1. Tiheeni olipa ooyara Eekristu anachunaaya osuwela wa anaya ehaakumve opatisiwa?

“MOOVIRA wa miyeeri kaanaaleela Apapa ni Amama wi kaanachuna opatisiwa nave awo ikwaha ikina yaanakileela vooloca sa yeeyo. Awo yaachuna wi kisuwele wi yoolakelela aka waari mwaha mutokweene. Mu 31 a Tesempuru a1934, naahiphiya nihiku mu yaweereya ya okumi aka.” Ti hiiha Plosom Prant aatharinheiye yeeyo yeeren’ye vaavaa aalakelenleiye opatisiwa. Olelotho, alipa ooyara annachuna waakhaviherya anaaya opaka soolakelela samiruku. Waakhala wi mwaana onnalekela opatisiwa nihirivo nthowa naphaama nnamweeriha weerano yeeyo, enanwerya onanariha onthamwene wa mwaana ni Yehova. (Tiyako 4:17) Ahaakumve mwanaya opatisiwa, alipa ooyara amiruku annachuna osuwela waakhanle wi mwanaya ookhwaanela wi akhale muhuserya a Kristu.

2. (1) Makacamiho taani ooweherya a ikulucu onnaaya? (2) Tiheeni nnahaalaahu othokororya mmwaha yoola?

 ² Ooweherya ekulucu akina ahoona wi amiravo ancipale a iyaakha saya soopwaha khumi naari makhumi meeli hapatisiwe, naamwi awo yunnunwe mu eparipari. Mu elukuluku yincipale, amiravo yaala annaya mmithukumano, mmuteko woolaleerya, nave aniisona okhala anamoona a Yehova. Nlelo, ni mathowa makina awo hiyiivelenle wa Yehova nave hepatisiwe. Mathowa makina, nthowa nawi alipa ooyara anuupuwela wi anaaya haakhwanenle wi epatisiwe. Mmwaha yoola nnahaala othokororya makacamiho mararu anaahiiha alipa ooyara akina waaceenyerya anaya wi epatisiwe.

3. Tiheeni yaaweeriha asitiithi a Plosom okhala awuukhuwa?

³ Asitiithi a Plosom, aromoliwe mu eparakrafo yoopacerya, yaari awuukhuwa waakhanle wi owo aahunnuwa mwawaakhwanela wi iiwexexe yootaphulela ya opatiso nave ophiyerya mweeryo taani oryaaya mwaha mutokweene. Alipa ooyara eni esuwele hai waakhanle wi mwanaya oohaakhwanela wi iveleele wa Yehova?

4. Nlamulo na Yesu nnaphwanyeya mu Mateu 28:19, 20 nnaakhaviherya hai alipa ooyara olelo?

⁴ Mwaalakhanye Mateu 28:19, 20. Piipiliya hanaloca wi muchu onaphwanela opatisiwa arino iyaakha sammoori. Nyenya ti yaphaama alipa ooyara wuupuwelela mwawiiseela vooloca sa yootaphulela ya waahusiha achu. Mu elocelo ya Ekriki, masu awi “mwahusihe atxhu othene” aphariheliwe mu Mateu 28:19 anataphulela omuhusiha muchu ni yoolakelela ya omukhaviherya okhala oohuserya. Muhuserya, ti muchu yoowo onahuserya ni wiiwexexa yeeyo Yesu aahusinheiye nave onachuna omwiiwelela. Mwawiihiiha ovinyerya vaavaa anamwane anayariwaaya, alipa ooyara anaphwanela waahusiha ni yoolakelela ya waakhaviherya wiiveleela wa Yehova ni okhala oohuserya a Kristu. Eparipari wi makwiya hanaphwanelela opatiso. Naamwi hiiha, Piipiliya onnooniherya wi amiravo ananwerya wiiwexexa ni osivela eparipari ya Piipiliya.

5, 6. (1) Mukhalelo Piipiliya onamuloceiye Timoteo enanikeriha makuchuwelo taani vooloca sa opatiso? (2) Tuuvi ori mukhalelo waphaama wa alipa ooyara amiruku waakhaviherye anaaya?

