1, 2. (1) Tiheeni Yesu aavenkeiye variyari va nivekelo nawe vamoha ni arummwa awe? (2) Ntakhara heeni akhweya Yesu aahikhala awuukhuwa vooloca sa wiiwanana?

YESU aari awuukhuwa vooloca sa wiiwanana variyari va yoolya awe yookuchula vamoha ni arummwa awe. Elukuluku aavekenleiye ni yaawo, owo aahiloca wi aachuna wi amuhuserya awe ekhale amoha, naari awiiwanana, ntoko owo ni Tiithi awe aryaaya amoha. (Mwaalakhanye Yohani 17:20, 21.) Vaavaa amuhuserya a Yesu yeeraaya ekhale awiiwanana, eyo yaahaala wooniherya wa akina wi Yehova aahimurumiha Yesu veelaponi. Achu yaahaala waasuwela amuhuserya eeparipari a Yesu orweela mwa osivelana mukina ni mukhwaawe, nave osivela yoola waahaala oweeriha olipiha wiiwanana waya.—Yohani 13:34, 35.

² Nnanwerya wiiwexexa ntakhara heeni Yesu aahiloca sincipale vooloca sa wiiwanana mu ohiyu yoole. Owo aahoona wi arummwa awe hiyaari awiiwanana moomalela. Ntoko yootakiherya, arummwa yaahivaanyihana vooloca sa “tani ì akhale mutokwene” ntoko yenraaya woopaceryani. (Luka 22:24-27; Marko 9:33, 34) Mu elukuluku ekina, Yohani ni Yakopo yaahimveka Yesu wi  aavahe nipuro noocicimiheya mu Omwene awe wa wirimu, wi ekhale mmakupa awe.—Marko 10:35-40.

3. Tiheeni yaahaala oweeriha amuhuserya a Kristu ohikhala awiiwanana, nave makoho taani nnahaalaahu othokororya?

³ Hinaari pahiru nchuno na okhalano oowerya ni olamulelo yaahaala waahiiha amuhuserya a Kristu okhala awiiwanana. Achu mmahiku a Yesu yaari ookawanyeya nthowa na wiica ni nthalu. Amuhuserya a Yesu yaaphwanela wiilipiserya ovootha moonelo yoola woonanara. Mmwaha yoola, nnahaala othokororya makoho ala: Tiheeni Yesu aapankeiye vooloca sa nthalu? Owo aakhavihenrye mwawiihai oomuchara awe waakhalihaka akina moohikhala nthalu, naari moophwanelela ni mwawiiwanana? Nave yootakiherya ya Yesu ni ichu aahusinheiye sini sinikhaviherye hai wiikhalelaru awiiwanana?

4. Mvahe yootakiherya ya nthalu nenlo Yesu eereliweiye.

⁴ Ophiyeryatho Yesu aahikhalihiwa mwa nthalu. Vaavaa Filipi aamulenleiye Natanayeli wi owo aahimphwanya Mesiya, Natanayeli aahiloca: “O Nazaré onnawerya okhumawo etxhu yaphama?” (Yohani 1:46) Natanayeli akhweya aahisuwela wi Mesiya aahaala oyariwa o Petelehemu, hiiha ntoko yooloherya enaphwanyeya mu Mikeya 5:1 yaaloncaaya. Akhweya Natanayeli uupuwela wi Nasareti hiyaari epooma yoophwanelela wi nikhale nipuro na Mesiya. Yaahikhalavotho Ayuta oocicimiheya yaawo yaamwiica Yesu nthowa nawi aaruule o Kalileya. (Yohani 7:52) Ayuta ancipale yuupuwela wi achu o Kalileya yaari oohicicimiheya. Ayuta akina yaaheererya omuruwana Yesu moorweela mu omwiichana Musamariya. (Yohani 8:48) Asamariya yaari a nloko noohiyana, nave malapelo aya yaari oohiyana ni a Ayuta. Mahimo oomeeli, Ayuta ni Akalileya hiyaacicimiha Asamariya nave yaanaathanya yaawo.—Yohani 4:9.

