1. Mmikhalelo taani nneeraahu nlape ni Yehova?

VAAVAA Yehova aapatunxeiye achu, owo aachuna wi ekhale anamalapa ni yoowo. Naamwi achu olelo eri oohiphaameya, yaawo ari oororomeleya nlelo ananwerya olapa ni Yehova nihiku ti nihiku. Ntoko yootakiherya, hiyaano “nri amulapeli ni Muluku” vaavaa nnalaleeryaahu michaka saphaama sa Omwene awe ni waapaka amuhuserya. (1 Korinto 3:5-9) Nna ncicimiho ntokweene Mpatusa oowerya woothene onithanla wi nipake muteko yoowo ori wookhweleyasa! Nyenya, olaleerya tahi mukhalelo mmoha nnalapaahu ni Yehova. Mmwaha yoola, nnahaala ohuserya mukhalelo nnalapaahu tho ni Yehova elukuluku nnakhaviheryaahu emusi ahu ni yaale a mmulokoni, vaavaa nnakhalaahu oowaakhela aleco, elukuluku nnakhaviheryaahu miteko marehereryo anapakaaya orukurerya elapo, ni vaavaa nnaaceereryaahu muteko ahu ntakhara Yehova.—Kolosi 3:23.

2. Ntakhara heeni hannaphwanela olikanyiha yeeyo nnapakaahu ntakhara Yehova ni yeeyo akina anapakaaya?

² Elukuluku nnahuseryaahu mwaha yoola, ti yookhweleya wa hiyo wuupuwelela wi muchu ti muchu toohiyana. Iyaakha sahu,  mikhalelo ni mavyakelo tahi soolikana. Mwawiihiiha muhilikanyihe yeeyo munaweryaanyu opaka ntakhara Yehova ni yeeyo akina anaweryaaya opaka. Murummwa Paulo aaloca: “Mutxhu ti mutxhu avareryeke merelo awe. Nave, akhalano nthowa na witxitximiha, itxitximiheke mekheiye pahi, ahìphwanaphwanihaka ni atxhu akina.”—Galasya 6:4.

3. Ntakhara heeni nnamuloca wi muchu ti muchu onakhapelela emusi awe onalapa ni Muluku?

³ Yehova onaweherya wi nikhapelele imusi sahu. Ntoko yootakiherya, akhweya munanwerya olapa wi mvakulele emusi anyu. Asimai ancipale annakhala vaate ni anamwanaaya akhaani. Nave vaavaa asitiithi ahu ahinaweryaaya wiikhapelela, hiyaano nnaphwanela waakhapelela. Iha ichu sookhweleya. Piipiliya oni: “Mutxhu yole ohinàthokorerya ahima awe, ntosa a vetxhekoni vawe, òkhotxa wemererya wawe, nave onnanpwaha yole ohinemererya.” (1 Timóteo 5:8) Waakhanle wi mookhalano mirici veemusini, akhweya hamuni nwerye opaka sincipale ntakhara Yehova hiiha ntoko mwaachunaanyu. Nyenya muhiceecheye! Yehova onnahakalala vaavaa munavakulelaanyu emusi anyu.—1 Korinto 10:31.

