1. Nni niphwanye hai miruku, nave eyo enahaala onikhaviherya hai?

YEHOVA ehime ya miruku, nave moosivela onnakawana ni akina. Ninnaalakhanya mu Tiyako 1:5: “Akhanle, mwa nyuwo ohiri ni miruku, aveke wa Muluku, wona wi owo onnàvaha atxhu othene ni murima woleva, ahikhalenle nrima.” Mukhalelo mmoha wa ophwanya miruku ori moorweela wa weemererya olaka wa Muluku. Weerano yeeyo ennanikhapelela osepa opaka ichu soonanara nave ennanikhaviherya otitelela omwaacamela Yehova. (Masiposipo 2:10-12) Navetho nnahaala okhalano ewehereryo yootikhiniha ya okumi woohimala.—Yuda 21.

2. Nni nihuserye hai olaka woosivela wa Muluku?

² Nthowa na okhala achu oohiphaameya naari mukhalelo niphwiiwaahu, ilukuluku ikina ti woovila weemererya olaka naari woona ntoko echu yaphaama. Nyenya vaavaa nnoonaahu mphurelo wa olaka wa Yehova mu okumi ahu, ninniiwexexa ophiyerya mweeryo taani owo onansiveleiye. Masiposipo 3:11, 12 ennaleela: “Mwan’aka, wemeke ikano s’Apwiya.” Voocharela ennaloca: “Apwiya anawokolola yale anakhwelaya.” Nnaphwanela ororomela wi Yehova onachuna yeeyo eri yaphaama  wa hiyo. (Mwaalakhanye Ahebri 12:5-11.) Woona wi Muluku oonisuwela phaama, olaka wawe ilukuluku soothene ti woophwanelela. Mmwaha yoola, nnahaala othokororya mikhalelo mixexe sa olaka: (1) wiilaka, (2) olaka alipa ooyara anaphwanelaaya waavaha anaaya, (3) olaka nnaakhelaahu mmulokoni, ni (4) echu enakhala yawiicelaxa opwaha wiicela vyakala wa olaka.

3. Mwaana oni unnuwihe hai wiilaka? Mvahe yootakiherya.

³ Waakhala wi ninniilaka, ninnavareryela meerelo ni muupuwelo ahu. Tahi wi niyariwe ni mukhalelo wa wiilaka mukhatiihu, koma nnaphwanela ohuserya. Ntoko yootakiherya, vaavaa mwaana onahusereiye weeciha ecika, apapa awe naari amamaawe annapharelela ecika wi akhale oolipa. Nyenya moovira wa elukuluku, mwaana onnahuserya mukhalelo wa okhala vacikani, nave mulipa oomuhusiha onanwerya omuhiyerya elukuluku tonto. Vaavaa mulipa oomuhusiha onasuweleiye wi mwaana onanwerya weeciha ecika meekheiye, owo onnamuhiyerya moomalela. Moolikana, vaavaa alipa ooyara moopixa murima anaavyakihaaya anaaya “merelo ni malakelo a Apwiya,” awo annakhaviherya anaaya wunnuwiha wiilaka ni miruku.—Éfeso 6:4.

4, 5. (1) Ntakhara heeni wiilaka makupa ookhweleya a “mutxhu musyani”? (2) Ntakhara heeni hannaphwanela ooceecheya naamwi nihesaka?

⁴ Enneereya emohamoha ni achu yaawo amusuwenle Yehova yunnunwe. Naamwi akhweya yaarino mukhalelo wa wiilaka, awo nlelo hiyaari Akristu awiichwelavo. Nyenya vaavaa yaapacenryaaya onwara “mutxhu musyani” ni weererya okhala ntoko Kristu, awo yaapacerya wiichwelavo. (Éfeso 4:23, 24) Wiilaka onnanikhaviherya ‘ohemererya minkhela sa elapo yavathi, ni okhala awisuwela, awokolola ni òmulapa Muluku.’—Tito 2:12.

