1. Munalipiha hai onthamwene wawaacameleya ni muchu?

WIILIWIILI, echu yoopacerya munapakaanyu wi muteke onthamwene woolipa ni muchu ori omaliha elukuluku ni yoowo. Elukuluku munavaanelaanyu, mulocaka miyaha ni saweereya sanyu, munnakhala asinthamwene. Nyenya elukuluku nnachunaahu olipiha onthamwene wawaacameleya ni Yesu, ninnahoolela makacamiho. Ntakhara heeni?

2. Nikacamiho taani noopacerya nnahoolelaahu?

² Nikacamiho noopacerya ti nawi hanintonko okumanano Yesu. Akristu ancipale a mu nsana noopacerya yaahihoolela nikacamiho noolikana. Naamwiihiiha, murummwa Petro aahiloca: “Ti yoowo munamukhwelaanyu nnaamwi muhimoonale. Muhimoonaka hiihaano, munnamuroromela.” (1 Ped. 1:8) Mwawiihiiha ti wooweryeya opaka onthamwene wawaacameleya ni Yesu naamwi nihintonko okumanano.

3. Nikacamiho taani nanaawiili nnahoolelaahu?

³ Nthowa nanaawiili ti nawi hinnawerya oloca ni Yesu. Vaavaa nnavekelaahu, nnaloca ni Yehova. Eparipari wi nnavekela orweela mu nsina na Yesu, nyenya hinnaloca mooluluwanya ni yoowo. Mweeparipari, Yesu hanachuna wi nivekeleke wa Yoowo. Ntakhara heeni? Nthowa nawi ovekela mukhalelo wa olapela, nave pahiru Yehova tonaphwanela olapeliwa. (Mat. 4:10) Naamwiihiiha, nnanwerya wooniherya osivela wahu ntakhara Yesu.

4. Nikacamiho taani naneeraru nnahoolelaahu, nave tiheeni nnahaalaahu othokororya mmwaha yoola?

 ⁴ Nikacamiho naneeraru ti nawi Yesu onakhala wirimu, mwawiihiiha hinnawerya omaliha elukuluku ni yoowo mmukhalelo woomwiilini. Nyenya nnanwerya osuwela sincipale vooloca sa Yesu naamwi nihikhalaka ni yoowo. Nnahaala wuuluulela ichu xexe seiho nnaphwanelaahu opaka wi nlipihe onthamwene ahu ni yoowo. Voopacerya, hankooni nthokororye ntakhara heeni oryaaya woochuneya wa hiyo oteka onthamwene wawaacameleya ni Kristu.

5. Ntakhara heeni ninnaphwanela okhala asinthamwene a Yesu? (Moone tho ikaaxa “ Opaka Onthamwene ni Yesu Onnahoolela mu Onthamwene ni Yehova” ni “ Moonelo Woophwanelela Vooloca sa Murici wa Yesu.”)

⁵ Nnanwerya okhala asinthamwene a Yesu wakhala wi nookhalano onthamwene waphaama ni Yehova. Ntakhara heeni? Muthokororye mathowa meeli. Noopacerya, Yesu aahaaleela arummwa awe: “Vawi Atiithi aneene annookhwelaani. Tiwi nyuwo mookikhwela miyo.” (Yoh. 16:27) Owo aahilocatho: “Haavo onarwa wa Atiithi ahivinre wa miyo.” (Yoh. 14:6) Weererya okhala nthamwene a Yehova nihipanke onthamwene waphaama ni Yesu, onalikana ni weererya ovolowa mpa nihivinre va milako. Yesu aahipharihela niphwanaphwaniho noolikana vaavaa iiloceiye ntoko “mulako wa ipucepuche.” (Yoh. 10:7) Nthowa nanaawiili ti nawi Yesu aahooniherya moophaameya makhalelo a Tiithi awe. Yesu aahiloca wa arummwa awe: “Yoowo onakoona miyo, onnawoona Atiithi.” (Yoh. 14:9) Mukhalelo mmoha onahaala onikhaviherya omusuwela phaama Yehova ori ohuserya vooloca sa Yesu. Vaavaa nnahuseryaahu vooloca sa Yesu, onthamwene ahu ni yoowo onamukhala woolipa.  Nave vaavaa onthamwene ahu ni Yesu onannuwaaya, osivela wahu ntakhara Tiithi awe onamukhala wawiiseela.

