Mmurumeele Yehova, Muluku a Otaphuwa
“Weiwo oneraya okhalewo Munepa wa Apwiya, wokhalawo onethi [naari otaphuwa].” —2 KORINTO 3:17.
MACIPO: 11, 137
1, 2. (1) Ntakhara heeni okapuro ni otaphuwa saari miyaha soochuneya mmahiku a murummwa Paulo? (2) Taani Paulo aamulonceiye wi tori Ehime ya otaphuwa?
AKRISTU oopacerya yaakhala mu Olamulelo wo Roma, weiwo achu yaaryaaya awiirumihaxa vooloca sa malamulo, ekhaikhai, ni otaphuwa yaaryaayano. Naamwi hiiha, olamulelo owo woowerya waaroromela akapuro ophara muteko woowalamela. Mwawooneya wa achu araru mmoha aari kapuro mu Olamulelo wo Roma. Mweeparipari, okapuro ni otaphuwa saari miyaha soochuneya wa achu awunlaana, ophitaanyerya Akristu.
2 Mu ilukuluku sincipale murummwa Paulo aahirepa vooloca sa otaphuwa. Nyenya tahi wi eererya orehererya makacamiho a mulaponi, yaawo achu ancipale mu elukuluku yeele yaachunaaya opaka. Ohiya yeeyo, Paulo ni Akristu akhwaawe yaahilapa moowetha wi yaahusihe achu michaka saphaama sa Omwene wa Muluku ni waakhaviherya yaawo wiiwexexa mukhalelo mukucho waawoopola wa Yesu Kristu waaryaaya wasisapo. Paulo aahaaleela Akristu akhwaawe weiwo yaahaalaaya ophwanyawo Ehime ya otaphuwa weeparipari. Owo aahirepa: “Apwiya [Yehova] ti Munepa. Weiwo oneraya okhalewo Munepa wa 2 Korinto 3:17.
Apwiya, wokhalawo onethi [naari otaphuwa].”—3, 4. (1) Tiheeni Paulo aatharinheiye mu iciciri ahaakumve orepa masu anaphwanyeya mu 2 Korinto 3:17? (2) Tiheeni nnaphwanelaahu opaka wi nikhaleno otaphuwa onarweela wa Yehova?
3 Mu ekaarata awe yanaawiili aaruminheiye o Korinto, Paulo aahithariha yeeyo yeeren’ye ni Mose vaavaa aakhurunweiye o mwaako Sinai amanle opwahavo vamiithoni va munkeelo a Yehova. Ethoi awe yaanaarya! Vaavaa Aisarayeli yaamonnaaya Mose, yaahikhala awoova, mwawiihiiha Mose aahikhuneela ethoi awe ni ekuwo. (Mukwaha 34:29, 30, 33; 2 Korinto 3:7, 13) Paulo aahithariha: “Nto yarukunuselà murima Apwiya, ekuwo eyo enanvìhiwavo.” (2 Korinto 3:16) Tiheeni Paulo aachuneiye oloca?
4 Noohuserya mmwaha woopacerya wi Yehova, Mpatusa a ichu soothene, Muchu yoowo pahiru orino otaphuwa wawaakhwanela, woohikota. Mwawiihiiha ti yoophwanelela wi wookhalavo otaphuwa vamiithoni va Yehova ni “weiwo oneraya okhalewo Munepa wa Apwiya.” Koma Paulo aahiloca wi wakhala wi ninnachuna otaphuwa wuuwu, nnaphwanela orukunusela mirima wa Yehova. Eyo enataphulela wi nnaphwanela okhalano onthamwene wa waacameleya ni yoowo. Aisarayeli yaaryaaya mutakhwani pahiru yoona ichu mmoonelo wa achu, ohiya mmoonelo wa Yehova. Ela yaari ntoko wi awo yaarino ekuwo yaakhunenle muupuwelo ni mirima saya. Awo yaachuna opharihela otaphuwa waya ovyaani wi ehakalalihe soochuna saya.—Ahebri 3:8-10.
