NNAKHALA mu elapo yookacamiha, mwawiihiiha enamukhala yoovila ophwanya murecele. Naamwi nrino murecele wammoori, mwawaakuveya nnamphiyerya oyeleela. Tiheeni Piipiliya onaloceiye yeeyo eni enikhaviherye ophwanya murecele weeparipari ni woohimala? Nave nni naakhaviherye hai akina weerano hiiha?

Wi niphwanye murecele weeparipari, nnaphwanela okhapeleleya ni okhala oohuukhuwa. Ninnaachuna okhalano asinthamwene aphaama, nave echu yookhweleyaxa, ninnachuna omwaacamela Muluku. Nni neereno hai yeela?

Malamulo ni malakiheryo a Yehova wiiliwiili taphaama wa hiyo. Elukuluku nniiwelelaahu, ninnooniherya wi ninnamuroromela Yehova nave ninnachuna okhalano onthamwene wa murecele ni yoowo. (Yeremiya 17:7, 8; Tiyako 2:22, 23) Voocharela Yehova onahaala onaacamela ni onivaha murecele wa mmuupuweloni. Isaiya 32:17 oni: “Ntakhara mutxhu ti mutxu oni anera yele eri yawokololowa, onamukhala muretxele ni witxhàla wa mahiku othene.” Nnanwerya ophwanya murecele vaavaa nnamwiiwelelaahu Yehova ni murima woothene.—Isaiya 48:18, 19.

Yehova onnanivahatho yamahala yasisapo wi enikhaviherye wunnuwiha murecele woohimala. Yamahala eyo ti munepa awe waweela.—Saweriwa T’arummwa 9:31.

Murummwa Paulo aahiloca wi murecele nikupa na “sawima sa Munepa.” (Galasya 5:22, 23) Woona wi munepa wa Muluku onnakumiherya murecele, nnaphwanela weemererya munepa waweela wi onihoolele wakhala wi ninnachuna murecele. Nni neereno hai ela?

Yoopacerya, nnaphwanela waalakhanya Masu a Muluku moohihiyererya. (Salumu 1:2, 3) Vaavaa nnuupuwelaahu mwawiiseela vooloca sa yeeyo naalakhannyaahu, munepa waweela onnanikhaviherya wiiwexexa yeeyo Yehova onuupuweleiye  vooloca sa miyaha soohiyanahiyana. Ntoko yootakiherya, ninnahuserya mukhalelo owo onakhapeleleiye murecele awe ni ntakhara heeni oryaaya woochuneya wa yoowo. Elukuluku nnapharihelaahu yeeyo naalakhannyaahu Mpiipiliyani, nnahaala okhalano murecele wawaaca mu ikumi sahu.—Masiposipo 3:1, 2.

Yanawiili, nnaphwanela ovekela ntakhara munepa waweela wa Muluku. (Luka 11:13) Yehova oororomeliha wa yaale anamveka nikhaviheryo: “Muretxele wa Muluku, onapwaha miruku sothene, onamukhapelela mirima sanyu ni mupuwelo anyu mwa Yesu Kristu.” (Filipi 4:6, 7) Elukuluku nnamwaacamelaahu Yehova ni ororomela munepa awe, owo onahaala onivaha murecele weeparipari wa mmuupuweloni.—Aroma 15:13.

Piipiliya ohaakhaviherya ancipale opaka matorokelo mu ikumi saya, nave vano awo annapuha murecele ni Yehova, murecele wa mmuupuweloni, nave murecele ni akina. Awenrye hai opaka matorokelo yaawo?

Ehaakumve ohuserya eparipari, anna ni arokora akina yaari eesara ni oowali. Nto yaahiilipiserya opaka matorokelo, nave vano awo tooreera murima, oovilela, nave tamurecele ni akina. * (Moone masu avathi.) (Masiposipo 29:22) Moone mukhalelo munna oniichaniwa Tavite ni murokora oniichaniwa Rakele matorokelo yaapankaaya mu omuchu aya.

Tavite ahaakumve ohuserya eparipari, owo wiiliwiili aanaaphwanyerya mathowa akina nave aanaloca moonanara wa amusi awe. Nto voocharela aahisuwela wi aanachuna opaka matorokelo. Awenrye hai ophwanya murecele? Tavite ooloca, “Kaahipacerya opharihela malakiheryo a Piipiliya mookumini mwaka, nave ntoko yookhumelela, ncicimiho variyari va miyaano ni emusi aka naahunnuwa.”

 Rakele aahivoloweliwa ni mukhalelo wa achu unnunweiyevo. Owo onnathariha, “Naamwi hiihaano, kinnawaniha ni moonelo wa esara nthowa nawi kiphuiwe va echoko esara yaapakaaya makupa.” Tiheeni emukhavihenrye Rakele ophwanya murecele? Owo ooloca, “Omuroromela Yehova ni murima woothene.”