5. Nthalu taani amuhuserya a Yesu yeereliwaaya?

⁵ Ahooleli a malapelo a Ayuta yaanaanyemulatho oomuchara a Yesu. Afarisi yaawiichana awo ntoko “awulumeliwa!” (Yohani 7:47-49) Afarisi yaamoona muchu yoowo ahaahusenrye mu isikola sa malapelo a Ayuta ni yoowo ahaachariha mihapo saya ntoko muchu pure ni oohiphwanelela. (Saweriwa T’arummwa 4:13) Yesu ni arummwa awe yaahikhalihiwa mwa nthalu woona wi achu mu elukuluku yeele yaari awiirumiha ni malapelo aya, ophwanelela yaaryaayano variyari va achu, ni mwiili aya. Nthalu nenlotho naahaavolowela amuhuserya ni mukhalelo yaawoonaaya akina. Wi etitelele okhala awiiwanana, awo yaaphwanela otoroka mukhalelo yuupuwelaaya.

6. Muloce sootakiherya sinooniherya mukhalelo nthalu nnahaalaaya onivolowela.

⁶ Olelo, achu anirukurenrye aasareya ni nthalu. Achu ananwerya onikhaliha mwa nthalu, naari nnanwerya okhala a nthalu ni akina. Murokora yoowo vano ori piyoneera  o Australiya ooloca: “Owiica waka asuku waahunnuwa vaava koonaaka nthalu yeereliwaaya akaneene a elapo.” Wiica wawe waahunnuwatho nthowa na mukhalelo akina yaamukhalihaaya moonanara. Munna o Kanata onnaloca mukhalelo ooneiye khalai: “Kuupuwela wi achu analoca Efransa yaari a vasuluxa.” Ooloca wi ntoko yookhumelela, haasiveliwa ni yaale yaaloca Enklesi.

7. Tiheeni Yesu enreiye vooloca sa nthalu?

⁷ Ntoko mmahiku a Yesu, moonelo wa nthalu mmahiku ahu tho wootepa okhala woolipa nave woovila otoroka. Tiheeni Yesu enreiye vooloca sa moonelo ntoko yoola? Yoopacerya, owo haari muchu a nthalu. Ilukuluku soothene Yesu haari a nthalu. Yene aanalaleerya wa achu ooreela ni oohaawa, wa Afarisi ni Asamariya, nave ophiyeryatho wa alipa oocheka. Yanawiili, Yesu aahaahusiha amuhuserya awe nave aahiwooniherya moorweela wa yootakiherya awe wi hiyaaphwanela waathanya akina naari waakhaliha mwa nthalu.

8. Nlakiheryo taani nookhweleya nri mathipelo a wiiwanana wahu? Mutharihe.

⁸ Yesu aahihusiha nlakiheryo nookhweleya nri mathipelo a wiiwanana wahu. Owo aahaaleela amuhuserya awe: “Nyuwo othene onnanyu.” (Mwaalakhanye Mateu 23:8, 9.) Mmukhalelo mukina, oothene na onna nthowa nawi na anamwane a Atamu. (Saweriwa T’arummwa 17:26) Yesu aahithariha wi amuhuserya awe yaaritho anna ni arokora nthowa nawi oothene yaahimusuwela Yehova ntoko Tiithi aya a wirimu. (Mateu 12:50) Nave oothene yaawo yaahipaka makupa a emusi ya Muluku, nave yaari awiiwanana orweela mwa osivela ni nroromelo. Ti nthowa nene arummwa yaawiichanaaya Akristu akina ntoko anna ni arokora mu ikaarata yaarepelaaya mmilokoni.—Aroma 1:13; 1 Pedro 2:17; 1 Yohani 3:13. *—Moone masu avathi.

9, 10. (1) Ntakhara heeni Ayuta hiyaarino nthowa na okhala a nthalu ntakhara mwiili aya? (2) Yesu aahusinhe hai wi ti yoonanara ohaathokororya achu a mwiili woohiyana? (Moone eruku yoopacerya.)

