1. Ntakhara heeni oothene ahu ninnachuna nihakararyo?

OOTHENE ahu ninnachuna nihakararyo. Akhweya okumi ahu woosareya ni woova, oceecheya, ni wiipiwa murima. Nnamuhooseya nthowa na ereca, nthowa na wuuluvala, naari nthowa nawi muchu yoowo naamusivelaahu ookhwa. Akina a hiyo annakhalihiwa moonanara ni akina. Mwawaaceererya, achu anirukurenrye anamvira ekhalaka oowali. Mweeparipari, “ilukuluku sokatxamiha” seiya sinnooniherya wi nnakhala mu “mahiku òmaliherya” nave nihiku ti nihiku ninnaacamela mu elapo evyaani. (2 Timóteo 3:1) Nlelo, akhweya nooweherya mu elukuluku yincipale waakhwanela wa soororomeliha sa Yehova, nave ninnakumana ni soohoosa sincipale. Vanonto ti woowi nneeraahu niphwanyewo nihakararyo?

2, 3. (1) Tiheeni nnasuwelaahu vooloca sa Hapakukhi? (2) Ntakhara heeni nnahaalaahu omuthokororya liivuru a Hapakukhi?

² Hankooni nimuthokororye liivuru a Hapakukhi wi niphwanye naakhulo na nikoho nenla. Naamwi Soorempwa sihinivahaka  sooleeliherya sincipale vooloca sa okumi wa Hapakukhi, liivuru awe toolipiha. Nsina Hapakukhi mwawooneya nnataphulela “Okhupaarela Otokotoko.” Ela enamutaphulela olopola wa Yehova woosivela yoowo onaahakararya alapeli awe. Naari ela enamutaphulela tho mukhalelo alapeli awe aniimakelelaaya mwa Yehova. Hapakukhi aahiloca ni Yehova, nave owo aahimveerela orepa ovaanela wuuwu nthowa nawi Owo aahisuwela wi naahaala ophura orweela wa yeela.—Habakukhi 2:2.

³ Ovaanela wuuwu waarivo variyari va mulipa miririmu awuukhwa ni Yehova ti yoothene yeeyo Piipiliya onanleeleiye vooloca sa Hapakukhi. Nyenya liivuru awe onnapaka makupa a “sothene iri mwa Sorempwa sa Muluku . . . wi, nivelelaka ni nihakalalaka ni masu a nliivuru na Muluku, nikhaleno owehererya.” (Aroma 15:4) Liivuru a Hapakukhi oni amulipihe hai muchu ti muchu a hiyo? Owo onamunikhaviherya woona yootaphulela ya ororomela mwa Yehova. Nave yooloherya ya Hapakukhi ennanilipiha wi nnanwerya okhalano murecele wa mmuupuweloni moohipwacha makacamiho taani naari saweeha nnakumanaahuno.

4. Ntakhara heeni Hapakukhi aahiphweeleya?

⁴ Mwaalakhanye Habakukhi 1:2, 3 Hapakukhi aakhala mu elukuluku yookacamihaxa. Achu yaawo yaamurukurenrye yaari oonanara murima ni a nlala ntokotoko. Makupa ari oothene aavareryeiye, owo aawoona Aisarayeli ekhalihanaka moonanara ni moohiroromeleya. Hapakukhi aahikoha: ‘Ophiyerya liini, onanara wuuwu oneeraaya omale? Ntakhara heeni Yehova onalekeleiye weeravo echu ntakhara yeela?’ Owo aahikhala oophweeleya. Mwawiihiiha owo aahimveka Yehova wi eerevo echu. Hapakukhi akhweya aahipacerya wuupuwela wi Yehova haapwacha achu Awe naari wi Owo haahaala weeravo echu. Apwanne mohintoko wiisoona mmukhalelo woolikana?