4. Asitiithi anawerya hai ohela soothowa sa Omwene vanipuro noopacerya, nave tiheeni eneereya vaavaa anapakaaya yeeyo?

⁴ Asitiithi ari Akristu ananwerya olapa ni Yehova moorweela wa waakhaviherya anamwanaaya okhalano soolakelela mmuteko wa Yehova. Asitiithi ancipale aheerano yeela. Ntoko yookhumelela, anaaya aasilopwana ni aasithiyana ohoolo waya aalakelela omurumeela Yehova mmuteko wookilaatheya, naamwi ori ocai wa echoko aya. Akina mamisiyonariyu, akina mapiyoneero anarumeela weiwo oriwo othowa otokotoko wa alaleeryi, nave akina anarumeela o Peteli. Nyenya, vaavaa anamwane anakhalaaya ocai, asitiithi hanawerya omaliha elukuluku yincipale ni yaawo hiiha ntoko yaachunelaaya. Nyenya awo moohaakhalela nrima annaaceenyerya anamwanaaya otitelela omurumeela Yehova moohipwacha nipuro aryaayawo. Ntakhara heeni? Nthowa nawi ari oohakalala woona wi anaaya anamuhela Yehova vanipuro noopacerya mu okumi aya. (3 Yohani 4) Asitiithi ancipale a yaala analikana ni Ana, yoowo aalonce wi ‘ahimvaha’ mwanawe Samuwele wa Yehova. Awo anoona ntoko ekari etokweene olapa ni Yehova mmukhalelo yoola.—1 Samuwele 1:28.

5. Muni mwaakhaviherye hai anna ni arokora mmuloko anyu? (Moone eruku yoopacerya.)

⁵ Waakhanle wi himwaanono mirici sa veemusini sawaakuveya, apwanne mwanwerya waakhaviherya anna ni arokora yaawo aniiceliwa naari uuluvanle, ni yaawo arino soothowa sikina? Naari apwanne mwanwerya waakhaviherya yaawo anaakhapelela achu ene yaawo? Nwaavye mmuloko anyu yaawo anachuna nikhaviheryo. Ntoko yootakiherya, akhweya ookhalamo murokora yoowo onaakhapelela asitiithi awe awuuluvala. Apwanne mwanwerya omaliha elukuluku ni asitiithi awe wi owotho awerye okhapelela miyaha mikina? Akhweya mwanwerya omukhaviherya muchu moorweela mwa omukeriha o mithukumano, oya othuma ichu, naari omusekurya muchu osipitaale. Elukuluku munapakaanyu yeeyo, nyuwo munalapa ni Yehova wi aakhule nivekelo.—Mwaalakhanye 1 Korinto 10:24.

6. Nni niwerye hai okhala oowaakhela aleco?

⁶ Achu yaawo ari amulapeli ni Muluku, asuweliwe ntoko achu oowaakhela aleco. (Ahebri  13:2) Mmasu a Muluku, nnanwerya waalakhanya sootakiherya seiyo sinanihusiha mukhalelo nneeraahu nooniherye meerelo yaala. (Maphatxuwelo 18:1-5) Nnanwerya nave nnaphwanela waakhaviherya akina elukuluku eri yoothene vaavaa nnakhalaahuno ekari ya opaka yeeyo, moohipwacha waakhanle wi “asinnihu munroromeloni” naari hooye.—Galasya 6:10.

7. Mphurelo taani muchu onakhaleiyeno vaavaa onaahayiheiye akapuro ari mmuteko wa elukuluku yoothene?

⁷ Apwanne mwanwerya olapa ni Yehova moorweela mwa waahayiha alapeli a Muluku ari mmuteko wa elukuluku yoothene yaawo anachuna mpuro wookhalavo? (Mwaalakhanye 3 Yohani 5, 8.) Vaavaa nnapakaahu yeela, awo annaphura navetho hiyo ninnaphura. Piipiliya oniichana ‘olipihana’ mukina ni mukhwaawe. (Aroma 1:11, 12) Muthokororye yaweereya ya Olaf. Elukuluku aareiye mmiravo, ooweherya ekulucu yoowo ori muciye aahisekurya muloko awe nave aanachuna mpuro woohayavo, nave haarivo muchu mmoha mmuloko aamukhavihenrye. Olaf aahaaveka asitiithi awe yaawo yahaari Anamoona, wi ooweherya ekulucu ole ahaye veechokoni vaya. Awo yaaheemererya nyenya yaahimuleela Olaf wi owo aahaala orupaka va Sofani. Ela ti yeeyo Olaf enreiye, nave haarino ekeerelani wa nthowa na yeeyo. Owo aahikhalano murunku woohakalaliha vamoha ni ooweherya ekulucu! Woosiiselo ori woothene awo yaanathokororya miyaha soochuneya elukuluku yaalyaaya. Ooweherya ekulucu aahimulipiha Olaf vancipale ophiyerya wi owo aahilakelela omurumeela Yehova mmuteko wa elukuluku yoothene. Ivinrevo iyaakha makhumi masese, Olaf onarumeela ntoko misiyonaariyo mu ilapo soohiyanahiyana.

