1. Wiiliwiili Piipiliya onathariha hai olaka?

TIHEENI munuupuwelaanyu vaavaa muniiwaanyu nsu nawi ‘olaka’? Achu ancipale anuupuwela sa othorihiwa, nyenya olaka onnavolowela sincipale opwaha othoriha. Piipiliya onaloca wi olaka ti waphaama wa hiyo nave ikwaha ikina onniiwananiha ni masuwelelo, miruku, okhwela ni okumi. (Masiposipo 1:2-7; 4:11-13) Ti nthowa nene olaka wa Muluku onnooniherya wi owo onnanikhwela nave onachuna wi nikhaleno ekumi yoohimala. (Ahebri 12:6) Naamwi ikwaha ikina olaka wa Muluku ophitaanyeryaka othoriha, honakhala woonanara naari wawiipha. Mweeparipari, yootaphulela yookhweleya ya nsu ‘olaka’ nnaphitaanyerya ohusiha, hiiha ntoko mulipa ooyara onamuhusiheiye mwaana onamusiveleiye.

2, 3. Mmukhalelo taani olaka onaphitaanyeryaaya ohusiha ni othoriha? (Moone eruku yoopacerya.)

² Muupuwele sa yootakiherya ela. Ponkwe mmoha oniichaniwa Yohani aamvonya mphirya mpa. Amamaawe yaahiloca: “Yohani, honaphwanela othata ni mphirya mpa! Onahaala opwexa echu.” Nyenya owo haapwanche amamaawe nave aahititelela othata  ni mphirya. Mphirya aahimana epiya, nave eyo yaahiphweya! Tiheeni amannya Yohani yaapankaaya wi emulake? Awo yaahimuhusiha moorweela wa omutharihela ntakhara heeni echu opankeiye yaaryaaya yoonanara. Awo yaachuna wi asuwele wi ti yaphaama owiiwelela alipa ooyara nave wi malamulo aya toochuneya ni oophimelela. Wi emukhaviherye Yohani ohuseryavo echu, awo yaahilakelela wi yaahaala okhala yoophwanelela omulaka moorweela wa omvitha mphirya ophiyerya evinrevo elukuluku. Eyo hiyaamusivenle Yohani, koma yaahimukhaviherya wuupuwelela wi saamukhalavo sookhumelela waakhanle wi hawiiwelenle asitiithi awe.

³ Ntoko Akristu, ninnapaka makupa a mpa mwa Muluku. (1 Timóteo 3:15) Tiithiihu, Yehova ookhalano ophwanelela wa olakelela yeeyo eri yaphaama ni yoonanara ni onlaka vaavaa nihinamwiiwelelaahu. Navetho, wakhala wi saweera sahu sinnakhalano sookhumelela soowaawa, olaka woosivela wa Yehova onanwerya onikhaviherya wuupuwelela ophiyerya mweeryo taani oryaaya wookhweleya omwiiwelela. (Galasya 6:7) Muluku onnatepa onisivela nave hanachuna wi nihooxeye.—1 Pedro 5:6, 7.

4. (1) Mukhalelo taani wa olaka Yehova onachuneiye wi naavyakiheno akina? (2) Tiheeni nnahaalaahu othokororya mmwaha yoola?

⁴ Vaavaa nnavahaahu olaka onathipeleya mu Piipiliya nnanwerya omukhaviherya mwaana naari oohuserya a Piipiliya wi akhale oomuchara a Kristu. Nnampharihela Piipiliya wi naahusihe oohuserya ahu yeeyo eri yaphaama ni waakhaviherya wiiwexexa ‘wera sothene Yesu onirummeiye.’ (Mateu 28:19, 20; 2 Timóteo 3:16) Ola mukhalelo yoowo Yehova onachuneiye wi awo evyakihiwe wi awotho ewerye waakhaviherya akina omuchara Kristu. (Mwaalakhanye Tito 2:11-14.) Vano hankooni nthokororye makoho mararu ookhweleya: (1) Olaka wa Muluku onooniherya hai wi owo onnanikhwela? (2) Tiheeni nnahuseryaahu orweela wa sootakiherya sa achu yaawo yaalakiwe ti Muluku? (3) Nni ntakiherye hai mukhalelo wa olaka wa Yehova ni Mwanawe?

