Parataiso! Achu anakhaviherya opaka mikwaha, annavuwiha mapuro oreeraxa yaawo analikana ni “parataiso” weiwo achu anaweryaaya wiichuuwa ni ocuwala makacamiho aaya oothene. Nyenya hiyaano noosuwela soothene sineereya, vaavaa achu anakookelaaya owaani, ichu inakhala ntoko saakhalenlaaya khalai.

Chiryene, achu oothene annachuna okhala mmapuro siyaala. Nyenya akina anniikoha: ‘Mpwanne “parataiso” tahi oloha? Waakhanle wi ti hiiha, ntakhara heeni wiiwaru elociwaka sa parataiso nnakhalaahu ootikhiniheya? Mpwanne parataiso onahaala okhala eeparipari?’

Variyari va iyaakha sincipale, olociwa wa parataiso onnaatikhiniha achu ancipale. Ancipale annooniherya nchuno nenla nthowa na yeeyo Piipiliya onaloceiye sa “ematxa ya w’Edeni.” Vano ntakhara heeni nipuro nle naaryaaya noochuneya? Piipiliya onnanleela ariki: “Apwiya Muluku, yàmeliha vatxheyani miri sa miloko-miloko: sàri sorèra wona nave sawima saya sàri sosiva.” Emaca yeeyo naari nipuro nooreera nave naphaama wi achu ekhalekemo. Navetho echu yaari yootikhiniha ti yawi waakhalawo mwiri “mmoha wovaha ekumi.”​—Maphatxuwelo 2:8, 9.

Mwawaacererya, liivuru a Maphacuwelo onnaloca sa mihice mixexe seiho saakhuma o emaca ya Eteni. Mihice miili sa seiho soosuweliwa ophiyerya olelo​—ntoko muhice Tikre (naari Hídequel) ni Eufrate. (Maphatxuwelo 2:10-14) Mihice seiha miili sinnavira mu elapo ya Irakhi, yeeyo khalai yaapaka makupa a elapo ya o Persiya, nave sinnaya o Kolfo Persiko.

Ophiyerya olelo, mwaha vooloca sa Parataiso veelaponi yavathi onnapaka makupa a sookhovelela sa achu o Persiya. Museu Arte de Filadélfia, empa onakuhiwamo ichu soohiyanahiyana ya o Estatu Unitu, yookhalawo etapeti emoha ya o Persiya ya esekulu 16 yeeyo enooniherya emaca yooreera erino miri ni ithutu nave emaca eyo yootekeliwa mukuso. Masu a o Persiya aphariheliwe ntoko “yootekeliwa mukuso” annataphulela tho “parataiso” nave iruku inaphwanyeya mu etapeti eyo enniiwanana ni yeeyo Piipiliya onaloceiye sa oreera wa emaca ya Eteni.

Mweeparipari, mwaha vooloca sa parataiso onnalociwa mu ilocelo soohiyanahiyana mu sookhovelela sa ilapo soothene. Vaavaa achu yaathaamaaya eyaaka mapuro makina, awo yaanakuxa moonelo aya vooloca sa Emaca ya Eteni. Nave, moovira wa iyaakha, mwaha ola waapacerya waakanyeryeya ni soororomela vamoha ni ithale seiho achu akina yaalocaaya. Ophiyerya olelo, mapuro ooreera achu aniichana ntoko parataiso.

Alipa ootholathola akina annaloca wi aaphwanya nipuro aariwo parataiso. Ntoko yootakiherya, Charles Gordon, mutokweene a anakhoco o Pritanika, mu eyaakha ya 1881, owo aaphiya mu ivilivili sa Seychelles. Owo aakhala ootikhiniheya ni oreera wa makupa aniichaniwa Vale do Mai, olelo nipuro nlo nsuweliwe ntoko patrimônio mundial, nave owo aaloca wi parataiso a Eteni aari vaavale. Mu nsana 15, mulipa ootholathola awiichaniwa Cristóvão Colombo, owo aapaka mukwaha ayaaka o evilivili ya Hispaniola, weiwo olelo oniichaniwawo Repuplika Tominikana ni o Haiti, nave owo tho aaloca wi oophwanya nipuro naari emaca ya Eteni.

