1. Tiheeni oothene ahu nnaphwanelaahu opaka?

APWANNE mwaamusiveliwa opaka mapokha a ochimaka yaawo munoonaanyu okhala oovila, xaxaxa wakhala wi munamwiiceliwa naari moovelavela? Woonaru hooye. Murummwa Paulo olonce wi Akristu oothene eeparipari ari mu ochimaka. (Ahe. 12:1) Nave oothene ahu, amiravo naari awunnuwelavo, arino okumi waphaama naari ooceecheya, nnaphwanela ovilela ophiyerya omakuchuwelo wakhala wi ninnachuna waakhela nchuwelo nenlo Yehova onivanheiye.—Mat. 24:13.

2. Ntoko erempwaaya mu 2 Timóteo 4:7, 8, ntakhara heeni Paulo aareiye ootaphuwa oloca yeela?

² Paulo aari ootaphuwa oloca yeela woona wi aahikhumelela phaama nave ‘aahaakhwaniha ochimaka wawe.’ (Mwaalakhanye 2 Timóteo 4:7, 8.) Ochimaka taani xaxaxa Paulo aaloceiye?

3. Ochimaka taani Paulo aaloceiye?

³ Ilukuluku ikina Paulo aanapharihela ichu seereya mu mapokha a elukuluku yakhalai o Kresiya wi ahusihe echu yoochuneya. (1 Kor. 9:25-27; 2 Tim. 2:5) Ilukuluku ikina, Paulo aanapharihela mapokha oochimaka wi aphwanaphwanihe ni mukhalelo wa okumi Weekristu. (1 Kor. 9:24; Gal. 2:2; Fil. 2:16) Muchu onavolowa mu “ochimaka” yoola elukuluku oniiveleeleiye wa Yehova ni opatisiwa. (1 Ped. 3:21) Owo onaphiya okhomoni vaavaa Yehova onamvaheiye nchuwelo na ekumi yoohimala.—Mat. 25:31-34, 46; 2 Tim. 4:8.

4. Tiheeni nnahaalaahu othokororya mmwaha yoola?

⁴ Olikanela taani orivovo variyari va ochimaka mmukwaha woorekama ni mukhalelo wa okumi Weekristu? Sookhalavo ichu sincipale soolikana. Hankooni nthokororye raru mwa seiho. Yoopacerya, nnaphwanela ochara meerelo oophwanelela; yanaawiili, ntikitheryeye mu ophiya okhomoni, yaneeraru, nnaphwanela ovootha makacamiho yaawo nnakumanaahuno.

5. Mukhalelo taani nnaphwanelaahu ochariha nave ntakhara heeni?

⁵ Mu ochimaka woomwiilini, alipa oochimaka wi ephwanye nchuwelo naya, anaphwanela ochariha marehereryo a yaale anahoolela mapokha. Moolikana, wakhala wi ninnachuna waakhela nchuwelo na ekumi yoohimala, nnaphwanela ochariha mukhalelo wa okumi Weekristu. (Saw. 20:24; 1 Ped. 2:21) Mwawiihiiha, Satana vamoha ni yaale anachariha yootakiherya awe anachuna wi nipake yoolakelela yoohiyana; awo anachuna wi ‘nchimake vamoha ni yaawo.’ (1 Ped. 4:4) Awo annanyemula mukhalelo weekristu yoowo nnacharihaahu nave analoca wi makupa aryaaya toophwanelela, yaawo anahoolela mu otaphuwa. Nyenya ichu analocaaya ti sawootha.—2 Ped. 2:19.