6. Nthowa taani nikina nnaneeriha okhalano onthamwene ni Yesu? Mutharihe.

⁶ Nnaphwanela okhalano onthamwene ni Yesu wi mavekelo ahu yaakhuliwe. Eyo enataphulela opaka sincipale ohiya pahiru oloca “mu nsina na Yesu” omakuchuwelo wa nivekelo. Nnaphwanela osuwela mukhalelo Yehova onamphariheleiye Yesu wi aakhule mavekelo ahu. Yesu aahaaleela arummwa: “Soothene muneeraanyu muveke mu nsina naka, kinarwa keerano.” (Yoh. 14:13) Naamwi ari Yehova onawiriyana ni waakhula mavekelo ahu, owo omvaha Yesu owerya wa opaka soolakelela Sawe. (Mat. 28:18) Mwawiihiiha, Yehova ahaakumve waakhula mavekelo ahu, owo onnaalikhela waakhanle wi noopharihela ekano yeeyo Yesu ovanheiye. Ntoko yootakiherya, Yesu ooloca: “Tiwi, mwaakhurumuwela achu soocheka saya, atiithinyu ari wirimu anamookhurumuwelaani tho. Nto, mwaahaakhurumuwela achu, atiithinyu hiyookhurumuwelaani soocheka sanyu.” (Mat. 6:14, 15) Ela ti yoochuneya wi naakhaliheke akina mmukhalelo Yehova ni Yesu ananikhalihaaya!

7. Taani onaphura mukucho wa woopola wa Yesu?

⁷ Pahiru yaale arino onthamwene ni Yesu tanahaala ophura mukucho awe wa woopola. Nnasuwela hai? Yesu ooloca wi aahaala “oleva okumi awe wa nthowa na asinthamwene.” (Yoh. 15:13) Achu oororomeleya yaawo yaakhanle Yesu ahaakumve orwa veelaponi yavathi anahaala ohuserya vooloca sa yoowo ni omusivela. Alopwana ni athiyana yaawo ntoko Aparahamu, Sara, Mose, ni Rahapi anahaala oviihiwa mookhwani, ophiyerya wi alapeli awookololowa yaala a Yehova anahaala ochuna opaka onthamwene ni Yesu wi ephwanye ekumi yoohimala.—Yoh. 17:3; Saw. 24:15; Ahe. 11:8-12, 24-26, 31.

8-9. Hiiha ntoko etharihiwaaya mu Yohani 15:4, 5, onthamwene ahu ni Yesu onaneeriha opaka eheeni, nave ntakhara heeni eryaaya yookhweleya?

⁸ Ninnahakalala olapa vamoha ni Yesu mmuteko wa olaleerya ni ohusiha michaka sa Omwene. Vaavaa Yesu aareiye veelaponi yavathi owo aari muhusiha. Nave ovinyerya vaavaa aakookenleiye wirimu, Yesu, ntoko muru wa muloko, nlelo onnatitelela ohoolela muteko wa olaleerya ni ohusiha. Owo onnoona nave onnathamalela wiilipiserya wanyu waakhaviherya achu ancipale ophiyerya munaweryelaanyuvo wi emusuwele yoowo ni Tiithi awe. Mweeparipari, nnanwerya waakhwaniherya muteko yoola, pahiru nnikhaviheryo na Yehova vamoha ni Yesu.—Mwaalakhanye Yohani 15:4, 5.

⁹ Masu a Muluku annanihusiha mookwakwaleya wi nnaphwanela okhalano ni okhapelela onthamwene ni Yesu wi nimuhakalalihe Yehova. Mwawiihiiha hankooni nthokororye ichu xexe seiho nnaphwanelaahu opaka wi nikhale asinthamwene a Yesu.

