Woona wi okumi onnakhala woovilaxa mu “mahiku [yaala] òmaliherya,” nnaphwanela okhala oovilela opwaha khalai. (2 Timóteo 3:1-5) Achu ancipale yaawo anirukurenrye tahi oovilela. Awo tanrima, onnaasivela tho waakhulana, nave haniihiiha. Mwawiihiiha nnaphwanela wiikoha: ‘Apwanne nkinakhala oovilela hiiha ntoko achu akirukurenrye? Okhala oovilela onataphulela eheeni chiryene? Tiheeni kinaphwanelaaka opaka wi ovilela opake makupa a okumi aka?’

Nsu nawi “ovilela” nenlo nnaphariheliwa Mpiipiliyani nnataphulela eheeni? Nsu nla ninnataphulela sincipale ohiya pahiru ovootha makacamiho. Muchu oovilela onnakhalano nthiti ni yoolakelela, eyo tiwi, onnaweherya wi ichu sinahaala okhala phaama. Owo hanuupuwela sa yene mukhateiye pahiru, nyenya onnapwacha miyoonelo sa akina, ophiyerya yaale amunyeenyeihale naari amukhalinhe moonanara. Owo onnatitelela oweherya wi onthamwene aya onahaala oreheryeya. Tahi yootikhiniha yeeyo Piipiliya onaloceiye wi ovilela onakhumela mu osivela. * (Moone masu avathi.) (1 Korinto 13:4) Ovilela makupatho a “sawima sa Munepa.” (Galasya 5:22, 23) Vanonto, tiheeni nnaphwanelaahu opaka wi nikhale oovilela chiryene?

Wi nikhale oovilela nnaphwanela oveka nikhaviheryo na munepa waweela wa Yehova yoowo onaavaheiye yaale anaroromela mwa yene. (Luka 11:13) Munepa owo ti wooweryaxa, nyenya nnaphwanela weera echu mwawiiwanana ni mavekelo ahu. (Salumu 86:10, 11) Eyo enataphulela wi nnaphwanela opaka owetha wahu wi nooniherye ovilela nihiku ti nihiku nave neerihe ovilela opaka makupa a okumi ahu. Nave ilukuluku ikina akhweya nnamuhesa. Tiheeni eni enikhaviherye?

Nnaphwanela ohuserya ni ochariha yootakiherya yaphaama ya yesu. Vaavaa murummwa Paulo aaloceiye sa “mutxhu a hihano,” yoowo onaphitaanyerya ovilela, owo aahiniceenyerya ariki: “Muretxele wa Kristu olamule mmurimani mwanyu.” (Kolosi 3:10, 12, 15) Wi neereno yeela nnaphwanela ochariha yootakiherya ya Yesu ni okhalano nroromelo nawaakhwanela mu elukuluku yoophwanelela Muluku onahaala wookolola. Wakhala wi nookhalano nroromelo nenla, hinni niyeleele ovilela wahu, moohipwacha yeeyo eneereya moorukurerya mwahu.—Yohani 14:27; 16:33.

Oothene ahu ninnachuna wi elapo evyaani erwe mwawaakuveya wakhala wooweryeya. Nyenya noohuserya okhala oovilela vancipale vaavaa nnuupuwelaahu mukhalelo Yehova onavileleiye ni hiyaano. Piipiliya onnanilipiha: ‘Tahi wi Apwiya anamulekela weriha nroromelo naya, ntoko akina anupuwelaya, Nto awo ari òvilela ni nyuwo, wona wi hanakhwela wi mutxhu arimele, nto wi othene erukunuse mirima.’ (2 Pedro 3:9) Vano vaavaa nnuupuwelaahu vooloca sa ovilela wa Yehova ntakhara hiyo, hiyotho nnamukhala oovilela vatokovene ni akina. (Aroma 2:4) Mikhalelo taani mikina mwemmo nnaphwanelaahu wooniherya ovilela?