6. Tiheeni munahuseryaanyu orweela wa yootakiherya ya Brian?

⁶ Oothene yaale anachimaka ni yaawo avoloweliwe ni elapo ya Satana, moohilekela anahaala osuwela wi makupa athanlilaaya hanahoolela mu otaphuwa; nyenya mu okapuro. (Aro. 6:16) Muthokororye yootakiherya ya Brian. Asitiithi awe yaahimuceenyerya ochariha mukhalelo wa okumi Weekristu. Nyenya vaava aareiye mmiravo owo aaniikoha waakhanle wi weerano eyo yaahaala omuruuhela ohakalala. Brian aahilakelela okhalaka mwawiiwanana ni yaale anachariha malamulo a Satana. Owo ooloca: “Vakhaani vakhaani kaahisuwela wi mukhalelo wa otaphuwa yoowo kaathanlilaaka waahaala okiceenyerya weeraka ichu soonanara. Moovira wa elukuluku, kaahipacerya olya mirece, owurya soohapaliha ni ocapaheya. Mu iyaakha soocharela, kaanalawiha mirece sawoopiha nave kaari kapuro a seiho. . . . Kaahipacerya otumiha mirece wi kiikhaviheryeke.” Wookuchulani, aahilakelela okhalaka mwawiiwanana ni malamulo a Yehova. Owo aahitoroka mukhalelo awe nave apatisiwa mu 2001. Vano owo ori oohakalala woona wi onachariha mukhalelo wa okumi Weekristu. *

7. Mwawiiwanana ni Mateu 7:13, 14, miphiro taani miili iri ohoolo wahu?

⁷ Ti yoohakalaliha woona wi noothanla ephiro yoophwanelela ochara! Satana onachuna onihiiha ochimaka mphiro wawuuraanyeya yoowo ‘onamukeryiha muchu wookumini’ wi anikerihe mu mphiro mutokweene yoowo achu ancipale mu elapo yeela anacharaaya. Mphiro yoowo wootepa waaceliwa nave ti wookhweya ochariha. Nyenya owo ‘onnaakeriha achu wootoloshiwani.’ (Mwaalakhanye Mateu 7:13, 14.) Wi nititelele weeca mu ephiro yawookololowa ni ohikhala awaakanyeryeya, nnaphwanela omuroromela Yehova ni onwiriyana.

8. Wakhala wi mulipa oochimaka ohuuwa, tiheeni onapakeiye?

⁸ Alipa oochimaka mmukwaha woorekama annatitelela oweha ohoolo mu mphiro yoowo anachimakaaya wi ehikwaculeye. Naamwiihiiha, mulipa oochimaka onanwerya okwaculeya wakhala wi oomukowa nthamwene awe naari oonyikala nlici. Wakhala wi awo ahuuwa, annavinya nave annatitelela ochimaka. Awo hanatikitheryeya mu yeeyo yaakwaculinhe, nyenya anatikitheryeya mu ophiya okhomoni ni waakhela nchuwelo nenlo anaweheryaaya.

9. Wakhala wi nookwaculeya, tiheeni nnaphwanelaahu weera?

⁹ Mu ochimaka wahu, nnanwerya okwaculeya mu ikwaha sincipale, nipakaka soocheka moorweela wa yeeyo nnalocaahu ni nnapakaahu. Naari alipa oochimaka akhwiihu ananwerya opaka soocheka seiho sinahaala onuukhula. Hannaphwanela okhala ootikhiniheya wakhala wi eyo yoheereya. Oothene ahu naachu oohiphaameya, nave nnachimaka mu mphiro mmoha wawuuraanyeya yoowo onakeriha wookumini. Mwawiihiiha ninnawerya okwaculeya wa mukina ni mukhwaawe mu ilukuluku ikina. Paulo aanasuwela wi mu ilukuluku ikina naahaala okhalakano “nthowa” wa mukina ni mukhwaawe. (Kol. 3:13) Nyenya ohiya otikitheryeya mu yeeyo enikwaculinhe, hankooni ntikitheryeye mu nchuwelo nenlo nnahaalaahu waakhela. Wakhala wi nookwaculeya, nnaphwanela othanla ovinya ni otitelela ochimaka. Wakhala wi noosimwa ni okuha mathowa nave nikhooca ovinya, hinni niwerye ophiya okhomoni wi naakhele nchuwelo. Wakhala wi noosimwa ni okuha mathowa nnahaala okhala nikacamiho wa akina yaawo aneererya ochimaka mu mphiro wawuuraanyeya yoowo onakeriha wookumini.