10. Tuuvi ori mukhalelo woopacerya wi nteke onthamwene ni Yesu?

¹⁰ (1) Mmusuwele Yesu. Nnamweerano yeela moorweela wa owaalakhanya aliivuru a Mpiipiliyani ntoko Mateu, Marko, Luka, ni Yohani. Vaavaa nnuupuwelelaahu saweereya sa Yesu, nnammusivela ni omucicimiha Yesu nthowa na mukhalelo aakhalinheiye achu. Ntoko yootakiherya, naamwi aari Pwiya aya, Yesu haakhalinhe arummwa awe ntoko akapuro. Ohiya yeeyo, owo ahuupulula muupuwelo ni moonelo awe wampuwa wa yaawo. (Yoh. 15:15) Vaavaa awo yaakhalaaya awuukhuwa, Yesu aanakhala tho awuukhuwa.  (Yoh. 11:32-36) Ophiyerya wi amwiicani awe yaanasuwela wi owo aari nthamwene a yaale yeemererya muchaka awe. (Mat. 11:19) Elukuluku nnamutakiheryaahu Yesu mmukhalelo aakhalinheiye arummwa awe, onthamwene ahu ni akina onnannuwa, ninnakhala oohakalala, nave omuthamalela wahu Kristu onnannuwa.

11. Echu taani yanaawiili nnaphwanelaahu opaka wi nikhale asinthamwene a Yesu, nave ntakhara heeni eryaaya yoochuneya?

¹¹ (2) Mutakiherye muupuwelo ni meerelo a Yesu. Vaavaa nnamusuwelaahu phaama ni otakiherya mukhalelo awe wa wuupuwela, nnamukhalano onthamwene wawaacameleya ni yoowo. (1 Kor. 2:16) Nni nimutakiherye hai Yesu? Moone yootakiherya emoha. Yesu aanuupuwela vancipale vooloca sa waakhaviherya akina ohiya wiihakalaliha meekheiye. (Mat. 20:28; Aro. 15:1-3) Woona wi aanuupuwela mmukhalelo yoola, Yesu aaniiveleela wi aakhaviherye akina ni waakhurumuwela. Owo haanyeenyeya pure ni yeeyo achu yaalocaaya sa yoowo. (Yoh. 1:46, 47) Nave owo heemererya wi soocheka seiho achu yaapankaaya khalai ivolowele mukhalelo awe vooloca sa yaawo. (1 Tim. 1:12-14) Yesu ooloca: “Mwakhalano osivela mukina ni mukhwaawe, achu oothene anarwa esuwela wi muri oohuserya aka chiri.” (Yoh. 13:35) Mwiikohe: “Apwanne kinnachariha yootakiherya ya Yesu moorweela mwa wiilipixerya otikitherya murecele ni anna ni arokora aka?”

12. Echu taani yaneeraru nnaphwanelaahu opaka wi nikhale asinthamwene a Yesu, nave nni neereno hai?

¹² (3) Mwaakhaviherye asinna a Kristu. Yeeyo nnapakaahu wi naakhaviherye asinnawe oothanliwa, Yesu onoona ntoko wi nnapaka ntakhara yene. (Mat. 25:34-40) Mukhalelo mmoha nnaakhaviheryaahu anna oothanliwa ori opaka owetha wahu wi nlaleerye ni waahusiha akina hiiha ntoko Yesu onilamulenleiye opaka. (Mat. 28:19, 20; Saw. 10:42) Pahiru nnikhaviheryo na “ipucepuche ikina” asinna a Kristu annawerya okhwaaniherya mukipici mutokweene wa olaleerya mu elapo yoothene yoowo oneeriwa mmahiku ahu. (Yoh. 10:16) Waakhanle wi muri mu nikhuuru na ipucepuche ikina, elukuluku eri yoothene munapakaanyu muteko yoola, munnooniherya osivela wanyu ntakhara anna oothanliwa vamoha ni Yesu.

