1-3. (1) Nnaphwanela woonaka hai vooloca sa eparipari ya Piipiliya? Mphwanaphwanihe. (Moone eruku yoopacerya.) (2) Tiheeni nnahaalaahu othokororya mmwaha yoola?

OLELO, ti yawunlaana achu othuma echu mulooxa ohoolo waya ekookihe. Nave vaavaa achu anathumaaya echu mu interneti, awotho mwawooneya annatepa okookiha. Akhweya awo hanasiveliwano ni echu yeeyo athummaaya hiiha ntoko yuupuwelaaya wi yaahaala okhala hiiha naari akhweya yookhala echu enananre ni yeeyo. Mwawiihiiha awo annalakelela otoroka ni echu vyakala naari wi ekookiheryiwe ikhorowa saya.

² Hannaphwanela weerano yeeyo ni eparipari ya Piipiliya. Elukuluku ‘nnathumaahu,’ hannaphwanela “otumiha” eyo ti wi, vaavaa nnahuseryaahu, hinnachuna ohiya yeeyo. (Mwaalakhanye Masiposipo 23:23; 1 Timóteo 2:4) Ntoko nimanlaahu othokororya mmwaha ovirale, ninnamaliha elukuluku yincipale nihuseryaka eparipari. Navetho akhweya noohiya muteko yoowo waaliva ikhorowa sincipale. Navetho, noopaka matorokelo ntakhara onthamwene ahu ni akina, otoroka mukhalelo nuupuwelaahu ni neeraahu ichu, naari noohiya sookhovelela  ni meerelo yaawo ahinamuhakalaliha Yehova. Nyenya noolekecheya wi hiyaavovo echu nihin’yaahu muculi eri yasisapo opwaha mareeliho naakhenlaahu mu osuwela eparipari.

³ Yesu aahivaha niphwanaphwaniho vooloca sa mulipa a maroca yoowo aavya nluku nawaarya. Vaavaa mulopwana ole aaphwannyeiye nluku nawaarya, owo aahitumiha echu eri yoothene aareiyeno wi athume nluku nlo. Nluku nawaarya nle naathoonyerya Omwene wa Muluku. Mmukhalelo yoola, Yesu aahooniherya ochuneya waya wa eparipari wa yaale yaahaala waavya eyo. (Mateu 13:45, 46) Elukuluku naahusenryaahu eparipari woopaceryani, eyo tiwi eparipari vooloca sa Omwene wa Muluku ni iparipari soothene sookhweleya sa Piipiliya, hiyotho naahilakelela ohiya echu vyakala wi niwerye ophwanya eyo. Wakhala wi nootitelela ovaha esisapo eparipari, hanirwa nihiya. Nyenya moothananiha, achu akina a Muluku aamaala ovaha esisapo eparipari nave aahiya eparipari. Hiyaano hinnachuna opaka yeeyo! Nnaphwanela ochariha ekano ya Piipiliya wi ‘netxeke mwa eparipari.’ (Mwaalakhanye 3 Yohani 2-4.) Ela enataphulela ohela eparipari mu nipuro noopacerya ni wooniherya yeeyo orweela mwa mukhalelo nnakhalaahu. Nyenya ntakhara heeni nave mmukhalelo taani muchu oneereiye ‘atumihe’ naari ohiya eparipari? Nni nroromele hai wi hanirwa neerano yeela? Nave nni nlakelele hai moopwaha ‘wetxa mwa eparipari.’?

4. Ntakhara heeni ancipale hiyaatitelenle weeca mu eparipari mu elukuluku ya Yesu?

⁴ Mu elukuluku ya Yesu, akina yaawo yeemerenrye eparipari wuupaceryani, hiyaatitelenle weeca mu eparipari. Ntoko yootakiherya, Yesu amanle opaka yootikhiniha ni ovakulela muloko mutokotoko, muloko ole waahimuchara mmakupa makina a Eniya yo Kalileya. Nave voocharela Yesu aahiloca masu yaawo yaawuukhunle yaawo: “Paripari txhiryene miyo kinnolèlani: mwahikhurà mwili wa Mwana a mutxhu nave mwahiwuryà nikhami nawe, himukhalano ekumi.” Ohiya omukoha Yesu yootaphulela ya yeeyo, awo yaaloca: “Masu ala t’òvilasa! Tani onawerya owiriyana?” Ntoko yookhumelela, “amuhuserya awe antxipale yàkòkela otxhuli ni yàhiya wetxa ni yowo.”—Yohani 6:53-66.

