Nlipihane Mukina ni Mukhwaawe ‘Mopwahasa’
“Nlipihaneke mokhwelani . . . , nlipiseryaneke, opwahasa musuwelakatho wi ninnatxamela nihiku.”—AHEBRI 10:24, 25.
MACIPO: 53, 20
1. Ntakhara heeni murummwa Paulo aahaaceenyerya Akristu oopacerya yaawo yaari Ahepri wi elipihaneke ‘mopwahasa’?
MU NSANA noopacerya, murummwa Paulo aahivaha ekano ela wa Akristu yaawo yaari Ahepri: “Nlipihaneke mokhwelani ni mwa miteko saphama. Nave nihitxompeleke oya omathukumaneloni wahu, ntoko akina akhovelenlaya. Nto, nlipiseryaneke, opwahasa musuwelakatho wi ninnatxamela nihiku na orwa wa Apwiya.” (Ahebri 10:24, 25) Anna akhweya yaaniikoha ntakhara heeni Paulo ayaaka waaleela wi ekhwelaneke moopwahaxa. Mu iyaakha vakhaani ohoolo waya, nthowa nimoha naahikhala nawooneya. Mu elukuluku yeele, awo yaahoona wi nihiku na Yehova na omuthoriha Yerusalemu naari vakhiviru. Awo yaahisuwela wi yaaphwanela ochawa mpooma hiiha ntoko Yesu aaleenleiye weera. (Luka 21:20-22; Saweriwa T’arummwa 2:19, 20) Nihiku nle na Yehova naahiphiya mu eyaakha ya makhumi mathanu napiili, vaavaa Aroma yaamutolonxaaya Yerusalemu.
2. Ntakhara heeni ninnaphwanela wuupuwelela vooloca sa olipihana mmahiku ahu?
Yoweli 2:11) Masu a mulipa miririmu Sofoniya annaphariheleyatho mmahiku ahu: “Nihiku ntokotoko na esara y’Apwiya nohatxamela, nokhuvèla, nnarwa ni wakuva.” (Sofoniya 1:14) Wanthowa nenla, nnaphwanela ‘olipihana [naari okhala awuukhuwa wa mukina ni mukhwaawe] mokhwelani ni mwa miteko saphama.’ (Ahebri 10:24) Nnaphwanela okhala awaapwacha annihu wi niwerye waalipiha yaawo vaavaa anachunaaya nlipiho.
2 Olelotho, nri mmukhalelo woolikana. Nihiku “ntokotoko ni na wopiha” na Yehova nohaacamela. (TAANI ONACHUNA OLIPIHIWA?
3. Tiheeni murummwa Paulo aalonceiye sa olipiha? (Moone eruku yoopacerya.)
3 “Okatxamiheya ti wawiniha murima, nsu norèra ninnahakalaliha murima.” (Masiposipo 12:25) Oothene hiyo mu ilukuluku ikina ninnakhwela nlipiho. Paulo aahooniherya mookwakwaleya wi ophiyeryatho yaale arino murici wa waalipiha akina anaphwanela olipihiwa. Owo aahaarepela annawe o Roma: “Txhiryene miyo kinnakhwela vatokovene owonani wi kovaheni mahala a Munepa awolipihani, ti wi nlipihaneke wa nthowa na nroromelo nyuwo ni miyo nryahuno.” (Aroma 1:11, 12) Ophiyerya wi murummwa Paulo aanachuna nlipiho mu ilukuluku ikina.—Mwaalakhanye Aroma 15:30-32.
4, 5. Taani nnaphwanelaahu omulipiha olelo, nave ntakhara heeni?
4 Mmahiku ahu, nnanwerya waalipiha yaale anamurumeela Yehova mu elukuluku yoothene, ntoko mapiyoneero oororomeleya. Ancipale a yaawo aahiya ichu sincipale seiyo saahakalaliha muukumini wi ewerye opiyoneero. Elatho eparipari wa mamisiyonaario, Mapetelita, ooweherya a ekulucu ni asaaraya, ni yaale anarumeela mu ikupweete sootaphulela. Oothene yaala anniilipiserya omaliha elukuluku yincipale emurumeelaka Yehova. Mwawiihiiha nnaphwanela waalipiha. Aakhalavotho ancipale yaawo nlelo anakhwela ovolowa mmuteko wa elukuluku yoothene nto hanawerya. Awotho annathamalela vaavaa anaakhelaaya nlipiho.