⁹ Yesu amanle waaleela amuhuserya awe wi yaaphwanela woonanaka mukina ni mukhwaawe ntoko anna ni arokora, owo aahiceenyerya wi awo yaaphwanela okhala awiiyeviha. (Mwaalakhanye Mateu 23:11, 12.) Hiiha ntoko nimanlaahu ohuserya, mu elukuluku, wiirumiha waahaakawanya arummwa. Nave mmahiku a Yesu, achu yaari awiirumiha nthowa na mwiili aya. Ayuta ancipale yaaroromela wi yaari oophwanelela waapwaha akina nthowa nawi yaari anamwane a Aparahamu. Nto Yohani Mpatisi aahaaleela ariki: “Muluku okhalano ikuru otatusa maluku ala wi ekhale anamwane a Abraau.”—Luka 3:8.

¹⁰ Yesu aahihusiha wi ti yoonanara achu wiirumiha nthowa na mwiili aya. Owo aahihiya vanlakani elukuluku mulipa oorepa mmoha aamukonheiye ariki: “Mukhwaka tani”? Wi aakhule nikoho nle, Yesu aahithariha yaweereya. Muyuta aahimaniwa ni ampava nave emurihela mphironi. Naamwi Ayuta akina yaamonne mulopwana ole, awo hiyaamukhavihenrye. Koma Musamariya aahimmorela ikharari Muyuta ole nave aamukhapelela. Yesu aahikuchula mwaha awe moorweela wa omuleela mulipa oorepa ole wi aaphwanela okhala ntoko Musamariya yoole. (Luka 10:25-37) Yesu aahooniherya wi Musamariya  aanwerya waahusiha Ayuta yeeyo yaataphulela omusivela mwaacamani aya.

11. Ntakhara heeni amuhuserya a Yesu hiyaaphwanela okhala a nthalu, nave Yesu aakhavihenrye hai wiiwexexa yeela?

¹¹ Yesu ahaakumve oya wirimu, ahaaleela amuhuserya awe olaleerya “o Yerusalemu, o Yudeya wothene ni o Samariya, ophiyerya okhomoni wa elapo.” (Saweriwa T’arummwa 1:8) Vaavaa yeeraaya yeereno yeela, amuhuserya a Yesu yaahaala ovootha wiirumiha ni nthalu naya. Yesu aanaloca mikhalelo saphaama sa akhopela, nave ela yaahaarehererya amuhuserya olaleerya wa achu oothene. Ntoko yootakiherya, owo aahihakalala ni mutokweene a anakhoco, aari mukhopela yoowo oonihenrye nroromelo nawaakhwanela. (Mateu 8:5-10) Mu epooma awe o Nasareti, Yesu aahithariha mukhalelo Yehova aakhavihenryeiye akhopela, ntoko naamukhwele o Sarepta ni mulipa a mareca Namani o Siriya. (Luka 4:25-27) Yesu tho aahimulaleerya muthiyana yoowo aari Musamariya nave aahimaliha mahiku meeli mu epooma yo Samariya nthowa nawi achu yaahooniherya nchuno ntakhara muchaka awe.—Yohani 4:21-24, 40.

12, 13. (1) Arummwa yoonne hai elukuluku Yesu aamuhusinheiye muthiyana o Samariya? (Moone eruku yoopacerya.) (2) Tiheeni enooniherya wi Yohani ni Yakopo hiyiiwexenxe phaama yeeyo Yesu eereryeiye waahusiha?

¹² Ovootha nthalu hiwaari wookhweya wa arummwa. Awo yaahitikhiniheya omoona Yesu amuhusihaka muthiyana yoowo aari Musamariya. (Yohani 4:9, 27) Ntakhara heeni? Akhweya nthowa nawi ahooleli a malapelo a Ayuta hiyaaloca ni muthiyana vanlakani, nave moopwahaxa muthiyana Musamariya yoowo aarino meecelo oonanara. Arummwa yaahimuleela Yesu wi alye, koma owo aanahakalala omulaleerya muthiyana ole ophiyerya wi olya hiyaari echu yookhweleyaxa wa yene. Muluku aachuna wi Yesu alaleerye, ni opaka yoochuna awe, ophiyerya wi omulaleerya muthiyana ole Musamariya yaari ntoko yoolya wa yene.—Yohani 4:31-34.