8. Ntakhara heeni ninnaphwanela okhala amahala naamwi akina woopaceryani ehithamalelaka? Mvahe yootakiherya.

⁸ Nnanwerya owooniherya osivela anamarwa mmikhalelo mincipale, naamwi woopaceryani ehithamalelaka. Ntoko yootakiherya, murokora o Espanya aanamuhusiha Piipiliya Yesika, muthiyana o Ekwatore. Nihiku nimoha variyari va yoohuserya ya Piipiliya, Yesika haawerya omaala wunla. Mwawiihiiha murokora owo aahimukoha Yesika ntakhara heeni aaninla? Yesika aalonce wi ahaakumve arwa o Espanya, aahitepa ohaawa. Nihiku nimoha haarino yoolya wi amvahe mwanawe amwaamuthiyana, pahiru aarino maahi. Yesika aahivekela avekaka nikhaviheryo vaavaa eereryeiye omulela mwanawe wi akone. Moohilekela, Anamoona eeli yaahimusekurya Yesika nave yaahimvaha erevista. Nyenya Yesika aahaanyemula Anamoona awo nave aahaahula erevista alocaka: “Yoolya ene ti yeela munachunaanyu wi kimvahe mwanaka?” Arokora awo yaaheererya omuhakararya, nyenya Yesika haawiriyanne. Ohoolo waya, arokora awo yaahiruuha yoolya emvaha Yesika. Vano, variyari va yoohuserya, Yesika anla nthowa nawi aahisuwela wi aakhooca naakhulo na Muluku ntakhara nivekelo nawe. Nyenya Yesika aahilakelela omurumeela Yehova. Mwawooneya,  sookhumelela saphaama saarweenle wa mahala a arokora yaale.—Eklesiyaste 11:1, 6.

9, 10. (1) Ikari taani Aisarayeli yaaryaayano wi yiivahe? (2) Mmikhalelo taani anna aneeraaya ekhaviherye mmulokoni olelo?

⁹ Mmahiku akhalai, Aisarayeli yaahikhalano ikari sincipale wi yiivahe. (Mukwaha 36:2; 1 Matharihelo 29:5; Nehemiya 11:2) Olelo, nyuwotho mookhalano ikari sincipale wi mvahe elukuluku anyu, ichu soomwiilini, ni mavyakelo anyu wi mwaakhaviherye anna ni arokora anyu. Vaavaa munapakaanyu yeeyo, munahaala okhala oohakalala chiryene nave Yehova onahaala wooreelihaani.

¹⁰ Masu a Muluku annaaceenyerya alopwana mmulokoni wi elape ni Yehova moorweela mwa waarumeela akina ntoko arummwa oorumeela ni atokweene a muloko. (1 Timóteo 3:1, 8, 9; 1 Pedro 5:2, 3) Yaale anapaka yeela annachuna waakhaviherya akina mmikhalelo sawooneya hiiha ntoko mmalapelo aya. (Saweriwa T’arummwa 6:1-4) Apwanne atokweene ahintoko woovekaani wi mukhale muthoonyeryi naari mukhaviherye a nipuro na soolaleeryiwa, a ikulucu, oreherya Empa ya Omwene naari echu vyakala? Anna yaawo anakhaviherya mmikhalelo seiya alonce wi annapuha vatokovene.