5. Tiheeni nnahuseryaahu orweela mu liivuru a Hapakukhi? (Moone eruku yoopacerya.)

⁵ Apwanne Hapakukhi aapanke makoho yaala nthowa nawi aahihiya omuroromela Yehova ni soororomeliha sawe? Hooye! Hapakukhi aamveka Yehova wi amukhaviherye vooloca sa minikwa ni makacamiho aareiyeno, yeeyo enooniherya wi owo haavelavenle owehererya nyenya nlelo aanamuroromela Yoowo. Mwawooneya Hapakukhi aari awuukhuwa ni awaakanyeryeya mmuupuweloni. Owo hiiwexexa ntakhara heeni Yehova aanalekela weeravo echu nave ntakhara heeni Yehova aaheemererya wi owo ahooxeye vatokovene. Nthowa na Yehova omveerela Hapakukhi orepa wuukhuwa wawe ennanihusiha echu yookhweleya. Hannaphwanela woova omuleela Yehova wuukhuwa wahu woothene naari minikwa sahu. Mmahiku ahu, owo mweepewe onnaniwopa wi nivekeleke nave nimuleele mukhalelo nnoonaahu. (Salumu 50:15; 62:8) Masiposipo 3:5 annanceenyerya oothene ahu: “Waroromeleke Apwiya ni murima à wothene, ohiroromeleke osuwela wà.” Hapakukhi aahipharihela masu yaala mu okumi awe.

6. Ntakhara heeni ovekela oryaaya woochuneya?

 ⁶ Hapakukhi aahimuroromela Yehova, Nthamwene ni Tiithi awe, nave aahimwaacamela yoowo. Hapakukhi tahi wi uukhuwa nthowa na mukhalelo awe pahiru nave eererya otikitherya mwawiiwanana ni moonelo awe. Ohiya yeeyo, owo aahivekela vooloca sa moonelo ni wuukhuwa wawe. Ela yootakiherya yaphaama wa hiyo. Yehova, yoowo ori Namawiriyana a nivekelo, onnaniwopa wi nooniherye wi ninnamuroromela orweela mwa ovekela ni omuleela wuukhuwa wahu. (Salumu 65:2) Elukuluku nneeraahuno yeela, nnahaala woona mukhalelo Yehova onaakhuleiye mavekelo ahu. Nnahaala woona okhupaarela wawe woosivela vaavaa onanihakararyeiye ni onihoolela. (Salumu 73:23, 24) Owo onamunikhaviherya wiiwexexa ophiyerya mweeryo taani onooneiye mukhalelo ahu, moohipwacha saweeha taani nnahoolelaahu. Ovekela wa Yehova mukhalelo mmoha waphaama nnooniheryaahu wi ninnamuroromela yene.

7. Yehova aakhulenle hai vaavaa Hapakukhi aamulenleiye Owo vooloca sa wuukhuwa wawe?

⁷ Mwaalakhanye Habakukhi 1:5-7. Hapakukhi amanle omuleela Yehova wuukhuwa wawe, akhweya owo aaniikoha mukhalelo Yehova aahaaleiye waakhulela. Ntoko Tiithi oosivela, Yehova aahiiwexexa mukhalelo Hapakukhi ooneiye. Owo aahisuwela wi Hapakukhi aanahooxeya nave wi aahimveka nikhaviheryo. Mwawiihiiha Yehova haamusamenle Hapakukhi nyenya aahimuleela yeeyo Owo aahaaleiye opaka moohilekela wa Ayuta oohiroromeleya. Mweeparipari, Hapakukhi aari muchu mmoharu yoowo Yehova aamulenleiye wi olakiwa wa Ayuta oohiroromeleya waari vakhiviru.