⁵ Timoteo aari oohuserya yoowo alakelenle omurumeela Yehova ovinyerya ari mmiravo. Murummwa Paulo aahiloca wi Timoteo aapacenrye ohuserya eparipari ya Masu a Muluku ‘ovinyerya ayenve.’ Atiithi a Timoteo hiyaamurumeela Yehova, nyenya amama awe ni amunnawe yaahimukhaviherya Timoteo osivela Masu a Muluku. Ntoko yookhumelela, owo aahikhalano nroromelo noolipa. (2 Timóteo 1:5; 3:14, 15) Akhweya aarino iyaakha makhumi meeli naari omapacereryo wa iyaakha seiha, vaavaa owo aaphwanelenleiye waakhela mirici savameekhaaya mmulokoni.—Saweriwa T’arummwa 16:1-3.

⁶ Anamwane oothene toohiyana. Tahi wi oothene anakhala awiichwelavo ni iyaakha imohamoha. Anamwane akina anniiwexexa eparipari, annapaka soolakelela sa miruku, nave annachuna opatisiwa vaavaa aryaaya amiravo. Akina akhweya hanaakhwanela opatisiwa ophiyerya awo yunnunwe vakhaani. Alipa ooyara amiruku hanaakhinyeererya anaaya wi epatisiwe. Moohiyana, awo annamukhaviherya mwaana ti mwaana wi eye vahoolo. Alipa ooyara annahakalala vaava anaaya anapharihelaaya yoorepa ya Masiposipo  27:11. (Mwaalakhanye.) Nyenya awo anaphwanela wuupuwelela wi yoolakelela aya ori waakhaviherya anaaya okhala oohuserya. Ni yeeyo mmuupuweloni, awo anaphwanela wiikoha, ‘Apwanne mwanaka oosuwela mwawaakhwanela wi iveleele wa Muluku ni opatisiwa?’

7. Apwanne muchu onaphwanela osuwela ichu soothene inahusihiwa Mpiipiliyani ahaakumve opatisiwa? Mutharihe.

⁷ Vaavaa alipa ooyara anaahusihaaya anaaya, awo anaakhaviherya osuwela phaama eparipari. Masuwelelo yaawo anahaala waaceenyerya anamwane wiiveleela mukhataaya wa Muluku. Nyenya eyo henataphulela wi mwaana onaphwanela osuwela soothene Piipiliya onahusiheiye ahaakumve opaka yoolakelela ya wiiveleela ni opatisiwa. Muhuserya ti muhuserya a Kristu onaphwanela otitelela ohuserya naamwi amanle opatisiwa. (Mwaalakhanye Kolosi 1:9, 10.) Vanonto ichu kavi muchu onaphwaneleiye osuwela ahaakumve opatisiwa?

8, 9. Tiheeni yeeren’ye ni mulipeleli o Filipi, nave tiheeni nnahuseryaahu orweela wa yaweereya awe?

⁸ Yaweereya ya emusi emoha yakhalai enanwerya waakhaviherya alipa ooyara olelo. (Saweriwa T’arummwa 16:25-33) Mu eyaakha ya makhumi mathanu, Paulo aahiya o epooma yo Filipi mmukwaha wanaawiili woomisiyonaario. Elukuluku aareiye weiwo, owo ni Sila yaahootheryiwa, epuruleliwa okhwipi, nave evonyeriwa mukalaposo. Variyari va ohiyu, aheereya mwaacikinye yoowo aahunle mikhora soothene sa mukalaposo. Mulipeleli uupuwela wi alipa oowaleliwa oothene aachawa, nave aanachuna wiisiipha. Nto Paulo aahimmaaliha. Voocharela Paulo ni Sila yaahimuhusiha mulipeleli ni emusi awe eparipari vooloca sa Yesu. Awo yaaheemererya ichu yaahusenryaaya vooloca sa Yesu nave yaahisuwela okhweleya waya omwiiwelela yoowo. Mwawiihiiha awo yaahipatisiwa ehilekenle. Tiheeni nnahuseryaahu orweela wa yootakiherya aya?

⁹ Mulipeleli owo akhweya aari nakhoco akhalai o Roma. Owo haasuwenle Masu a Muluku. Mwawiihiiha wi akhale Mukristu, owo aaphwanela okhalano masuwelelo a iparipari orweela Mpiipiliyani, wiiwexexa yeeyo Yehova onavekeiye wa akapuro awe ni ochuna wiiwelela mahusiheryo a Yesu. Yeeyo aahusenryeiye mu elukuluku yavakhaani yaahimukhaviherya ochuna opatisiwa. Mweeparipari, owo aahaala otitelela ohuserya amanle opatisiwa. Vanonto, vaavaa mwaninyu onooleeleiyeni wi onachuna opatisiwa nthowa na omusivela Yehova ni ochuna omwiiwelela, tiheeni munaphwanelaanyu opaka? Akhweya mmuhiye aloce ni atokweene wi awo elakelele waakhanle wi onnaphwanelela opatisiwa. * (Moone masu avathi.) Moolikana ni Akristu oothene apatisiwe, owo onahaala otitelela  ohuserya sincipale vooloca sa Yehova mu ekumi awe yoothene.—Aroma 11:33, 34.