Ophiyerya wi muchu yoole ori mukalaposo, onawerya okhalano otaphuwa yoola
5. (1) Mukhalelo taani wa otaphuwa munepa wa Yehova onavahaaya? (2) Nnasuwela hai wi muchu onanwerya okhala kapuro naari mukalaposo nave nlelo akhaleno otaphuwa Yehova onavaheiye? (3) Makoho taani nnachunaahu waakhula?
5 Otaphuwa yoowo munepa wa Yehova onavahaaya onnapwaha otaphuwa onarweela wa okhala kapuro. Munepa owo onnaruuha otaphuwa otokweene opwaha yoowo achu yaahaalaaya oruuha. Owo onanwerya onoopola orweela wa yoocheka ni okhwa, navetho orweela wa okapuro wa malapelo oowoka ni sookhovelela saya. (Aroma 6:23; 8:2) Ola otaphuwa woohakalaliha chiryene! Ophiyerya wi muchu yoole ori kapuro naari ori mukalaposo, onanwerya okhalano otaphuwa yoola. (Maphatxuwelo 39:20-23) Murokora Nancy Yuen ni Munna Harold King mmoha ti mmoha aahimaliha iyaakha sincipale mukalaposo nthowa na nroromelo naya, naamwi hiiha nlelo yaahikhalano mukhalelo yoola wa otaphuwa. Munanwerya woona exilema enaloca sa yaweereya aya mu JW Broadcasting. (Moone vathi va ENTREVISTAS E CASOS REAIS > SUPORTANDO DIFICULDADES.) Vano hankooni naakhule makoho meeli. Nni nooniherye hai wi otaphuwa wahu ti wasisapo etokweene wa hiyaano? Nave nni nipharihele hai otaphuwa wahu mwamiruku?
OTAPHUWA MULUKU ONIVANHEIYE TI WASISAPO ETOKWEENE
6. Aisarayeli yoonihenrye hai wi hiyaathamalenle otaphuwa Yehova aavanheiye?
6 Vaavaa nnaakhelaahu yamahala yasisapo, ninnamuthamalela muchu yoowo onivanhe. Namarepela 11:5, 6, 10; 14:3, 4) Ela ennanivaha nihusiheryo noochuneyaxa.
Mwawiihiiha Aisarayeli hiyaathamalenle otaphuwa Yehova aavanheiye. Pahiru mu miyeeri vakhaani ovinyerya vaavaa Yehova aawooponleiye o Yikuputu, awo yaahipacerya wuupuwelela soolya seiyo yaapharihelaaya weiwo. Awo yaaniikhupanyerya ni mana, yoolya yeeyo Yehova aavahereryeiye. Ophiyerya wi yaanachuna okookela o Yikuputu! Wa yaawo, ‘ihopa, musiri, melau, alyu ni sebola’ saari soochuneyaxa opwaha otaphuwa Yehova aavanheiye wi emulapeleke. Hiwaavovo minikwa wi Yehova aahitepa onanariwa ni yaawo. (7. Paulo aapharihenleiye hai ekano awe enaphwanyeya mu 2 Korinto 6:1, nave nni nipake hai moolikana?
7 Paulo aahaalopola Akristu oothene wi ehikhale oohithamalela otaphuwa yoowo Yehova onivanheiye moorweela wa Mwanawe, Yesu Kristu. (Mwaalakhanye 2 Korinto 6:1.) Paulo aari oohiphaameya, kapuro a yoocheka ni okhwa, nave eyo yaahimweeriha woona ntoko epahu. Nlelo, owo aahiloca: “Muluku athamaliwe mwa Yesu Kristu Pwiya ahu.” Ntakhara heeni ayaaka oloca yeela? Paulo aahaatharihela Akristu akhwaawe ariki: “Wona wi nlamulo na Munepa na ekumi mwa Yesu Kristu nònopola wa nlamulo na yotxheka ni na okhwa.” (Aroma 7:24, 25; 8:2) Moolikana ni Paulo, hannaphwanela ocuwala wi Yehova oonoopola orweela wa okapuro wa yoocheka ni okhwa. Nthowa na yawoopola, ti wooweryeya wa hiyaano omurumeela Muluku ni yawuupuxerya-ya-murima yaphaama, nave ela ennanivaha ohakalala weeparipari.—Salumu 40:8.