⁵ Nyenya, oothene naachu ohiphaameya. (Eklesiyaste 7:20) Vanonto wakhala wi noohesa, apwanne enataphulela wi hinaanono mwawaakhwanela mukhalelo owo wa wiilaka? Hooye. Ninnaalakhanya mu Masiposipo 24:16: “Awokololowa onnavinya, namwi ùwale vathanu napili.” Tiheeni enahaala onikhaviherya ‘ovinya’ wanaawiili? Munepa wa Muluku toni onikhaviherye ohiya ikuru sahu. (Mwaalakhanye Filipi 4:13.) Yawiima ya munepa enaphitaanyerya wiihiiha, yeeyo eri yoolikanela ni wiilaka.

6. Nni nikhale hai anamahuserya aphaama a Masu a Muluku? (Moone eruku yoopacerya.)

⁶ Ovekela, omuhuserya Piipiliya, ni wuupuwelela enahaala onikhaviherya wunnuwiha wiilaka. Nyenya hanka wakhala wi omuhuserya Piipiliya ti woovila wa nyuwo naari honoosivelaani. Muhiceecheye. Yehova onahaala wookhaviheryaani wi “mukhweleke” Masu awe. (1 Pedro 2:2) Mumveke Yehova wi ookhaviheryeeni wiilaka mukhatiinyu wi nwerye ophwanya elukuluku ya omuhuserya Piipiliya. Akhweya munaphwanela opacerya ohuserya mu aminutu a vakhaani. Tonto tonto, onahaala okhala wookhweya nave munamusiveliwakano ohuserya. Munahaala omalihaka elukuluku muupuwelelaka ichu sasisapo sa Yehova.—1 Timóteo 4:15.

7. Wiilaka oni onikhaviherye hai ophwanya soolakelela sahu mmuteko wa Yehova?

⁷ Wiilaka onnanikhaviherya ophwanya soolakelela sahu mmuteko wa Yehova. Ntoko yootakiherya, tiithi mmoha aanoona wi aanayeleela mvai awe, mwawiihiiha aahipaka yoolakelela ya okhala piyoneero ookilaatheya. Wiilaka waamukhavihenrye hai? Owo  aahaalakhanya mu irevista sahu vooloca sa opiyoneero nave aahivekela vooloca sa yeeyo. Weerano yeeyo yaahimweeriha olipiha onthamwene awe ni Yehova. Owo aanakhala piyoneero okhaviherya vaavaa aaweryeiye. Heemerenrye wi echu vyakala emuhiihe; moohiyana, aathokororya yoolakelela awe. Moovira wa elukuluku, aahikhala piyoneero ookilaatheya.

8-10. Tiheeni enahaala waakhaviherya alipa ooyara waaphuwa anaaya wi emurumeele Yehova? Mvahe yootakiherya.

⁸ Yehova ohaavaha alipa ooyara murici wa waaphuwa anaaya mu “merelo ni malakelo a Apwiya.” (Éfeso 6:4) Eyo ti yoovilaxa weerano mmahiku ahu yaala. (2 Timóteo 3:1-5) Vaavaa anamwane anayariwaaya, hanasuwela ohiyaniha yaphaama ni yoonanara, nave oleela-wa-murima aya onakhala woohivyakiheya. Mwa yeeyo annachuna olaka wi evyakihe oleela-wa-murima. (Aroma 2:14, 15) Mulipa oomuhuserya Piipiliya oothariha wi nsu na Ekriki ntaphuleliwe ntoko “olaka” nnataphulelatho “mannuwelo a mwaana” naari “omphuwa mwaana wi akhale ni miruku.”