8. Ntakhara heeni naakhulo na Yehova hinaari nenlo Hapakukhi aaweheryeiye?

⁸ Yehova aahimuleela Hapakukhi wi aari ooreheryeya weeravo echu. Owo aahaala waalaka achu a nlala ni oonanara murima o Yuteya. Moorweela wa oloca wi “mmahiku anyu,” Yehova aahooniherya wi othoriha iwo waahaala orwa elukuluku Hapakukhi naari Aisarayeli nlelo ekhanle. Naakhulo na Yehova hinaari nenlo Hapakukhi aaweheryeiye. Achu o Papulu yaahitepa otakhala. Awo Yaahitepa okhala a nlala waapwaha Aisarayeli yaawo yaasuwenle malakiheryo a Yehova. Vano ntakhara heeni Yehova aahaaleiye opharihela nloko nenla nootakhala wi aalake achu awe? Ela yaahaala otannya wiicela otokotoko wa Ayuta. * (Moone masu avathi.) Waakhanle wi mwaari Hapakukhi mwaahaala woona hai?

9. Makoho taani makina Hapakukhi aapankeiye?

⁹ Mwaalakhanye Habakukhi 1:12-14, 17. Naamwi Hapakukhi iiwexenxe wi Yehova aahaala waapharihela achu o Papulu wi aalake achu oonanara yaawo yaamurukurenrye, owo nlelo aari awuukhuwa. Nyenya owo aari awiiyeviha nave aahilakelela otitelela omuroromela Yehova. Mweeparipari, owo aalonce wi Yehova aahititelela okhala “Mwala” awe. (Malamulo 32:4; Isaiya 26:4) Hapakukhi aahilekecheya wi Muluku toosivela ni eepewe, mwawiihiiha owo hoova ompakela Yehova makoho makina mancipale, ntoko: Ntakhara heeni Yehova aaheemererya wi ichu o Yuteya sinanare nave achu awe ehooxeye vatokotoko? Ntakhara heeni owo haapanke echu vyakala mwawaakuveya? Ntakhara heeni Aikuru Soothene aahititelela okhala ‘omàlela’ ni otumerya otakhala yoowo waasaren’ye  moorukurerya? Opwaha soothene, Yehova ti “Muluku [aweela],” ‘mitho awe àtepa warya wi evilele wona itxhu sonanara.’

10. Ntakhara heeni ilukuluku ikina nnamwiisoona hiiha ntoko Hapakukhi?

¹⁰ Ilukuluku ikina nnamwiisoona hiiha ntoko Hapakukhi. Ninnanwiriyana Yehova. Ninnamuroromela, ninnaalakhanya ni ohuserya Masu awe, yaawo analipiha ewehereryo ahu. Ninniiwatho vooloca sa soororomeliha sawe vaavaa nnawiriyanaahu yeeyo marehereryo awe ananihusihaaya. Nyenya akhweya nlelo nnamwiikoha, ‘Ohooxeya wahu oni omale liini?’ Nnanwerya ohuserya echu orweela wa yeeyo Hapakukhi aapankeiye voocharela.

11. Tiheeni Hapakukhi aalakelenleiye weera?

¹¹ Mwaalakhanye Habakukhi 2:1. Ovaanela wa Hapakukhi ni Yehova waahimvaha murecele wa mmuupuweloni. Ela yaahimweeriha okhala oolakelela onweherya Yehova wi eerevo echu. Hapakukhi aahuuluulela yoolakelela awe vaavaa aalonceiye: “Kinnawehererya kimanle . . . nihiku nothanana.” (Habakukhi 3:16) Alapeli akina a Muluku annatitelela tho onweherya Yehova moovilela wi eerevo achu. Yootakiherya aya ennanilipiha woona wi eyo ennooniherya wi hiyotho nnanwerya opaka emohamoha.—Mikeya 7:7; Tiyako 5:7, 8.

