1. Atamu ni Eva emanle omwareya, Yehova aavanhe hai nlipiho ni ewehereryo wa achu?

YEHOVA MULUKU yoowo onavaha nlipiho. Owo onneerano yeeyo ovinyerya vaava achu yaachenkaaya ni ekhala oohiphaameya. Mweeparipari, mwawaakuveya Atamu ni Eva emanle ommwareela Muluku, owo aahivahererya yooloherya, vaava yiiwexexiwaaya, yaavanhe nlipiho ni ewehereryo wa achu yaawo yaahaala oyariwa omwaahiyu. Yooloherya eyo enaphwanyeya mu Maphatxuwelo 3:15 nave ennaroromeliha wi Satana Musaserya ni miteko sawe soonanara inahaala otolosiwa.—1 Yohani 3:8; Wupulula 12:9.

2. Yehova aamulipinhe hai Nowa?

² Nkuupuwelani mukhalelo Yehova aamulipinheiye kapuro awe Nowa. Achu yaakhala variyari va elukuluku yeele yaari a  nlala ni oocapaheya, nave Nowa ni emusi awe pahiru ti yaamulapela Yehova. Akhweya Nowa aahiceecheya. (Maphatxuwelo 6:4, 5, 11; Yuda 6) Nto Yehova aahimvaha nlipiho nenlo owo aachuneiye wi atitelele omulapela Yoowo ni opaka yeeyo yaari yoophwanelela. (Maphatxuwelo 6:9) Yehova aahimuleela Nowa wi aahaala otolosa elapo yeele yoonanara, navetho aahimutharihela yeeyo Nowa aaphwaneleiye opaka wi owo ni emusi awe ewerye ovuluwa. (Maphatxuwelo 6:13-18) Yehova aari Muluku a nlipiho wa Nowa.

3. Yehova aamulipinhe hai Yosuwa? (Moone eruku yoopacerya.)

³ Ohoolo waya, Yehova aahimulipiha kapuro awe Yosuwa, yoowo aarino murici mutokweene ohoolo wawe. Owo aahaala waahoolela achu a Muluku ovolowa mu Elapo ya Nlakano ni waavootha anakhoco akuruxa a maloko yaakhala mwemmo. Yehova aahisuwela wi Yosuwa aahikhalano nthowa na woova, mwawiihiiha Owo aahiloca wa Mose: “Omuhusihe Yosuwa, omulèle wi akhale òlipa ni awumiha murima: owo onamukhala mutokwene a nloko nla, nave onamuholèla nloko nenlo n’yaka okusa elapo onerawe wone.” (Malamulo 3:28) Voocharela Yehova aahimulipiha Yosuwa, ariki: “Wiriyana: ti nlamulo kinovahaka: Olipihe murima! Ohòve! Ntakhara Apwiya, Muluku à, anamukhala ni weyano, weiwo onerawe oyekewo.” (Yosuwa 1:1, 9) Munuupuwela wi masu yaala yaamukhavihenrye hai Yosuwa?

4, 5. (1) Khalai Yehova aalipinhe hai achu awe? (2) Yehova aamulipinhe hai Mwanawe?

⁴ Yehova aahaalipihatho achu awe ntoko nikhuuru. Ntoko yootakiherya, Yehova aahisuwela wi Ayuta yaahaala ochuna nlipiho vaavaa yaaryaaya wookapuroni o Papulu, nave aahaavaha nlipiho moorweela wa yooloherya, alocaka: “Ohòve, miyano kiri ni weyano. Ohithananeke, miyano ka Muluku à. Kinnolipiha, kinnokhaviherya, kinnawakiha ni mata aka a ikuru.” (Isaiya 41:10) Ohoolo waya, Yehova aahaalipiha Akristu oopacerya, nave owo onnanilipiha mmukhalelo mmohamoha.—Mwaalakhanye 2 Korinto 1:3, 4.

⁵ Yehova aahimvahatho nlipiho Mwanawe. Yesu amanle opatisiwa, aahiiwa nsu orweela wirimu nriki: “Ola ti mwanaka òkhweleyasa, kinaphwanyakamo nihakalaliho naka.” (Mateu 3:17) Apwanne munnawerya waanyiherya mukhalelo masu yaala yaamulipinhaaya Yesu variyari va muteko awe veelaponi?