⁹ Vaavaa alipa ooyara anaalakaaya anaaya moosivela, anamwane annoona okhala ookhapeleleya. Awo annahuserya wi otaphuwa wookhalano mphimo nave ichu soothene  anapakaaya mukumi sookhalano sookhumelela. Mwawiihiiha ti yookhweleyaxa wa alipa ooyara Eekristu ororomela miruku sa Yehova wi saakhaviherye waaphuwa anaaya. Moonelo vooloca sa waaphuwa anamwane onakhala woohiyana mwawiiwanana ni mpuro muchu onakhaleiyewo, nave moonelo owo onamvira otorokeyaka. Nto, alipa ooyara yaawo anamuwiriyana Muluku hanaphwanela waanyiherya yeeyo anaphwanelaaya opaka naari ororomela yaweereya naari miruku sa achu.

¹⁰ Nnanwerya ohuserya yootakiherya ya Nowa. Vaavaa Yehova aamulenleiye Nowa wi ampake mwaaceya, owo haasuwenle mukhalelo wa ompaka. Owo aahimuroromela Yehova, nave ninnaalakhanya wi Nowa “àhera sothene” hiiha ntoko Yehova aamulenleiye. (Maphatxuwelo 6:22) Tiivi yaari yookhumelela? Mwaaceya aahivuluxa ekumi ya Nowa vamoha ni emusi awe! Nowa aaritho mulipa ooyara aakhumelenle phaama. Ntakhara heeni? Nthowa nawi aahiroromela miruku sa Muluku. Nowa aahaahusiha phaama anaawe nave aari yootakiherya yaphaama wa yaawo. Mu elukuluku yeele yoonanara ehaakumve orwa Maahi Mancipale hiwaari wookhweya.—Maphatxuwelo 6:5.

11. Ntakhara heeni alipa ooyara annaphwanela olapa moowetha wi yaavyakihe anaaya?

¹¹ Wakhala wi mwa mulipa ooyara, muni ‘mwereno sothene’ mwawiihai? Munwiriyane Yehova. Mmweemererye wi ookhaviheryeeni waaphuwa aniinyu. Pharihelani miruku sinarweela Mmasu awe ni marehereryo awe. Ohoolo waya, anamwanaanyu akhweya anahaala woothamalelaani mu weerano yeeyo! Munna mmoha oorepa: “Koosareya ohakalala ni mukhalelo makholo aka akiphunwaaya. Awo aapaka yaaweryelaayavo wi etannye murimaaka.” Owo olonce wi yaari alipa oomuyara awe yaamukhavihenrye okhalano onthamwene ni Yehova. Mweeparipari, naamwi alipa ooyara epakaka soothene anaweryaaya wi emuhusihe mwanaya, owo akhweya onammuhiya Yehova. Nyenya mulipa ooyara yoowo oniilipixerya onanwerya okhalano oleela-wa-murima waphaama nave onnawehererya wi nihiku nimoha mwanawe onahaala omukookela Yehova.

12, 13 (1) Wakhala wi mwaana ohiikariwa mmulokoni, alipa ooyara eni yooniherye hai wi annamwiiwelela Muluku? (2) Emusi emoha yaakhaviheren’ye hai moorweela wa omwiiwelela Yehova?

¹² Wa alipa ooyara akina, yaweeha etokweene vooloca sa wiiwelela onakhala vaavaa mwanaya oniikariweiye mmulokoni. Murokora yoowo mwanawe mwaamuthiyana iikariwe mmulokoni nave apwahavo vaate onnaloca: “Kaanaavya wiikuphelela kipharihelaka soolaleeryiwa sahu wi kiwerye ochekula ni mwanaka mwaamuthiyana vamoha ni musulwaaka amwaamuthiyana.” Nyenya iyawe aahimukhaviherya mweepewe wi hiyaaphwanela omuthokororya mwanaya nave yaaphwanela okhala oororomeleya wa Yehova.

