1. Tiheeni enooniherya wi Yehova tamahala?

YAAHIKHALAVO elukuluku vaavaa Yehova aareiye meekheiye pahiru. Voocharela aahilakelela ovaha yamahala ya ekumi wa soopatusiwa sa wirimu ni sa veelaponi yavathi. “Muluku oohakalala,” Yehova, onnamusivela ovaha ichu saphaama. (1 Timóteo 1:11, Nlakano Nahihano; Tiyako 1:17) Nave woona wi Yehova onachuna wi nikhale oohakalala, owo onnanihusiha okhala amahala.—Aroma 1:20.

2, 3. (1) Ntakhara heni ninnakhala oohakalala elukuluku nnakhalaahu amahala? (2) Tiheeni nnahaalaahu othokororya mmwaha yoola?

² Muluku aapanke achu moophwanaphwana ni yoowo. (Maphatxuwelo 1:27) Ela enooniherya wi Yehova onipanke ni makhalelo yaawo oreiyeno. Wi nikhaleno ohakalala weeparipari nave naakhele mareeliho a Yehova, nnaphwanela ochariha yootakiherya awe. Nnaphwanela waapwacha achu nave nikhale amahala. (Filipi 2:3, 4; Tiyako 1:5) Ntakhara heeni? Nthowa nawi ti yeeyo onachuneiye wa hiyo. Naamwi nri oohiphaameya, nnanwerya  omutakiherya Yehova nave nikhale amahalatho.

³ Vano nnahaala othokororya mahusiheryo makina yaawo Piipiliya onanivaheiye vooloca sa mahala. Nnahaala ohuserya mukhalelo Yehova onahakalaleiye vaavaa nnakhalaahu amahala. Nnahaala tho othokororya mukhalelo mahala ananikhaviheryaaya opaka muteko yoowo Yehova onivanheiye wi nipake nave ntakhara heeni ninnahakalala elukuluku nnakhalaahu amahala. Nave nnahaala othokororya ntakhara heeni nnaphwanelaahu otitelela okhala amahala.

4, 5. Mmukhalelo taani Yehova ni Yesu aryaaya oovaha, nave ntakhara heeni ninnaphwanela waatakiherya?

⁴ Yehova onachuna wi nimutakiheryeke, mwawiihiiha eyo ennamuhakalaliha vaavaa nnakhalaahu amahala. (Éfeso 5:1) Yehova onachuna tho wi nikhale oohakalala. Noosuwela yeela nthowa nawi owo onipanke mmukhalelo wooreeraxa, nave oopaka elapo ahu yavathi ni ichu soothene iri muumu ntakhara hiyo wi nipuheke. (Salumu 104:24; 139:13-16) Mwawiihiiha ninnamucicimiha Yehova elukuluku nneereryaahu waahakalaliha akina.

⁵ Ninnamutakiheryatho Yesu, yoowo otikithenrye yootakiherya yaphaama ya mukhalelo achu eneeraaya ekhale amahala. Owo aahiloca: “Hiha Mwana a mutxhu harwele olampwa, nto walapa atxhu ni ovaha ekumi awe, wi awopole antxipale.” (Mateu 20:28) Nave murummwa Paulo aahaaceenyerya Akristu: “Mukhaleno mmurimani mwanyu moonelo mmohamoha wa Yesu Kristu . . . Àrula omuluku awe akusaka mukhalelo wokapuro.” (Filipi 2:5, 7) Mwawiihiiha nnaphwanela wiikoha , ‘Apwanne kinnachariha yootakiherya ya Yesu vakhivirukhiviru?’—Mwaalakhanye 1 Pedro 2:21.

6. Tiheeni Yesu onihusinheiye ni mwaha wa mwaacamani yoowo aari Musamariya? (Moone eruku yoopacerya.)

⁶ Yehova onnahakalala vaavaa nnacharihaahu yootakiherya yaphaama yeeyo owo ni Yesu atikithenryaaya ntakhara hiyo. Nneerano yeela moorweela mwa waapwacha achu ni waavya mikhalelo sa waakhaviherya. Yesu aahooniherya ochuneya waya yeela, elukuluku aalonceiye mwaha wa mwaacamani yoowo aari Musamariya. (Mwaalakhanye Luka 10:29-37.) Yesu aahaahusiha oomuchara awe wi awo yaaphwanela waakhaviheryaka akina, moohipwacha mukhalelo wa omuchu aya naari elapo anakhumaayawo. Apwanne nyuwaano munnuupuwela ntakhara heeni Yesu ayaaka oloca mwaha yoola? Waari nthowa nawi Muyuta mmoha aamukoha: “Mukhwaka tani” chiryene? Naakhulo na Yesu ninnanihusiha wi ntoko Musamariya, nnaphwanela okhala amahala wakhala wi ninnachuna omuhakalaliha Yehova.