10, 11. (1) Alipa ooyara akina anuupuwela eheeni? (2) Tiheeni chiryene enamukhapelela mwaana?

¹⁰ Alipa ooyara akina anuupuwela wi enahaala okhala yaphaama wa mwanaya opatisiwa pahiru amanle okhalano mahusiheryo a vasulu naari arino muteko. Alipa ooyara ala akhweya aakhalano mathowa aphaama, nyenya anaphwanela wiikoha: ‘Apwanne eyo enahaala omukhaviherya mwanaka okhumelela phaama? Apwanne ela enniiwanana ni yeeyo nihusenryaahu Mpiipiliyani? Yehova onachuna wi nipharihele okumi ahu mwawiihai?’—Mwaalakhanye Eklesiyaste 12:1.

¹¹ Ti wookhweleya wuupuwelela wi elapo ela ni ichu siri muumu ti soovuhana ni yeeyo Yehova onachuneiye ni onuupuweleiye. (Tiyako 4:7, 8; 1 Yohani 2:15-17; 5:19) Onthamwene ni Yehova echu yaphaama eni emukhapelele mwaana ohivoloweliwa ni Satana, elapo yeela, ni muupuwelo aya woonanara. Wakhala wi alipa ooyara anahela mahusiheryo avasulu ni muteko mu nipuro noopacerya muukumini, akhweya mwanaya onahaala weemererya wi ichu sa elapo yeela ti sookhweleyaxa opwaha onthamwene wawaacameleya ni Yehova. Eyo echu yawoopiha. Ntoko alipa ooyara oosivela, apwanne chiryene munnachuna wi elapo ela emuhusihe mwaninyu yeeyo enoonaaya wi enahaala omuhakalaliha? Mukhalelo mmoha wa okhumelela phaama ni okhalano ohakalala weeparipari ori omuhela Yehova mu nipuro noopacerya mu okumi ahu.—Mwaalakhanye Salumu 1:2, 3.

12. Ntakhara heeni alipa ooyara akina anoonaaya wi ti yaphaama wa mwanaya oweherya wi apatisiwe?

¹² Mai mmoha aahithariha ntakhara heeni ahaachuneiye wi mwanawe mwaamuthiyana apatisiwe. Owo aaloca, “Kaanuuliwa muru oloca wi nthowa ntokweene naari nrehereryo na wiikariwa mmulokoni.” Moolikana ni murokora yoowo, alipa ooyara akina annuupuwela wi ti yaphaama wi mwanaya aweherye  wunnuwa wi apatisiwe wi asepe opaka soohesa. (Maphatxuwelo 8:21; Masiposipo 22:15) Alipa ooyara yaawo anoona wi wakhala wi mwanaya hapatisiwe, owo hani iikariwe mmulokoni. Nyenya tiheeni eri yoonanara mmukhalelo yoola wa wuupuwela?—Tiyako 1:22.

13. Wakhala wi muchu hapatisiwe, enataphulela wi tahi ookhweleya wa Yehova? Mutharihe.

¹³ Mweeparipari, alipa ooyara hanachuna wi mwanaya apatisiwe ahaakumve okhwaanela wi aveleele okumi awe wa Yehova. Nyenya yaahaala okhala yooheseya wuupuwela wi mwaana tahi ookhweleya vamiithoni va Yehova ophiyerya apatisiwe. Mwaana onakhala ookhweleya wa Muluku vaavaa owo onasuweleiye yeeyo Yehova onaloceiye wi ti yaphaama ni yoonanara. (Mwaalakhanye Tiyako 4:17.) Alipa ooyara amiruku hanamvololiha mwanaya wi ahipatisiwe. Naamwi mwaana owo ari mmiravo, awo annamuhusiha osivela yeeyo Yehova onaloceiye wi ti yoophwanelela ni wiica yeeyo Owo onaloceiye wi ti yoonanara, hiiha ntoko awo apankaaya. (Luka 6:40) Wakhala wi mwaninyu onnamusivela Yehova, enahaala omukhapelela wi ahipake yoocheka etokotoko, nthowa nawi owo onahaala ochuna opaka yeeyo Yehova onaloceiye wi ti yoophwanelela.—Isaiya 35:8.