5 Muchu taani mukina onaphwanela olipihiwa? Nnanwerya waalipiha anna ni arokora ancipale yaawo athanlile wiikhalelaru aciye nthowa na ochuna omwiiwelela Yehova ni othela naari otheliwa “mwa Apwiya pahi.” (1 Korinto 7:39) Athiyana ootheliwa annalipiheya vaavaa asiiyaya anaaleelaaya wi annaasivela navetho annathamalela ntakhara soothene anapakaaya. (Masiposipo 31:28, 31) Akristu yaawo anavilela ni wiikariwa naari aniiceliwa annachunatho olipihiwa. (2 Tesalónika 1:3-5) Yehova ni Yesu annaahakalaliha oothene yaale ari oororomeleya.—Mwaalakhanye 2 Tesalónika 2:16, 17.
ATOKWEENE ANANWERYA ONILIPIHA
6. Tuuvi ori murici wa “asitokwene” alociwe mu Isaiya 32:1, 2?
6 Mwaalakhanye Isaiya 32:1, 2. Nnakhala mu ilukuluku soovila nave onamukhala wookhweya okhala ooximwa ni ooceecheya. Yesu Kristu onnaapharihela annawe oororomeleya oothanliwa ni “asitokwene” anapaka makupa a ipucepuche ikina wi enilipihe. Atokweene awo a mmulokoni tahi ‘anene’ a nroromelo nahu nto ‘akhaviheryi’ a ohakalala wahu. Awo anachuna onikhaviherya okhala oohakalala ni otitelela okhala oororomeleya.—2 Korinto 1:24.
7, 8. Atokweene eni yaalipihe hai akina moorweela wa yeeyo analocaaya ni anapakaaya?
7 Atokweene anaphwanela omutakiherya murummwa Paulo, yoowo ilukuluku soothene eererya waalipiha annawe. Owo aahaarepela Akristu o Tesalonika yaawo yaahoolela wiikariwa: “Hiyotho, wa nthowa na wokhwelani wahu, nanakhwela wovahani tahi Mutxhakaru wa Muluku, nto ekumi ahutho, wona wi nantepa wokhwelani.”—8 Atokweene ananwerya okhala oolipihaxa orweela wa yeeyo analocaaya. Nyenya apwanne ilukuluku soothene ela ennaakhwana? Paulo aahaaleela atokweene o Efeso: “[Munnaphwanela] wakhaviherya alipa òthoiwa, mupuwelaka masu a Apwiya Yesu, wi yole onavaha ori òrèriwa [oohakalala] ompwaha yole onakhela.” (Saweriwa T’arummwa 20:35) Paulo aari oolakelela ‘wavaha sothene aryeiyeno, ni wileva’ ntakhara annawe. Owo aahooniherya moorweela mu saweera sawe wi aari ooreheryeya weera echu eri yoothene ntakhara yaawo. (2 Korinto 12:15) Moolikana, atokweene anaphwanela okhala oolipiha ni waahakalaliha akina ohiya pahiru moorweela wa yeeyo analocaaya, komatho wa yeeyo anapakaaya. Eyo ennooniherya wi chiri annanikhapelela.—1 Korinto 14:3.
9. Atokweene eni evahe hai ekano mmukhalelo woolipiha?
9 Wi yaalipihe anna, ikwaha ikina atokweene anaphwanela ovaha ekano. Atokweene anaphwanela ohuserya orweela Mpiipiliyani mukhalelo wa opaka yeela mmukhalelo woolipiha. Yesu ootikitherya yootakiherya yaphaama mu ovaha ekano vaava aaruminheiye michaka mmiloko so Asiya mukhaani amanle okhwa ni oviihiwa mookhwani. Owo aahivaha ekano yakuru mu miloko so Efeso, Perkamu, ni Tiyatíra. Nto ahaakumve ovaha ekano, aahaathamalela ntakhara ichu soothene saphaama yaapakaaya. (Wupulula 2:1-5, 12, 13, 18, 19) Yesu aahiloca wa muloko wo Laotikaya: “Yale kinàkhwelaka, kinnàsamela ni kinnàlaka. Tiva, okhale òlipiserya ni orukunuse murima.” (Wupulula 3:19) Atokweene ahu anneererya omutakiherya Kristu mmukhalelo anavahaaya ekano.
