Soovaha ikina sinakhala soochuneya wa hiyaano nthowa na ovahiwa ni muchu oovuwa naari oocicimiheya. Soovaha ikina, naamwi sihiri soowalamela, ti soochuneya nthowa na ovahiwa ni muhima ahu naari muchu nnamuroromelaahu. Ti yeeyo tho yeeren’ye ni yoovaha ya Russel wa Yortano, ntoko elociwaaya woopaceryani. Mano, ela enalikanela hai ni yamahala ya woopola?

Yoopacerya, Piipiliya onaloca wi ‘Muluku . . . omurumiha mwana awe mmoharu mwelaponi wi hiyano nikhale mwa yowo.’ (1 Yohani 4:9) Masu ala annanikhaviherya wiiwexexa wi yamahala eyo chiryene ti yasisapo. Haavo orino owerya otokweene ompwaha Muluku. Vooloca sa yoowo, namarepa a Salumu aahi: “Nyenyuru, nsina nanyu mwa Yehova, Mwa Awirimurimu velaponi yothene ya vathi.”(Salumu 83:18, Nlakano Nahihano.) Tahi wi naanaphwanela waakhela yamahala yeela enarwa wa Yehova.

Yanaawiili, Muluku ti “Atithihu.” (Isaiya 63:16) Mmukhalelo taani? Owo oonivaha ekumi. Mwawaacererya, owo onnanthokororya hiiha ntoko tiithi oosivela onaathokororyeiye anamwane awe. Alocaka wa akapuro akhalai, Muluku aahi: “Efrayimi, mwanaka òkhweleyasa, mwanaka òkisivelasa . . . murima aka wosareya osivela nave kinamummorela ikharari.” (Yeremiya 31:20) Muluku onoona mmukhalelo mmohamoha wa akapuro awe olelo. Tahi wi pahiru  onne onipatuxa nyenyatho owo ori ntoko tiithi ni nthamwene ahu oororomeleya. Apwanne ela heneeriha wi yoovaha awe ekhale yasisapo etokweene?

Soovaha ikina sinakhala soochuneya nthowa nawi iho sivahiwe ohiya moophareliwa, nyenya nthowa na osivela. Mulipa oovaha ohirino nrima hanavaha aweheryaka okookiheryiwa echu.

Muluku oonivaha Mwanawe nthowa nawi onnanisivela. Piipiliya oni: “Muluku ononiha onikhwela wawe, vomurumihela Mwana awe mmoharu.” Ni yoolakelela taani? “Wi hiyano nikhale mwa yowo.” (1 Yohani 4:9) Apwanne Muluku aarimphareliwa weerano yeela? Hooye! Owo “muteko wa nivuluso weriwe ti Yesu Kristu” nthowa na “oréra . . . murima” wa Muluku.—Aroma 3:24.

Ntakhara heeni yoovaha ya Muluku enooniheryaaya “orèra wawe murima”? Piipiliya onnaakhula: “Nto Muluku ononiha onikhwela wawe, ntakhara naryahu atxhu òtxheka, Yesu t’okhwileiye wa nthowa na hiyo.” (Aroma 5:8) Osivela woohikhala nrima woomweeriha Muluku weeravo echu wi aakhaviherye achu oocheka, ooceecheya, ni oohiphaameya. Tahi wi naanaphwanela waakhela osivela yoola, nave hinnawerya omukookiherya echu. Yoovaha yeela ya Muluku, yawooniherya etokweene ya osivela.

Soovaha ikina sinakhala soochuneya nthowa na wiilipixerya weeriweno wa yoole ovanhe. Wakhala wi muchu oolakelela mukhateiye onivaha echu yasisapo oreiyeno, hiyaano ninnacicimiha yoovaha eyo nthowa na wiilipixerya opankeiye.

Muluku “Onvaha Mwana awe mmoharu.” (Yohani 3:16) Waari woovila wa yoowo onivaha muchu onamusiveleiye vancipale. Variyari va opatuxa elapo mu iyaakha soohaalakhanyeya, Yesu aanalapa ni yoowo nave aari “nihakalaliho nawe nihiku ti nihiku.” (Masiposipo 8:30) Yesu “Mwana awe òkhweleya” nave tho “eruku ya Muluku òhoniwa.” (Kolosi 1:13-15) Onthamwene woolipa variyari va Muluku ni Yesu ori ocai wa wiiwexexa wahu.

Chiryene, Muluku ti “yowo ahánimanne Mwanawe.” (Aroma 8:32, Nlakano Nahihano) Yehova oonivaha echu yoochuneyaxa wa hiyaano. Hiyaavo yoovaha eri yasisapoxa opwaha yeela.

Soovaha ikina sinakhala sa esisapo nthowa nawi sinnaakhwaniherya soochuna sahu, ophiyerya tho sawaakuveya. Ntoko yootakiherya, othamalela taani mwaahaalaanyu okhalano waakhanle wi muchu ohiiveleela okula murece onahaala wookhaviheryaani openuwa, yoowo nyuwaano mwahaahaalaanyu owerya okula! Yoovaha eyo yaahaala woohakalalihaani, hamuneemererya?

“Ntoko mwa Adamu othene anakhwa, hihatho mwa Kristu othene anarwa ekhalihiwa akumi.” (1 Korinto 15:22) Woona wi na anamwane a Atamu, oothene hiyo ‘ninnakhwa,’ nave hinnawerya osepa wiiceliwa ni okhwa naari hinnawerya opaka onthamwene mukhatiihu ni Muluku ni okhalano yawuupuxerya-ya-murima yaphaama vamiithoni vawe. Nthowa na ohiphaameya wahu, hinnawerya wiivaha naari waavaha akina ‘ekumi.’ Piipiliya oni: “Nari munneni hamopolaru. Nari omvelélela yoliva wa Muluku. Ntakhara yawopola ya okumi aya ti yesisapo  aya yowalamela.” (Salumu 49:7, 8, Nlakano Nahihano) Hiyaano pahiru nnachuna nikhaviheryo woona wi hinnawerya ovaha yawoopola. Nahoopoliwe, naahaala orimeela.

Nthowa na osivela wawe, Yehova oonivaha woopola naachunaahu, mwawiihiiha, moorweela wa Yesu “othene anarwa ekhalihiwa akumi.” Mphurelo taani woopola onanivahaaya? “Nikhami na mwanawe Yesu Kristu ninnanrapiha wa yotxheka yothene.” Aai, mukucho wa woopola wa Yesu woohula ephiro ya okhurumuweliwa soocheka ni waakhela ekumi yoohimala. (1 Yohani 1:7; 5:13) Mano, tiheeni mukucho wa Yesu onahaalaaya weera wa yaale akhwile? “Ntoko okhwa orulaya mwilaponi wa nthowa na mutxhu mmoha, hiha ovinya wa atxhu òkhwa oruletho wa nthowa na mutxhu mmoha [Yesu].”—1 Korinto 15:21. *

Hiyaavo yoovaha etokweenexa evahiwe ni muchu oocicimiheyaxa nave enooniherya osivela otokweene opwaha mukucho wa Yesu. Haavo onivanhe echu yoochuneyaxa opwaha yeeyo Yehova Muluku onivanheiye. Nave hiyaavo yamahala enaakhwaniherya yoochuna opwaha mukucho onanivuluxa mwa yoocheka ni okhwa. Eparipari, hiyaavo yoovaha enalikana ni yawoopola.