5, 6. (1) Ntakhara heeni akina annahiya eparipari olelo? (2) Muchu aahaala opheruwa hai mu eparipari?

⁵ Moothananiha, akina olelo aahiya tho eparipari. Ntakhara heeni? Akina yaahikwaculeya orweela wa matorokelo mmukhalelo wa wiiwexexeya wa eciciri vyakala ya Piipiliya naari akina hiyaasiveliwe elukuluku muchu mukina aavanheiye ekano orweela Mpiipiliyani naari yaahikhalano ohiiwanana otokweene ni muchu a mmulokoni. Akhweya awo yaacharinhe mahusiheryo oowoka a alipa oomwaryeya ni akina yaawo analoca sawootha ntakhara hiyo. Ala mathowa a vakhaani yaawo anaweeriha akina omuhiya Yehova ni muloko. (Ahebri 3:12-14) Yaahala okhala yaphaama wa yaawo waakhanle wi aamuroromela Yesu, hiiha ntoko Petro enreiye! Vaavaa akina yaaryaaya awuukhuwa ni masu a Yesu, owo aahaakoha arummwa awe waakhanle wi awotho yaanachuna omuhiya. Petro aahaakhula: “Pwiya nni n’ye wa wani? Weyano orino masu a ekumi.”—Yohani 6:67-69.

⁶ Akina yaahihuwela mu eparipari vakhaani  vakhaani, akhweya ehoonaka echu taani yeereya. Muchu yoowo onahiya eparipari vakhaani vakhaani ori ntoko mwaaceya yoowo onahuwela vakhaani vakhaani mu ephiro awe. Piipiliya onnanlopola wi nikhaleno ekaasoope “wi nihihuwele.” (Ahebri 2:1) Wiiliwiili muchu yoowo onahuwela mu eparipari henataphulela wi eenreno mwaayiini. Nyenya owo onneemererya wi onthamwene awe ni Yehova okhale wooceecheya, nave mu elukuluku owo onnayeleela onthamwene owo. Nni nroromele hai wi ela eheereye ni hiyo?

7. Tiheeni eni enikhaviherye ohitumiha eparipari?

⁷ Wi ntitelele weeca mu eparipari, nnaphwanela weemererya ni wiiwelela echu eri yoothene yeeyo Yehova onaloceiye. Nnaphwanela weeriha eparipari okhala echu yoochuneyaxa muukumini mwahu ni ochariha malakiheryo a Piipiliya mu echu vyakala nnapakaahu. Mu nivekelo, Mwene Tavite, aahimuroromeliha Yehova: “Kini kinecha mwiparipari anyu.” (Salumu 86:11) Tavite aahilakelela otitelela weeca mu eparipari, navetho hiyo nnaphwanela weerano emohamoha. Wakhala wi hinneerano, nnampacerya wuupuwela ichu seiye nihin’yaahu ntakhara eparipari nave akhweya nnamuchuna okookela ikina sa seiyo. Nyenya hannaphwanela othanla eparipari taani ya Mpiipiliya nnachunaahu weemererya ni yeeyo nihinachunaahu weemererya. Nnaphwanela weeca mu “eparipari yawakhwanela.” (Yohani 16:13) Mmwaha ovirale, noothokororya ichu thanu nihin’yaahu muculi ni yoolakelela ya ohuserya ni opharihela eparipari. Vano nnahaala woona mukhalelo nneeraahu nroromele wi hanrwa nchikela ichu seiye nihin’yaahu muculi.—Mateu 6:19.

