MU eyaakha evirale, macikhwi a anna orukurerya elapo yoothene aathanliwa okhala atokweene ni arummwa oorumeela. Waakhanle wi nyuwo mwa mmoha a yaawo, mweeparipari moohakalala wi munanwerya omurumeele Yehova ni anninyu mmulokoni mmukhalelo yoola muvyaani.

Waakhanle wi munnuukhuwa vakhaani, eyo ti yoophwanelela. Jason, mutokweene a muloko yoowo ori mmiravo, ooloca: “Vaavaa kaathanliwaaka woopaceryani, kaahikhala awuukhuwa chiryene ntakhara mirici saka mivyaani.” Mose ni Yeremiya yiisoona wi hiyaaphwanelela elukuluku yaakhenlaaya mirici mivyaani orweela wa Yehova. (Mukwaha 4:10; Yeremiya 1:6) Waakhanle wi munoona mmukhalelo woolikana, tiheeni munaphwanelaanyu opaka wi muteke nroromelo nanyu nave mutitelele oya vahoolo? Munanwerya ohuserya sincipale orweela wa yootakiherya ya Timoteo.—Saweriwa T’arummwa 16:1-3.

Akhweya Timoteo aarino iyaakha makhumi meeli pahi elukuluku aapacenryeiye weeca ni murummwa Paulo. Vaavaa aakhenleiye nwopelo yoola woopaceryani, akhweya Timoteo iisoona ntoko wi haaphwanelela ohusiha ni waavaha ekano akina woona wi aahitepa okhala mmiravo. (1 Timóteo 4:11, 12; 2 Timóteo 1:1, 2, 7) Nyenya owo aahititelela oya vahoolo, nave iyaakha khumi ohoolo waya, Paulo aahiloca wa anna o Filipi: “Mwa Apwiya kinnawehererya vohilekela worumelihani Timóteo.” Ntakhara heeni Paulo oonneiye mmukhalelo yoola? Paulo oothariha: “Nkano mutxhu orino monelo mmohamoha ni onateteiwa ni nyuwo ntoko yowo.”—Filipi 2:19, 20.

Ntakhara heeni Timoteo oreiye yootakiherya yaphaama wa atokweene? Muthokororye mathowa mathanu nammoha.

1. Aanaakhapelela achu chiryene. Paulo aahaaleela anna o Filipi wi Timoteo aanatepa “oteteiwa” ni yaawo. (Filipi 2:20) Timoteo aanachuna wi anna etitelele okhala vakhiviru va Yehova, nave owo aahiilipiserya wi apharihele elukuluku ni ikuru sawe wi aakhaviherye anna.

Wiliyamu, yoowo ori mutokweene a muloko mu iyaakha opwaha makhumi meeli, wiiliwiili onnaaleela atokweene athanliwe hiihaanoru: “Mwaasivele anna. Mpwacheke soothowa saya ohiya okhapelela ichu pahi.” Muhikhale ntoko mulipa aweeciha ekaaro yoowo onapwacha pahiru ophiya oneemelavo ikaaro ohiya oweemererya achu owela mu ekaaro.

2. Aahela muteko wa Yehova vanipuro noopacerya. Paulo aalonce wi Timoteo aari oohiyana ni yaawo “enateteiwa ni itxhu saya, ehiyaka oteteiwa ni sa Yesu Kristu.” (Filipi 2:21) Paulo aahoona wi anna yaawo yaamurukurenrye yaateteiwa pahiru ni ikumi saya. Ilukuluku ikina awo yaanahela vanipuro noopacerya soochuna saya ohiya omurumeela Yehova. Nyenya Timoteo haari ntoko yaawo! Vaavaa aareiyeno ekari ya opaka sincipale mmuteko wa Yehova, owo aahaakhulela ntoko Yesaya, yoowo aalonce ariki: “Miyano kiri okhalene! Mukirume!”—Isaiya 6:8.

Muni nwerye hai okhalano mphimo vaavaa munakhapelelaanyu soothowa sanyu ni soothowa sa muloko? Yoopacerya, mucharihe ekano ya Paulo: “Musuwele othalela eri yaphama.” (Filipi 1:10) Muhele muteko wa Yehova va nipuro noopacerya. Yanawiili, musepe miteko seiyo sinahaala wookutuphulaani imalihaka elukuluku anyu yincipale ni  ikuru. Paulo aahimuleela Timoteo: “Weyano otxhawe mukhalelo wa omiravo. Wasyeke wokolola, wemererya, okhwela ni muretxele.”—2 Timóteo 2:22.