5. Olaka onarweela wa Yehova onooniherya hai wi owo onnanikhwela?

⁵ Yehova onnanookolola, onnanihusiha nave onnanivyakiha nthowa nawi owo onnanikhwela. Owo onachuna wi nimwaacamele nave nikhaleno ekumi yoohimala. (1 Yohani 4:16) Owo hananruwana naari oneeriha wiisoona ohikhala echweenevo. (Masiposipo 12:18) Moohiyana, Yehova onateteiwa ni mikhalelo sahu saphaama nave onnaneemererya okhalano othanla woochuna. Apwanne munnawerya woona mukhalelo olaka onooniheryaaya wi Yehova onnanikhwela? Olaka iwo onarweela Mpiipiliyani, mu soolaleeryiwa sahu, asitiithi ahu naari atokweene. Mweeparipari vaavaa atokweene aneereryaaya onookolola mmukhalelo wawiiyeviha ni woosivela  naamwi nihaakumve osuwela wi noopaka echu yoonanara, awo anatakiherya osivela wa Yehova ntakhara hiyo.—Galasya 6:1.

6. Olaka onooniherya hai okhwela wa Muluku naamwi eyo etaphulelaka wi muchu owo hani aphwanelele waakhela mirici?

⁶ Ikwaha ikina olaka onnavolowela sincipale opwaha ekano. Wakhala wi muchu oopaka yoocheka etokotoko, owo hani aphwanelele ovahiwa mirici mmulokoni. Naamwi eyo yeeren’ye, olaka iwo onnooniherya okhwela wa Muluku ntakhara namacheka. Ntoko yootakiherya, eyo enahaala omukhaviherya woona ophiyerya mweeryo taani oryaaya wookhweleya omaliha elukuluku yincipale amuhuseryaka Piipiliya, wuupuwelela ni ovekela. Opaka ichu seiya enammukhaviherya olipiha onthamwene awe ni Yehova. (Salumu 19:8) Vaavaa elukuluku enaviraaya, owo akhweya onamukookela mirici sawe aayeleenleiye. Naamwi muchu owo iikariwe mmulokoni, eyo yawooniherya ya okhwela wa Yehova nthowa nawi ennakhapelela muloko orweela wa ovolowela woonanara. (1 Korinto 5:6, 7, 11) Nave wanthowa nawi olaka wa Muluku wiiliwiili ti woophimelela, eyo ennamukhaviherya muchu iikariwe mmulokoni wiiwexexa ophiyerya mweeryo taani yoochekaawe eryaaya etokotoko. Eyo enahaala omweeriha olapha.—Saweriwa T’arummwa 3:19.

7. Sepena aari taani, nave mikhalelo taani soonanara unnuwinheiye?

⁷ Wi niiwexexe ophiyerya mweeryo taani olaka oryaaya wookhweleya, nnahaala vano waathokororya achu eeli yaawo Yehova aalankeiye. Mmoha ti Sepena, Muisarayeli aakhanle variyari va elukuluku ya Mwene Esekiya, nave mukina ti Kraham, munna a mmahiku ahu. Sepena aari “mutokwene a empa ya mwene,” akhweya ya Mwene Esekiya, nave aahikhalano olamulelo. (Isaiya 22:15) Nyenya Sepena aahikhala awiirumiha nave aachuna oweeriha akina wuupuwelela wi yene aari ookhweleyaxa. Ophiyerya wi aahithipa nihiye nawe vamwala, nave aanawela “ikharo” soocicimiheya.—Isaiya 22:16-18.

