YOOVAHA etokweene ennaneeriha wooniherya othamalela wahu. Yesu ahooniherya yeela vaavaa aapenunxeiye alopwana khumi yaarino mareca mu iyaakha sincipale. Pahiru mulopwana mmoha mwa ale khumi “Àkòkela mutxhuli ni ànvuwiha Muluku alipihaka nsu.” Yesu aaloca ariki: “Miyo nkapenunse atxhu khumi? Aruwi akinaku athanu nasese?” (Luka 17:12-17) Tiheeni nnahuseryaahuvo? Nnawerya ocuwala mwawaakuveya mahala akina aneerenlaaya!

Yawoopola henalikana ni yoovaha eri yoothene. Ela eri ocai ni yamahala eri yoothene nnavahiwaahu. Vano munahaala waakhulela hai wa soothene iha Muluku oweerenleiyeni mu okumi anyu?

• Rwaani wi mmusuwele Mulipa Oovaha. Tahi wi woopola onahaala owiiha okumi woohimala wa  achu oothene eheenrevo echu. Moohiyana, avekelaka wa Muluku, Yesu aaloca: “Ekumi yohimala ti ela: wi yawo yosuwele weyano Muluku mmoharu ni a eparipari, ni emusuwele yole omurummawe, Yesu Kristu.” (Yohani 17:3) Waakhanle wi muchu mukina ohooleelaani wi ookhala muchu aawooponleni elukuluku mwaaryaanyu mwaana, apwanne himwaahaala ochuna omusuwela phaama muchu owo ni yeeyo yaamweerinhe owoopolaani? Yehova Muluku, yoowo oovanheni yawoopola ya okumi, onachuna ohiya pahiru wi mmusuwele, nyenya tho onachuna wi mpake onthamwene woolipa ni yoowo. Piipiliya onnaceenyerya: “Mmwatxameleke Muluku nave owo onan’watxamelani.”—Tiyako 4:8.

• Mukuhe nroromelo nanyu mu yawoopola. “Ole onamwemererya Mwana, òkhalano ekumi yohimala.” (Yohani 3:36) Okuha nroromelo onataphulela eheeni? Enataphulela saweera; wi nooniherye nroromelo nahu wa yawoopola nnaphwanela weeravo echu. (Tiyako 2:17) Saweera sa mukhalelo taani? Yoovaha enakhala yawinyu pahiru wakhala wi moophwanya nave mwaakhela. Moolikana, munaphwanela ophwanya ni waakhela yoovaha. Mwawiihai? Muhuserye mukhalelo Muluku onakhweleiye wi mphariheleke okumi anyu, ni weera mwawiiwanana ni yeeyo. * Mumveke Muluku nikhurumuwelo vamoha ni yawuupuxerya-ya-murima yaphaama. Mmwaacamele Muluku muroromelaka wi woopola woopaka mathipelo a omwaahiyu wa murecele, woohakalaliha, wa oothene yaale arino nroromelo!—Ahebri 11:1.

• Mphiye va Yawuupuxerya ya okhwa wa Yesu. Yesu aatikitherya mukonelo yoowo oneeriwano va eyaakha wi onuupuxeryeke marehereryo a yawoopola. Alocaka sa wuupuwelela yaweereya yeela owo ahi: “Mwereke yela mukupuwelaka miyano.” (Luka 22:19) Anamoona a Yehova anahaala wuupuwelela okhwa wa Yesu nihiku na Nanaawiili, 11 a Apirili a 2017, nsuwa nneenle. Muthukumano ola wa ewora emoha, onahaala othokororya yootaphulela ya okhwa wa Yesu ni mukhalelo eyo enahaalaaya owiiha mareeliho hiihaano ni omwaahiyu. Muyakha ovirale, achu awaakhwana macikhwi makhumi meeli a elapo yoothene yaaphiya va mukonelo. Ninnoowopani tho nyuwaano wi mukhale vamoha ni hiyaano mu waakhulela yoovaha yeela etokweene ya Muluku.