12. Tiheeni nnahuseryaahu orweela wa Hapakukhi?

¹² Tiheeni nnahuseryaahu orweela wa yoolakelela ya Hapakukhi? Yoopacerya, hannaphwanela ohiya ovekela wa Yehova moohiphwacha makacamiho nryaahuno. Yanaawiili, nnaphwanela owiriyana yeeyo Yehova onanleeleiye orweela wa Masu awe ni mareheryo awe. Nave nnaphwanela onweherya moovilela Yehova wi eerevo echu nave nroromele wi owo onammaliha wiicela wahu mu elukuluku awe yoophwanelela. Wakhala wi noomutakiherya Hapakukhi, nnamukhalano murecele wa mmuupuweloni, nave nnanwerya ovilela. Ewehereryo ahu enamunikhaviherya okhala oovilela ni oohakalala moohipwacha makacamiho taani nryaahuno. Ninnaroromela wi Tiithi ahu awirimu onahaala weeravo echu.—Aroma 12:12.

13. Yehova aamuhakaranrye hai Hapakukhi?

¹³ Mwaalakhanye Habakukhi 2:3. Ninnaroromela wi Yehova aahitepa ohakalala woona wi Hapakukhi aahilakelela onweherya Yene wi eerevo echu. Aikuru Soothesene aanasuwela chiryene yeeyo yaamohoosa Hapakukhi, mwawiihiiha Owo aahimuhakararya mulipa a miririmo nave moosivela aahimulipiha wi Owo aahaala waakhula makoho awe. Hapakukhi aahaala woopowa ni wuukhuwa wawe woothene. Eyo yaakhala ntoko wi Yehova aamuleela Hapakukhi ariki: “Pahiru okhale oovilela nave okiroromele. Kinahaala waakhula nivekelo naa, naamwi ekhalaka wi enamviravo elukuluku yincipale.” Mwawiihiiha owo aahimulipiha Hapakukhi otitelela oweherya. Vookuchulani, mulipa miririmu haki akhale awuukhuwa.

14. Tiheeni nnaphwanelaahu olakelela opaka vaavaa nnahooseyaahu ni saweeha?

 ¹⁴ Hiyotho nnaphwanela onweherya Yehova wi eerevo echu. Nnaphwanelatho owiriyana moopwacha yeeyo onanleeleiye. Voocharela nnahaala okhalano nroromelo ni murecele wa mmuupuweloni moohipwacha saweeha seiyo sinanihoosa. Yesu ooniceenyerya ohitikitheryeya mu “mahiku” yaawo Muluku ohinileenleiye. (Saweriwa T’arummwa 1:7) Nnaphwanela ororomela wi Yehova oosuwela elukuluku yoophwanelela ya weeravo echu. Mwawiihiiha, hannaphwanela ovelavela nyenya nnaphwanela okhala awiiyeviha ni oovilela nave nikhaleno nroromelo mwa Muluku. Nave vaavaa nnaweheryaahu, nnaphwanela opharihela elukuluku ahu mwamiruku nave nimurumeele Yehova ophiyerya nnaweryelaahuvo.—Marko 13:35-37; Galasya 6:9.

15, 16. (1) Soororomeliha taani nnaphwanyaahu mu liivuru a Hapakukhi? (2) Soororomeliha seiya sinanihusiha eheeni?

¹⁵ Yehova oororomeliha: “Mulipa awokololowa onamukhala wa nthowa na ororomeleya wawe,” nave “osuwela w’Apwiya òvuwa onamusareya mwelaponi mothemwene.” (Habakukhi 2:4, 14) Chiryene, Yehova oororomeliha waavaha ekumi yoohimala yaale ari oovilela nave anamuroromela yene.

¹⁶ Yoororomeliha yeela enaphwanyeya mu Habakukhi 2:4 ti yoochuneyasa woona wi murummwa Paulo aahuuluulela ikwaha chaaru  mu ikaarata sawe! (Aroma 1:17; Galasya 3:11; Ahebri 10:38) Nnaphwanela ororomela wi moohipwacha makacamiho taani ananihoosa, nnahaala woona soororomeliha sawe saakhwanelaka wakhala wi nootitelela okhala oororomeleya wa yoowo. Yehova onachuna wi ntikitheryeye mu ewehereryo ahu ya omwaahiyu.

