1, 2. Tiheeni munna mmoha aasuwenleiye sa yoowo mukhateiye, nave tiheeni owo enreiye?

ROPERTU opatisiwe ari mmiravo, nyenya eparipari hiyaari echu yookhweleya muukumini mwawe. Owo onnaloca: “Nkintonko opaka echu yoonanara, nyenya nkaatikitheryen’ye. Kaaneererya okhala olipa omunepani, ophiya mmithukumano soothene ni orumeela ntoko piyoneero ookhaviherya mu elukuluku vakhaani mu eyaakha. Nyenya yaanahala echu emoha.”

² Ropertu hiiwexexa echu taani yaamuhalela ophiyerya vaava owo amanle othela. Owo ni mwaariye yaanakohana mukina ni mukhwaawe makoho a Mpiipiliyani. Mwaariye aanamusuwela phaama Piipiliya nave aanaakhula makoho mookhweya. Nyenya Ropertu haasuwela maakhulo nave aanuuliheya muru. Owo onnaloca: “Yaakhala ntoko wi hiyaavoru kaasuwelaaka. Kaahuupuwela mmurimani mwaka, ‘Wakhala wi miyaano ka muhooleli oomunepani a mwaaraka, kinaphwanela weeravo echu.’” Mwawiihiiha owo aaheeravo echu. Owo onnaloca: “Kaanamuhuserya Piipiliya ikwaha sincipale, moohihiyererya, nave vakhaani vakhaani kaahipacerya omwiiwexexa. Nave echu yoochuneyaxa, kaahunnuwiha onthamwene aka ni Yehova.”

3. (1) Tiheeni nnahuseryaahu orweela wa yaweereya ya Ropertu? (2) Miyaha taani soochuneya nnahaalaahu othokororya hiihaano?

 ³ Nnanwerya ohuseryavo echu orweela wa yaweereya ya Ropertu. Akhweya nnanwerya okhalano masuwelelo a Piipiliya, ophiya mmithukumanoni wiiliwiili ni oya mmuteko woolaleerya, nave ela henaneeriha okhalano muupuwelo woomunepani. Akhweya nohiilipixerya wi nikhaleno muupuwelo woomunepani, nyenya vaavaa nnivareryaahu, ninnoona mikhalelo nnaphwanelaahu orehererya. (Filipi 3:16) Mmwaha yoola, nnahaala waakhula makoho mararu ala oochuneya: (1) Tiheeni eni enikhaviherye osuwela waakhanle wi nookhalano muupuwelo woomunepani? (2) Nni niwerye hai okhala oolipa omunepani? (3) Okhala oolipa omunepani oni onikhaviherye hai mu okumi ahu wa nihiku ti nihiku?

4. Ekano enaphwanyeya mu Éfeso 4:23, 24 anaphariheleya wa aani?

⁴ Vaavaa naapacenryaahu omulapela Muluku, naahipaka matorokelo anavolowela makupa oothene a okumi ahu. Mukhalelo owo homanle vaava naapatisiwaahu. Piipiliya onnanleela: “Mwireherye wiliwili mmunepani wa miruku sanyu.” (Éfeso 4:23, 24) Woona wi naachu ohiphaameya, nnachuna otitelela opaka matorokelo. Naamwi nimulapelaka Yehova mu iyaakha sincipale, nnachuna otitelela olipiha onthamwene ahu ni yoowo.—Filipi 3:12, 13.

5. Makoho taani eni enikhaviherye osuwela waakhanle wi nookhalano muupuwelo woomunepani?

⁵ Moohipwacha waakhanle wi na amiravo naari awunnuwelavo, nnachuna wiivareryela mukhatiihu munroromeloni. Nnaphwanela wiikoha: ‘Apwanne kinnoona wi kookhalano muupuwelo woomunepani? Mano kiri ntoko Kristu? Muupuwelo ni mukhalelo aka mmithukumano onooniherya eheeni? Ovaanela waka onooniherya eheeni vooloca sa yeeyo chiryene kinachunaaka muukumini? Sookhovelela sa ohuserya waka, mawarelo ni wiireeriha, navetho mukhalelo kinaakhulelaaka ekano enooniherya eheeni vooloca sa miyaano? Kinaakhulela hai vaavaa kineereryiwaka wi kipake echu yoonanara? Apwanne ka Mukristu awiichwelavo?’ (Éfeso 4:13) Makoho yaala anamunikhaviherya osuwela ophiyerya mweeryo taani nryaahu awunnuwa omunepani.