TAHI ATOKWEENERU ANAPHWANELA WAALIPIHA AKINA
Alipa ooyara, apwanne munnaavyakiha aniinyu waalipiha akina? (Moone eparakrafo 10)
10. Oothene ahu nni nlipihane hai?
10 Tahi atokweeneru anaphwanela waalipiha akina. Paulo aahaaceenyerya Akristu oothene oloca ‘masu aphama wi yunnuwihe nroromelo naya wi ewereleke akina eri yaphama.’ (Éfeso 4:29) Muchu ti muchu a hiyo onaphwanela wuupuwelela vooloca sa yeeyo nneeraahu nipake wi naakhaviherye akina. Paulo aahaarepela Akristu yaawo yaari Ahepri: “Vìhani mata anyu òvelevela ni makutha anyu òtxetxheya. Okololani iphiro wa inani sanyu wi mwetxo worakala ohikokhowe, nto openuwe.” (Ahebri 12:12, 13) Oothene ahu nnanwerya olipihana orweela wa yeeyo nnalocaahu, naamwi nri amiravo.
11. Tiheeni yaamukhavihenrye Marta vaava aareiye awuukhuwa?
11 Murokora mmoha oniichaniwa Marta aahikhala awuukhuwa mu elukuluku ekina. * (Moone masu avathi.) Owo aahirepa: “Nihiku nimoha kivekelaka ntakhara nlipiho, kaahimusuwela murokora mmoha awuuluvala yoowo aakoonihenrye okipwacha ni oreera murima, echu miyaano kaachunaaka mu elukuluku yeele. Owotho aahikileela yaweereya awe yeeyo yiiwanana ni yaweeha kaahoolelaaka, nave wiisoona omeekha waakivukuwa.” Akhweya murokora ole haasuwenle ophiyerya mweeryo taani masu awe yaamvolowenlaaya Marta!
12, 13. Nni nipharihele hai ekano enaphwanyeya mu Filipi 2:1-4?
12 Paulo aahaarepela Akristu o Filipi: “Tiva, warivo nihakalaliho mwa Kristu, oleketxheya mokhwelani, okumanela wa mmunepani, niphwanya ni ikharari, akhwanihani ohakalala waka, mwiwananaka ni monelo mmoha, ni okhwelana omoha, ni mupuwelo mmoha, ni murima mmoha. Muhere etxhu wa nthowa na owanawana, nari na wisona, nto ni wiyeviha ni n’wonaka akhwinyu ntoko atokwene anopwahani nyuwo. Muhithokorerye sanyuru, nto sa akhwinyutho.”—Filipi 2:1-4.
13 Oothene ahu nnaphwanela waavya mikhalelo sa okhaviheryana. Nnanwerya ovaha “nihakalaliho” noosivela, “okumanela wa mmunepani,” “niphwanya ni ikharari” wi naalipihe anna ni arokora ahu.
MIKHALELO MIKINA SA OLIPIHA
14. Tuuvi ori mukhalelo mmoha wa ovaha nlipiho?
14 Ninnahakalala osuwela wi yaale naakhavihenryaahu annatitelela okhala oororomeleya. Murummwa Yohani aahirepa: “Nkano ohakalala onapwaha vava vosuwela wi anaka anetxa mwa eparipari.” (3 Yohani 4) Mapiyoneero annahakalala vaavaa anasuwelaaya wi muchu yoowo yaamukhavihenryaaya ohuserya eparipari khalai nlelo onnamurumeela Yehova moororomeleya, akhweyatho piyoneero. Mwawiihiiha wakhala wi mapiyoneero annaceecheya, nnaphwanela owuupuxerya ichu soothene saphaama apankaaya mu waakhaviherya akina.
