Apwanne ninnaphwanela weemererya wi soolaiherya sa Yehova inarwa saakhwanela? Yesu aanaroromela yeela, nave yeeyo owo aaloceiye yaanalipiha nroromelo na achu yanwiriyana. Ntoko yootakiherya, nkoonani yeeyo Yesu aalonceiye mu Mwaha wa Vamwaako, mu Mateu 5:18: “Mwa eparipari miyo kinnolèlani: ehakunve ovira elapo ya vathi ni ya wirimu, horimela mutxeka nari ethoka emoharu mwa nlamulo. Sothene inamwereya.”

Eleetera ekhaani ya masu a Ehepiri ti י (iode) ela eleetera yoopacerya ya Tetrakrama, yoowo oneemelela nsina na Muluku Yehova. * Nave, ohiya ovaha esisapo masu a Nlamulo na Muluku, alipa oorepa ni Afarisi yoona wi “nsu ti nsu” naari noochuneya.

Yesu achuna oloca wi waari wooweryeya wi elapo ni erimu ehiye okhala ohiya wi masu yaala makhaani a Masu a Muluku ehaakhwanele. Nyenya Piipiliya onnaloca wi erimo ni elapo herwa etoloxiwa. (Salumu 78:69) Vanonto Yesu achuna ohusiha wi hiyaavo echu naari ekhaani eri Mmasu a Muluku, naamwi etempe oyeva, eni ehaakhwanele.

Apwanne Muluku onnapwacha sooleeliherya ikhaani? Aai chiryene. Muupuwele ela: Aisarayeli mmahiku akhalai yaaleeliwa wi ehipwexeke nikhuva na epucepuche yaaphariheliwa nihiku na Paskha. (Mukwaha 12:46) Akhweya ela yaari yooleeliherya ekhaani. Apwanne awo yaahiiwexexa mathoweene? Akhweya hooye. Nyenya Yehova Muluku aanasuwela echu yaataphulelaaya. Yooleeliherya ela yaasiphela yeeyo yaahaala weereya ni Mesiya, wi nikhuva nawe hinaahaala opwexiwa vaavaa aahaaleiye othomeiwa va mwiri woohooxa.​—Salumu 34:20; Yohani 19:31-33, 36.

Tiheeni nnahuseryaahu orweela wa masu yaala a Yesu? Hiyaano tho nnaphwanela ororomela wi ichu soothene Yehova Muluku olaihenryeiye sinahaala waakhwanela, ophiyerya tho sooleeliherya ikhaani. Mweeparipari, nnanwerya ohuserya ichu sincipale orweela wa eleetera ekhaani ya Ehepiri!