Apwanne munapharihela otaphuwa wa othanla wi mmurumeele Yehova naari pahiru opaka yeeyo munachunaanyu? (Moone iparakrafo 8-10)
8, 9. (1) Olopola taani murummwa Petro ovanheiye vooloca sa mukhalelo nnaphwanelaahu opharihela otaphuwa wahu? (2) Muchu aahaala opharihela hai otaphuwa wawe mmukhalelo woonanara?
8 Hannaphwanela pahiru wi moona oloca wi ninnamuthamalela Yehova, koma nnaphwanelatho okhalano ephoole wi nihipharihele otaphuwa wahu mmukhalelo woonanara. Ntoko yootakiherya, murummwa Petro aahilopola wi hannaphwanela opharihela otaphuwa wahu ntoko yookhuneelano soonanara. (Mwaalakhanye 1 Pedro 2:16.) Olopola yoola onnanuupuserya yeeyo yeeren’ye ni Aisarayeli mutakhwani. Olelotho ninnachuna olopola yoola moopwahaxa. Satana ni elapo awe onnavaha ichu sincipale ntoko yoowara, yoolya, ohapaliwa ni okhala ooweiwa ni seiyo. Alipa oovuwiha miyaha sa maroca annaapharihela achu aphaama wi eneerihe wuupuwela wi nnaphwanela okula ichu seiyo chiryene nihinachunaahu. Ela enamukhala yookhweya ovoloweliwa ni elapo eneerihaka opharihela otaphuwa wahu mmukhalelo woonanara.
9 Ekano ya Petro ennaphariheleyatho mmiyaha mincipale soochuneya mu okumi, ntoko ohuserya, olapa, naari muteko nnathanlaahu. Ntoko yootakiherya, amiravo mmahiku ahu yaala annakhinyeereryiwa olapa moowetha wi ewerye weemereryiwa mu isikola sa vasulu. Achu ancipale annaaleela wi wakhala wi aakhalano mahusiheryo a vasulu, awo anahaala ophwanya miteko saphaama, okhalano ikhorowa sawaaca, ni okhala oocicimihiwa. Achu yaawo akhweya annawooniha sooleeliherya seiho sinooniherya wi yaale ahusenrye mu esikola ya vasulu annaweherya okhalano ikhorowa sawaaca opwaha yaale arino mahusiheryo a veeri-veeri. Mahusiheryo a vasulu enakhala ntoko miruku saphaama wa amiravo vaavaa awo anapakaaya soothanla seiho sinahaala ovolowela okumi aya woothene. Nto tiheeni awo ni asitiithi aya anaphwanelaaya wuupuwela?
10. Tiheeni nnaphwanelaahu wuupuwela vaavaa nnapakaahu soothanla mmiyaha sa muchu mukhateiye?
10 Akina ananwerya woona wi nthowa nawi miyaha seiha ti sa muchu mukhateiye, awo anaphwanela okhalano otaphuwa wa othanla echu anachunaaya, wakhala wi henuukhula oleela-wa-murima aya. Awo ananwerya wuupuwela masu a Paulo: “Ntakhara seni onethi aka oneraya ovareryiwe ti nlèlo na murima wa akina?” (1 Korinto 10:29) Naamwi nrino otaphuwa wa opaka soothanla sahu vooloca sa mahusiheryo ni muteko ahu, nnaphwanela wuupuwela wi otaphuwa wahu wookhalano mphimo nave wi soolakelela sahu soothene inahaala okhalano sookhumelela. Ti nthowa nene Paulo aalonceiye: “Sothene ti sowereya, nto sothene tahi sophwanela. Sothene ti sowereya, nto tahi sothene inakhaliha phama.” (1 Korinto 10:23) Mwawiihiiha, naamwi nrino otaphuwa wa opaka soothanla mmiyaha sa muchu mukhateiye, echu nnachunaahu tahi yookhweleyaxa.