11. Murokora mmoha ophunre hai moorweela mwa olapa mmuteko wooteka?

¹¹ Yaale aniivaha wi elape mmuteko wooteka wiiliwiili annakhalano asinthamwene avyaani. Murokora mmoha oniichaniwa Marxiye onnalapa mu miteko sa oteka Ipa sa Omwene mu iyaakha khumi nathanu nararu. Mu miteko seiyo, owo aanaapwacha arokora yaawo yaari asimwali nave aanaakhaviherya yaawo moorweela wa waavyakiha. Owo olonce wi owo mukhalelo waphaama wa awiivaha wi elipihane mukina ni mukhwaawe. (Aroma 1:12) Mweeparipari, vaavaa aahoolenleiye  ilukuluku sookacamiha muukumini mwawe, asinthamwene yaawo aapankeiye mmiteko seiya yaahimulipiha. Apwanne mohintoko wiivaha mmuteko wooteka? Nyuwo munanwerya wiivaha mmuteko wooteka, naamwi muhirino mavyakelo avameekhaaya.

12. Muni mukhaviherye hai emanle ovira epahu?

¹² Nnanwerya tho olapa ni Yehova moorweela mwa waakhaviherya annihu emanle ophacuwa epahu. Ntoko yootakiherya, nnanwerya oveleela ikhorowa. (Yohani 13:34, 35; Saweriwa T’arummwa 11:27-30) Mukhalelo mukina nnahaalaahu okhaviherya ori weeliha naari orehererya ichu sinyakanyen’ye emanle ovira epahu. Kapriyela, murokora o Poloniya yoowo empaawe yaanyaanyen’ye ni maahi mancipale, aahihakalala vaavaa aawoonneiye anna a muloko wawaacamela erwaaka wi emukhaviherye. Elukuluku onuupuweleiye yaweereya yeeyo, owo olonce wi haniikhupanyerya ntakhara ichu soothene oyeleenleiye, nyenya otikithenrye muupuwelo awe mu ichu seiyo ophwannyeiye. Owo oriye: “Yaweereya yeela yookilipiha wi opaka makupa a muloko Weekristu ekari emoharu ya ehime ya murecele ni ohakalala.” Ancipale yaawo akhaviheryiwe emanle ovira epahu alonce wi anoona mmukhalelo woolikana. Nave oothene yaawo analapa ni Yehova wi yaakhaviherye anna annakhalano oohakalala ni weeliwa murima weeparipari.—Mwaalakhanye Saweriwa T’arummwa 20:35; 2 Korinto 9:6, 7.

13. Nnalipiha hai osivela wahu ntakhara Yehova vaavaa nniivahaahu? Mvahe yootakiherya.

¹³ Murokora oniichaniwa Estefaniya ni alaleeryi akina a muceche awe yaahilapa ni Muluku moorweela mwa waakhaviherya Anamoona yaawo yaachawenle o Estatu Unitu nthowa na ekhoco mu elapo aya. Awo yaahaakhaviherya alipa oochawa waavya ipa ni ikaruma sa vaate. Owo ooloca: “Naahiceenyeryeya moorweela mwa ohakalala ni othamalela waya, vaavaa yaalawihaaya osivela wa onna aya wa elapo yoothene. Imusi suupuwela wi hiyaano naakhavihenrye, nyenya mweevelevelo, awo tiyaanikhavihenrye vatokovene. Osivela, wiiwanana, nroromelo, ni omuroromela Yehova, weiwo neerenlaahu onamoona, waatepa olipiha osivela wahu ntakhara Yehova, nave eyo ennanivaha nthowa ntokweene na othamalela ichu soothene nnaakhelaahu mmarehereryo a Yehova.”

14, 15. (1) Moonelo taani mulipa miririmu Yesaya aareiyeno? (2) Akristu eni etakiherye hai moonelo wa Yesaya?