6. Niphwanaphwaniho na Yesu vooloca sa italento nnanlipiha hai?

⁶ Yesu aahimutakiherya Tiithi awe moorweela wa waalipiha akina okhala oororomeleya. Aaheerano yeeyo mu niphwanaphwaniho na italento, vaava aalonceiye wi pwiya aahiloca wa kapuro ti kapuro oororomeleya: “Wòhera phama, wà mmiravo òroromeleya! Wona wi wàkhala òroromeleya wa etxhu ekhani, vano kinamokuha vanipuroni nohakalala na apwiya-à.” (Mateu 25:21, 23) Masu yaale yaahaalipiha amuhuserya awe otitelela omurumeela Yehova moororomeleya!

7. Yesu aalipinhe hai arummwa awe, xaxaxa Petro?

⁷ Naamwi arummwa ikwaha sincipale yaanaakhulana vooloca sa taani aari mutokweene, elukuluku yoothene Yesu aari  oovilela ni yaawo. Owo aahaalipiha wi ekhale awiiyeviha ni yaarumeele akina, opwaha ochuna wi akina yaarumeeleke. (Luka 22:24-26) Ikwaha sincipale Petro aahipaka soocheka nave haamusivelinhe Yesu. (Mateu 16:21-23; 26:31-35, 75) Nto Yesu hantonko omukhooca Petro. Moohiyana, owo aahimulipiha nave aahimvaha murici wa waalipiha akina.—Yohani 21:16.

8. Esekiya aalipinhe hai asitokweene a anakhoco vamoha ni achu o Yuteya?

⁸ Naamwi ehaakumve okhalano yootakiherya ya Yesu wi echareke, akapuro a Yehova yaahisuwela ochuneya waya waalipiha akina. Mmuupuwele Esekiya. Vaavaa Asiriya yaahaalaaya waatolosa achu o Yuteya, owo aahaathukumanya asitokweene a anakhoco vamoha ni achu wi aalipihe, nave awo ‘yàhilipa ni masu awe.’—Mwaalakhanye 2 Matharihelo 32:6-8.

9. Tiheeni nnahuseryaahu orweela wa Yupu vooloca sa ovaha nlipiho?

⁹ Nnawerya ohuserya vooloca sa ovaha nlipiho moorweela wa Yupu. Naamwi owo aachuna nlipiho, owo aahaahusiha akina mukhalelo wa ovaha nlipiho. Yupu aahaaleela alopwana yaawo yaaruule wi emuhakararye wi waakhanle wi owo eererya waahakararya, aahaala oloca ichu saahaala waalipiha ni oweeriha okhala phaama, ohiya ichu saahaala waaceecheiha. (Yobi 16:1-5) Koma wookuchulani Yupu aahaakhela nlipiho orweela wa Elihu ni Yehova.—Yobi 33:24, 25; 36:1, 11; 42:7, 10.

10, 11. (1) Ntakhara heeni mwaana mwaamuthiyana a Yefite aanachuna nlipiho? (2) Taani nnaphwanelaahu waalipiha olelo?

¹⁰ Mwaana amwaamuthiyana a Yefite aanachunatho nlipiho. Tiithi awe yoowo aari muthoriha, aakele owana ekhoco ni Amonita. Aahiroromeliha wi wakhala wi Yehova oomukhaviherya ovootha ekhoco, muchu oopacerya omuthikirerya akookelaka veechokoni aahaala omurumeelaka Yehova mu tapernaakulu. Aisarayeli yaahivootha ekhoco nave muchu oopacerya omuthikirerya aari mwanawe amwaamuthiyana, mwanawe mmoharu. Murima wa Yefite waahiphweya. Nto aahikhwaaniherya yoororomeliha awe nave aahimurumiha mwanawe wi amurumeele Yehova mu tapernaakulu okumi awe woothene.—Amuthoriha 11:30-35.