Mu okumi ahu wa nihiku ti nihiku sookhalavo mikhalelo sawaaca seiyo nnaphwanelaahu wooniherya ovilela. Ntoko yootakiherya, onnachuneya ovilela wi nihaakwatelele akina elukuluku nnoonaahu wi nookhalano echu yookhweleya oloca. (Tiyako 1:19) Nnaphwanelatho okhala oovilela elukuluku muchu onannyeenyeiheiye. Ohiya waakhulela moohivilela, ti yaphaama wa hiyo wuupuwelela mukhalelo Yehova ni Yesu anaakhulelaaya miyoonelo sahu sooceecheya. Awo hanathokororya ichu ikhaani soonanara nnapakaahu. Ohiya yeeyo, awo annoona mikhalelo saphaama seiyo nryaahuno, nave moovilela annanivaha elukuluku ya orehererya.—1 Timóteo 1:16; 1 Pedro 3:12.

Nnaphwanelatho okhala oovilela elukuluku muchu onanleeleiye wi nooloca naari noopaka echu yoonanara. Naamwi waakhulela wahu woopacerya okhalaka wuukhuleya ni ochuna wiisaakiha. Nyenya masu a Muluku ananileela waakhulela mmukhalelo woohiyana. Awo ani: “Ovilela ti waphama ohiya wisòna. Ohakuveleke onyènyeya mmurimani mwà, ntakhara esara enakhala mw’alolo.” (Eklesiyaste 7:8, 9) Mwawiihiiha naamwi wootheriwa nipakeliwaahu ori watheru, nnaphwanela okhala oovilela nave nuupuwelele moomaaleleya nihaakumve weeravo echu. Ela ti yeeyo Yesu enreiye vaavaa akina yaamootheryaaya moonanara.—Mateu 11:19.

Xaxaxa asitiithi anaphwanela okhala oovilela elukuluku anaakhaviheryaaya anaaya wi yookolole muupuwelo aya aari osepa minkhela soonanara. Muthokororye yootakiherya ya Matiyasi yoowo onarumeela o Peteli yo Eskantinavia. Vaavaa aareiye mmiravo, asinthamwene awe oosikola yaanamutheya nthowa na soororomela sawe. Wuupaceryani, asitiithi awe hiyaasuwela echu yeereya. Nyenya voocharela awo yaahoona wi Matiyasi aahipacerya okhwa minikwa soororomela sawe. Xilis, apaapa a Matiyasi, alonce wi awo ni mwaaraya yaaphwanela okhala oovilelasa mmukhalelo yoola. Matiyasi aanaakoha makoho ntoko ala: “Muluku taani? Hanka waakhanle wi Piipiliya tahi Masu a Muluku? Nnasuwela hai wi chiryene ti Muluku onachuna ela naari ele wa hiyo?” Owotho aanaakoha apaapawe: “Ntakhara heeni kineeraka kithorihiwe wakhala wi nkinuupuwela nave nkineemererya hiiha ntoko nyuwo?”

Xilis onnathariha: “Ikwaha ikina, mwanihu mwaamulopwana aapaka makoho mu esara, ohiya ntakhara miyo naari amamaawe, nyenya ntakhara  eparipari, yeeyo ooneiye wi enneeriha okumi awe okhala woovila.” Xilis aamukhavihenrye hai mwanawe? “Miyaano ni mwanaka naanakiraathi nave naanavaanela mu iwora.” Ilukuluku soothene, Xilis aananwiriyana mwanawe nave aanampakela makoho wi eererye wiiwexexa miyoonelo sawe. Ikwaha ikina Xilis aanamutharihela mwanawe echu nave aanamuleela wi uupuwelele vooloca sa yeeyo mu nihiku nimoha, naari ehaakumve oloca sa yeeyo wanaawiili. Mu ilukuluku ikina, Xilis aanachuna mahiku vakhaani wi uupuwelele echu vooloca sa yeeyo mwanawe olonceiye. Moorweela mwa ovaanela wuuwu woohihiyererya, Matiyasi aahipacerya wiiwexexa yootaphulela ya woopola nave wi Yehova onnanisivela nave aahiiwexexa wi ookhalano ophwanelela wa onlamulela hiyo. Apaapawe aaloca: “Yooviravo elukuluku, nave ela yaari yoovila, nyenya vakhaani-vakhaani, omusivela Yehova waahunnuwa mmurimani mwawe. Mwaaraka ni miyaano nri oohakalala woona wi owetha wahu moovilela wi nimukhaviherye mwanihu, ovinyerya mu iyaakha sawe soomiravo yookumiherya mphurelo nave yootannya murima awe.”