10. Nni nsepe hai ‘waakwaculiha’ akina?

¹⁰ Mukhalelo mukina nnahaalaahu osepa ‘waakwaculiha’ alipa oochimaka akhwiihu, ori moorweela wa oweemererya ochariha moonelo aya vaavaa onakhalaaya wooweryeya ohiya waakhinyererya opaka soochuna sahu. (Aro. 14:13, 19-21; 1 Kor. 8:9, 13) Mmukhalelo yoola woochuneya, hannalikana ni alipa oochimaka oomwiilini. Awo anachuna waapwaha alipa oochimaka akina, nave mmoha ti mmoha a yaawo onatikitheryeya mu ophwanya nchuwelo wa yoowo mukhateiye. Alipa oochimaka awo pahiru anuupuwela vooloca sa yaawo mukhataaya. Mwawiihiiha awo anneererya waakakhela akina okhwipi wi yaavirele. Moohiyana, hiyo hinnachuna ovirelana mukina ni mukhwaawe. (Gal. 5:26; 6:4)  Yoolakelelaahu ori waakhaviherya ancipale ophiyerya nnaweryelaahuvo wi yaphiye okhomoni vamoha ni hiyo wi ephwanye nchuwelo na ekumi yoohimala. Mwawiihiiha ninneererya opharihela ekano yooveereliwa ya Paulo yeeyo eni: “Mmoha ni mmoha ahithokororyeke sawaweru, nto saakhweiye tho.”—Fil. 2:4.

11. Alipa oochimaka anatikitheryeya mu eheeni, nave ntakhara heeni?

¹¹ Mwawaaceererya, alipa oochimaka oomwiilini, tahi wi pahiru anaweha ohoolo mu mphiro yoowo anachimakaaya, nyenya anatikitheryeya mu ophiya okhomoni. Naamwi awo ehiweryaka woona okhomoni ni miitho aya, anniisaanyiherya ephin’ye okhomoni ni yaakhelaka nchuwelo. Awo annaceenyeryeya moorweela wa wuupuwelela nchuwelo.

12. Tiheeni Yehova onivanheiye mooreera murima?

¹² Mu ochimaka yoowo nnapakaahu, mooreera murima Yehova ohaaroromeliha achu nchuwelo na ochimaka waya—ekumi yoohimala moohipwacha waakhanle wirimu naari mu Parataiso veelaponi yavathi. Piipiliya onnaloca mwa mukwasu nchuwelo nenlo, mwawiihiiha nnanwerya waanyiherya mukhalelo ekumi ahu eneeraaya ekhale yoohakalalihaxa. Wakhala wi ewehereryo yeela yootitelela okhala mmuupuwelo ni mmurimani mwahu, hinnahaala weemererya wi echu vyakala enikwacule moomalela.

13. Mphurelo taani nryaahuno waapwaha alipa oochimaka oomwiilini?

¹³ Alipa oochimaka mmapokha o Kresiya yaaphwanela ovootha makacamiho, ntoko okoma ni wiicela. Nyenya awo yaaphwanela ororomela ovyakiha waya ni ikuru saya. Hiyotho nnalikana ni alipa oochimaka yaale woona wi ninnaakhela ovyakiha mmukhalelo nnahaalaahu ochimaka. Nyenya nookhalano mphurelo waapwaha alipa oochimaka oomwiilini. Nnaphwanela omuroromela Yehova yoowo orino owerya woohikota. Wakhala wi noomuroromela Yehova, owo onnaniroromeliha ohiya pahiru onivyakiha nyenya onivaha ikuru!—1 Ped. 5:10.

14. Ti mwawiihai 2 Korinto 12:9, 10 onanikhaviheryeiye ohoolela saweeha?

¹⁴ Paulo aahivilela ni makacamiho mancipale. Opwaha oruwaniwa ni wiikariwa ni akina, mu ilukuluku ikina owo aaphwanela ovilela ni makacamiho yaawo iichaneiye ntoko “miiwa mmwiilini” mwawe. (2 Kor. 12:7) Nyenya ohiya woona makacamiho ale ntoko nthowa na ovelavela, owo oona ntoko ekari ya omuroromela Yehova. (Mwaalakhanye 2 Korinto 12:9, 10.) Woona wi Paulo aahikhalano moonelo yoola, Yehova aahimukhaviherya ovootha makacamiho awe oothene.