Liivuru a miyaha sahiihaano, yoowo oniichaniwa Mapping Paradise (Opaka Maapa a Parataiso) onnaphwanyeyamo sooleeliherya vooloca sa maapa akhalai opwaha 190, maapa mancipale a yaawo onnaphwanyeyavo Atamu ni Eva eri mu emaca ya Eteni. Mapa a Beato a Liébana a nsana 13, yawooniherya ya yeeyo. Makupa oosulu a maapa yaawo, yookhalavo ekaaxa nave emaca ya Eteni erempwe veeri vaya. Va maapa, sookhalavo mihice mixexe seiho sirino nsina na “Tikre”, “Eufrate”, “Into” ni “Yortano”, nave muhice ti muhice onaya makupa maxexe a elapo. Ela yooniherya omwaramwaxeya wa Okristu mu elapo yoothene. Chiryene, hiyaano hansuwenle ti woowi aareiyewo parataiso, nyenya sooleeliherya seiha soothene sinnooniherya wi achu ovinyerya khalai ahooniherya nchuno na okhala mparataiso.

 Mulipa oorepa macipo awiichaniwa John Milton, aavuwa vancipale nthowa na orepa ncipo naarino muru Paraíso Perdido orweela mu mwaha onaphwanyeya mu Maphacuwelo vooloca sa yoocheka ya Atamu ni wiikariwa wawe mu Emaca ya Eteni. Ohoolo waya John Milton aarepa ncipo nikina naarino muru O Paraíso Reconquistado. Mu ncipo nenla John Milton aaloca yoolaiherya ya Muluku yawi achu anahaala okhalaka okhala wookhala mu Parataiso veelaponi yavathi. Owo aaloca “elapo yoothene enamukhala Parataiso.”

Ninnawerya wiiwexexa wi mwaha yoola wa Parataiso veelaponi yavathi, waanaasivela achu moovira wa elukuluku. Vano ntakhara heeni mahiku yaale achu anacuwalaaya? Akhweya nthowa na yeeyo liivuru Mapping Paradise olonceiye “alipa oopaka maapa aakhuwa moomalela nipuro aaphwanyeyeiyewo Parataiso.”

Achu ancipale yaawo anaya okerexa, anahusihiwa wi nnahaala oya wirimu, ohiya okhala veelaponi yavathi. Nave Piipiliya onnaloca mu Salumu 37:29: “Atxhu awokololowa anamwakhela elapo, anamukhala wa mahiku othene.” Woona wi elapo ahu ela tahi Parataiso, apwanne yoorepa ela enahaala waakhwanela? *

Yehova Muluku, yoowo aampanke Parataiso a emaca ya Eteni, oororomeliha wi onahaala weeriha wi elapo ekhale Parataiso. Oni eereno hai? Munnuupuwela wi Yesu oonihusiha ovekela ariki: “Omwene anyu orwe. Okhwela wanyu wereye, ntoko wirimu hiha vathiva.” (Mateu 6:10) Omwene yoowo, Mwene aya ori Yesu Kristu, ti yoowo onahaala weeriha wi elapo ekhale Parataiso. Nave onahaala omaliha olamulelo woothene orivovo olelo. (Daniyeli 2:44) Omwene ola onahaala waakhwaniherya soolaiherya soothene sa Muluku ntakhara elapo yavathi.

Khalai, Yehova aamveerela mulipa a miririmu Isaiya wi arepe makhalelo a Parataiso yoowo Muluku omulanhenryeiye. (Isaiya 11:6-9; 35:5-7; 65:21-23) Ichu soothene soonanara ineereya olelo, sinahaala ocakanela. Wiiceliwa, ohaawa, nthalu, owanawana, onanarihiwa elapo, soothene inahaala omala. Ninnoovekaani wi mwiivahe elukuluku wi mwaalakhanye soorepa iromoliwe woopaceryani wa eparakrafo yeela. Eyo enahaala wookhaviheryaani ororomela wi soolaiherya sa Muluku sinahaala waakhwanela. Achu yaawo anamwiiwelela Muluku anahaala okhala Mparataiso veelaponi yavathi ni okhalano onthamwene woolipa ni yoowo—ichu seiho Atamu ni Eva ayeleenlaaya.​—Wupulula 21:3.

Ntakhara heeni nnaphwanelaahu okhala oolekecheya wi ewehereryo ya Parataiso veelaponi yavathi tahi oloha nyenya eparipari? Nthowa na yeeyo Piipiliya onanleeleiye: “Erimu ti y’Apwiya [Yehova], nto elapo yavathi, ahàvaha ana a atxhu.” Muupuwele wi ela yoolaiherya ya Muluku, nave owo “Muluku ohinotha.” (Salumu 115:16; Titu 1:2) Ela yoororomeliha yoohakalaliha ni yootikhiniha Piipiliya onanivaheiye​—Okhala Mparataiso okhala wookhala!