7. Nnooniherya hai wi ninneemererya wi mukhalelo Yehova onapakeiye ichu, ti woophwanelela? Mutharihe.

⁷ Nthowa nikina na okhala amahala nniiwanana ni yeeyo yeeren’ye mu emaca ya Eteni. Satana aalonce wi Atamu ni Eva yaahaala okhala oohakalala waakhanle wi awo haamwiiwelenle Yehova nave iithokoronrye mukhataaya. Eva aari anrima nave aachuna olikana ni Muluku. Atamu aari anrima nave aachuna omuhakalaliha Eva opwaha ochuna omuhakalaliha Muluku. (Maphatxuwelo 3:4-6) Sookhumelela saari sawoopiha. Mwawooneya, haavo ani akhale oohakalala vaavaa onakhaleiye anrima. Nyenya vaavaa nihinakhalaahu anrima nave nnakhalaahu amahala, ninnooniherya wi ninneemererya wi mukhalelo Yehova onapakeiye ichu, ti woophwanelela.

8. Ntakhara heeni Atamu ni Eva yaaphwanela owuupuwelela akina?

⁸ Naamwi Atamu ni Eva yaari meekhaaya mu Emaca ya Eteni, awo yaaphwanela owuupuwelelaka akina. Ntakhara heeni? Yehova ohaavaha muteko wi epakeke. Owo aahaaleela wi esaryeihe elapo yavathi ni anamwane aya ni weeriha elapo okhala parataiso. (Maphatxuwelo 1:28) Atamu ni Eva yaaphwanela ochuna wi anaaya amuhoolo ekhale oohakalala, hiiha ntoko Yehova aachuneiye wi muchu ti muchu veelaponi akhale oohakalala. Yehova aaweherya wi anamwane oothene a Atamu elape vamoha wi yeerihe elapo yoothene yavathi okhala parataiso. Ola waaya okhala muteko mutokweene!

9. Ntakhara heeni achu yaahaalaaya okhala oohakalala vaavaa yeeraaya yeerihe elapo yavathi okhala parataiso?

⁹ Achu oophaameya yaaphwanelatho olapa vakhivirukhiviru ni Yehova wi yeerihe elapo yoothene yavathi okhala parataiso ni waakhwaniherya yookhwelaawe. Mmukhalelo yoola, oothene yaahaala ovolowa mu nipuro nawe nawiichuuwa. (Ahebri 4:11) Nkaanyiheryani mukhalelo muteko yoowo waahaalaaya okhala wa weeliha murima ni woopuheya! Yehova aahaala waareeliha vancipale nthowa na ohikhala anrima ni waapwacha akina.

10, 11. Tiheeni enahaala onikhaviherya olaleerya ni waapaka amuhuserya?

¹⁰ Olelo Yehova oonivaha muteko wavameekhaaya wi nipake. Owo onachuna wi nlaleerye nave naapake amuhuserya. Wi nipake muteko  yoola, nnaphwanela waapwacha achu. Mweeparipari, nnanwerya opaka muteko yoola pahiru wakhala wi nookhalano nthowa naphaama: omusivela Yehova ni waasivela achu.

¹¹ Paulo aalonce wi owo ni Akristu akina mu nsana noopacerya yaari “amulapeli ni Muluku” nthowa nawi yaanalaleerya ni waahusiha achu eparipari. (1 Korinto 3:6, 9) Mmahiku ahu tho, nnanwerya okhala “amulapeli ni Muluku” moorweela mwa ovaha mwa mahala elukuluku ahu, ikuru sahu, ni ichu soomwiilini wi nipake muteko yoowo Yehova onivanheiye. Nla ncicimiho ntokotoko!

12, 13. Tiheeni mwaahaalaanyu oloca seiyo siri sookhumelela sa waapaka amuhuserya?