14. Atokweene eni ekhaviherye hai yeeyo alipa ooyara aneeraaya?

¹⁴ Atokweene ananwerya okhaviherya yeeyo alipa ooyara anapakaaya moorweela wa okhala oophimelela vaavaa awo analocaaya sa soolakelela mmuteko wa Yehova. Murokora mmoha aahuupuwela wi Munna Russell aahiloca wa yene vaavaa aareiyeno iyaakha thanu nammoha. Owo aaloca, “Aahimaliha minutu khumi nathanu alocaka ni miyo vooloca sa soolakelela saka soomunepani.” Tiivi yaari yookhumelela ene? Ohoolo waya murokora owo aahikhala piyoneera, nave aahirumeela mu iyaakha opwaha makhumi mathanu napiili! Mweeparipari, masu alociwe mwaphaama ni nceenyeryo ananwerya ovolowela ekumi yoothene ya muchu. (Masiposipo 25:11) Atokweene ananweryatho waawopa alipa ooyara ni anamwane wi ekhaviherye miteko o Empa ya Omwene. Awo ananwerya waaveka  anamwane opaka ichu siniiwanana ni iyaakha ni mavyakelo aya.

15. Akina a mmulokoni eni yaakhaviherye hai amiravo?

¹⁵ Akina a mmulokoni eni ekhaviherye hai? Moorweela mwa wooniherya waapwacha waya amiravo. Ntoko yootakiherya, munanwerya waavyaavya ineneeryo sinooniherya wi amiravo annamwaacamela Yehova. Apwanne mwaana oovaha naakhulo naphaama mmithukumano, naari apwanne aahikhalano makupa mmithukumano sa veeri va esumana? Apwanne oomulaleerya muchu osikola, naari oopaka echu yoophwanelela vaavaa owo eehiweiye opaka echu yoonanara? Yaari hiiha, mwaakuvele omuleela wi oopaka phaama! Enaphwanela okhala yoolakelela ahu waaleela amiravo ihaakumve naari simanle mithukumano. Vaavaa nnapakaahu hiiha, anamwane anahaala woona wi awo annapaka makupa a “mmuthukumanoni mw’atxhu.”—Salumu 35:18.

16, 17. (1) Ntakhara heeni ti wookhweleya anamwane opatisiwa? (2) Ohakalala taani alipa ooyara Eekristu anakhalaayano? (Moone eruku yoopacerya.)

¹⁶ Ekari etokweenexa alipa ooyara anakhalaayano ori waahusiha anamwane aya omusivela Yehova. (Salumu 127:3; Éfeso 6:4) Mu nloko na Aisarayeli, anamwane yiiveeleela wa Yehova vaavaa awo yaayariwaaya. Nyenya ti yoohiyana ni anamwane ahu. Pahiru nthowa na alipa ooyara omusivela Yehova ni eparipari, eyo henataphulela wi anamwane aya anahaala weerano emohamoha. Ovinyerya elukuluku mwaana onayariweiye, alipa ooyara anaphwanela okhalano yoolakelela ya omukhaviherya okhala oohuserya, wiiveleela wa Muluku ni opatisiwa. Tiheeni enaphwanela okhala echu yookhweleyaxa? Wiiveleela wa muchu, opatisiwa, ni oororomeleya mmuteko wa Yehova enahaala omukhaviherya ovuluwa variyari va ekoi etokotoko.—Mateu 24:13.

¹⁷ Vaavaa Plosom aachuneiye opatisiwa, asitiithi awe yaanachuna osuwela waakhanle wi aari awaakhwanela. Emanle osuwela wi aahikhwaanela, awo yaahikhaviherya yoolakelela awe. Plosom aahithariha echu apapa awe yaapankaaya ohiyu ahaakumve opatisiwa: “Awo yaanileela oothene wi nikokhore, nave yaahipaka nivekelo. Awo yaahimuleela Yehova wi yaari oohakalala vooloca sa yoolakelela ya nahano aya oveleela okumi awe wa Yoowo.” Moovira wa iyaakha opwaha makhumi mathanu nammoha, Plosom aaloca: “Kinachuna wi musuwele wi mu iyaakha soothene sinacharela, nkirwa kicuwala ohiyu yoole!” Alipa ooyara nyuwo, munanwerya okhalano tho ohakalala vaavaa munawoonaanyu anamwane anyu ekhalaka arummwa a Yehova awiiveleela ni oopatisiwa.