1, 2. (1) Alipa ooyara akina anoona hai vaavaa mwanaya onachuneiye opatisiwa? (2) Ntakhara heeni yaale anachuna opatisiwa aniikohaaya waakhanle wi ahiiveleela wa Yehova? (Moone eruku yoopacerya.)

ASITIITHI a Mariya yaanamvarerya mwanaya mwaamuthiyana eemenle vamoha ni akina yaaya opatisiwa. Namaloca aahipaka makoho meeli. Mariya aahaakhula moohakalala ni masu oovuwa. Moohilekela owo aahipatisiwa.

² Asitiithi a Mariya yaahitepa ohakalala woona wi mwanaya mwaamuthiyana aahiveleela okumi awe wa Yehova nave apatisiwa. Nyenya ahaakumve opatisiwa, amannya Mariya yaanoovelela vakhaani. Awo yaaniikoha: ‘Apwanne Mariya hatempe oyeva wi apatisiwe? Apwanne onniiwexexa ophiyerya mweeryo taani wiiveleela wawe wa Yehova oryaaya mwaha mutokweene? Mano hanaphwananela oweherya elukuluku wi apatisiwe?’ Alipa ooyara ancipale oosivela anniipakela makoho oolikana ni yaala vaavaa mwanaya onaloceiye wi onachuna  opatisiwa. (Eklesiyaste 5:4) Opwaha soothene, yoolakelela yoochuneya muchu ti muchu onaphwaneleiye opaka, ori oveleela okumi awe wa Yehova ni opatisiwa. — Moone ekaaxa “Apwanne Mohiiveleela wa Yehova?”

3, 4. (1) Murummwa Petro onihusinhe hai wi opatiso echu yookhweleyaxa? (2) Ntakhara heeni Petro oolikanyiha opatiso ni mwaaceya Nowa aamutenkeiye?

³ Murummwa Petro aahilikanyiha opatiso ni mwaaceya Nowa aamutekeiye. Owo aaloca: “Yophwaniherya yawihihátho tinovulushani hihano, ti obatiso.” (Mwaalakhanye 1 Pedro 3:20, 21, NN.) Mwaaceya aahiwooniherya akina wi Nowa ni murima woothene aanachuna weerano yookhwela ya Muluku. Moororomeleya Nowa aaheerano muteko aavahiweiye ni Yehova wi apake. Nthowa na nroromelo na Nowa, Yehova aahimvuluxa owo vamoha ni emusi awe variyari va Maahi Mancipale. Tiheeni Petro onachuneiye onihusiha?

⁴ Vaavaa achu yamoonaaya mwaaceya, awo yaanasuwela wi Nowa aahikhalano nroromelo wa Muluku. Vaavaa achu anamoonaaya muchu apatisiwaka, annasuwela wi owo ooveleela okumi awe wa Yehova nthowa na nroromelo nawe mu oviihiwa mookhwani wa Kristu. Moolikana ni Nowa, oothene yaale anapatisiwa annamwiiwelela Muluku nave anneerano muteko owo aavanheiye wi yeereno. Nave hiiha ntoko Yehova amvulunxeiye Nowa variyari va Maahi Mancipale, owo onahaala waavuluxa akapuro awe ororomeleya apatisiwe vaavaa onahaleiye otoloxa elapo ela yootakhala. (Marko 13:10; Wupulula 7:9, 10) Mweeparipari, ti yoochuneyaxa oveleela ekumi ahu wa Yehova ni opatisiwa. Vano, yakhala wi muchu onnalekela opatisiwa, owo onahaala oyeleela ekari ya okhala wookhala.

5. Tiheeni nnahaalaahu ohuserya mmwaha yoola?

 ⁵ Vano nsuwenlaahu wi opatiso echu etokweene, ti woochuneya osuwela maakhulo a makoho ala mararu: Tiheeni Piipiliya onaloceiye sa opatiso? Tiheeni muchu onaphwaneleiye weera ahaakumve opatisiwa? Ntakhara heeni ilukuluku soothene ti woochuneya wuupuwela okhweleya waya opatiso vaavaa nnaahusihaahu aniihu naari oohuserya a Piipiliya?

6, 7. (1) Opatiso wa Yohani waataphulela eheeni? (2) Opatiso taani waari woohiyana wa achu oothene, nave ntakhara heeni?

