawuupuxerya-ya-murima ahu. Owo oothariha: “Miyano, Apwiya, ka Muluku à. Ti miyano kinosuweliha yele enawerya wolapela; ti miyano kinawetxiha mphironi wophwanela otxhara.” (Isaiya 48:17, 18) Vaavaa nnuupuwelelaahu mwawiiseela vooloca sa malakiheryo a Mpiipiliyani ni weemererya wi ekwannye murimahu, nnanwerya wookolola ni orehererya yawuupuxerya-ya-murima ahu. Eyo enamunikhaviherya opaka soolakelela mwa miruku.

10. Nlakiheryo tiheeni, nave Yesu aapharihenle hai malakiheryo mu ohusiha wawe?

¹⁰ Nlakiheryo, nthipelo na eparipari nnahoolela muupuwelo ahu, nnikhaviheryaka opaka soolakelela saphaama. Osuwela malakiheryo a Yehova ennanikhaviherya wiiwexexa mukhalelo owo onuupuweleiye ni mathowa anamweeriha onivaha malamulo ammoori. Yesu aahipharihela malakiheryo wi aahusihe amuhuserya awe wi muupuwelo ni saweera sookhalano sookhumelela. Ntoko yootakiherya, owo aahihusiha wi onanariwa onnahoolela owali, nave wi muupuwelo woocapaheya onnahoolela mararuwo. (Mateu 5:21, 22, 27, 28) Vaavaa nneemereryaahu ohooleliwa ni malakiheryo a Yehova, yawuupuxerya-ya-murima ahu enahaala ovyakiheya phaama, nave nnahaala opaka soolakelela seiyo sinaruuha ncicimiho wa Muluku.—1 Korinto 10:31.

11. Ohiyana taani onakhalavo variyari va Yawuupuxerya-ya-murima?

¹¹ Naamwi vaavaa Akristu anavyakihaaya yawuupuxerya-ya-murima aya empharihelaka Piipiliya, awo ananwerya okhalano makuchuwelo oohiyana hiyana vooloca sa mwaha wammoori. Yootakiherya emoha ya yeeyo yaahaala okhala waakhanle wi onneemereryeya owurya eviinyu. Piipiliya hanaloca wi owurya eviinyu ti yoonanara, nto onnanlopola wi hannaphwanela owuryaxa naari ohapaliwa. (Masiposipo 20:1; 1 Timóteo 3:8) Apwanne eyo enataphulela wi vaavaa Mukristu ohinawuryeiyexa owo hanaphwanela wuukhuwa ni akina? Hooye. Naamwi yawuupuxerya-ya-murima awe emweemereryaka owurya eviinyu, owo nlelo onaphwanela wuupuwela vooloca sa yawuupuxerya-ya-murima ya akina.

12. Masu anaphwanyeya mu Aroma 14:21 ananikhaviherya hai ocicimiha yawuupuxerya-ya-murima ya akina?

¹² Paulo aahooniherya wi nnaphwanela ocicimiha yawuupuxerya-ya-murima ya akina vaavaa aarempeiye: “Ti yaphama ohikhura enama, nari ohiwurya evinyu, nari ohera etxhu ekina yomutxhekela, yomukwatxuliha, nari yonvololiha munna-à.” (Aroma 14:21) Naamwi nrino ophwanelela wa owurya eviinyu, nnaphwanela opwacha yawuupuxerya-ya-murima ya Mukristu mukina. Akhweya munna aahikhalano yookhovelela ya owurya khalai ahaakumve ohuserya eparipari nave oolakelela ohiwurya naari vakhaani mano. Hinnachuna opaka echu vyakala yaahaala omweeriha okookela yookhovelela awe yakhalai. (1 Korinto 6:9, 10) Waakhanle wi munna owo aahan’ye owannyahu, apwanne naahaala omukhinyererya owurya eviinyu, naamwi akhonce? Chiryene hooye!

13. Timoteo aaciciminhe hai yawuupuxerya-ya-murima ya akina wi aakhaviherye weemererya michaka saphaama?

¹³ Vaavaa Timoteo aareiye mmiravo, owo aaheemererya othikiliwa naamwi yaari yawiicela. Owo aahisuwela wi othikiliwa waari wookhweleya wa Ayuta yaawo aayeiye waalaleeryaka. Timoteo, hiiha ntoko Paulo, hiyaachuna omunyeenyeiha muchu. (Saweriwa T’arummwa 16:3; 1 Korinto 9:19-23) Apwanne nyuwaanotho munniilipiserya waakhaviherya akina?

14, 15. (1) Nni nikhale hai otokweene? (2) Mukristu awiichwelavo onaakhaliha hai akina?

¹⁴ Oothene ahu nnaphwanela ‘omwalanakano masu a mapacheryeryo a Kristu’ nave “n’tcharekeru otokwene.” (Ahebri 6:1, NN) Hinni nikhale Akristu awiichwelavo pahiru nthowa nawi nri mu eparipari mu iyaakha sincipale. Onnachuneya wiilipiserya wi niphwanye otokweene. Nnaphwanela otitelela wunnuwa mu masuwelelo ni mmirukuni. Mwawiihiiha nnaphwanela omwaalakhanya Piipiliya mahiku oothene. (Salumu 1:1-3) Vaavaa munamwaalakhanyaanyu Piipiliya mahiku oothene, munahaala wiiwexexaka phaama malamulo ni malakiheryo a Yehova.