6. Echu taani ekina eni enikhaviherye osuwela waakhanle wi nookhalano muupuwelo woomunepani?

⁶ Ilukuluku ikina ninnachuna wi akina enikhaviherye osuwela waakhanle wi nookhalano muupuwelo woomunepani. Murummwa Paulo aahithariha wi muchu oneecela miruku sa vathiru naari muchu oomwiilini, hanasuwela wi mukhalelo wa okumi awe honamuhakalaliha Muluku. Nyenya muchu oomunepani onniiwexexa mukhalelo Muluku onooneiye miyaha. Owo onnasuwela wi Muluku haneemererya mukhalelo wa okumi woomwiilini. (1 Korinto 2:14-16; 3:1-3) Atokweene yaawo arino muupuwelo wa Kristu mwawaakuveya annoona vaava  munna onapaceryeiye okhalano muupuwelo woomwiilini, nave anneererya omukhaviherya. Vaavaa atokweene aneereryaaya onikhaviherya, apwanne nnahaala waakhela nikhaviheryo naya ni opaka matorokelo anachuneya? Wakhala wi noheerano, nnahaala wooniherya wi ninnachuna okhala oolipa omunepani chiryene.—Eklesiyaste 7:5, 9.

7. Nnasuwela hai wi muchu a muupuwelo woomunepani tahi muchu pahiru orino masuwelelo a Piipiliya?

⁷ Okhalano masuwelelo a Piipiliya pahiru henaneeriha okhala oomunepani. Mwene Solomoni aahitepa osuwela sincipale vooloca sa Yehova, ophiyerya wi masu a miruku sa Solomoni yaahikhala makupa a Piipiliya. Nyenya ohoolo waya, onthamwene awe ni Yehova waahiceecheya, nave owo haatitelenle okhala oororomeleya. (1 Mamwene 4:29, 30; 11:4-6) Vano, tiheeni nnachunaahu mu waaceererya masuwelelo a Piipiliya? Nnaphwanela otitelela olipiha nroromelo nahu. (Kolosi 2:6, 7) Nni niwerye hai weerano yeela?

8, 9. (1) Tiheeni eni enikhaviherye olipiha nroromelo nahu? (2) Teevi eri yoolakelelaahu vaavaa nnahuseryaahu nave nnuupuwelelaahu? (Moone eruku yoopacerya.)

⁸ Mu nsana noopacerya, Paulo aahaaceenyerya Akristu ‘ochara otokwene.’ (Ahebri 6:1, Nlakano Nahihano) Nni nipharihele hai ekano yeela olelo? Mukhalelo mmoha wookhweleya ori omuhuserya liivuru Mwikhapelele mu Osivela wa Muluku. Owo onahaala wookhaviheryaani wiiwexexa mukhalelo wa opharihela malakiheryo a Piipiliya mookumini mwanyu. Wakhala wi moomuhuserya liivuru ola, sookhalavo soolaleeryiwa ikina munaphwanelaanyu ohuserya wi sookhaviheryeeni olipiha nroromelo nanyu. (Kolosi 1:23) Nnaphwanelatho wuupuwelela yeeyo nnahuseryaahu ni omveka Yehova wi anikhaviherye woona mukhalelo wa opharihela muteko.

⁹ Vaavaa nnahuseryaahu nave nnuupuwelelaahu, yoolakelelaahu enaphwanela okhala wunnuwiha nchuno na omuhakalaliha ni omwiiwelela Yehova. (Salumu 40:8; 119:97) Nnaphwanelatho okhooca echu vyakala yeeyo enahaala onimaaliha oya vahoolo omunepani.—Tito 2:11, 12.

10. Tiheeni amiravo anaphwanelaaya opaka wi ekhale oolipa omunepani?

¹⁰ Waakhanle wi mwa mmiravo, apwanne mookhalano soolakelela soomunepani? Munna mmoha yoowo onarumeela o Peteli wiiliwiili onnaloca ni amiravo yaawo anaya opatisiwa  va muthukumano wa ekulucu nave onnaakoha vooloca sa soolakelela saya soomunepani. Owo onnoona wi ancipale annuupuwelela phaama vooloca sa mukhalelo anachunaaya omurumeela Yehova omwaahiyu. Akina anuupuwela omurumeela Yehova mmuteko wa elukuluku yoothene naari othaamela weiwo oriwo othowa otokweene wa alaleeryi. Nyenya amiravo akina hanawerya waakhula nikoho nawe. Apwanne eyo enataphulela wi awo hanoona okhweleya waya okhalano soolakelela soomunepani? Waakhanle wi mwa mmiravo, mwiikohe: ‘Apwanne kinaya mmithukumanoni ni mmuteko woolaleerya pahiru nthowa nawi asitiithi aka tanachuna wi keereno? Naari wi kookhalano onthamwene ni Muluku?’ Mweeparipari, oothene ahu nnaphwanela okhalano soolakelela soomunepani, moohipwacha naari amiravo naari atokweene. Soolakelela seiyo sinahaala onikhaviherya okhala oolipa omunepani.—Eklesiyaste 12:1, 13.