8. Yehova aamulanke hai Sepena, nave tiivi yaari yookhumelela?

⁸ Nthowa na Sepena weererya waavya  ovuwa, Muluku aahimwaakha murici awe amvaha mulopwana iichaniwa Eliyakimi. (Isaiya 22:19-21) Eyo yeeren’ye vaava Mwene Senakeripi o Asiriya aapankeiye marehereryo a omutolosa Yerusalemu. Ohoolo waya, Senakeripi aahirumiha nikhuuru na asitokweene vamoha ni anakhoco ancipale wi yawane ni Ayuta ni omuceecheiha Mwene Esekiya. (2 Mamwene 18:17-25) Esekiya aahimurumiha Eliyakimi ni alopwana akina apiili wi yakumane ni asitokweene yaawo. Mulopwana mmoha a yaawo aari Sepena, yoowo vano aari mulipa oorepa. Ovinyerya vaava nnanwerya woona wi Sepena akhweya aahihuserya okhala awiiyeviha nave haanyeenyen’ye naari hiikhupanyenrye. Owo aari ooreheryeya weemererya muteko mukhaani. Vala sookhalavo ichu raru nnahuseryaahu wa yeeyo yeeren’ye ni Sepena.

9-11. (1) Miyaha taani sookhweleya nnahuseryaahu orweela wa Sepena? (2) Munoona hai vooloca sa mukhalelo Yehova aamukhalinheiye Sepena?

⁹ Yoopacerya, Sepena oyeleela wawe otokweene awe ennanuupuxerya wi “wisona onnamunanariha mutxhu.” (Masiposipo 16:18) Akhweya nnamukhalano mirici mmulokoni, nave akina anamuupuwela wi nri ookhweleyaxa. Yaari hiiha, apwanne nnahaala okhala a wiiyeviha? Apwanne nnahaala wuupuwela wi mavyakelo nryaahuno ni ichu saphaama nnaakhwaniha pahiru nnikhaviheryo na Yehova? (1 Korinto 4:7) Murummwa Paulo oolopola: “Kinnolèlani wi ahikhale oni isoneke opwaha mukhalelo awe. Nto mukhale awisumaliha.”—Aroma 12:3.

¹⁰ Yanaawiili, ekano yoolipa Yehova amvanheiye Sepena, ennooniherya wi owo aanaroromela wi Sepena aahaala otoroka moonelo awe. (Masiposipo 3:11, 12) Ela yoohuserya wa oothene yaale ayelenle murici aya. Ohiya okhala oonyeenyeya ni oophuceya, awo ananwerya otitelela omurumeela Yehova moohakalala. Awo anaphwanela woona olaka ntoko yaawooniherya ya okhwela wa Yehova. Muupuwele wi Tiithiihu onahaala waavaha nchuwelo yaale anatitelela wiiyeviha. (Mwaalakhanye 1 Pedro 5:6, 7.) Olaka woosivela wa Yehova onanwerya onuupa wakhala wi nri awiiyeviha hiiha ntoko oloko wawoolowa.

¹¹ Yaneeraru, ninnahuserya mwaha wookhweleya moorweela wa mukhalelo Yehova aamukhalinheiye Sepena. Naamwi mukhalelo Yehova onalakeiye wooniheryaka wi owo onniica yoocheka, olaka iwo onnooniheryatho wi owo onnamukhwela muchu yoowo ochenke. Yehova onathokororya ichu saphaama mwa achu. Mwaari mulipa ooyara naari mutokweene, apwanne munahaala omutakiherya Yehova mmukhalelo wa ovaha ekano?—Yuda 22, 23.

12-14. (1) Akina anaakhulela hai olaka onarweela wa Yehova? (2) Masu a Muluku yaamukhavihenrye hai munna otoroka moonelo awe, nave tiivi yaari yookhumelela?