NINNAPHARIHELA MWAMIRUKU OTAPHUWA WAHU VAAVAA NNAMURUMEELAAHU YEHOVA
11. Nthowa taani nimweerinhe Yehova onoopola?
11 Vaavaa Petro aaloponleiye wi nihipharihele otaphuwa wahu mmukhalelo waananara, owo ahiloca wi mukhalelo woophwanelela wa opharihela okhale “womulapano Muluku.” Nthowa nimweerinhe Yehova ompharihela Yesu wi anoopole mu okapuro wa yoocheka ni okhwa, ti nawi nipharihele okumi ahu woothene wi nimurumeele Yoowo.
Mukhalelo waphaama wa opharihela otaphuwa wahu ori opharihela elukuluku ahu ni ikuru sahu wi nimurumeele Yehova mwawaakhwanela
12. Yootakiherya taani Nowa ni emusi awe atikithenryaaya wa hiyo?
12 Mukhalelo waphaama wa opharihela otaphuwa wahu ori opharihela elukuluku ahu ni ikuru sahu wi nimurumeele Yehova mwawaakhwanela. Weerano yeela enahaala onikhapelela oheemererya soolakelela ni soochuna soomuchu okhala ichu sookhweleyaxa mu okumi ahu. (Galasya 5:16) Nkuupuwelani yeeyo Nowa ni emusi awe yaapankaaya. Awo yaakhanle mu elapo ya nlala ni yoocapaheya. Nyenya awo hiyaavolowenle meerelo a achu yaawo yaarukurenrye. Awo yaahithanla okhala ooweiwa mmuteko Yehova aavanheiye. Yaahimuteka mwaaceya, ethukumanya soolya saya ni sa inama saya, nave yaahaalopola akina vooloca sa Maahi Mancipale. Piipiliya onnaloca: “Nowe àhera sothene Muluku amurummeiye.” (Maphatxuwelo 6:22) Ntoko yookhumelela, Nowa ni emusi awe yaahivuluwa mu okuchuwa wa elapo ele.—Ahebri 11:7.
13. Tiheeni Yehova onanilamuleleiye opaka?
13 Tiheeni Yehova onanilamuleleiye opaka mmahiku ahu yaala? Ntoko amuhuserya a Yesu, noosuwela wi Muluku oonilamulela olaleerya. (Mwaalakhanye Luka 4:18, 19.) Olelo, Satana ohaaruuhela evaasi achu ancipale nave awo hanasuwela wi akapuro a malapelo oowoka, a ichu soomwiilini, ni a mukhalelo wa epoliitika. (2 Korinto 4:4) Moolikana ni Yesu, nookhalano ekari ya waakhaviherya akina omusuwela ni omulapela Yehova, Muluku a otaphuwa. (Mateu 28:19, 20) Waalaleerya akina tahi wookhweya. Mmapuro makina, achu haanono nchuno na omusuwela Muluku, nave akina annaphiyerya okhala oonyeenyeya vaavaa nnaalaleeryaahu. Nyenya woona wi Yehova onnanilamulela olaleerya, nnaphwanela wiikoha, ‘Apwanne kinnawerya opharihela otaphuwa waka wi kipake sincipale mmuteko wa Yehova?’
14, 15. Tiheeni achu ancipale a Yehova alakelenlaaya opaka? (Moone eruku yoopacerya.)
14 Ti yoolipiha wi achu ancipale a Yehova aasuwela wi makuchuwelo a mukhalelo yoola wa ichu aatepa waacamela nave annalakelela okhweiha ikumi saya ni opacerya opiyoneero. (1 Korinto 9:19, 23) Mapiyoneero makina analaleerya ekulucu ya muloko aya, nave akina anathaamela muloko onachuneyawo nikhaviheryo. Mu iyaakha thanu ivirale, anna ni arokora opwaha 250.000 yaahipacerya opiyoneero, nyenya vano aakhalavo mapiyoneero ookilaatheya opwaha 1.100.000. Ti yoohakalaliha osuwela wi ancipale annapharihela otaphuwa waya wi emurumeele Yehova mmukhalelo yoola!—Salumu 110:3.
