Wakhala wi muri mmakacamiho, moohikhwa minikwa mwaahaala ochuna wi nthamwene anyu eerevo echu wi ookhaviheryeeni. Ni yeela mmuupuweloni, akina analoca wi Muluku tahi nthamwene, nthowa nawi anoona wi haneeravo echu wi aakhaviherye. Nyenya mweeparipari, ovinyerya khalai owo onneeravo echu nave tho onahaala weeravo echu wi amalihe makacamiho ni ohooxeya woothene nnoonaahu olelo. Vano, tiheeni Muluku onahaaleiye weera?

Muluku onahaala omaliha sootakhala soothene moorweela wa oviihavo yeeyo enatannya. Piipiliya onnamuloca mulipa ootannya makacamiho ariki: “Elapo ya vathi yoothene enuupela wa [naari enalamuleliwa ni] mulipa oonanara owo.” (1 Yohani 5:19) “Mulipa oonanara owo” tahi muchu mukina omuhiya yoowo Yesu aamwiichanneiye ntoko “mutokweene eelapo yeela,” Satana Musaserya. (Yohani 12:31) Ovolowela wa Satana mu elapo yoothene toneeriha okhalavo makacamiho mancipale. Tiheeni Muluku onahaaleiye weera?

Moohilekela, Yehova Muluku onahaala ompharihela Mwanawe, Yesu Kristu, wi “amvoothe yoole orino ikuru sa okhwa, tiwi, Musaserya.” (Ahebri 2:14; 1 Yohani 3:8) Mweeparipari, Piipiliya onooniherya wi mwaneene Musaserya onnasuwela wi “elukuluku awe ehanle vakhaani.” (Wupulula 12:12) Muluku tho onahaala waavela oothene yaale anatannya makacamiho.—Salumu 37:9; Masiposipo 2:22.

Amanle omaliha soonanara soothene veelaponi yavathi, Mpatuxa ahu onahaala weeravo echu wi aakhwaniherye yoochuna awe yoopacerya ntakhara elapo yavathi vamoha ni achu. Matorokelo taani onahaaleiye opaka?

Murecele woohimala ni ohakalala. “Nto awiichacala anarwa yaakhela elapo ya vathi nave anarwa ehakalala, yiichaala mmureceleni.”—Salumu 37:11.

Yoolya yincipale yaphaama. “Mweelaponi okhalemo yoolya yincipale ophiyerya vasulu va miyaako.—Salumu 72:16.

Ipa saphaama ni muteko woohakalaliha. “Yoowo onateka empa awe, tanii akonekemo; yoowo onaala miri sawe, tanii alyeke sawiima sene. . . . Epuhaka muteko wa matata aya.”—Isaiya 65:21, 22.

Nyuwaano hamunachuna woona waakhwanela wa ichu seiha? Soothene iha inahaala weereya moohilekela.

Mmahiku ahu yaala, muchu ori oothene onniiceliwa ni okhwa, nyenya mu elapo evyaani iho hikhalavo. Muluku onahaala opharihela mukucho wa woopola wa Yesu wi “oothene yaawo anamuroromela ehirimeele, nto ekhaleno okumi woohimala.” (Yohani 3:16) Teevi eni ekhale yookhumelela?

Masooso hekhalavo. “Haavo oni aloce, ariki: ‘Kinniiceliwa;’ nave muloko omanke mwemmo, onarwa okhurumuweliwa sootakhala saya.”—Isaiya 33:24.

Okhwa hotitelela waarimeeliha achu. “Apwiya anammirya okhwa, ohikhale mahiku oothene; pwiyaka onamvuta miithori wiithoni wa achu oothene.”—Isaiya 25:8.

Achu anahaala okhalaka okhala wookhala. “Yoolivela ya ocheka ti okhwa, nto yamahala ya Muluku ti okumi woohimala mwa Yeesu Kristu Apwiyaahu.”—Aroma 6:23.

Yaale akhwile anahaala oviihiwa. “Muluku onarwa aaviiha wookhwaani awookololowa murima ni oonanara murima.” (Saweriwa T’arummwa 24:15) Mukucho wa woopola wa Yesu Kristu onnaphariheleya tho ophiyerya wa yaale akhwile.

Muluku oni aakhwaniherye hai soothene seiha?

Muluku onahaala waakhwaniherya yoochuna we wa achu ni elapo yavathi moorweela wa olamulelo wa wirimu, yoowo Yesu Kristu okhanleiye tothanliwe wi akhale Mwene. (Salumu 110:1, 2) Ola olamulelo naari omwene yoowo Yesu aahusinheiye oomuchara awe oveka ni masu ala: “Atiithi muri wirimu, . . . Omwene anyu orwe.”—Mateu 6:9, 10.

Omwene wa Muluku onahaala olamulela elapo yoothene ni omaliha ohooxeya naari makacamiho oothene veelaponi yavathi. Omwene ola, olamulelo waphaamaxa yoowo achu ahintonkwaaya okhalano! Ti nthowa nene Yesu aatempeiye wiilipixerya olaleerya “michaka yaphaama ya omwene” elukuluku yeeyo aareiye veelaponi yavathi ni ahaaceenyerya oohuserya awe weerano emohamoha.—Mateu 4:23; 24:14.

Nthowa na waasivela wawe vancipale achu, Yehova Muluku oororomeliha waakhwaniherya ichu soothene iha sa phaama wa yaawo. Apwanne ela henaweerihaani ochuna omusuwela owo phaama ni opaka onthamwene ni yoowo? Vano, wakhala wi moothanla weerano yeeyo tiheeni munahaalaanyu ophura? Mwaha onacharela onahaala waakhula.