15. Wakhala wi noomutakiherya Paulo, tiheeni nnahaalaahu woona?

¹⁵ Hiyaanotho nnanwerya oruwaniwa naari wiikariwa nthowa na nroromelo nahu. Nnamphiyera tho ovilela ni ekumi yookotakota ni wuukhuwa. Nyenya wakhala noomutakiherya Paulo, nikacamiho nri noothene nnanwerya okhala ekari ya woona nikhaviheryo ni osivela wa Yehova.

16. Naamwi mwiiceliwaka tiheeni munaphwanelaanyu opaka?

¹⁶ Apwanne mukonne va ekaama ya areca naari mukiranthe va ekatera ya alipa oorakala? Apwanne muri ni meco sooceecheya naari nikacamiho na woona phaama? Waakhanle wi ti hiiha, apwanne munanwerya ochimaka ni yaale ari amiravo ni arino okumi waphaama? Aai munanwerya! Achu ancipale awunnuwelavo ni awiiceliwa annachimaka mu mphiro wa okumi. Awo heni ewerye opaka muteko yoola ni ikuru saya. Ohiya yeeyo, awo anahooleliwa ni ikuru sa Yehova moorweela wa owiriyana mithukumano Seekristu moohiphwacha waakhanle wi mu telefoni naari mu TV. Nave awo annapaka makupa mmuteko wa waapaka oohuserya moorweela wa waalaleerya matotore, alipa murece, ni amusi.

17. Yehova onoona hai vooloca sa yaale arino ekumi yookotakota?

¹⁷ Muheemererye wi wuukhuwa nthowa na  okumi anyu oweeriheni wuupuwela wi mootepa oceecheya wi muchimake mu ephiro ya wookumini. Yehova onnoosivelaani nthowa na omuroromela wanyu ni ovilela yoowo munooniheryaanyu mu iyaakha sincipale. Nyuwaano munnachuna nikhaviheryo nawe hiihaano opwaha khalai, nave owo harwa oohiyaani. (Sal. 9:10) Ohiya yeeyo, owo onahaala okhala vakhiviru vanyu. Moone yeeyo murokora mmoha yoowo orino makacamiho a okumi olonceiye: “Nthowa na makacamiho aka a ekumi, kinnoona wi ekari ya wuuka eparipari ni akina ennavukuwa. Nyenya kinnasuwela wi wiilipiserya waka wavakhaani onnahakalaliha murima wa Yehova, nave ela ennakeeriha tho okhala oohakalala.” Vaavaa munakhalaanyu awuukhuwa, muupuwele wi hamuri mukhatiinyu. Muupuwele yootakiherya etikitheryiwe ni murummwa Paulo, nave muupuwele masu awe oolipiha: “Kinnahakalala mu oceecheya, . . . vaavaa kinaceecheyaaka kinalipaaka.”—2 Kor. 12:10.

18. Nikacamiho taani noovila ni navameekhaaya nenlo akina anahoolelaaya?

¹⁸ Akina a yaawo anachimaka mu ephiro ya wuukumini annahoolela nikacamiho nikina. Awo annavilela ni mikhalelo sa muchu mukhateiye seiho akina ahinaweryaaya woona naari wiiwexexa. Ntoko yootakiherya, awo annavilela ni ereca ya mmuupuweloni naari moonelo wa wuukhuwa woopwahererya. Ntakhara heeni alapeli yaala oosiveliwa a Yehova annahoolela nikacamiho nooluluwanya? Nthowa nawi muchu orakanle nwono naari yoole oneeca ni ekatera ya alipa oorakala, muchu ti muchu onanwerya woona nikacamiho nawe ni oceenyeryeya omukhaviherya. Nyenya, muchu yoole onahooxeya ni ereca ya mmuupuweloni hanawerya wooniherya eneneeryo ya ohooxeya wawe. Mukhalelo aya ti woovila, nyenya nthowa nawi akina hanawerya woona ohooxeya waya, heni ewerye waavaha osivela ni nikhaviheryo nenlo anachunaaya.