8. Mukhalelo Mukristu onaphariheleiye elukuluku awe waahaala omweeriha hai ohuwela mu eparipari? Mvahe yootakiherya.

⁸ Elukuluku. Wi nroromele wi hinihuwela mu eparipari, nnaphwanela opharihela mwa miruku elukuluku ahu. Naahikhalano ekaasoope, nnahaala omalihaka elukuluku ahu yincipale mu mathatelo, mu ichu soohakalaliha, otholathola mu interneti, naari omoona televisau. Naamwi ekhalaka wi ichu seiya tahi sooheseya, nnahaala opharihelaka elukuluku yeeyo naapharihelaahu mu yoohuserya ni mmuteko woolaleerya. Echu yoolikana ni yeela yoheereya ni Ema. * (Moone masu avathi.) Ovinyerya woonahanoni, aanasiveliwa ni akavalo nave aaneeca ni yaawo mpuro ori woothene aayeiyewo. Nave aahipacerya wiisoona okhalano nthowa vooloca sa elukuluku aamaliheiye mu mathatelo awe nave aahilakelela otoroka ichu aaheleiye vanipuro noopacerya. Ema aahihuseryatho orweela wa yaweereya ya Kory Wells, murokora yoowo aasiveliwa ni akavalo. * (Moone  masu avathi.) Vano Ema onamaliha elukuluku yincipale amurumeelaka Yehova, nave owo onnakhalano elukuluku yincipale ni amusi awe ni asinthamwene yaawo anamurumeelatho Yehova. Owo onniisoona okhala vakhiviru va Muluku nave ori oohakalala osuwela wi onnapharihela elukuluku awe mwamiruku.

9. Ichu soomwiilini sini sikhale hai soochuneyaxa wa hiyo?

⁹ Ichu soomwiilini. Wi ntitelele weeca mu eparipari, hannaphwanela weemererya wi ichu soomwiilini ikhale soochuneyaxa wa hiyo. Vaavaa naahusenryaahu eparipari, naahisuwela wi omurumeela Yehova echu yookhweleyaxa opwaha ichu soomwiilini, nave naari oohakalala ohiya muculi echu eri yoothene ntakhara eparipari. Nyenya moovira wa elukuluku, akhweya nnanwoona akina ethumaka ikhankoonya samutano sa vasulu naari epuhaka ichu ikina seiyo inathummwa ni ikhorowa. Hiyo nnampacerya woona wi ninnayeleela. Nnampacerya oheeliwa murima ni yeeyo nryaahuno nave nipacerye otikitherya muupuwelo ahu mu ichu soomwiilini opwaha omurumeela Yehova. Ela ennanuupuserya yeeyo yeeren’ye ni Tema. Owo aahisiveliwa vancipale ni “itxhu sa elapo yela” ophiyerya ohiya murici aareiyeno ni murummwa Paulo. (2 Timóteo 4:10) Akhweya Tema aahisivela moopwaha ichu soomwiilini opwaha osivela omurumeela Muluku. Naari akhweya owo haachuna wiilipiserya wi arumeele ni Paulo. Tiheeni nnahuseryaahu orweela wa yeela? Akhweya khalai naanasiveliwa ni ichu soomwiilini. Naahikhalano kasope, osivela ichu soomwiilini onahaala wunnuwa mwa hiyo wanaawiili nave onamukhala woolipa ophiyerya oyeleela osivela wahu eparipari.

10. Ovolowela taani nnaphwanelaahu okhooca?

¹⁰ Onthamwene ni akina. Wi ntitelele weeca mu eparipari, hannaphwanela weemererya wi yaale ahinamurumeela Yehova enivolowele. Vaavaa naahusenryaahu eparipari, onthamwene ahu ni yaale ahiri Anamoona a Yehova ophitaanyerya amusi ahu waahitorokeya. Akhweya akina yaanacicimiha soororomela sahu ivyaani, nave akina yaanaakaaha seiyo. (1 Pedro 4:4) Mweeparipari, ninnachuna okhalano onthamwene waphaama ni amusi ahu ni waakhaliha mweepewe. Nyenya hannaphwanela omukakhela Yehova okhwipi nichunaka waahakalaliha amusi. Nave hiiha ntoko nihusenryaahu mu 1 Korinto 15:33, asinthamwene ahu awaacameleya anaphwanela okhala yaale anamusivela Yehova.