¹² Yoothananiha, achu akina annatepa onyeenyeya vaavaa awo analakiwaaya ophiyerya omurakamela Muluku ni muloko. (Ahebri 3:12, 13) Apwanne eyo enataphulela wi haavo oni aakhaviherye? Hooye! Muthokororye yootakiherya ya Kraham, yoowo iikariwe mmulokoni nave alekela okookelamo. Amanle okookela mmulokoni, owo aahimaala olaleerya ni oya mmithukumano. Mutokweene mmoha aahiilipiserya okhala nthamwene a Kraham, nave veelukuluku aya Kraham aahimveka mutokweene wi amuhuseryeke Piipiliya ni yene.

¹³ Mutokweene onnuupuwela: “Kraham aahikhalano nikacamiho na wiisoona. Owo aanaathoriha atokweene yaawo yaathokoronrye mwaha awe ophiyerya wiikariwa mmulokoni. Mwawiihiiha nimanle ohuserya vakhaani,  naahithokororya soorepa saaloca sa wiisoona ni sookhumelela saya. Kraham aahipacerya woona mookwakwaleya va eweheryo ya Masu a Muluku, nave haasiveliweno yeeyo ooneiye! Sookhumelela saari sootikhiniha! Amanle osuwela wi owo aahikhalano ‘ekhukulu’ mmiithoni mwawe vooloca sa wiirumiha nave wi mukhalelo awe wa waathoriha akina naari nikacamiho nawe, mwawaakuveya aahipacerya otorokeya. Owo aahipacerya ophwanyeya mmithukumano Seekristu moohihiyererya, ohuserya Masu a Muluku, ni akhalano yookhovelela ya opaka nivekelo. Owotho aaheemererya mirici sawe ntoko muhooleli a emusi, ntakhara mphurelo wa mwaariye ni anaawe.”—Luka 6:41, 42; Tiyako 1:23-25.

¹⁴ Mutokweene onnaaceererya: “Nihiku nimoha Kraham aahikileela echu yeeyo yaatannyile murima aka. Owo aaloca: ‘Soovira iyaakha sincipale kisuwenlene eparipari, nave kohintoko orumeela ntoko piyoneero. Nyenya olelo kinnawerya oloca moororomeleya wi kinnamusivela Yehova.’” Moohilekela, Kraham aahivahiwa murici wa okhaviherya makupa a mikrofoni mmithukumano, nave aari oohakalala okhalano murici yoowo. Mutokweene ooloca: “Yootakiherya awe yookihusiha wi vaavaa muchu oniiyeviheiye vamiithoni va Muluku moorweela wa weemererya olaka, mareeliho anakhala mancipale!”

15. Tiheeni nnaphwanelaahu opaka wi olaka wahu okhumelele phaama?

¹⁵ Wakhala wi nnachuna okhala muhusiha aphaama, voopacerya nnaphwanela okhala muhuserya aphaama. (1 Timóteo 4:15, 16) Moolikana, mwaakhanle muchu yoowo Yehova onamphariheleiye wi aalakeke akina, munaphwanela otitelela wiiyeviha nave mmweemererye Yehova wi ahoolele okumi anyu. Vaavaa akina anoonaaya wi muri awiiyeviha, awo anahaala woocicimihaani nave onamukhala wookhweya wa yaawo weemererya ekano naari miruku munavahaanyu. Nnanwerya ohuserya orweela wa yootakiherya ya Yesu.

16. Tiheeni nnahuseryaahu orweela wa Yesu vooloca sa olaka ni mahusiho oophara muteko?

¹⁶ Ilukuluku soothene Yesu aanamwiiwelela Tiithi awe, naamwi weerano hiiha yaahaakhala yookhweya. (Mateu 26:39) Owo aahiwuupuxerya alipa oowiriyana awe wi mahusiheryo ni miruku sawe saarweela wa Tiithi awe. (Yohani 5:19, 30)Yesu aari awiiyeviha ni awiiwelela, nave eyo yaahimukhaviherya okhala muhusiha ooreera murima. Achu awiiyeviha yaanasiveliwa okhala ni yoowo. (Mwaalakhanye Luka 4:22.) Masu aphaama a Yesu yaahaalipiha yaale yaari ooceecheya ni awuukhuwa. (Mateu 12:20) Owo aanawookolola arummwa awe mmukhalelo waphaama ni woosivela naamwi aaphwanela okhala osarasareya ni yaawo nthowa na waakhulana waya vooloca sa taani aari mutokweene.—Marko 9:33-37; Luka 22:24-27.