¹² Okhala amahala mu ovaha elukuluku ni ikuru sahu vaavaa nnalaleeryaahu ni ohusiha, ennanruuhela ohakalala otokotoko. Ela ti yeeyo anna ni arokora ancipale yaawo yaarino ekari ya weeciha soohuserya sa Piipiliya aloncaaya. Ninnatepa ohakalala elukuluku nnawoonaahu oohuserya a Piipiliya ahu ekhalaka oohakalalaxa vaavaa aniiwexexaaya yeeyo Piipiliya onanihusiheiye, wunnuwiha nroromelo nawaaca, epakaka matorokelo mu okumi aya, nave epaceryaka waaleela akina yeeyo awo anahuseryaaya. Yesu aari tho oohakalala elukuluku alaleeryi makhumi mathanu napiili ‘yàkòkalaya ehakalanle’ nthowa na saweereya soohakalaliha yaaryaayano.—Luka 10:17-21, Nlakano Nahihano.

¹³ Anna ni arokora ahu orukurerya elapo ari oohakalala vaavaa anoonaaya mukhalelo muchaka wa Piipiliya onaakhaviheryaaya achu orehererya okumi aya. Ntoko yootakiherya, murokora Ana, yoowo ori mwali ohitheliwe aahichuna opaka sincipale ntakhara Yehova. * (Moone masu avathi.) Mwawiihiiha Ana aaya makupa Onakhuma nsuwa o Europa weiwo oriwo othowa wa alaleeryi. Owo oorepa: “Nno yookhalawo ekari etokweene ya weeciha soohuserya sa Piipiliya nave kinnasiveliwa vancipale. Muteko aka onnakivaha ohakalala otokotoko. Vaavaa kinaphiyaaka vaate, nkinakhalano elukuluku ya wuupuwela sa miyo mukhataaka. Kinawuupuwela yaale kinahuseryaakano, vooloca sa makacamiho aya ni sawuukhula saya. Kinnaavya mikhalelo sa waalipiha ni waakhaviherya mmeerelo awooneya. Nave kinnakhala oolekecheya wi ‘wookhalavo ohakalala wawaaca mu ovaha opwaha mu waakhela.’”—Saweriwa T’arummwa 20:35, TNM.

14. Muni mpuhe hai olaleerya naamwi achu ehiwiriyanaka?

¹⁴ Naamwi achu ehiwiriyanaka vaavaa nnalaleeryaahu, nnanwerya okhala oohakalala nthowa nawi nohaavaha ekari ya owiriyana michaka yaphaama. Yehova onaweherya wi nipake echu yoolikana ni yeeyo aamurummeiye Esekiyeli opaka: “Weyano walèle yeyo kinalotxaka, ewiriyane nari ehiwiriyane.” (Ezekiyeli 2:7; Isaiya 43:10) Mwawiihiiha moohipwacha mukhalelo achu anaakhulelaaya, Yehova onnavaha esisapo wiilipiserya wahu. (Mwaalakhanye Ahebri 6:10.) Munna mmoha ooloca sa muteko awe woolaleerya: “Ninnaala, ohelela maahi, nave ninnavekela niweheryaka wi Yehova onamweeriha nchuno wunnuwa.”—1 Korinto 3:6.

15. Apwanne nnaphwanela okhala amahala pahiru wakhala wi achu annanthamalela? Mutharihe.

¹⁵ Yesu onachuna wi nikhale amahala nthowa nawi ennaneeriha okhala oohakalala. Elukuluku nnakhalaahu amahala, achu ancipale anahaalatho onikookiherya mahala. Mwawiihiiha owo onnanceenyerya: “Nvaheke nave munarwa nvahiwa. Mphimo waphama, wosareya, wokhitxeliwa, wotathiwa, onamuyeheriwa mmatani mwanyu, wona wi mphimo yowo muneranyu mumphimeleno mukhwinyu, munarwatho mphimeliwano.” (Luka 6:38) Mweeparipari, vaavaa munakhalaanyu amahala, tahi wi achu oothene anahaala othamalela. Nyenya naamwi ehithamalelaka, mutitelele ovaha. Hamunasuwela ophiyerya mweeryo taani munaweryaanyu opaka yaphaama pahiru ni yamahala emoharu.