11. Nni nsepe hai muupuwelo ni meerelo ooriipiheya?

¹¹ Muupuwelo ni meerelo ooriipiheya. Wi neece mu eparipari, nnaphwanela okhala aweela, mmoonelo wa Yehova. (Isaiya 35:8; mwaalakhanye 1 Pedro 1:14-16.) Vaavaa naahusenryaahu eparipari, naahipaka matorokelo muukumini mwahu wi ncharihe malakiheryo a Piipiliya. Akina aapaka matorokelo matokotoko. Nyenya nlelo nnaphwanela okhalano kasope wi nihitoroke ekumi ahu yaweela ni meerelo oocapaheya. Tiheeni eni enikhaviherye ovootha yaweeha vyakala ya opaka ocapaheya? Muupuwele yeeyo Yehova ovanheiye wi niwerye okhala aweela. Owo oovaha ekumi yasisapo ya Mwanawe ookhweleyasa, Yesu Kristu! (1 Pedro 1:18, 19) Wi nikhaviheryeye otitelela okhala aweela vamiithoni va Yehova, ilukuluku soothene nnaphwanela wuupuwela ochuneya wa mukucho wa woopola wa Yesu.

12, 13. (1) Ntakhara heeni ninnaphwanela woona mahiku avameekhaaya hiiha ntoko Yehova onooneleiye? (2) Tiheeni nnahaalaahu othokororya voocharela?

 ¹² Sookhovelela ni meerelo yaawo ahinamuhakalaliha Muluku. Achu aveemusini, asinthamwene oomutekoni, ni asinthamwene oosikola anamweererya oneeriha okhalaka ni yaawo mu saweera saya. Tiheeni eni enikhaviherye ovootha okhinyererya ntakhara ophwanyeya va sookhovelela ni va mahiku avameekhaaya yaawo ahinamuhakalaliha Yehova? Nnaphwanela wuupuwela ntakhara heeni Yehova haneemererya mahiku yaawo. Nnanwerya otholathola mu soolaleeryiwa sahu nave niisuupuserye mukhalelo mahiku yaawo yaapacenryaaya. Elukuluku nnuupuwelelaahu mathowa a mu Soorempwa ananeeriha ohipaka makupa mu mahiku yaawo, ninnaroromela wi ninneeca mu ephiro yeeyo “eri yowasivela Apwiya [Yehova].” (Éfeso 5:10) Wakhala wi ninnamuroromela Yehova ni Masu awe, hinni nikhale awoova ntakhara yeeyo akina anuupuwelaaya.—Masiposipo 29:25.

¹³ Hiyo ninnawehererya otitelela weeca mu eparipari okhala wookhala. Tiheeni eni enikhaviherye olakelela otitelela weeca mu eparipari? Sookhalavo ichu chaaru nnaphwanelaahu opaka.

14. (1) Otitelela omuhuserya Piipiliya oni onikhaviherye hai olakelela ohihiya eparipari? (2) Ntakhara heeni ninnachuna miruku, wiisuumaaliha ni osuwela?