⁶ Mpiipiliyani ninnaalakhanya wi muchu oopacerya aapatisa akina aari Yohani Mpatisi. (Mateu 3:1-6) Ntakhara heeni achu yaanaya wa yoowo wi aapatise? Awo yeerano yeeyo wi yooniherye wi aalapha wa soocheka saya, eyo tiwi, awo yaaneemererya wi hiyiiwelenle Nlamulo na Mose nave yaari oothanana. Nyenya opatiso woochuneya Yohani aapankeiye waahikhalano yootaphulela yoohiyana. Yohani aakhalano ncicimiho ntokweene na ompatisa Yesu, Mwaana oophaameya a Muluku. (Mateu 3:13-17) Yesu hantonko ocheka. Owo haaphwanela olapha. (1 Pedro 2:22) Vano ntakhara heeni Yesu aahipatisiwa? Wi ooniherye wi aari ookhwaanela opharihela okumi awe mu weerano yookhwela ya Muluku.—Ahebri 10:7.

⁷ Yesu amanle opacerya muteko woolaleerya, arummwaawe yaahipacerya waapatisa akina. (Yohani 3:22; 4:1, 2) Achu oothene yaanapatisiwa tho nthowa nawi yaahilapha ochekela waya Nlamulo na Mose. Nyenya Yesu amanle okhwa ni oviihiwa mookhwani, yaale yaachuna okhala oohuseryaawe yaahaala opatisiwa ni mathowa oohiyana.

8. (1) Nlamulo taani Yesu aavanheiye amanle oviihiwa mookhwani? (2) Ntakhara heeni Akristu annaphwanela opatisiwa?

⁸ Mu eyaakha ya makhumi mararu nararu, amanle oviihiwa mookhwani, Yesu aahiloca ni alopwana, athiyana oopwaha masana mathanu, vamoha ni anamwane. Akhweya teelukuluku yeeyo aalonceiye ariki: “Haweni, mwahusihe atxhu othene, mwapatisaka wa nsina na Atithi, na Mwana ni na Munepa Wawela, nave mwahusihaka wera sothene korummakani.” (Mateu 28:19, 20; 1 Korinto 15:6) Yesu aahaalamulela oomuchara awe waapaka oohuserya. Muchu yoole onachuna okhala muhuserya awe, naari oteexa “muritxi” awe onaphwanela opatisiwa. (Mateu 11:29, 30) Wi muchu amurumeele Muluku mmukhalelo onahaala omuhakalaliha, owo onaphwanela weemererya wi Muluku onampharihela Yesu wi akhwaaniherye yookhwela Awe. Voocharela, muchu owo onaphwanela opatisiwa wi eemereryiwe ni Muluku. Piipiliya onnanivaha sawooniherya wi oohuserya oopacerya a Yesu yaahisuwela ochuneya waya opatisiwa. Awo hiyuupuwela wi yaaphwanela oweherya nave epatisiwe ohoolo waya.—Saweriwa T’arummwa 2:41; 9:18; 16:14, 15, 32, 33.

9, 10. Tiheeni nnahuseryaahu orweela wa opatiso wa Mutiyope ni wa Saulo?

⁹ Mwaalakhanye Saweriwa T’arummwa 8:35, 36. Mutiyope mmoha yoowo eemerenrye nroromelo na Ayuta aaya owannyawe amanle olapela mu empa ya Muluku o Yerusalemu. Munkeelo a Yehova aahimuruma Filipi wi amulaleerye, nave Filipi aahimuhusiha “mutxhaka wa Yesu.” Mano, Mutiyope aakhulenle hai? Owo ahiiwexexa ochuneya waya omweemererya Yesu ntoko  Pwiya, nave aanachuna weerano yeeyo Yehova onavekeiye wa Akristu. Mwawiihiiha aahipatisiwa ahilekenle.