¹⁵ Tinivi nri nlamulo nookhweleyaxa wa Akristu? Nlamulo na okhwela. Yesu aahaaleela amuhuserya awe: “Mwa yeyo atxhu othene anamusuwela wi muri a muhuserya aka, nyuwo mwakhwelanà mukina ni mukhweiye.” (Yohani 13:35) Okhwela oniichaniwa “nlamulo ntokotoko” nave “onakhwaniha malamulo.” (Tiyako 2:8; Aroma 13:10) Hannakhala ootikhiniheya wi okhwela ti woochuneya, nthowa nawi Piipiliya onaloca wi “Muluku ti okhwela.” (1 Yohani 4:8) Wa Muluku, okhwela tahi pahiru moonelo. Owo onnooniherya okhwela wawe moorweela wa meerelo awe. Yohani oorepa: “Muluku ononiha onikhwela wawe, vomurumihela Mwana awe mmoharu mwelaponi wi hiyano nikhale mwa yowo.” (1 Yohani 4:9) Vaavaa nnooniheryaahu omukhwela Yehova, Yesu, annihu ni achu akina, ninnooniherya wi na Akristu awiichwelavo.—Mateu 22:37-39.

16. Vaavaa nnakhalaahu Akristu awiichwelavo, ntakhara heeni ninnavaha esisapo malakiheryo?

¹⁶ Vaavaa nnakhalaahu Akristu awiichwelavo, ninnavaha esisapo malakiheryo. Malamulo wiiliwiili anaphariheleya wa mukhalelo wooluluwanya, koma malakiheryo  anaphariheleya mmikhalelo soohiyana hiyana. Ntoko yootakiherya, mwaana haniiwexexa yawoopiha ya waapaka asinthamwene ni achu oonanara murima, mwawiihiiha alipa oomuyara awe anaphwanela otikitherya malamulo wa yoowo. (1 Korinto 15:33) Nto vaavaa mwaana owo onannuweiye, onnahuserya wuupuwela mwawiiwanana ni malakiheryo a Piipiliya. Malakiheryo awo anahaala omukhaviherya waathanla asinthamwene aphaama. (Mwaalakhanye 1 Korinto 13:11; 14:20.) Vaavaa nnuupuwelaahu mwawiiwanana ni malakiheryo a Piipiliya, yawuupuxerya-ya-murima ahu enahaala okhala yoororomeleya. Nnamwiiwexexa mookwakwaleya yeeyo Muluku onachuneiye wi nipake mmwaha wammoori.

17. Ntakhara heeni nnanwerya oloca wi nookhalano soothene nnachunaahu wi nipake soolakelela mwa miruku?

¹⁷ Nookhalano soothene nnachunaahu wi nipake soolakelela seiyo sinamuhakalaliha Yehova. Mpiipiliyani, ninnaphwanyamo malamulo ni malakiheryo yaawo ananikhaviherya okhala “awakhwanelela ni awireherya wera saphama sothene.” (2 Timóteo 3:16, 17) Malakiheryo a Piipiliya annanikhaviherya wiiwexexa mukhalelo Yehova onuupuweleiye. Nto onnachuneya wiilipiserya wi niphwanye. (Éfeso 5:17) Wi nikhaviheryeye, nookhalano Índice das Publicações da Torre de Vigia, Guia de Pesquisa para Testemunhas de Jeová, Watchtower Library, Watchtower ONLINE LIBRARY, ni aplikativo JW Library. Vaavaa nnapharihelaahu ikaruma seiya, nnahaala ophura mu yoohuserya ya muchu mukhateiye ni malapelo eechoko.

18. Tiheeni eneereya vaavaa nnapharihelaahu malamulo ni malakiheryo a Yehova mookumini mwahu?

¹⁸ Okumi ahu onnakhumelela phaama vaavaa nnapharihelaahu malamulo ni malakiheryo a Yehova! Salumu 119:97-100 onnaloca: “Pwiya, kinnakhwelasa malamulo anyu! Kinnupuwela yawo mahiku òthene. Malamulo anyu annakikhaliha a miruku wapwaha amwitxana, malamulo anyu annakhala mwa miyo mahiku òthene. Kòtepa okhala ni miruku wapwaha amuhusiha aka, wa nthowa na wupuwelela malamulo anyu. Kòsyaka wapwaha awùluvala, ntakhara kinnakhapelela otxhuna wanyu.” Vaavaa nnaavyaahu elukuluku ya wuupuwelela mwawiiseela vooloca sa malamulo ni malakiheryo a Muluku, saweera sahu inahaala okhala mwa miruku ni masuwelelo. Nave wakhala wi ninnapharihela malamulo ni malakiheryo awe wi nivyakihe yawuupuxerya-ya-murima ahu, nnahaala ophwanya “mphimo wa munnuwelo wa wakhwanela wa Kristu.”—Éfeso 4:13.