¹³ Ivinrevo iyaakha ohoolo waya, mwanaya mwaamuthiyana aahikookela mmulokoni. Murokora onnaloca: “Vano owo onnakiichana mu telefone naari okirepela michaka mahiku oothene! Nave onnancicimiha nthowa nawi oosuwela wi naahimwiiwelela Muluku. Nookhalano onthamwene wootikhiniha.” Wakhala wi mwaninyu ohiikariwa mmulokoni, apwanne munahaala ‘waroromela Apwiya ni murima anyu wothene’? Apwanne munahaala wooniherya wa Yoowo wi nyuwo ‘hamunaroromela osuwela wanyu’? (Masiposipo 3:5, 6) Muupuwele, olaka wa Yehova onnanooniherya ophiyerya mweeryo taani oreiye a miruku ni mukhalelo onansiveleiye. Muhicuwale wi oomvaha Mwanawe wa achu oothene,  ophitaanyerya mwaninyu. Muluku onachuna wi achu oothene erukunuse murima. (Mwaalakhanye 2 Pedro 3:9.) Vano alipa ooyara, musuwele wi olaka ni ohoolela wa Yehova ti waphaama, naamwi wiiwelela okhalaka woovila. Nwiriyane olaka wa Muluku, nave muhinyeenyeyeno.

14. Nnaphura hai mahusiheryo Yehova onanivaheiye moorweela wa “mulapeli òroromeleya”?

¹⁴ Yehova oolaiherya okhapelela, ni ohusiha mmuloko Weekristu. Owo oneerano yeeyo mmikhalelo soohiyanahiyana. Ntoko yootakiherya, Yehova oomuthanla Mwanawe wi akhapeleleke muloko, nave Yesu oomuthanla “mulapeli òroromeleya” wi avahereryeke yoolya wi enikhaviherye okhala oororomeleya. (Luka 12:42) “Mulapeli” owo onnanivaha mahusiheryo ookhweleya, naari olaka. Akhweya nyuwaano munnuupuwela ikwaha seiyo mwawiriyannaanyu mwaha mmulokoni naari mu erevista yeeyo yookhavihenryeeni otoroka muupuwelo naari meerelo anyu. Munnakhala oohakalala opaka matorokelo yaawo, woona wi eyo enataphulela wi moomweemererya Yehova wi oolakeeni.—Masiposipo 2:1-5.

15, 16. (1) Nni niphure hai orweela wa muteko wa atokweene? (2) Nni neerihe hai wi muteko wa atokweene okhale woohakalaliha wa yaawo?

¹⁵ Kristu ohaavahererya tho atokweene wi ekhapeleleke muloko moosivela. Piipiliya onawiichana anna yaala “samahala wa atchu.” (Éfeso 4:8, 11-13, Nlakano Nahihano) Nni niphure hai orweela wa muteko wa atokweene? Nnaphwanela ochariha nroromelo ni yootakiherya aya yaphaama ni ochariha miruku ananivahaaya orweela Mpiipiliyani. (Mwaalakhanye Ahebri 13:7, 17.) Atokweene annanisivela nave anachuna wi nimwaacamele Muluku. Wakhala wi awo ahoona wi ninnayeleela mithukumano naari mvai ahu, mwawaakuveya awo anahaala weererya onikhaviherya. Awo anahaala oniwiriyana nave voocharela enilipihe moosivela ni onivaha ekano enarweela Mpiipiliyani. Apwanne munnoona nikhaviheryo naya ntoko yawooniherya wi Yehova onnoosivelaani?

¹⁶ Muupuwele wi honakhala wookhweya atokweene onivaha ekano. Apwanne munnuupuwela mukhalelo mulipa a miririmu Natani oonneiye vaavaa aayeiye oloca ni Mwene Tavite amanle weererya ovitha yoocheka awe etokweene? (2 Samuwele 12:1-14) Tuuvi waari moonelo wa Paulo vaavaa aamulankeiye Petro, mmoha a arummwa khumi napiili, yoowo aakhaliha phaama Ayuta yaari Akristu waapwaha yaale yahaari Ayuta? Waanachuneya olipa murima wi Paulo eereno yeeyo. (Galasya 2:11-14) Vano muni mweerihe hai okhala wookhweya wa atokweene wi yoovaheeni ekano? Mukhale awiiyeviha, oothamalela, ni awaakuveya oloca echu enawuukhulaani. Moone nikhaviheryo naya ntoko yawooniherya ya osivela wa Muluku. Nyuwaano munahaala ophura nave atokweene anahaala ohakalala ophara muteko aya.