19. Tiheeni nnahuseryaahu orweela wa yootakiherya ya Mefiposeti?

¹⁹ Waakhanle wi mukhalelo anyu ti wookotakota nave akina hanawerya owiiwexexaani, munanwerya olipiheya vancipale ni yootakiherya ya Mefiposeti. (2 Sam. 4:4) Owo aanavilela ni ereca awe, nave aahithorihiwa moonanara ni mwene Tavite. Mefiposeti huupuwenle wi nikacamiho nle naari nthowa nawe. Mwawiihiiha, owo heemerenrye wunnuwiha moonelo wooheseya; owo aanathamalela ichu saphaama seereya mookumini mwawe. Owo aanathamalela oreera murima yoowo Tavite aamoonihenryeiye khalai. (2 Sam. 9:6-10) Mwawiihiiha vaavaa Tavite aamuthorinheiye moonanara, Mefiposeti aaheererya othokororya soothene saavolowela mwaha. Owo heemerenrye wi yoocheka ya Tavite emweerihe okhala awuukhuwa. Nave owo haamunyemunle Yehova nthowa na yeeyo Tavite aapankeiye. Mefiposeti aatikitheryen’ye mwa yeeyo aaphwaneleiye opaka wi amukhaviherye mwene oothanliwa  ni Yehova. (2 Sam. 16:1-4; 19:24-30) Yehova ookhapelela yootakiherya yaphaama ya Mefiposeti Mmasu Awe ntakhara mphurelo ahu.—Aro. 15:4.

20. Wuukhuwa onaavolowela hai akina, nyenya tiheeni awo anaphwanelaaya ororomela?

²⁰ Nthowa na sawuukhula sincipale, anna ni arokora ancipale annakhala oophweeleya vaavaa anakhalaaya vakhiviru wa achu akina. Onnakhala woovila wa yaawo okhala vamoha nnikhuuru naachu ancipale, nave annatitelela ophiya mmithukumano sa muloko, sa ekulucu ni sa muceche. Awo annoona okhala woovila oloca ni achu ahaasuwenlaaya, naamwiihiiha, annaloca ni achu mmuteko woolaleerya. Waakhanle wi ela enneereya ni nyuwaano, muroromele wi hamuri mukhatiinyu. Achu ancipale annawaniha nnikacamiho noolikana. Muupuwele wi Yehova onnahakalala ni wiilipiserya wanyu. Woona wi himukookenle muculi eyo enooniherya wi Yehova onnooreelihaani nave onnoovahaani ikuru seiho munachunaanyu. * (Fil. 4:6, 7; 1 Ped. 5:7) Waakhanle wi munnamurumeela Yehova moohiphwacha nikacamiho munahoolelaanyu, munaphwanela ororomela wi munnamuhakalaliha Yehova.

21. Nnikhaviheryo na Yehova, tiheeni oothene ahu nnahaalaahu owerya opaka?

²¹ Ti yoohakalaliha woona wi wookhalavo ohiyana variyari va ochimaka woomwiilini ni woomunepani yoowo Paulo aaheiye. Ochimaka woomwiilini mu elukuluku yakhalai, pahiru muchu mmoha taakhela nchuwelo. Moohiyana, muchu ti muchu yoole onavilela moororomeleya mmukhalelo wa okumi Weekristu, onnaakhela nchuwelo na ekumi yoohimala. (Yoh. 3:16) Nave mu ochimaka woomwiilini, alipa oochimaka oothene anaphwanela okhalano okumi waphaama, yaahikhalano heni ewerye ophwanya nchuwelo. Mmakupa makina, ancipale a hiyo naachu ookotakota omwiilini, naamwiihiiha ninnavilela. (2 Kor. 4:16) Nnikhaviheryo na Yehova, oothene ahu nnanwerya ochimaka ophiyerya okuchula!