17. Mikhalelo taani sini saakhaviherye atokweene okhapelela phaama muloko?

 ¹⁷ Elukuluku yoothene atokweene analakaaya epharihelaka malakiheryo a Piipiliya, awo anaphwanela omutakiherya Kristu. Mmukhalelo yoowo awo anahaala wooniherya wi annachuna ohooleliwa ni Muluku vamoha ni Mwanawe. Murummwa Petro aahirepa: “Mukukhule muhuwo Muluku ohiyenryeyeni, muhilapaka ni wikhinyererya, nto ni okhwela wanyu, ntoko Muluku, ohiri wa nthowa na ikhorowa, nto nulipiserya. Muhikhale ntoko anamatxhonka a yale muhiyeriwanyu, nto ntakiheryo na muhuwo.” (1 Pedro 5:2-4) Atokweene yaawo moohakalala anamwiiwelela Muluku ni Kristu anahaala ophura, ophiyeryatho yaale anaakhapelelaaya.—Isaiya 32:1, 2, 17, 18.

18. (1) Tiheeni Yehova onaweheryeiye wi alipa ooyara epake? (2) Muluku onaakhaviherya hai alipa ooyara?

¹⁸ Hanka vooloca sa olaka ni ovyakiha veemusini? Yehova onnaaleela ahooleli a ichoko: “Muhavahe aninyu nthowa na onyenyeya, nto mwahusiheke merelo ni malakelo a Apwiya.” (Éfeso 6:4) Apwanne ovyakiha ni olaka ti woochuneya chiryene? Ninnaalakhanya mu Masiposipo 19:18: “Omokolole mwana à wi ahuserye nto ohimwiphe ni ommana.” Yehova ohaavaha alipa ooyara murici wa waalaka anaaya. Wakhala wi hiyenreno, awo anahaala omwaakhula Yehova! (1 Samuwele 3:12-14) Nyenya Yehova onnaavaha alipa ooyara miruku ni ikuru awo anachunaaya vaavaa anavekaaya nikhaviheryo nawe mu nivekelo ni ororomela Masu awe ni munepa awe waweela wi waahoolele.—Mwaalakhanye Tiyako 1:5.

19, 20. (1) Mareeliho taani anakhalavo vaavaa nneemereryaahu olaka wa Muluku? (2) Tiheeni nnahaalaahu othokororya mmwaha onacharela?

¹⁹ Wakhala wi noheemererya olaka onarweela wa Muluku ni otakiherya mukhalelo Yehova ni Yesu analakaaya, nnahaala okhalano mareeliho mancipale! Imusi sahu ni miloko sinahaala okhala sa murecele, nave muchu ti muchu onahaala wiisoona okhala oocicimiheya, ookhweleya ni ookhapeleleya. Iho pahiru sawooniherya savakhaani sa murecele ni ohakalala nneeraahu nikhalano omwaahiyu. (Salumu 72:7) Olaka wa Yehova onnanirehererya wi nikhaleke vamoha okhala wookhala mmureceleni ni emusi yawiiwanana, ni Yehova ntoko Tiithiihu. (Mwaalakhanye Isaiya 11:9.) Wakhala wi nohuupuwelela sa yeela, nnahaala osuwela yootaphulela yeeparipari ya olaka: mukhalelo waphaama yoowo Muluku onooniheryeiye wi onnanikhwela.

²⁰ Mmwaha onacharela, nnahaala ohuserya sincipale vooloca sa olaka veemusini ni mmulokoni. Nnahaala othokororya mukhalelo nneeraahu niilake mukhatiihu. Nave nnahaala ohuserya mukhalelo wa osepa opaka echu yawiicelaxa opwaha olaka vyakala naahaalaahu waakhela.