17. Atokweene yaamukhavihenrye hai murokora mmoha?

¹⁷ Murokora mmoha olonce wi echu yeeren’ye khalai yaahimweeriha okhala woovila omusivela Yehova, nave aahikhala oothananaxa. Owo onnaloca: “Kaanasuwela wi kaanaphwanela oloca ni atokweene. Vaavaa kaalenlaaka, awo hiyaakisamenle naari okithoriha, nyenya yaarimukihakararya ni okilipiha. Omakuchuwelo wa muthukumano, moohipwacha oweiwa waya, mmoha a  yaawo aanakikoha muxelo. Wanthowa na yaweereya aka yakhalai, kaaniisoona ohikhala oophwanelela osivela wa Yehova. Chiryene moovira wa elukuluku, Yehova aahipharihela muloko ni atokweene wi ooniherye osivela wawe wa miyo. Kinnavekela wi nkirwa kimuhiya.”

18, 19. Tiheeni eniicelaxa opwaha wiicela vyakala wa olaka? Mvahe yootakiherya.

¹⁸ Olaka akhweya onamukhala wawiicela, nyenya sookhumelela sa okhooca olaka wa Muluku sinnatepa wiicela. (Ahebri 12:11) Nnanwerya ohuserya orweela wa yootakiherya yoonanara ya Kayine ni ya Mwene Setekiya. Vaavaa Yehova oonneiye wi Kayine aanamwiica munneeni nave wi aanachuna omwiipha, Muluku aahimulopola ariki: “Ti seni onanareliwawe? Osimweleni? Wera yaphàma, txhiri ethoni à enamukhala yohakalala; nto wera yonanara, yotxheka enan’wipithela vamilako và, yothurumelaka, nto weyano onan’werya ovòtha”? (Maphatxuwelo 4:6, 7) Kayine aahikhooca olaka wa Yehova, amwiipha munneeni, nave aaheeteteya ni sookhumelela soowaawa mu ekumi awe yoothene. (Maphatxuwelo 4:11, 12) Waakhanle wi Kayine onwiriyana Muluku, haahaala okhalano yaweereya yawiicelaxa.

¹⁹ Setekiya aari ooceecheya nave aari mwene oonanara murima. Mu olamulelo awe, achu o Yerusalemu yaari mmukhalelo woonanara. Mulipa a miririmu Yeremiya aanamulopola Setekiya wiiliwiili wi owo aaphwanela opaka matorokelo. Nyenya mwene aahikhooca olaka wa Yehova, nave sookhumelela saari sawoopiha. (Yeremiya 52:8-11) Yehova hanachuna wi neeteteyeke ni wiicela si yoowo!—Mwaalakhanye Isaiya 48:17, 18.

20. Tiheeni enahaala weereya wa yaale aneemererya olaka wa Muluku ni wa yaale anakhooca?

²⁰ Olelo, achu ancipale hanapwacha olaka wa Muluku nave annakhooca. Nyenya moohilekela oothene yaale anakhooca olaka wa Muluku anahaala weeteteya ni sookhumelela soowaawa. (Masiposipo 1:24-31) Mwawiihiiha hankooni ‘niwiriyane yeyo nnahusihiwahu nave nikhale a miruku.’ Ntoko yoorepa ya Masiposipo 4:13 enalocaaya, ‘nupuweleke mahiku othene yele nihusenryahu; nihitxuwale: ela ti ekumi ahu.’