¹³ Yakopo ni Yohani hiyiiwexexa nihusiheryo nenla nookhweleya. Vaava amuhuserya yeecaaya ni Yesu eviraka o Samariya, awo yaanaavya nipuro nookonavo ohiyu mu epooma yo Samariya. Nto Asamariya hiyaaweemerenrye. Yakopo ni Yohani enyeenyen’ye yaahimveka Yesu wakhala wi owo aanachuna wi eveke ekoi ya mooro wi yeeyele epooma. Moolipa murima Yesu aahaasamela. (Luka 9:51-56) Akhweya Yohani ni Yakopo hiyaahaala onyeenyeyaxa waakhanle wi echu ela yeeren’ye mu elapo aya o Kalileya. Akhweya yaanyeenyen’ye nthowa nawi yaahikhalano nthalu. Ohoolo waya, elukuluku Yohani aalalenryeiye Asamariya nave ancipale enwiriyana, akhweya aahikhalano ekeerelani vooloca sa mukhalelo aakhalinheiye khalai.—Saweriwa T’arummwa 8:14, 25.

14. Nikacamiho vooloca sa nthalu naamalihiwe hai?

¹⁴ Elukuluku vakhaani mu Pentekoste a eyaakha ya 33, naahikhalavo nikacamiho na nthalu mmulokoni. Vaavaa anna yaavahaaya yoolya a naamukhweli oothoiwa, hiyaakhaliha phaama anaamukhwele yaaloca Ekriki. (Saweriwa T’arummwa 6:1) Eyo yaaheereya nthowa na ohiyana wa ilocelo. Arummwa yaahimaliha nikacamiho mwawaakuveya. Yaahaathanla anna athanu napiili oophwanelela wi ekaweke yoolya mwawaakhwanela. Anna oothene yaala yaahikhalano nsina na elocelo ya Ekriki, yeeyo yaahaala waahakararya a naamukhweli yaale.

15. Petro aahusenrye hai ohikhala a nthalu wa oothene? (Moone eruku yoopacerya.)

 ¹⁵ Mu eyaakha ya 36, amuhuserya a Yesu yaahipacerya waalaleerya achu a maloko oothene. Ehaakumve eyaakha yeela, murummwa Petro aalaleerya pahiru Ayuta. Voocharela Muluku aahooniherya wi Akristu hiyaaphwanela okhala a nthalu, nave Petro aahimulaleerya Korneliyu, mukhoco o Roma. (Mwaalakhanye Saweriwa T’arummwa 10:28, 34, 35.) Ovinyerya vaavaa, Petro aanamaliha elukuluku nave aanalya ni Akristu yahaari Ayuta. Iyaakha ohoolo waya, o epooma yo Antiyokeya, owo aahihiya olya ni Akristu yahaari Ayuta. (Galasya 2:11-14) Paulo aahimulaka Petro nave owo aaheemererya olaka. Nnasuwela hai yeela? Elukuluku Petro aarempeiye ekaarata awe yoopacerya wa Ayuta ni wa yaale yahaari Ayuta o Asiya Mukhaani, owo aahiloca okhweleya waya waasivela annihu oothene.—1 Pedro 1:1; 2:17.

16. Tiheeni yaasuwanyeiha Akristu oopacerya?

¹⁶ Mweeparipari, nthowa na yootakiherya ya Yesu, arummwa yaahihuserya waasivela “atxhu othene.” (Yohani 12:32; 1 Timóteo 4:10) Naamwi yaavinrevo elukuluku, awo yaahitoroka mukhalelo yaawoonaaya achu. Chiryene, Akristu oopacerya yaahisuweliwa ntakhara osivelana waya mukina ni mukhweiye. Ivinrevo iyaakha masana meeli, namarepa Tertuliyano aahiloca yeeyo achu akina yaaloncaaya sa Akristu: “Awo annasivelana mukina ni mukhweiye,” nave “Awo ari ooreheryeya okhwa ntakhara mukina ni mukhweiye.” Nthowa na Akristu yaala onwara “mutxhu a hihano,” awo yaahihuserya owoona achu oothene ntoko oolikana, hiiha ntoko Muluku onawooneiye.—Kolosi 3:10, 11.