¹⁴ Apwanne mwaamusiveliwa olapa ni Yehova mwawaacererya? Apwanne mooreheryeya oya weiwo oriwo othowa wa alaleeryi? Mweeparipari, hannaphwanela oya ocai wene wi nikhale amahala. Nyenya aakhalavo anna ni arokora yaawo anawerya. Awo aakhalano  moonelo woolikana ni wa mulipa miririmu Yesaya. Vaavaa Yehova aakonheyeiye: “Tani kineraka kimurume? Tani oni akhale namutxhaka ahu?” Owo aahiloca: “Miyano kiri okhalene! Mukirume!”(Yesaya 6:8) Apwanne munanwerya nave mooreheryeya okhaviherya mareheryo a Yehova? Makhalelo taani makina muneeraanyu mukhaviherye?

¹⁵ Yesu aahiloca sa olaleerya ni waapaka amuhuserya: “Ematxa yòtepa wunnuwa, nto anamalapa àri vakhani. Munvekeleke mwanene a ematxa wi àrumihele anamalapa mmatxani mwawe.” (Mateu 9:37, 38) Apwanne mwanwerya orumeela ntoko piyoneero weiwo oriwo othowa wa alaleeryi? Naari apwanne mwanwerya omukhaviherya muchu mukina weerano yeeyo? Anna ni arokora ancipale anoona wi mukhalelo waphaama wa wooniherya osivela waya ntakhara Muluku ni mwaacamani aya, ori orumeela ntoko piyoneero weiwo oriwo othowa wa alaleeryi. Apwanne akhalavo makhalelo makina muneeraanyu mpake wi mwaaceererye muteko anyu? Wakhala wi moheerano yeeyo, munahaala okhala oohakalala chiryene.

16, 17. Makhalelo taani makina muneeraanyu mwaaceererye muteko anyu ntakhara Yehova?

¹⁶ Apwanne muri ooreheryeya orumeela o Peteli naari okhaviherya mmuteko wooteka, akhweya orumeela mu elukuluku yavakhaani naari nihiku nimoha naari mu mahiku ammoori mu esumana. Marehereryo a Yehova wiiliwiili annaachuna achu yaawo ari ooreheryeya orumeela makupa ari oothene weiwo oriwo othowa nave anahaala opaka echu eri yoothene marehereryo anaavekaaya opaka naamwi awo arino mavyakelo a muteko mukina. Yehova onnamvaha esisapo yoowo ori ooreheryeya orumeela weiwo onachuneyawo muchu.—Salumu 110:3.

¹⁷ Apwanne mwaamusiveliwa ovyakihiwa mwawaaceererya wi nwerye omurumeela Yehova moopwahaxa? Akhweya mwanwerya ovolowa mu Exikola ya Alaleeryi a Omwene. Exikola yeela ennaavyakiha anna ni arokora awiichwelavo yaawo anamurumeela Yehova mmuteko wa elukuluku yoothene wawi marehereryo a Yehova yaapharihele opaka sincipale. Yaawo anavolowa mu exikola yeela anaphwanela okhala ooreheryeya oya makupa ari oothene weiwo eneeraaya erumiheliwewo. Apwanne muri ooreheryeya opaka sincipale ntakhara Yehova mmukhalelo yoola?—1 Korinto 9:23.

18. Miphurelo taani inakhalavo vaavaa nnalapaahu ni Yehova nihiku ti nihiku?

¹⁸ Woona wi naachu a Yehova, nri amahala, aphaama, ooreera murima, ni oosivela. Ninnakhapelelana muchu ti muchu nave nihiku ti nihiku. Eyo ennanruuhela ohakalala, murecele, ni weeliwa murima. (Galasya 5:22, 23) Moohipwacha mukhalelo muryaanyu, munanwerya okhala oohakalala vaavaa munatakiheryaanyu mahala a Yehova ni okhala mmoha a amulapeli awe asisapo!—Masiposipo 3:9, 10.