16. Taani nnaphwanelaahu owooniherya mahala, nave ntakhara heeni?

¹⁶ Mweeparipari achu amahala hanavaha nthowa nawi anaweherya okookiheryiwa echu. Yesu ooloca: “Nto wakhwelaka ovaha yolya, owitxhaneke alipa òhawa, òtuthunya, òrakala ni alipa èvasi. Ni onamuhakalala ntakhara hanono yawokòkiherya.” (Luka 14:13, 14) Piipiliya onnalocatho: “Ori òleva, . . . onamurèlihiwa.” nave “Òrèriwa [naari oohakalala] ti mutxhu onàkhaviherya atxhu òthoiwa.” (Masiposipo 22:9; Salumu 41:1) Nnaphwanela okhala amahala nthowa nawi chiryene ninnachuna waakhaviherya akina.

17. Mikhalelo taani mikina sa ovaha seiyo sinahaala oneeriha okhala oohakalala?

¹⁷ Elukuluku Paulo uulunleiye masu a Yesu awi “wookhalavo ohakalala wawaaca mu ovaha opwaha mu waakhela” tahi wi Paulo aaloca sa ichu soomwiilini pahiru. Nnanwerya  waavaha achu nlipiho, ekano ya Mpiipiliyani, ni nikhaviheryo nawooneya. (Saweriwa T’arummwa 20:31-35, TNM) Orweela wa yeeyo Paulo aalonceiye ni aapankeiye, owo oonihusiha mukhalelo wa ochuneya waya okhala amahala mu ovaha elukuluku ahu, ikuru sahu, opwacha wahu, ni osivela wahu.

18. Tiheeni alipa ootholathola ancipale aloncaaya sa okhala amahala?

¹⁸ Alipa ootholathola yaawo anahuserya okhala phaama wa achu ahoona wi ovaha onnamweeriha muchu okhala oohakalala. Mwawiiwanana ni mwaha mmoha, achu alonce wi annakhalano ohakalala wawaaca emanle opaka ichu saphaama ntakhara akina. Alipa ootholathola alonce wi vaavaa nnaakhaviheryaahu akina, ninnoona wi ekumi ahu yookhalano yootaphulela ni yoolakelela. Mwawiihiiha alipa oosuwela akina analoca wi achu anaphwanela opaka miteko sa wiiveleela wi akhaleno ekumi yaphaama ni ohakalala. Mweeparipari, yeeyo awo aloncaaya henantikhiniha hiyo, woona wi Mpatusa ahu oosivela, Yehova wiiliwiili onnaloca wi ovaha onnaneeriha okhala oohakalala.—2 Timóteo 3:16, 17.

19, 20. Ntakhara heeni munnachuna okhala amahala?

¹⁹ Vaava achu anirukurenrye aniipwachaaya mukhataaya pahiru, enamukhala yoovila otitelela okhala amahala. Nyenya Yesu oonuupuserya wi malamulo meeli matokotoko taala: omusivela Yehova ni murima ahu woothene, ekumi, muupuwelo, ni ikuru navetho omusivela mwaacamani ahu ntoko nniisivelaahu yeehu ene. (Marko 12:28-31) Noomala ohuserya mmwaha yoola wi yoole onamusivela Yehova onamutakiherya yoowo. Yehova ni Yesu tamahala. Awo annanceenyerya ochariha yootakiherya aya, woona awo annasuwela wi eyo enamuneeriha okhala oohakalala chiryene. Wakhala wi naachu amahala mwa yeeyo nnapakaahu ntakhara Muluku ni mwaacamani ahu, nnahaala omucicimiha Muluku nave nnahaala okhalano mphurelo mukhatiihu ni akina.

²⁰ Chiryene nyuwo munnapaka owetha wanyu wi mukhale achu amahala ni waakhaviherya akina, xaxaxa anna ni arokora anyu. (Galasya 6:10) Wakhala wi mootitelela weerano hiiha, achu anahaala woothamalelaani ni woosivelaani, nave munahaala okhala oohakalala. Piipiliya onnaloca: “Ori òvaha onanvahiwa vawatxa; ori òkhaviherya onamukhaviheryiwa.” (Masiposipo 11:25) Mu okumi ni mmuteko ahu woolaleerya, sookhalavo mikhalelo mincipale sa ovaha moohikhalela nrima ni okhala eepewe ni amahala. Hankooni nthokororye vooloca sa mikhalelo seiyo mmwaha onacharela.