Mmwaha ovirale, noothokororya eneneeryo Yesu aalonceiye. Eneneeryo eyo ennanikhaviherya osuwela ichu Omwene wa Muluku weenraaya wirimu ni Yesu Kristu ntoko Mwene.

Piipiliya onnaloca wi vaavaa eereiye akuxe Omwene, Yesu aahaala omwiikara Satana ni masololo awe wirimu. Awo anaphara muteko aya pahiru veelaponi yavathi, ti nthowa nene ichu inaamviraaya inanaraka ovinyerya eyaakha ya 1914.—Wupulula 12:7, 9.

Moohipwacha waaceereryeya wa mikhalelo sa mulaponi, Yesu, ntoko Mwene a Omwene wa Muluku, onneera ichu wi aakhaviherye achu mu elapo yoothene. Moorweela wa muteko woolaleerya oneeriwa veelapo yoothene yoowo Yesu aalaihenryeiye, ancipale annahuserya ni opharihela malakiheryo a Piipiliya mookumini mwaya nihiku ti nihiku. (Isaiya 2:2-4) Ancipale aahuserya okhalano moonelo woophimelela vooloca sa muteko, orehererya okumi wa echoko aya, ni opharihela phaama ichu saya soomwiilini, ehikhanle akapuro a seiho. Achu yaala annahuserya ichu sa mphurelo, nave annakhala achu a mukhalelo yoowo Muluku onachuneiye wi ekhale mu Omwene awe.

Naamwi Yesu alamulelaka wirimu, nlelo alamuleli aachu annalamulela veelapo yavathi. Mwawiihiiha, Muluku onnamulamulela Yesu: “Olamuleleke veeri va amwiicani aa.” (Salumu 110:2) Moohilekela Yesu onahaala waatoloxa moomalela oothene yaale ahiniiwelela, ni oruuha otaphuwa wa oothene yaale anamwiiwelela Muluku.

Variyari va elukuluku yeeyo, Omwene wa Muluku onahaala weeravo echu wi:

• Omalihe malapelo atheru. Malapelo yaawo anahusiha sawootha vooloca sa Muluku ni yaawo anakacamiha ikumi sa achu anahaala otoloxiwa. Piipiliya onnooniherya malapelo atheru ntoko namararuwe. Otoloxiwa wawe onahaala waatikiniha achu ancipale.—Wupulula 17:15, 16.

• Omalihe olamulelo wa achu. Omwene wa Muluku onahaala weeravo echu wi omalihe olamulelo wa achu.—Wupulula 19:15, 17, 18.

• Waaviihevo achu oonanara. Hanka vooloca sa achu yaawo ari oolakelela weera soonanara nave anakhooca omwiiwelela Muluku? “Aweera soonanara anarwa eviihiwamo mweelaponi ya vathi.”—Masiposipo 2:22.

• Omutoloxe Satana ni masololo awe. Satana ni masololo haweryaka “ohuweliha maloko.”—Wupulula 20:3, 10.

Tiheeni enataphulelaaya wa oothene yaawo aneemererya Omwene wa Muluku?

Alamulelaka ntoko Mwene wirimu, Yesu onahaala okhwaaniherya sincipale waapwaha alamuleli aachu. Owo onahaala okhaviheryiwaka ni achu 144.000 yaawo anathanliwa variyari va achu. (Wupulula 5:9, 10; 14:1, 3) Owo onahaala weeriha wi yookhwela ya Muluku yeereyeke veelaponi yavathi. Tiheeni Omwene wa Muluku onahaalaaya oweerela achu a veelaponi ya vathi?

• Omaliha ireca ni okhwa. “Haavo oni aloce ariki: ‘Kinniiceliwa,’” nave “horwa tho okhalawo okhwa.”—Isaiya 33:24; Wupulula 21:4.

• Otikitherya murecele weeparipari ni okhapeleleya. “Anamwane aa anamwiichaala mmureceleni,” ni awo “anarwa ekhala awiithipela, mmoha ni mmoha onarwa iichuuwa mmureceleni, vathi va muurushi wa mukuukhu awe ni wa miri onavaha eviinyu.”—Isaiya 54:13; Mikeya 4:4.

• Waavaha muteko wamphurelo. “Oothanliwa aka ekaamulekela epuhaka muteko wa mata aya. Helapa, ephweeleya mahaleene.”—Isaiya 65:22, 23.

• Orehererya elapo. “Elapo ya wuuma ni mweehaavani enamuhakalala; wahaakhumamo echu onamuchapamo, ohuruweliwamo ithutu.”—Isaiya 35:1.

• Waahusihe achu yeeyo anaphwanelaaya weera wi ekhale okhala wookhala. “Okumi ene woohimala tuula: yoosuweleeni nyu, muri Muluku mmoharu eeparipari, ni Yesu, ti Kristu yoowo mmuruminhaanyu.”—Yohani 17:3.

Muluku onachuna wi nyuwo mpuhe mareeliho yaala. (Isaiya 48:18) Mmwaha onacharela onahaala othokororya yeeyo munaphwanelaanyu weera hiihaano wi mpake makupa a omwaahiyu yoola wooreera.