13. Nni nipharihele hai miruku sa Yesu inaphwanyeya mu Luka 16:9?

¹³ Ninnapaka tho onthamwene ni Yehova vamoha ni Yesu moorweela wa opharihela muhakhu ahu wi nikhaviherye muteko yoowo anahoolelaaya. (Mwaalakhanye Luka 16:9.) Ntoko yootakiherya, nnanwerya opaka yooveleela ntakhara muteko wa elapo yoothene, yoowo onavolowela okhaviherya mmapuro yaawo ohilaleeryiwewo, oteka ni orehererya ipa seiho sinakhaviherya malapelo eeparipari, ni waakhaviheryano yaale ahoolenle ipahu sa maphacuwelo. Nnanweryatho opaka sooveleela ntakhara muloko ahu ni waakhaviherya yaale naasuwenlaahu wi annachuna nikhaviheryo. (Masi. 19:17) Ala makhalelo a waakhaviherya anna a Kristu.

14. Mwawiiwanana ni Éfeso 4:15, 16, tuuvi ori mukhalelo waneexexe wi nikhale asinthamwene a Yesu?

¹⁴ (4) Mukhaviherye soolakelela sa muloko Weekristu. Yesu muru wa muloko, nave owo ohaathanla achu a mavyakelo wi eweryeke onikhapelela. Vaavaa nnawiiwelelaahu ninnalipiha onthamwene ahu ni Yesu. (Mwaalakhanye Éfeso 4:15, 16.) Ntoko yootakiherya, vano ninnasuwela wi Empa ti Empa ya Omwene ennaphariheliwa phaama. Nthowa na yeeyo, waanachuneya opakiwa matorokelo wi miloko mikina ikawanyiwe navetho wi ireheryeryiwe ikulucu. Matorokelo yaala  aheeriha wi ikhapeleliwe phaama sooveleela. Nyenya mu elukuluku emohamoha, aheeriha wi alaleeryi epake matorokelo. Alaleeryi yaala oororomeleya akhweya yaari a muloko mmoha mu elukuluku yincipale nave yaahikhalano anna ni arokora yaawo yaari asinthamwene aya. Nyenya vano awo aahaakhela muloko muvyaani. Yesu ootepa ohakalala owoona arummwa yaala ororomeleya ekhaviheryaka soolakelela sa marehereryo!

15. Ti mwawiihai onthamwene ahu ni Yesu onahaalaya okhala woolipa muhoolo?

¹⁵ Oothanliwa ni munepa waweela akhalano ewehereryo ya okhala vamoha ni Yesu elamulelaka mu omwene wa Muluku okhala wookhala. Chiryene awo anahaala okhala vamoha ni Kristu—ananwerya omoona, oloca ni yoowo ni okhala vamoha. (Yoh. 14:2, 3) Wa ale arino ewehereryo ya okhala veelaponi yavathi anahaala waakhela osivela ni okhapelela wa Yesu. Eparipari wi hanahaala owerya omoona Yesu vakhiviru. Nyenya ipucepuche seiha inahaala okhalano onthamwene woolipa ni Yesu vaavaa inahaalaaya okhala oohakalala mu parataiso yoowo Yehova ni Yesu anahaalaaya omutikitherya veelaponi ya vathi.—Isa. 9:6, 7.

16. Mareeliho taani nnaphuraahu moorweela wa okhala asinthamwene a Yesu?

¹⁶ Yesu onnaniwopa wi nikhale asinthamwene awe. Vaavaa nneemereryaahu nwopelo yoola, ninnaakhela mareeliho mancipale. Ntoko yootakiherya nookhalano osivela nnikhaviheryo nawe hiihaano. Nookhalano ewehereryo ya okhala wookhala. Nave echu yoochuneyaxa, tiyawi onthamwene ahu ni Yesu onahaala oneeriha waakhela yoovaha yasisapo opwaha soothene—onthamwene wa waacameleya ni Tiithi awe, Yehova! Moohikhwa minikwa, ekari etokweene wiichaniwa ntoko asinthamwene a Yesu!