17. Tiheeni Yehova oniroromelinheiye wi onahaala opaka ntakhara hiyo wakhala wi noomuroromela?

¹⁷ Liivuru a Hapakukhi ookhalano nihusiheryo nakuru wa oothene ahu nnakhala mu mahiku yaala ookuchula. Yehova oororomeliha ekumi yoohimala wa muchu ti muchu awookololowa yoowo onaroromela mwa yoowo. Mwawiihiiha hankooni ntitelele olipiha nroromelo nahu mwa Muluku, moohipwacha makacamiho ni sawuukhula nryaahuno. Yeeyo Yehova aalonceiye wa Hapakukhi ennanilipiha wi Owo onamunikhaviherya nave onamunivulusa. Owo onnaniveka mweepewe wi nimuroromele nave niweherye moovilela elukuluku yoophwanelela yeeyo Omwene awe oneeraaya olamulele elapo yavathi. Mu elukuluku yeeyo, elapo enamusareya achu oohakalala ni a murecele yaawo anamulapela Yehova.—Mateu 5:5; Ahebri 10:36-39.

18. Masu a Yehova yamvolowenle hai Hapakukhi?

¹⁸ Mwaalakhanye Habakukhi 3:16-19. Yeeyo Yehova aamuleenleiye Hapakukhi yaahimvolowela vatokovene. Hapakukhi aahuupuwelela mwawiiseela ichu sootikhiniha seiyo Yehova aapankeiye wa achu awe khalai. Vano nroromelo nawe mwa Yehova naahilipiheya. Owo aahiroromela wi Yehova aahaala weeravo echu moohilekela! Eyo yaahimulipiha Hapakukhi, naamwi aasuwenle wi aahaala ohooseya mu elukuluku vakhaani. Hapakukhi haarino minikwa. Ohiya yeeyo, owo aahiroromela moomalela wi Yehova aahaala omvulusa. Mweeparipari, yeeyo owo olonceiye mu eciciri khumi nathanu nararu ananwerya okhala masu mamoha ookhweleyasa yaawo nnaalakhanyaahu Mpiipiliyani anooniherya nroromelo. Alipa oomuhuserya Piipiliya akina aneemererya wi awo anataphulela: “Kinamucupha nuuhakalala mwa Apwiya; kinamurukurerya ni weeliwa murima mwa Muluku.” Nla nihusiheryo ntokotoko wa oothene hiyo! Tahi wi Yehova onanivaha pahi soororomeliha sa omwaahiyu, nyenya onnaniroromeliha wi moohilekela onahaala okhwaaniherya soororomeliha seiyo.

19. Nni nihakararyiwe hai ni Yehova, hiiha ntoko Hapakukhi?

¹⁹ Echu yoochuneya nnahuseryaahu mu liivuru a Hapakukhi ori omuroromela Yehova. (Habakukhi 2:4) Wi ntitelele omuroromela Yehova, nnaphwanela olipiha onthamwene ahu ni yoowo. Mwawiihiiha ela ti yeeyo nnaphwanela opaka (1) otitelela ovekela nimuleelaka Yehova vooloca sa wuukhuwa ni wiiniwa wahu murima woothene. (2) Owiriyana moopwacha yeeyo Yehova onanleeleiye Mmasu awe, ni ochariha ohoolela onanivaheiye orweela mmarehereryo awe. (3) Okhala oororomeleya ni oopisa murima vaavaa nnanweheryaahu Yehova wi akhwaaniherye soororomeliha sawe. Ela ti yeeyo Hapakukhi enreiye. Naamwi owo aari oophweeleya elukuluku aapacenryeiye ovaanela ni Yehova, omakuchuwelo wa yeela, owo aari oolipiheya ni oohakalalaxa! Wakhala wi ninnamutakiherya Hapakukhi, hiyotho nnamuhakararyeya moorweela wa okhupaarela woosivela wa Tiithi ahu, Yehova. Nihakararyo taani ntokotoko nneeraahu niphwanye mu elapo yeela yoonanara?