¹⁰ Yootakiherya ekina ti ya Muyuta iichaniwa Saulo. Nloko noothene na Ayuta naahiiveleela wa Muluku, nyenya Yehova aahaakhooca Ayuta nthowa nawi awo hiyaamwiiwelela. Saulo aanaroromela wi Ayuta yaanamulapela Muluku mmukhalelo waphaama, mwa yeeyo aanawiikara Akristu. Nyenya nihiku nimoha, Yesu yoowo aaviihiwe mookhwani, Saulo uupuweleiye wi aari ookhweene, aahilocano orweela wirimu. Saulo aakhulenle hai? Moohakalala aaheemererya nikhaviheryo noorweela wa Mukristu Hananiya. Piipiliya onnaloca: “Avinyaka àpatisiwa.” (Saweriwa T’arummwa 9:17, 18; Galasya 1:14) Ohoolo waya aahisuweliwa ntoko murummwa Paulo. Moone wi vaavaa iiwexenxeiye wi Muluku aahimpharihela Yesu wi aakhwanihe yookhwela Awe, mwawaakuveya Saulo aahipatisiwa ahilekenle.—Mwaalakhanye Saweriwa T’arummwa 22:12-16.

11. (1) Tiheeni enaweeriha anamahuserya a Piipiliya olakelela opatisiwa? (2) Nnoona hai vaavaa muchu onapatisiweiye?

¹¹ Olelotho, ti yoolikana ni anamuhuserya ancipale a Piipiliya, amiravo ni awunnuwelavo. Nthowa nawi annasivela yeeyo Piipiliya onaloceiye, awo ari ooreheryeya oveleela okumi aya wa Yehova ni opatisiwa. Mweeparipari, mwaha wa opatiso, elukuluku yavameekhaaya va muthukumano wa ekulucu ni wa muceche. Anamoona a Yehova annahakalala vaavaa anamahuserya a Piipiliya aneemereryaaya eparipari nave elakelela opatisiwa. Alipa ooyara annahakalalatho vaavaa anaaya aneeraayano emohamoha. Variyari va eyaakha ya muteko ya 2017 achu opwaha 284.000 aapatisiwa wi yooniherye wi aaveleela ikumi saya wa Yehova. (Saweriwa T’arummwa 13:48) Mweeparipari, awo yaahiiwexexa wi ti woochuneya Akristu opatisiwa. Nyenya tiheeni yaaphwanelaaya weera ehaakumve opatisiwa?

12. Tiheeni anamahuserya a Piipiliya anaphwanelaaya opaka ehaakumve opatisiwa?

¹² Anamahuserya a Piipiliya ehaakumve opatisiwa anaphwanela ohuserya eparipari vooloca sa Muluku, yookhwela awe wa achu ni elapo yavathi ni yeeyo opankeiye wi aavuluse achu. (1 Timóteo 2:3-6) Voocharela anaphwanela wunnuwiha nroromelo, nenlo nnahaala waakhaviherya wiiwelela malamulo a Muluku ni ohiya weera ichu owo oniiceiye. (Saweriwa T’arummwa 3:19) Ela ti yoochuneya, nthowa nawi Yehova harwa eemererya wiiveleela wa muchu yoowo onatitelela opaka ichu Owo oniiceiye. (1 Korinto 6:9, 10) Nyenya yookhalavo echu ekina. Yaale anachuna oveleela okumi aya wa Yehova anaphwanela oyaaka mmithukumano, olaleerya michaka moohihiyererya ni waahusiha akina. Ela yoovekeya wa yoole onachuna omuchara Kristu. (Saweriwa T’arummwa 1:8) Woopaceryani muhuserya onaphwanela weerano ichu soothene seiya. Voocharela  onanwerya oveleela okumi awe wa Yehova mu nivekelo nawiiphini nave apatisiwe.

13. Vaavaa nnaahusihaahu akina, ntakhara heeni ti yoochuneya wuupuwela wi annaphwanela opatisiwa wi ekhale Akristu eeparipari?

¹³ Vaavaa nnaakhaviheryaahu aniihu ni anamahuserya a Piipiliya weera ichu seiya soochuneya, nnaphwanela wuupuwela wi yaale anachuna okhala oomuchara eeparipari a Yesu annaphwanela opatisiwa. Voocharela hinikhala awoova waaleela awo mu elukuluku yoophwanelela okhweleya waya wiiveleela ni opatisiwa. Nnachuna wi aniihu ni anamahuserya akina a Piipiliya etitelele oya vahoolo ni opatisiwa.

