Khalai nuupuwela hiiha nthowa na yeeyo enaphwanyeya mu Ahebri 12:16. Eciciri ela enaloca wi Esawu ‘hatxitximinhe itxhu sa Muluku’ nave aahimvaha Yakopo “otokwene awe wopatxerya oyariwa, ni yolya.” Mwawiihiiha nuupuwela wi vaavaa Yakopo aakhenleiye ‘otokwene ntoko opatxerya oyariwa,’ yaaphitaanyerya ekari ya okhala muyareriwo wa Mesiya.​—Mateu 1:2, 16; Luka 3:23, 34.

Mwawiihiiha, ohuserya mwawiiseela saweereya ikina sa Piipiliya sohooniherya wi mulopwana haaphwanela okhala mwaana opacerya oyariwa wi akhale muyareriwo wa Mesiya. Hankooni nthokororye saweereya ikina sa seiya:

Mwaana oopacerya Yakopo aamuyanreiye ni Liya aari Rupeni. Mwaana oopacerya aamuyanreiye ni Rakele aari Yosefe. Vaavaa Rupeni aapankeiye ocapaheya, owo aahiyeleela ophwanelela wawe ntoko mwaana opacerya oyariwa, nave ophwanelela iwo aavahiwa Yosefe. (Maphatxuwelo 29:31-35; 30:22-25; 35:22-26; 49:22-26; 1 Matharihelo 5:1, 2) Naamwi hiiha, Mesiya haarwenle wa Rupeni naari wa Yosefe. Owo orwenle wa Yuta, mwaana aneesese Yakopo aamuyanreiye ni Liya.​—Maphatxuwelo 49:10.

Luka 3:32 onnaaloca achu akina athanu a muyareriwo wa Mesiya, nave muchu ti muchu a yaawo onooneya ntoko wi mwaana oopacerya oyariwa. Ntoko yootakiherya, Powasi aari tiithi a Opeti, nave Opeti aari tiithi a Yese.​—Ruthi 4:17, 20-22; 1 Matharihelo 2:10-12.

Mwaana a Yese Tavite haari oopacerya oyariwa. Owo aari mwaana a neethanu nararu. Nyenya, Mesiya orwenle wa Tavite. (1  Samuwele 16:10, 11;  17:12; Mateu 1:5, 6) Moolikana, muyareriwo woocharela wa Mesiya aari Solomoni, naamwi ahaari mwaana oopacerya a Tavite.​—2 Samuwele 3:2-5.

Eyo henataphulela wi okhala mwaana oopacerya oyariwa hiwaari wookhweleya. Mwaana oopacerya oyariwa aanakhalano ekari yeeyo anamwane akina yahaakhalaayano. Wiiliwiili, owo aakhala muhooleli oocharela a emusi, nave aanaakhela mukelampa wawaaca.​—Maphatxuwelo 43:33; Malamulo 21:17; Yosuwa 17:1.

Nyenya ophwanelela wa opacerya oyariwa waanathaamiheriwa wa mwaana mukina. Vaavaa Aparahamu aamurumihenleiye ocai Isimayeli, ophwanelela wawe opacerya oyariwa waathaamiheryiwa wa Isaki. (Maphatxuwelo 21:14-21; 22:2) Navetho ntoko nimanlaahu othokororya, ophwanelela wa Rupeni ntoko oopacerya oyariwa waahithaamiheryiwa wa Yosefe.

Vanonto, mwaha taani murummwa Paulo aalonceiye mu Ahebri 12:16? Va ninnaalakhanya: “Mwa nyuwano ahikhalemo mutxhu ònanara murima nari ohitxitximiha itxhu sa Muluku. Muhere ntoko Esawú akulin’he otokwene awe wopatxerya oyariwa, ni yolya.”

Vala, Paulo haathokororya sa muyareriwo wa Mesiya. Opwaha yeeyo, owo aalopola Akristu. Aahiloca wa yaawo: “Okololani iphiro wa inani sanyu” wi “ahikhalevo oni amwalane ni mahala a Muluku.” Moothananiha eyo yaahaala weereya waakhanle wi aacapaheya. (Ahebri 12:12-16) Nave mmukhalelo yoowo, awo yaahaala okhala ntoko Esawu yoowo, ‘ohitxitximinhe itxhu sa Muluku’ nyenya aachunne ohakalaliha minkhela sawe.

Mwawiiwanana ni sookhovelela sa ilukuluku seiye, Esawu akhweya aahaala okhalano ekari ya omvahaka mikucho Yehova. (Maphatxuwelo 8:20, 21; 12:7, 8; Yobi 1:4, 5) Nyenya Esawu aateteiwe pahiru ni minkhela sawe ophiyerya ovaha ekari awe ntoko mwaana oopacerya oyariwa ni yoolya. Esawu akhweya aanachuna osepa ekoi yeeyo Yehova aalohenryeiye muyareriwo wa Aparahamu waahaalaaya okumanano. (Maphatxuwelo 15:13) Aahooniheryatho wi haavaha esisapo ichu saweela vaavaa aathenleiye athiyana eeli yahaamulapela Yehova, yeeyo yaathananinhe vancipale asitiithi awe. (Maphatxuwelo 26:34, 35) Mweeparipari owo aari ohiyana ni Yakopo, yoowo aamuthenle muthiyana aamulapela Muluku eeparipari!​—Maphatxuwelo 28:6, 7; 29:10-12, 18.

Saweereya seiya sa Piipiliya inanihusiha eheeni vooloca sa muyareriwo wa Mesiya? Akina a yaawo yaari anamwane oopacerya oyariwa, nave akina hooye. Ela yaari echu yeeyo Ayuta yiiwexenxaaya nave yeemererya. Nnasuwela hai yeela? Nthowa nawi awo yaaheemererya wi Kristu aaphwanela okhala muyareriwo wa Tavite, mwaana ookuchula a Yese.​—Mateu 22:42.