1, 2. Vaavaa naatitelenlaahu oya vahoolo, tiheeni naahusenryaahu? Mvahe yootakiherya.

MWAANYIHERYE wi muchu oomvaha mwaana mukhaani yamahala. Evinyaka asitiithi a mwaana emuleela owo: “Weere koothamalela.” Owo eerano yeeyo, nthowa nawi asitiithi awe aamuleela opaka yeeyo. Nyenya vaavaa mwaana onannuweiye, owo onnapacerya wiiwexexa ntakhara heeni asitiithi awe yuupuwenlaaya wi waari wookhweleya oothamalela vaavaa akina anapakaaya ichu mweepewe. Vano, owo onnaceenyeryeya waathamalela akina meekheiye nthowa nawi owo oohuserya okhala muchu oothamalela.

² Echu yoolikana yoheereya ni hiyo. Vaavaa naapacenryaahu ohuserya eparipari, naahihuserya wi ti yoochuneya wiiwelela malamulo a Yehova. Nyenya elukuluku natitelenlaahu oya vahoolo, naahihuserya sincipale vooloca sa muupuwelo awe, eyo tiwi, yeeyo onasiveleiye, yeeyo ohinasiveleiye, ni mukhalelo owo onooneiye miyaha. Elukuluku nnahiyaahu wi muupuwelo wa Yehova ovolowele soothanla ni saweera sahu, ninneeriha muupuwela awe okhala wawihu.

3. Ntakhara heeni enamukhala yoovila wuupuwela hiiha ntoko Yehova?

 ³ Naamwi nipuhaka ohuserya wuupuwela ntoko Yehova, ilukuluku ikina onakhala woovila wuupuwela ntoko hiiha ntoko owo nthowa nawi naachu oohiphaameya. Ntoko yootakiherya, noosuwela mukhalelo onooneiye meecelo, wiithukumanyerya, muteko woolaleerya, oheliwa nikhami, ni miyaha mikina. Nave onamukhala woovila wa hiyo wiiwexexa ntakhara heeni owo onooneiye ichu hiiha ni mukhalelo onapakeiye ichu. Vano nni nihuserye hai wuupuwela moopwahaxa hiiha ntoko Yehova? Nave ela eni enikhaviherye hai opaka ichu saphaama hiihaano ni omwaahiyu?

4. Enataphulela eheeni otatusa muupuwelo ahu?

⁴ Mwaalakhanye Aroma 12:2. Mu eciciri yeela, murummwa Paulo aahithariha echu nnaphwanelaahu opaka wi nihuserye wuupuwela hiiha ntoko Yehova. Owo aalonce wi “muhitxharihe [naari muhuupiwe ni] makhalelo a elapo yela.” Hiiha ntoko nihusenryaahu mmwaha ovirale, eyo enataphulela wi nnaphwanela okhooca moonelo ni miruku seelapo. Nyenya Paulo aahilocatho wi nnaphwanela otatusa muupuwelo ahu. Eyo enataphulela wi nnaphwanela ohuseryaka Masu a Muluku, niiwexexe muupuwelo awe, nuupuwelele yaawo, nave niilipixerye wi nikhaleno muupuwelo wa Muluku.

5. Mutharihe ohiyana orivovo variyari va waalakhanya ni ohuserya.

⁵ Ohuserya tahi pahi waalakhanya miselo mwawaakuveya naari oceka maakhulo a makoho oohuserya. Elukuluku nnahuseryaahu, nuupuwele vooloca sa yeeyo mwaha owo onanihusihaaya vooloca sa Yehova taani, tiheeni onapakeiye, ni mukhalelo owo onuupuweleiye. Ninneererya wiiwexexa ntakhara heeni Yehova onanleeleiye opaka echu emoha ni osepa echu vyakala. Ninnathokororyatho yeeyo nnachunaahu otoroka mookumini mwahu ni mmuupuweloni mwahu. Mweeparipari, onamukhala woovila wuupuwelela miyaha soothene seiya, ilukuluku soothene nnahuseryaahu. Nyenya ti yaphaama omaliha elukuluku, akhweya emeya ya elukuluku nnahuseryaahu, nuupuwelaka yeeyo nimanlaahu waalakhanya.—Salumu 119:97; 1 Timóteo 4:15.

6. Echu taani eneereya vaavaa nnuupuwelelaahu Masu a Muluku?

⁶ Echu yootikhiniha enneereya vaavaa nnuupuwelelaahu moohihiyererya Mmasu a Muluku. Hiyaano ‘ninnawerya othalela,’ naari olekecheya mukhatiihu, wi muupuwelo wa Yehova ti woophwanelela. Ninnapacerya wiiwexexa mukhalelo owo onooneiye miyaha, nave moohilekela ninneemererya moonelo awe. Mwawiihiiha ninnatatusa muupuwelo ahu nave ninnapacerya wuupuwela mmukhalelo muvyaani. Vakhaani vakhaani, ninneeriha muupuwelo wa Yehova okhala wawihu.

7, 8. (1) Yehova onoona hai ichu soomwiilini? (Moone iruku soopacerya.) (2) Wakhala wi ninnoona ichu soomwiilini ntoko Yehova, ilukuluku soothene tiheeni eni ekhale echu yoochuneyasa wa hiyo?