15. Echu taani nnaphwanelaahu opaka wi naalipihe yaale anarumeela moororomeleya?
15 Ooweherya a ikulucu ancipale annaloca wi awo ni asaaraya annalipiheya vaavaa anathamaleliwaaya emanle oxekurya muloko. Elatho eparipari wa atokweene, mamisiyonariyu, mapiyoneero, ni Mapetelita, oothene yaawo anamurumeela Yehova moororomeleya. Moorweela wa waathamalela, ninnaalipiha vancipale opwaha nnasuwelaahu.
TI MWAWIIHAI OOTHENE AHU NNEERAAHU NAALIPIHE AKINA?
16. Ichu taani sookhweya inahaala omulipiha muchu?
16 Hanka wakhala wi onnoovilaani waaleela akina mukhalelo munoonaanyu vooloca sa yaawo? Mweeparipari, tahi woovila waalipiha akina. Mweererye otheya vakhaani. Wakhala wi awotho hanooniherya otheya, munanwerya osuwela wi akhweya yookhala enaakacamiha, nave wi annamuchuna muchu ochekulano. Munanwerya waakhaviherya pahiru moorweela wa waawiriyana.—Tiyako 1:19.
17. Tiheeni yaamulipinhe munna mmoha?
17 Munna yoowo ori mmiravo oniichaniwa Henri aahitepa wuukhuwa vaavaa amusi awe ancipale yaamanlaaya omurumeela Yehova. Mmoha a yaawo yaari apaapawe, yaawo yaari mutokweene. Ooweherya a ekulucu aahisuwela wi Henri aari oothanana nave aahimukusa wi yanwurye chaaya vamoha. Ooweherya a ekulucu aahinwiriyana moopwacha vaavaa aathariheiye moonelo awe. Henri aahisuwela wi mukhalelo mmoha Salumu 46, Sofoniya 3:17, ni Marko 10:29, 30.
eereiye aakhaviherye amusi awe okookela mu eparipari, waari otitelela okhala oororomeleya. Owotho aahilipiheya moorweela wa omwaalakhanyaOothene ahu nnanwerya ohakalalihana ni olipihana (Moone eparakrafo 18)
18. (1) Tiheeni Mwene Soolomoni aarempeiye vooloca sa nlipiho? (2) Tiheeni murummwa Paulo aalonceiye?
18 Tiheeni nnahuseryaahu orweela wa yaweereya ya Marta ni Henri? Mmoha ti mmoha a hiyo onanwerya omuhakararya ni omulipiha munna naari murokora onachuna nlipiho. Mwene Solomoni aahirepa: “Nsu n’eparipari t’etxhu yorèra elukuluku yophwanelela. Oweha wokhurunuwa onnahakalaliha murima, mutxhaka waphama onnavaha ikuru.” (Masiposipo 15:23, 30) Apwanne mwanwerya omuupuwela muchu yoowo mmusuwenlaanyu wi ori awuukhuwa naari oothanana? Ntakhara heeni hamunapaka echu yookhweya ntoko omwaalakhanyerya Mulipeleli naari omooniha ikaruma mu site ahu. Navetho, Paulo aahihusiha wi wiipa macipo a Omwene vamoha ennaneeriha okhala phaama. Owo aahirepa: “Muhusihanaka ni mulipihanaka ni miruku sothene, mmwipelaka mmurimani mwanyu Muluku vomuthamala ni masalmo, mathamalelo ni matxipo ammunepani.”—Kolosi 3:16; Saweriwa T’arummwa 16:25.
19. Ntakhara heeni moohilekela nlipiho nnahaalaaya okhala nookhweleyaxa, nave tiheeni nnaphwanelaahu opaka?
19 Vaavaa nnaacamelaahu nihiku na Yehova, onahaala okhala wookhweleyaxa wa hiyo olipihana mukina ni mukhwaawe. (Ahebri 10:25) Nnahaala okhala oohakalala wakhala wi noopharihela ekano ya Paulo: “Tiva, muhakalalihaneke ni mukhaviheryaneke ntoko mwenranyu ophiyerya olelo.”—1 Tesalónika 5:11.
^ par. 11 Masina aatorokiwa.