Tavite ni Rakele sootakiherya piili sa achu yaawo vano arino murecele nthowa nawi aapharihela malakiheryo a Piipiliya nave aaroromela munepa waweela. Naamwi nikhalaka mu elapo ya esara, nlelo nnanwerya okhalano murecele wa mmuupuweloni. Murecele owo onamweeriha okhala wookhweya okhala vamoha ni aveemusini vahu ni anna ni arokora mmulokoni. Nto Yehova onnanleela ‘okhala ni muretxele n’atxhu othene.’ (Aroma 12:18) Apwanne ti yooweryeya? Nave ntakhara heeni ninnaphwanela weererya okhala mmureceleni ni akina?

Mmuteko ahu woolaleerya, nnalaleerya michaka sa murecele vooloca sa Omwene wa Muluku. (Isaiya 9:6, 7; Mateu 24:14) Ancipale annasiveliwa ni michaka seiya nave anneemererya. Ntoko yookhumelela, hanuukhuwa naari hanakhalano esara wa nthowa na yeeyo eneereya mweelaponi. Awo vano aakhalano ewehereryo yeeparipari ntakhara omwaahiyu, nave eyo ennaweeriha ochuna ‘wasyaka muretxele.’—Salumu 34:15.

Naamwi hiiha, tahi wi woopaceryani achu oothene annachuna michaka sahu. (Yohani 3:19) Moohipwacha mukhalelo achu anaakhulelaaya, Muluku onnanivaha munepa awe. Munepa owo onnanikhaviherya otitelela okhala a murecele ni ancicimiho vaavaa nnalaleeryaahu. Mmukhalelo yoola, ninnachariha ekano ya Yesu: “Mwavolowaka mpa mulotxele empa yeyo. Nave empa yeyo yaphwanelelà, onamukuru welamo muretxele; nto, yahiphwanelelà, muretxele anyu onamokòkelani.” (Mateu 10:11-13) Vaavaa nnakhalaahuno moonelo yoola, nnanwerya otitelela okhala a murecele moohipwacha yeeyo akina aloncaaya naari apankaaya. Nave ninnasuwela wi akhweya nnamukhalano ekari ya waakhaviherya achu yaawo omwaahiyu.

Hiyaanotho ninnaaceererya murecele moorweela wa okhala ancicimiho elukuluku nnalocaahu ni ahooleli, naamwi ewatiihaka muteko ahu. Ntoko yootakiherya, mu elapo emoha o Afrika, alamuleli hiyeemererya opakiwa Ipa sa Omwene. Annihu yaahisuwela wi yaanaphwanela weererya omaliha nikacamiho mwa murecele. Awo yaahimuruma munna yoowo aarumeenle ntoko misiyonaariyo mu elapo yeeyo wi aloce ni Mulipa aweemelela elapo yookhopela, o Inklatera, nave amuleela vooloca sa muteko onakhaviherya murecele yoowo Anamoona a Yehova anapakaaya.

Munna ooloca: “Vaavaa kaaphin’yaaka va nipuro onaakheliwavo aleco, kaahisuwela moorweela wa mawarelo a muthiyana aawaakhela aleco wi owo aari a nihimo nenlo elocelo aya kaasuwenlaaka. Mwawiihiiha kaahimmwenyerya mu elocelo awe. Mwawaakuveya, muthiyana owo aahikikoha, ‘Tiheeni eweerinhe ophiya vaava?’ Mweepewe kaahimuleela wi kaachuna oloca ni Mulipa aweemelela elapo yookhopela. Muthiyana owo aahimwiichana muhooleli, nave owo aahirwa nave akimwenyerya mu elocelo ya vanipuroni. Voocharela, owo aahikiwiriyana phaama vaavaa kaamuleelaaka vooloca sa muteko wa murecele wa Anamoona.”

Mulipa aweemelela elapo yookhopela amanle owiriyana yeeyo munna aalonceiye, aahiiwexexa phaama muteko ahu nave haari a nthalu hiiha ntoko aakhanleiye khalai. Ohoolo waya, olamulelo owo waahitoroka yoolakelelaaya nave yaahiweemererya Anamoona a Yehova oteka Ipa sa Omwene. Anna yaahitepa ohakalala! Mweeparipari, elukuluku nnaakhalihaahu akina mwancicimiho, ninnaaceererya murecele.

Olelo, achu a Yehova annampuha parataiso oomunepani, vaavaa anamulapelaaya mmukhalelo wa murecele. Muchu ti muchu a hiyo onanwerya waaceererya murecele yoola moorweela wa wiilipiserya wunnuwiha murecele mu okumi ahu. Voocharela nnahaala ororomela wi Yehova onnahakalala ni hiyo. Nave mu elapo awe yahiihaano, owo onahaala onivaha murecele woohimala.—2 Pedro 3:13, 14.