11. (1) Tiheeni nnaphwanelaahu opaka wi nikhaleno muupuwelo woomunepani? (2) Yootakiherya taani ya Mpiipiliyani nnaphwanelaahu ochariha?

¹¹ Nimanle woona makupa onachuneyavo orehererya, nnaphwanela opacerya opaka matorokelo. Eyo ti yookhweleyaxa woona wi enahaala wooniherya waakhanle wi nnahaala okhalano ekumi naari okhwa. (Aroma 8:6-8) Yehova hanaweherya wi nikhale oophaameya, nave onnanivaha munepa awe waweela wi onikhaviherye. Nyenya nlelo nnaphwanela wiilipiserya. Munna John Barr, yoowo aarumeenle mu Nikhuuru Noolamulela, aahiloca sa yoorepa ya Luka 13:24 ariki: “Ancipale annahesa woona wi haniilipixerya wunnuwa ophiyerya anaweryelaayavo.” Nnaphwanela okhala ntoko Yakopo, yoowo aawanne ni munkeelo  nave ahivelavenle ophiyerya waakhela mareeliho. (Maphatxuwelo 32:26-28) Naamwi omuhuserya Piipiliya okhalaka woohakalaliha, hannaphwanela oweherya wi Piipiliya onahaala okhala oochekuliha ntoko omoona novela. Nnaphwanela wiilipiserya ophwanya iparipari sasisapo seiyo inahaala onikhaviherya.

12, 13. (1) Tiheeni eni enikhaviherye ompharihela Aroma 15:5? (2) Yootakiherya ni ekano ya Petro eni enikhaviherye hai? (3) Tiheeni munaphwanelaanyu opaka wi mukhale oolipa omunepani? (Moone ekaaxa “ Tiheeni Munaphwanelaanyu Opaka wi Munnuwe Omunepani?”)

¹² Vaavaa nniilipixeryaahu wunnuwa omunepani, munepa waweela onahaala onikhaviherya otoroka muupuwelo ahu. Vakhaani vakhaani, nnanwerya wuupuwela ntoko Kristu enreiye. (Aroma 15:5) Munepa waweela onamunikhaviherya okhooca minkhela soonanara ni wunnuwiha mikhalelo seiyo sinamuhakalaliha Muluku. (Galasya 5:16, 22, 23) Wakhala wi nohoona wi nnateteiwa ni ichu soomwiilini naari soopuha, hannaphwanela ovelavela. Nnaphwanela otitelela omveka Yehova munepa waweela wi onikhaviherye othokororya ichu soophwanelela. (Luka 11:13) Mmuupuwele murummwa Petro. Wiiliwiili owo huupuwela ntoko Kristu. (Mateu 16:22, 23; Luka 22:34, 54-62; Galasya 2:11-14) Nyenya owo haavelavenle nave Yehova aahimukhaviherya. Vakhaani vakhaani, Petro aahihuserya wuupuwela ntoko Kristu. Hiyaanotho nnanwerya.

¹³ Ohoolo waya Petro aahiloca mikhalelo sooluluwanya seiyo inahaala onikhaviherya. (Mwaalakhanye 2 Pedro 1:5-8.) Nnaphwanela olapa mwakuru wi ninnuwihe wiiphima naari wiihiiha, nthìti, omulapa Muluku, okhwela wonna, ni mikhalelo mikina saphaama. Nihiku ti nihiku nnaphwanela wiikoha, ‘Mukhalelo taani kinaphwanelaaka wunnuwiha olelo yoowo oni okikhaviherye okhala oolipa omunepani?’

14. Muupuwelo woomunepani oni ovolowela hai okumi ahu?

¹⁴ Wakhala wi ninnuupuwela ntoko Kristu, eyo enahaala ovolowela mukhalelo ahu omutekoni naari oxikola, mmalocelo ahu, ni nnapakaahu soolakelela sahu nihiku ti nihiku. Soolakelela sahu inahaala wooniherya wi ninneererya omutakiherya Kristu. Woona wi nookhalano muupuwelo woomunepani, hinnachuna wi echu vyakala enanarihe onthamwene ahu ni Yehova. Vaavaa nneehiwaahu wi nipake echu yoonanara, wunnuwa wahu oomunepani onahaala onikhaviherya osepa yaweeha. Nihaakumve opaka yoolakelela, nnahaala omaala nave niikohe: ‘Nlakiheryo taani na Piipiliya nni nikikhaviherye? Tiheeni Kristu aahaaleiye opaka mmukhalelo yoola? Tiheeni eni emuhakalalihe Yehova?’ Nnaphwanela wiikhoveleliha wuupuwela mmukhalelo yoola. Hankooni vano nthokororye mikhalelo mikina. Mukhalelo ti mukhalelo, nnahaala woona nlakiheryo na Piipiliya nnahaala onikhaviherya opaka yoolakelela yamiruku.