¹¹ Naamwi yaari yoovila wa Yefite, eyo yaahikhala yoovilaxa wa mwanawe mwaamuthiyana. Koma, owo aahiiveleela wi apake yeeyo tiithi awe aaroromelinheiye. (Amuthoriha 11:36, 37) Eyo yaaphitaanyerya ohitheliwa ni ohikhalano anamwane. Nihimo na emusi naahaala ocakanela. Mwaana mwaamuthiyana aanachuna nihakararyo ni nlipiho nincipale. Piipiliya oni: ‘Elukuluku ene yele, asimwali a w’Isarayele yanathukumana o Galaadi, mahiku masese vamuyakhani, wi emwinlele mwana a Yeftè.’ (Amuthoriha 11:39, 40) Mwaana mwaamuthiyana a Yefite onnaneeriha wuupuwela sa Akristu olelo yaawo anathanla okhala aciye wi ewerye opaka sincipale ntakhara  Yehova. Apwanne hannaphwanela waathamalela ni waalipiha yaawo?—1 Korinto 7:32-35.

12, 13. Petro ‘alipinhe hai annawe’?

¹² Mu ohiyu Yesu ahaakumve okhwa, owo aahiloca wa murummwa Petro: “Simau, Simoni, satana owasyani vantxipale, wi overeni ntoko trigo. Nto miyo kìhovekelela, wi nroromelo na nihitxiphe. Ni weyano, warukunusà murima, walipiheke asinna à.”—Luka 22:31, 32.

¹³ Petro aari mmoha wa yaawo yaarino murici mmuloko woopacerya wa Akristu. (Galasya 2:9) Owo aahaalipiha anna moorweela wa meerelo awe yooniherya olipa murima mu Pentekoste ni ohoolo waya. Amanle orumeela iyaakha sincipale, owo aahaarepela ekaarata anna. “Kohorepelani vowakuveya, kolèlakani, kolipihakani ni kihelaka onamona wi ti ala mahala èparipari a Muluku. Mutitele wilipiha mwa yawo.” (1 Pedro 5:12) Ekaarata ya Petro yaahaalipiha Akristu a mahiku awe. Nave nlelo eyo ennanilipiha vaavaa nnawehereryaahu yoororomeliha ya Yehova waakhwanela moomalela!—2 Pedro 3:13.

14, 15. Aliivuru a Piipiliya arempwe ni murummwa Yohani ananlipiha hai?

¹⁴ Murummwa Yohani aaritho mmoha yoowo aarino murici mmuloko woopacerya wa Akristu. Owo aahirepa Muchaka wootannya murima vooloca sa muteko  wa Yesu. Liivuru yoowo a Piipiliya aahaalipiha Akristu mu iyaakha masana nave onnatitelela onilipiha olelo. Ntoko yootakiherya, pahiru mu yaweereya ya Yohani ninnaalakhanya masu a Yesu wi osivela mukhalelo yoowo onaasuwanyeiha amuhuserya eeparipari.—Mwaalakhanye Yohani 13:34, 35.

¹⁵ Ikaarata chaaru seiyo Yohani orempeiye sookhalanotho iparipari sasisapo. Elukuluku nnakhalaahu ooceecheya nthowa na soocheka sahu, ninnaphwanya nihakalaliho waalakhanya wi mukucho wa woopola wa Yesu ‘onnanrapiha wa yotxheka yothene.’ (1 Yohani 1:7) Nave wakhala wi ninnatitelela wiisoona okhalano nthowa, nnahaala ohakararyeya vaavaa nnaalakhanyaahu wi “Muluku t’ori mutokwene opwaha murima ahu.” (1 Yohani 3:20) Yohani namarepa mmoharu a Piipiliya yoowo orempe wi “Muluku ti okhwela.” (1 Yohani 4:8, 16) Ekaarata awe yanawiili ni yaneeraru sinnaalamulela Akristu wi etitelele ‘wetxa mweparipari.’—2 Yohani 4; 3 Yohani 3, 4.

16, 17. Murummwa Paulo aalipinhe hai Akristu oopacerya?

¹⁶ Murummwa Paulo aari yootakiherya yaphaama ya muchu yoowo aavanhe nlipiho wa annawe. Elukuluku vakhaani Yesu amanle okhwa, arummwa ancipale yaakhala o Yerusalemu, weiwo naaphwanyeyawo nikhuuru noolamulela. (Saweriwa T’arummwa 8:14; 15:2) Akristu o Yuteya yaalaleerya vooloca sa Kristu  wa achu yaawo nlelo yaamweemererya Muluku mmoha. Koma munepa waweela waahimurumiha Paulo olaleerya wa Akriki, Aroma, ni akina yaawo yaalapela amuluku ancipale.—Galasya 2:7-9; 1 Timóteo 2:7.