¹⁴ Yoopacerya, mutitelele omuhuserya Piipiliya nave muupuwele mwawiiseela vooloca sa yeeyo munahuseryaanyu. Mweerekeno yeela moohihiyererya. Vaavaa munahuseryaanyu vancipale, munahaala osivelaka vancipale eparipari nave munamulakelela ohihiya yeeyo. Masiposipo 23:23 annanleela ‘othuma eparipari’, navetho othuma “miruku, wiisuumaaliha ni osuwela.” Henaakhwanela pahiru osuwela eparipari ya Piipiliya. Nnaphwanela opharihela yeeyo muukumini mwahu. Vaavaa nnaphwanyaahu osuwela, ninnathukumanya vamoha ichu seiyo nihusenryaahu ni seiye nsuwenlaahu khalai. Miruku sinnaneeriha opaka ichu mwawiiwanana ni yeeyo nsuwenlaahu. Ilukuluku ikina eparipari ennanivaha ekano moorweela wa onooniherya matorokelo yaawo nnaphwanelaahu opaka. Nnaphwanela okhala awaakuveya waakhulela ekano, yeeyo Piipiliya onaloceiye wi ti yoochuneyaxa opwaha ewooro.—Masiposipo 8:10.

15. Eparipari enanikhapelela hai ntoko nrampa?

¹⁵ Yanaawiili, mulakelele opharihela eparipari mu okumi anyu wa nihiku ti nihiku. Piipiliya onnalikanyiha eparipari ni nrampa na mukhoco. (Éfeso 6:14) Mu elukuluku yakhalai, nrampa naanamukhaviherya mukhoco nave naanamukhapelela okhoconi vaavaa nno naamakiwaaya moophwanelela. Wakhala wi ooyeleela nlo, hinaawerya omukhaviherya.  Eparipari enanikhaviherya hai hiiha ntoko nrampa? Wakhala wi noheeriha eparipari okhala vakhiviru va hiyo, eyo enahaala onikhapelela orweela wa wuupuwela mmukhalelo wooheseya, nave enamunikhaviherya opaka soolakelela saphaama. Vaavaa nnakhalaahuno makacamiho matokweene naari weereryiwa opaka echu yoonanara, eparipari ya Piipiliya enamuneeriha olakelela opaka yeeyo eri yawookololowa. Hiiha ntoko nakhoco aahaaleiye oya okhoconi ahirino nrampa nawe, hiyaano hannaphwanela ohiya eparipari. Nnaphwanela ororomela wi ninnapharihela eparipari ya Mpiipiliya mu makupa oothene a okumi ahu. Nakhoco tho aaphwanela ohela nlema nawe mu nrampa. Haya noone mukhalelo nneeraahu neereno emohamoha.

16. Ohusiha eparipari onanikhaviherya hai weeca mu eparipari?

¹⁶ Yaneeraru, mwaahusihe akina eparipari ophiyerya munaweryelaanyuvo. Piipiliya onnalikanyihiwa ni nlema. Hiiha ntoko nakhoco aphaama aatiteleleiye omakelela nlema mu nrampa nawe, nnaphwanela otitelela wiimakelela Masu a Muluku. (Éfeso 6:17) Oothene ahu nnanwerya okhala ahusiha aphaama, “óluluwelano phama masu éparipari.” (2 Timóteo 2:15, NN) Vaavaa nnampharihelaahu Piipiliya wi naahusihe akina, nnamusuwela eparipari moopwahaxa ni osivela yeeyo. Nave nnamukhala oolakelelaxa otitelela weeca mu eparipari.

17. Ntakhara heeni eparipari eryaaya yoochuneyaxa wa nyuwo?

¹⁷ Eparipari yamahala yasisapo enarweela wa Yehova. Eyo enneeriha okhala wooweryeya wa hiyo okhalano onthamwene wawaacameleya ni Tiithi ahu awirimu. Ela echu yasisapo etokweene nnaphwanelaahu okhalano. Yehova oonihusiha vancipale, nyenya ala mapacereryo pahi! Owo ooniroromeliha onihusiha okhala wookhala. Mwawiihiiha, mvahe esisapo eparipari hiihaa ntoko mwaahaalaanyu ovaha esisapo nluku nawaarya. Mutitelele ‘othuma eparipari nave muhitumihe.’ Voocharela, moolikana ni Tavite, munahaala okhapelela yoororomeliha anyu wa Yehova: “Kini kinecha mwiparipari anyu.”—Salumu 86:11, NN.