Ntakhara heeni haneemereryiwa muchu ohela soolaleeryiwa sa Anamoona a Yehova mu isaiti ikina?

Achu akina anuupuwela wi woona wi ninnavaha soolaleeryiwa sahu nihivekaka ikhorowa, awo ananwerya okopiyaari naari ohela soolaleeryiwa iho mu isaiti naari mmikhalelo mikina sawunlaana. Nyenya eyo enanwerya otannya makacamiho matokweene nave enahaala ovuhana ni Termos de Uso [Malakiheryo Oopharihela] * (moone masu avaathi) a esaiti ahu. Mwawooneya malakiheryo yaala analoca wi haavovo muchu oneemereryiwa “ohela iruku, soolaleeryiwa sa mukhankoonya, marcas registradas, macipo, ixilema naari miyaha sa esaiti yeela mu interneti (yeeyo enaphitaanyerya esaiti vyakala, ireti sa makhuuru ni isaiti sawuuka miyaha soorempwa ni ixilema).” Ntakhara heeni malamulo yaala tookhweleya?

Soolaleeryiwa ni ikaruma soothene mu saiti ahu sookhapeleliwa, eyo enataphulela wi sookhapeleliwa ni nlamulo. Ela ti yookhweleya woona wi ennakhaviherya osepa opharihela moonanara. Alipa oomwaryeya ni akina yaawo anachuna opahula muteko ahu ikwaha ikina annahela soolaleeryiwa sahu mu isaiti saya wi yaalekeche Anamoona a Yehova ni akina. Nave mu isaiti seiyo annahelamo miyaha seiyo sinatannya minikwa mmuupuwelo wa achu. (Salumu 26:4; Masiposipo 22:5) Akina annapharihela ikaruma sahu naari jw.org logo ahu mu ovuwiha maroca, mu atelefone, nave mu ichu seiho anakulihaaya. Nyenya woona wi ikaruma ni saiti ahu sookhapeleliwa ni nlamulo, nnanwerya oya o nipuro na othoriha ni waamaaliha opaka yeeyo. (Masiposipo 27:12) Nyenya alipa oothoriha heni enikhaviherye wakhala wi nooweemererya achu akina, ophitaanyerya annihu, ohela soolaleeryiwa sahu mu isaiti ikina naari ompharihela jw.org logo wi ekuliheno maroca.

Wakhala wi nookumiha soolaleeryiwa sahu ohiri mu jw.org, yaahaala okhala yawoopiha. Yehova onanivaha yoolya yoomunepani pahiru orweela wa “kapuro óroromeleya.” (Mateu 24:45) “Kapuro” owo onampharihela pahiru saiti awe wi avahererye yoolya yoomunepani.—www.pr418.com, tv.pr418.com, ni wol.pr418.com. Nave hiyo nrino makhuuru mararu a aplikativo a ikaruma sa mu ikhankoonya—JW Language^®, JW Library^®, ni JW Library Sign Language^®. Mu isaiti seiya, ni mu aplikativo yaala, hinnaphwanyamo miyaha sa maroca naari echu eri yoothene enarweela mu elapo ya Satana. Nyenya wakhala wi noohela soolaleeryiwa sahu mu isaiti ni mu aplikativo akina, yookhalavo yawoopiha yawi soolaleeryiwa iho sinamutorokiwa mmukhalelo mukina.—Salumu 18:26; 19:8.

Mwawaacererya, wakhala wi noohela miyaha sahu mu isaiti seiyo achu aneeraaya ehelemo masu aya, eyo enanweeriha alipa oomwaryeela ni akina ophwanyerya mathowa marehereryo a Yehova. Anna akina annaakhulana ni achu yaawo, nave eyo ennaruuha munyemu ntakhara Yehova. Waakhulana mmukhalelo yoowo mu interneti tahi mukhalelo woophwanelela orehererya muupuwelo wa muchu ni omukhaviherya wiiwexexa eparipari. (1 Timóteo 6:3-5; 2 Timóteo 2:23-25) Navetho achu akina annapaceryiha isaiti ni ikonta sa ikhankoonya seiyo sinakhala wi sinarweela mmarehereryo naari wa anna a Nikhuuru Noolamulela. Nyenya awo anamootha. Haavovo munna a Nikhuuru Noolamulela orinono Nikupa naari ekonta mu esaiti vyakala.

Elukuluku nnaaceenyeryaahu achu ovolowa mu Jw.org, nnakhaviherya muteko wa olaleerya “Mutxhaka” waphaama. (Mateu 24:14) Isaiti ni aplikativo ahu inamvira irehereryiwaka phaama. Nnachuna wi muchu ti muchu akumihe mphurelo orweela wa seiyo. Mwawiihiiha ninneemereryiwa omvonyerya muchu ekoopiya ya yoolaleeryiwa mu e-maili naari omvonyerya linkhi a saiti ahu. Mmukhalelo yoowo nnaahoolela achu mu ehime emoharu yeeyo Yehova onavahereryeiye yoolya yoomunepani, wa “kapuro óroromeleya.