Elukuluku Xilis ni mwaariye yaamukhaviheryaaya mwanaya moovilela, awo yaanaroromela wi Yehova aahaala waakhaviherya. Xilis ooloca: “Wiiliwiili kaanamuleela Matiyasi wi osivela wahu wawiiseela ntakhara yoowo waahiweeriha amamaawe ni miyaano ovekela vancipale wi Yehova amukhaviherye wiiwexexa.” Asitiithi ala ari oohakalala woona wi yaari oovilela nave hiyaavelavenle!

Hiyaanotho nnaphwanela okhala oovilela vaavaa nnamukhapelelaahu muchu aveemusini naari nthamwene ahu yoowo oniiceliwa mu elukuluku yincipale. Mucharihe yootakiherya ya Elena * (moone masu avathi), yoowotho onakhala o Eskantinavia.

Mu iyaakha thanu nararu ivirale, iyawe Elena aahikhalano ereca ya mmuupuweloni ikwaha piili yeeyo yaananarinhe ocoopare awe. Wa nthowa na yeela, owo hanawerya okhala oohakalala, oothanana, naari wuukhuwa ni akina. Mukhalelo ola onnamukacamiha vancipale Elena. Owo ooloca: “Onnachuneya ovilela wawaaca ni mavekelo mancipale.” Elena onnaaceererya: “Yoorepa yavamurimani vaka yeeyo enakiruuhela nihakararyo ti Filipi 4:13, yoowo oni: ‘Kinnawerya itxhu sothene mwa yowo onakilipiha.’” Ni ikuru sa Yehova nnikhaviheryo nawe, Elena onnavootha nikacamiho nenla nuuvilela.—Salumu 62:5, 6, Nlakano Nahihano.

Chiryene, yootakiherya yoophwanelela ya wooniherya ovilela ti Yehova mwaneene. (2 Pedro 3:15) Mpiipiliyani, wiiliwiili ninnaalakhanya vooloca sa ovilela otokotoko wa Yehova. (Nehemiya 9:30; Isaiya 30:18) Apwanne munnuupuwela mukhalelo Yehova aakhunleiye elukuluku Aparahamu aamukonheiye makoho mancipale vooloca sa yoolakelela Awe ya omutoloxa Sotoma? Yehova haamukwatelenle Aparahamu. Owo moovilela aahiwiriyana makoho ni wuukhuwa wa Aparahamu. Voocharela, Yehova aahooniherya aahiiwa wuukhuwa wa Aparahamu nave aahimuceenyerya wi haahaala amutoloxa Sotoma naamwi yaariwo achu khumi pahiru awookololowa mu epooma yeele. (Maphatxuwelo 18:22-33) Yehova ilukuluku soothene onnawiriyana nuuvilela, nave hanaakhulela moonanara!

Ovilela ari makupa oochuneyaxa a muchu a hiihaano yoowo Akristu oothene anaphwanelaaya okhalano. Wakhala wi ninnapaka owetha wahu wi nikhale oovilela chiryene, ninnamucicimiha Tiithi ahu oopwacha, Yehova, nave nnahaala okhala variyari va “yale anakhala òhiyeriwa sororomelihiwa wa nthowa na wemererya ni nthìti naya.”—Ahebri 6:10-12.