15 Tiheeni yaakhavihenrye opharihela otaphuwa waya mwamiruku? Muthokororye yaweereya ya Yohani ni Yutiti, yaawo arumeenle mu ilapo soohiyanahiyana mu iyaakha makhumi mararu ivirale. Awo annathariha wi vaavaa Exikola ya Muteko Woopiyoneero yaapacenryaaya mu 1977, anamahuserya yaahiceenyeryiwa othaamela ni orumeela mmapuro waariwo othowa otokweene wa alaleeryi. Wi ekhwaaniherye yoolakelelaaya, Yohani ni Yutiti yaanachuna okhweiha ikumi saya. Ti nthowa nene Yohani aatorokeiye muteko awe mu ilukuluku sincipale. Ohoolo waya, yaaya olaleerya mu elapo ekina. Tiheeni yaakhavihenrye ovootha makacamiho ntoko ohuserya elocelo evyaani ni opaka matorokelo a yookhovelela evyaani ni mukhalelo wa elapo? Awo yaahivekela wa Yehova nave yaahimuroromela owo wi aakhaviherye. Vanonto awo yoonne hai vooloca Tiyako 4:8: ‘Mmwatxameleke Muluku nave owo onan’watxamelani.’ Koosuwela wi koophwanya yeeyo kaavyaaka, yoolakelela ya weeliha murima muukumini.”
sa omurumeela Yehova mmukhalelo yoola mu iyaakha soothene seiha? Yohani onnaloca: “Kohoona wi kaahiivoliiherya mmuteko woophwanelela yoowo kaasuwenlaaka naari kaalawinhaaka. Yehova aahikhala eeparipari wa miyaano, hiiha ntoko tiithi oosivela. Vano kinniiwexexa phaama yootaphulela ya yoorepa ya16. Mmukhalelo taani macikhwi a anna ni arokora apharihenlaaya otaphuwa waya mwamiruku?
16 Akina, ntoko Yohani ni Yutiti, ananwerya okhala piyoneero mu elukuluku yincipale. Nthowa na mikhalelo, akina ananwerya okhala piyoneero pahiru mu elukuluku vakhaani. Nlelo, akina anniivaha wi ekhaviherye muteko wa oteka orukurerya elapo. Ntoko yootakiherya, anna ni arokora waacamela 27.000 yaahirwa okhaviherya muteko wa oteka o nipuro nahu ntokotoko o Warwick, Nova York. Akina yaarwiile okhaviherya mu isumana piili, akina mu miyeeri vakhaani, nave akina mu eyaakha yantero naari opwaha. Ancipale mwa anna ni arokora yaala yaahiilipixerya wi erumeele o Warwick. Awo yootakiherya yaphaama ya achu yaawo apharihenle otaphuwa waya wi emuhakalalihe ni omucicimiha Yehova, Muluku a otaphuwa!
17. Tiheeni nnahaalaahu ophwanya wakhala wi noopharihela otaphuwa wahu mwamiruku hiihaano?
17 Ninnatepa othamalela omusuwela Yehova, ni okhalano otaphuwa yoowo onarweela mu omulapela yoowo. Hankooni nooniherye moorweela wa soothanla nnapakaahu wi otaphuwa ola tiwasisapo etokotoko wa hiyo. Ohiya opharihela mmukhalelo woonanara, hankooni nipharihele wi nimurumeele Yehova moomalela ophiyerya nnaweryelaahuvo. Voocharela nnahaala opuha mareeliho yaawo Yehova olaihenryeiye vaava aalonceiye ariki: “Sopatusiwa seihotho inarwa sopoliwa mukapuroni wa eyutxe, wi sakhele onethi [naari otaphuwa] mwa ovuwa wa ana a Muluku.”—Aroma 8:21.