¹⁷ Paulo aaya makupa yaawo vano aniichaniwa Turkiya, hiiha ntoko Kresiya ni Italiya. Aahaalaleerya yaawo yahaari Ayuta yaakhala mmapuro yaawo, nave aahipaceryiha miloko Seekristu. Okumi hiwaari wookhweya wa Akristu yaawo avyaani. Achu a elapo aya yaanawiikara, wa nthowa na yeeyo yaanachuna nlipiho. (1 Tesalónika 2:14) Waacamela eyaakha makhumi mathanu, Paulo aahirepa ekaarata ya nlipiho ntakhara muloko yoowo muvyaani o Tesalonika. Owo aahiloca: “Ninnamuthamala Muluku mahiku othene wa nthowa na nyuwo othene, niwupuwelakani mmavekeloni mwahu. Ninnupuwela vohihiyererya nroromelo nanyu nolapasa, okhwelana wanyu wolipiserya, ni nthìti.” (1 Tesalónika 1:2, 3) Owotho aahaaveka wi elipihaneke mukina ni mukhwaawe nave aahirepa: “Muhakalalihaneke [naari mulipihaneke] ni mukhaviheryaneke.”—1 Tesalónika 5:11.

18. Nikhuuru noolamulela mu nsana noopacerya naamulipinhe hai Filipi?

¹⁸ Mu nsana noopacerya, Yehova aahipharihela nikhuuru noolamulela wi naalipihe Akristu oothene, ophitaanyerya yaawo yaarino murici mmilokoni. Vaavaa Filipi aalalenryeiye Asamariya vooloca sa Kristu, nikhuuru noolamulela naahimukhaviherya. Nno naahaarumiha anna a nikhuuru naya, Petro ni Yohani, wi yaavekelele Akristu avyaani wi yaakhele munepa waweela. (Saweriwa T’arummwa 8:5, 14-17) Filipi ni anna ni arokora avyaani yaahitepa olipiheya moorweela wa nikhaviheryo yaakhenlaaya orweela wa nikhuuru noolamulela!

19. Akristu oopacerya yoona hai vaava yaalakhanyaaya ekaarata yaarumihiwe ni nikhuuru noolamulela?

¹⁹ Voocharela, nikhuuru noolamulela naanachuna opaka yoolakelela yookhweleya. Apwanne Akristu yaawo yahaari Ayuta yaanaphwanela othikiliwa hiiha ntoko Ayuta yeerenlaaya, mwawiiwanana ni Nlamulo na Mose? (Saweriwa T’arummwa 15:1, 2) Nikhuuru noolamulela nimanle ovekela ntakhara munepa waweela ni wuupuwelela mu Soorempwa, awo yaahilakelela wi hiyaari yookhweleya othikiliwa. Voocharela awo yaahirepa ekaarata etharihaka yoolakelelaaya nave yaahaarumiha anna wi yaperekhe mmilokoni. Elukuluku Akristu yaalakhanyaaya ekaarata eyo, “yàheliwa murima ni masu òhakalaliha yari vakartani.”—Saweriwa T’arummwa 15:27-32.

20. (1) Nikhuuru Noolamulela nnanlipiha hai olelo? (2) Nikoho taani nnahaalaahu othokororya mmwaha onacharela?

²⁰ Olelo, Nikhuuru Noolamulela na Anamoona a Yehova ninnavaha nlipiho wa Mapetelita, akapuro a mmuteko wavameekhaaya wa elukuluku yoothene, ni oothene ahu. Hiiha ntoko anna a nsana noopacerya, ninnahakalala ni nlipiho! Navetho, wi elipihiwe yaale ahin’ye eparipari, mu 2015 Nikhuuru Noolamulela naahivahererya eproxura Kookelani wa Yehova. Apwanne anaphwanela waalipiha akina anna yaawo arino murici, naari oothene ninnaphwanela weerano? Nnahaala othokororya nikoho nenla mmwaha onacharela.