17. Nni niwerye hai okakhela okhwipi moonelo vyakala wa okhala a nthalu? Mvahe sootakiherya.

¹⁷ Olelo, akhweya enamviravo elukuluku wi nikakhele okhwipi moonelo wa ohikhala a  nthalu. Murokora o Fransa oothariha mukhalelo waaryaaya woovila wa yoowo. Owo ooloca: “Yehova onnakihusiha yootaphulela ya osivela, wuuka ni akina, ni yootaphulela ya waasivela achu a mukhalelo woothene. Koma nlelo kinnahuserya ovootha nthalu vooloca sa akina, nave wiiliwiili henakhala yookhweya. Kinnatitelela ovekela ntakhara yeeyo.” Murokora o Espanya oothariha wi ikwaha ikina owo nlelo onnawaniha ni moonelo woonanara vooloca sa nikhuuru nammoori na achu. Owo ooloca: “Kinnakhumelela phaama mu elukuluku yawaaca. Nto koosuwela wi kinaphwanela otitelela owaniha. Nnikhaviheryo na Yehova, kiri oohakalala opaka makupa a emusi yawiiwanana.” Oothene ahu nnaphwanela wuupuwela phaama vooloca sa mukhalelo nnoonaahu. Apwanne hiyaanotho ninnachuna okakhela okhwipi moonelo wa nthalu?

18, 19. (1) Mathowa taani nryaahuno a owaakhela achu oothene? (2) Nni neereno hai yeela?

¹⁸ Ti yaphaama wa hiyo wuupuwela wi oothene ahu naari ocai wa Muluku. (Éfeso 2:12) Nto Yehova oonithanla nthowa na osivela. (Oseya 11:4; Yohani 6:44) Nave Kristu oonaakhela. Owo oheeriha wa hiyo opaka makupa a emusi ya Muluku. (Mwaalakhanye Aroma 15:7.) Naamwi nri oohiphaameya, Yesu mweepewe onnaneemererya, mwa yeeyo hannaphwanela omuthanyaka muchu!

¹⁹ Vaavaa nnaacamelaahu omakuchuwelo wa elapo yeela yoonanara, achu anahaala okhala ookawanyeyaxa, a nthalu, ni oowali. (Galasya 5:19-21; 2 Timóteo 3:13) Ntoko achu a Yehova, hiyaano nnaavya “miruku inarwa wirimu,” seiyo sinahaala onikhaviherya ohikhala a nthalu ni waaceererya murecele. (Tiyako 3:17, 18) Ninnahakalala waapaka asinthamwene ni achu a ilapo ikina, weemererya mukhalelo anapakaaya ichu, ni ohuserya elocelo aya. Elukuluku nneeraahuno yeeyo, ninnapuha murecele ntoko “mihitxe” nave ekhaikhai ntoko “matxhumutxa a mphareya!”—Isaiya 48:17, 18.

20. Tiheeni eneereya elukuluku osivela onatorokaaya mukhalelo nnuupuwelaahu ni nnapakaahu ichu?

²⁰ Elukuluku murokora o Australiya aamuhusenryeiye Piipiliya, nthalu ni owali awe woothene saahicakanela vakhaani vakhaani. Osivela waahitoroka mukhalelo uupuweleiye ni aapakeiye ichu. Munna o Kanata yoowo onaloca Efransa ooloca wi vano owo oosuwela wi achu wiiliwiili annawiica akina pahiru nthowa nawi haasuwenle phaama. Oohuserya wi “mikhalelo sa achu hasinarweela mu nipuro ayariwaayawo.” Ophiyerya wi vano owo othelanne ni murokora onaloca Enklesi! Sootakiherya seiya sinnooniherya wi osivela onnavootha nthalu. Osivela onnaniiwananiha ni nimakelo nenlo nihinawerya ophweya.—Kolosi 3:14.