14. Ntakhara heeni hannaphwanela omukhinyererya muchu wi apatisiwe?

¹⁴ Mweeparipari haavo onaphwanela omukhinyererya naari omutiteliha mwaana naari oohuserya a Piipiliya wi apatisiwe. Yehova hananikhinyererya omurumeela yene. (1 Yohani 4:8) Elukuluku nnaahusihaahu akina nnaphwanela waakhaviherya wiiwexexa ochuneya waya wunnuwiha onthamwene aya ni Yehova. Voocharela, waakhala wi oohuserya a Piipiliya oosiveliwa osuwela eparipari vooloca sa Muluku ni wi onnachuna weera soothene Akristu eeparipari anaphwanelaaya opaka, owo onahaala ochuna opatisiwa.—2 Korinto 5:14, 15.

15, 16. (1) Apwanne muchu onaphwanela okhalano iyaakha sammoori wi apatisiwe? Mutharihe. (2) Ntakhara heeni oohuserya a Piipiliya onnaphwanela opatisiwa ntoko mmoha a Anamoona a Yehova naamwi aapatisiwe mu ekerexa ekina?

¹⁵ Muchu hanaphwanela okhalano mannuwelo ammoori wi apatisiwe. Achu oothene toohiyana, nave anamahuserya akina a Piipiliya annaya vahoolo mwawaakuveya  waapwaha akina. Ancipale epatisiwe vaavaa yaaryaaya amiravo, nave annatitelela okhala oororomeleya wa Yehova vaavaa aninnuwaaya. Akina amuhusenrye Piipiliya ni epatisiwa yuuluvanleene. Ophiyerya wi Akina annakhalano iyaakha opwaha nsana!

¹⁶ Muthiyana mmoha yoowo aamuhusenrye Piipiliya aahipatisiwa mu ikerexa soohiyana hiyana. Ti nthowa nene aamukonheiye muhusiha awe a Piipiliya waakhanle wi chiri waari woochuneya opatisiwa wanaawiili. Muhusiha awe a Piipiliya aahimooniha iciciri sa Piipiliya saakhunle nikoho nawe. Woona wi muthiyana owo aahiiwexexa yeeyo Piipiliya onavekeiye, aahipatisiwa, naamwi aarino iyaakha waacamela 80. Tiheeni nnahuseryaahu orweela wa yootakiherya yeela? Yehova onahaala weemererya opatiso ahu pahiru yaakhala wi noosuwela eparipari vooloca sa yookhwelaawe. Mwawiihiiha naamwi nipatisiwe mu ekerexa ekina, nlelo nnaphwanela opatisiwa ntoko mmoha a Anamoona a Yehova.—Mwaalakhanye Saweriwa T’arummwa 19:3-5.

17. Tiheeni muchu onaphwaneleiye wuupuwela vooloca sa nihiku opatisiweiye?

¹⁷ Nihiku muchu onapatisiweiye nnakhala nihiku noohakalaliha. Eyotho elukuluku ya wuupuwelela mwawiixeela vooloca sa echu enavolowela wiiveleela ni opatiso. Weera ichu soothene inachuneya wa Mukristu eeparipari muteko mutokweene. Amuhuserya a Yesu hanaphwanela okhala “akumi wa yawo mekhaya, nyenya wa Yowo akhwenle yawo, avinya.”—2 Korinto 5:15, NN; Mateu 16:24.

18. Makoho taani nnahaalaahu othokororya mmwaha onacharela?

¹⁸ Ntoko nihusenryaahu mmwaha yoola, yoolakelela ya okhala Mukristu eeparipari mwaha mutokweene. Ti nthowa nene amannya Mariya yiipakelaaya makoho alociwe woopaceryani wa mwaha yoola. Wakhala wi mwa mulipa ooyara, akhweya munniikoha: Apwanne mwanaka ohaakhwanela wi apatisiwe? Apwanne oosuwela mwawaakhwanela vooloca sa Yehova wi iiveleele wa yoowo? Apwanne onnaphwanela okhalano mahusiheryo aphaama ni muteko ahaakumve opatisiwa? Hanka wakhala wi oopaka yoocheka etokweene amanle opatisiwa? Nnahaala othokororya makoho yaala mmwaha onacharela, nave nnahaala ohuserya mukhalelo alipa ooyara aneeraaya ekhalano moonelo waphaama vooloca sa opatiso.