15, 16. Wuupuwela ntoko Kristu eni enikhaviherye hai opaka yoolakelela yamiruku vooloca sa (1) omuthanla oothelanano? (2) waathanla asinthamwene ahu?

¹⁵ Omuthanla oothelanano. Nlakiheryo na Piipiliya nnaphwanyeya mu 2 Korinto 6:14, 15. (Mwaalakhanye.) Paulo oohiya vanlakani wi achu a muupuwelo woomunepani hanoona ichu mmukhalelo woolikana ni achu oomwiilini, naari a muupuwelo woomwiilini. Nlakiheryo nla nni nookhaviheryeni hai omuthanla oothelanano?

¹⁶ Waathanla asinthamwene ahu. Nlakiheryo na Piipiliya nnaphwanyeya mu 1 Korinto 15:33. (Mwaalakhanye.) Muchu orino muupuwelo woomunepani hani apake onthamwene ni achu yaawo eni eceecheihe nroromelo nawe. Muupuwele mukhalelo muneeraanyu mpharihele  nlakiheryo nna mmikhalelo soohiyanahiyana. Ntoko yootakiherya, nni nookhaviheryeni hai opaka soolakelela vooloca sa waapaka asinthamwene mu interneti? Nni nookhaviheryeni hai olakelela waakhanle wi munahaala opaka mapokha mu interneti ni achu muhaasuwenlaanyu?

17-19. Okhalano muupuwelo woomunepani oni wookhaviheryeeni hai (1) osepa miteko soohiphwanelela? (2) okhalano soolakelela saphaama? (3) wakhalavo ohiiwanana?

¹⁷ Miteko seiyo sinapahula mukhalelo ahu woomunepani. Ninnaphwanya olopola wookhweleya mu Ahebri 6:1. (Mwaalakhanye.) Tisivi siri “miteko sokhwa” seiyo nnaphwanelaahu osepa? Iho iri miteko soohiphwanelela seiyo sihinahaala onikhaviherya okhala oolipa omunepani. Olopola ola vooloca sa miteko sookhwa sinamunikhaviherya waakhula makoho ntoko: ‘Apwanne muteko ola ti wamphurelo naari ti woohiphwanelela? Apwanne kinnaphwanela otitelela mu nakoso yoola? Ntakhara heeni nkinaphwanela ovolowa mu nikhuuru naachu nenlo nneererya otoroka mukhalelo wa elapo?’

¹⁸ Soolakelela soomunepani. Mmwaha wa vamwaakoni, Yesu oonivaha miruku saphaama vooloca sa soolakelela. (Mateu 6:33) Muchu orino muupuwelo woomunepani onnakuha Omwene va nipuro noopacerya mu okumi awe. Nlakiheryo nenla nnamunikhaviherya waakhula makoho ntoko: ‘Apwanne kinnaphwanela oya o exikola yavasulu kamaliha mahusiheryo aveeriveeri? Apwanne kinnaphwanela weemererya muteko vyakala?’

¹⁹ Ohiiwanana. Ekano ya Paulo aavanheiye Akristu o Roma enanwerya onikhaviherya vaavaa onakhalaayavo ohiiwanana ni annihu. (Aroma 12:18) Ninnamutakiherya Kristu, mwawiihiiha ninneererya okhala “ni muretxele n’atxhu othene.” Nnaakhulela hai vaavaa nnakhalaahu oohiiwanana ni akina? Apwanne enakhala yoovila wa nyuwaano weemererya muupuwelo wa muchu mukina? Naari apwanne nsuweliwe ntoko muchu oneererya opaka murecele?

20. Ntakhara heeni munnachuna oya vahoolo omunepani?

²⁰ Sootakiherya seiha sinnooniherya mukhalelo malakiheryo a Piipiliya eneeraaya enikhaviherye opaka soolakelela seiho sinooniherya wi nnahooleliwa ni munepa wa Muuku. Wakhala wi nookhalano muupuwelo woomunepani, okumi ahu onahaala okhala woohakalala nave woopuheya. Ropertu oromoliwe woopaceryani onnaloca: “Kimanle wunnuwiha onthamwene aka ni Yehova chiryene, kaari mutheli ni tiithi oophwanelela. Kaari oohakalala.” Wakhala wi noopaka soothene ntoko nnaweryelaahuvo wi nunnuwe omunepani, nnahaalatho opuha mareeliho awaaca. Nnanwerya okhalano okumi woohakalaliha hiihaano, nave omwaahiyu nnamukhalano “ekumi yeparipari.”—1 Timóteo 6:19.