3. Aahilapa mwakuru mmuteko wa Yehova. Paulo aahiloca sa Timoteo: “Ntoko mwana ni atithinya, alaleyaka Mutxhaka Waphama ni miyo.” (Filipi 2:22) Timoteo haari mankoonya. Owo aahilapa mwakuru vamoha ni Paulo, nave eyo yaaheeriha onthamwene aya okhala woolipa.

Wookhalavo muteko wawaaca mmarehereryo a Yehova olelo. Muteko ola ti waweeliha murima nave onamookhaviheryaani okhala vakhiviru va anna ni arokora anyu. Mwawiihiiha muroromele wi ilukuluku soothene “mutepeke ophara muteko wa Apwiya”. —1 Korinto 15:58.

4. Aahipharihela yeeyo aahusenryeiye. Paulo aahimurepela ekaarata Timoteo: “Nto weyano wòkitxhara mmahusihoni mwaka, mmereloni, mmupuweloni, n’wemereryani, molevani, mokhwelani, munthìtini.” (2 Timóteo 3:10) Timoteo aahipharihela yeeyo aahusenryeiye, mwawiihiiha aahaakhela mirici mincipale.—1 Korinto 4:17.

Munoona hai omwaavya mutokweene a muloko yoowo munamoonaanyu okhala ntoko yootakiherya yaphaama? Tom yoowo ori mutokweene a muloko mu iyaakha sincipale, onnuupuwela wi mutokweene a mavyakelo aahimuthokororya nave aamvaha ovyakiha waphaama. Owo ooloca: “Kaanamukoha moohihiyererya nave kaanapharihela ekano awe. Ela yaahiteka nroromelo naka mwawaakuveya.”

5. Aahititelela wiivyakiha. Paulo ahimvaha ekano Timoteo: “Nave olemeyeno wera machichimiheryo.” (1 Timóteo 4:7, Nlakano Nahihano) Naamwi mulipa oochimaka orino muchu onamuvyakiha, owotho onaphwanela wiivyakihaka mukhateiye. Paulo aahimuceenyerya Timoteo: “Wivahe walakhanya olaka ni ohusiha . . . Othokorerye otitelela seiho, wi atxhu othene yoneke wunnuwa wa murima-à.”—1 Timóteo 4:13-15.

Nyuwaanotho munaphwanela otitelela orehererya mavyakelo anyu. Mukhale namahuserya a nthiti a Piipiliya, nave muchariheke mwawaakuveya ohoolela ovyaani wa marehereryo. Muhikhale awiiroromelaxa. Enahaala okhala yoonanara wuupuwela wi mookhalano mavyakelo mancipale a ohooleela mwaha ori woothene muhipanke otholathola moopwacha. Moolikana ni Tomoteo, ‘mwikhapelele nyuwo mukhatinyu ni mahusiho.’—1 Timóteo 4:16.

6. Aahiroromela munepa wa Yehova. Elukuluku aaloceiye sa orummwa wa Timoteo, Paulo aahimuupuxerya: “Okhapelele sokuhiwa saphama ni ikuru sa Munepa Wawela ori mwa hiyo.” (2 Timóteo 1:14) Timoteo aaphwanela ororomela munepa wa Muluku.

Tonaltu, yoowo ori mutokweene a muloko mu iyaakha sincipale, ooloca: “Alopwana arino mirici aanaphwanela okhapelela onthamwene aya ni Muluku. Yaawo aneerano anahaala ‘mwa’kuru wacheryerya’vo ikuru.’ Wakhala wi awo annaveka munepa waweela, ni wunnuwiha sawima sa munepa, awo anahaala okhala mareeliho eeparipari wa annaya.”—Salumu 84:7, NN; 1 Pedro 4:11.

Ti yoohakalaliha owoona arummwa oorumeela ni atokweene a muloko avyaani, yaawo ntoko nyuwo, anatitelela oya vahoolo mu omurumeela waya Yehova. Jason yoole oromoliwe wuupaceryani, ooloca: “Ovinyerya elukuluku kikhanlaaka mutokweene, koohuserya sincipale, nave nroromelo naka ninnannuwa. Vano kinnapuha chiryene murici aka nave kinoona owo ntoko ekari yooreeraxa!”

Apwanne munahaala otitelela oya vahoolo? Wakhala wi moochariha yootakiherya ya Timoteo, nyuwotho munahaala okhala mareeliho wa anna ni arokora anyu.