⁷ Muupuwelo ahu onnavolowela saweera sahu. (Marko 7:21-23; Tiyako 2:17) Hankooni nthokororye sootakiherya vakhaani seiyo sinahiya vanlakani mwaha yoola. Yootakiherya emoha, enaphwanyeya mu yaweereya vooloca sa oyariwa wa Yesu, mwawooneya ennooniherya muupuwelo wa Yehova vooloca sa ichu soomwiilini. Muluku mwaneene aahimuthanla Yosefe ni Mariya wi emphuwe Mwanawe naamwi awo yahaarino ikhorowa  sawaaca. (Onamukutxho 12:8; Luka 2:24) Elukuluku Yesu aayariweiye, Mariya “àmwatalela mmwatxeyani walyamo imope, ntakhara wa yawo hiwarivo nipuro mpa mwa aletxo.” (Luka 2:7) Waakhanle wi Yehova aahichuna, owo aahaala weeriha wi Yesu ayariwe mu nipuro noophwanelelasa. Nyenya owo aachunne wi Yesu aphuiwe mu emusi yeeyo yaahela omulapela Muluku va nipuro noopacerya. Eyo ti yaari echu yoochuneyaxa wa Yehova.

⁸ Yaweereya yeela vooloca sa oyariwa wa Yesu ennanihusiha mukhalelo Yehova onooneiye ichu soomwiilini. Asitiithi akina anachuna wi anaaya ekhaleno ichu soomwiilini soophwanelela, naamwi eyo enanarihaka onthamwene wa anamwane ni Yehova. Nyenya, Yehova onoona onthamwene ahu ni yoowo okhala echu yoochuneyaxa. Apwanne nyuwo munneemererya moonelo wa Yehova mmwaha yoola? Saweera sanyu sinooniherya eheeni?—Mwaalakhanye Ahebri 13:5.

9, 10. Nni nooniherye hai wi ninnoona waakwaculiha akina hiiha ntoko Yehova onooneiye?

⁹ Yootakiherya ekina eri vooloca sa mukhalelo Yehova onawooneiye yaale anaakwaculiha akina, eyo tiwi, oweeriha akina ocheka naari omaala omurumeela Yehova. Yesu aaloca: “Nave mutxhu onamukwatxuliha mwana mukhani awi si yola onakemererya miyo, yaphama yari amakeleliwe musikoni nsilo, ariheliwe mphareya.” (Marko 9:42) Ala masu akurusa! Nave noosuwela wi Yesu onalikana ni Tiithi awe. Mwawiihiiha, nnawerya ororomela wi Yehova onnatepa othanana vaavaa muchu onamukwaculiheiye mmoha a oomuchara a Yesu.—Yohani 14:9.

¹⁰ Apwanne nnoona waakwaculiha akina hiiha ntoko Yehova ni Yesu anoonelaaya? Tiheeni saweera sahu sinooniheryaaya? Ntoko yootakiherya, akhweya nnamusiveliwa ni mukhalelo vyakala wa owara ni wiireeriha. Nyenya tiheeni nnahaalaahu opaka wakhala soothanla sahu sinnawuukhula akina mmulokoni naari sinnaweeriha akina wuupuwela mukhalelo woocapaheya? Apwanne osivela wahu ntakhara anna onahaala oneeriha osepa soothanla sahu?—1 Timóteo 2:9, 10.

11, 12. Nni niikhapelele hai mukhatiihu wakhala wi ninniica yeeyo Yehova oniiceiye ni wunnuwiha wiihiiha?

¹¹ Yootakiherya yaneeraru: Yehova onniica ohookololowa. (Isaiya 61:8) Mweeparipari, owo oosuwela wi ilukuluku ikina ti woovila wa hiyo opaka echu yeeyo eri yawookololowa nthowa nawi naachu oohiphaameya. Naamwiihiiha, owo onachuna wi niiceke yeeyo eri yoonanara, hiiha ntoko yene. (Mwaalakhanye Salumu 97:10.) Wakhala wi nohuupuwelela ntakhara heeni Yehova oniiceiye ichu soonanara, eyo enamunikhaviherya weeriha moonelo awe okhala wawihu nave onamunivaha ikuru wi nivoothe ichu soonanara.

¹² Wakhala wi noohuserya wiica yeeyo eri yoonanara, enamunikhaviherya tho osuwela wi ichu sammoori ti soonanara naamwi Piipiliya ahilocaka mookwakwaleya. Ntoko yootakiherya, mukhalelo mmoha wa meecelo oocapaheya aniichaniwa lap dancing onamvira okhalaka wawunlaana mweelaponi olelo. Achu akina anoona wi eyo henalikana ni  okonihana ni muchu, mwawiihiiha awo anuupuwela wi eyo tahi yoonanara. * (Moone masu avathi.) Nyenya apwanne Yehova onoona hiiha vooloca sa yeeyo? Muupuwele, Yehova onniica mukhalelo ori woothene woonanara. Mwawiihiiha, hankooni ntitelele okhala ocai wa echu vyakala yoonanara moorweela mwa ohuserya wunnuwiha wiihiiha ni moorweela wa wiica yeeyo Yehova oniiceiye.—Aroma 12:9.

13. Ntakhara heeni ninnaphwanela wuupuwela vooloca sa mukhalelo Yehova onooneiye miyaha hiihaano wi niwerye opaka soolakelela mwa miruku omwaahiyu?

¹³ Elukuluku nnahuseryaahu, nnaphwanela wuupuwela vooloca sa mukhalelo Yehova onooneiye miyaha woona wi eyo enamunikhaviherya opaka soolakelela mwamiruku. Voocharela, wakhala wi ennachuneya opaka yoolakelela mwawaakuveya, hinnahaala ohisuwela echu yoopaka. (Masiposipo 22:3) Hankooni nthokororye sootakiherya ikina sa Mpiipiliyani.

14. Tiheeni nnahuseryaahu orweela wa mukhalelo Yosefe aamwaakhunleiye mwaara a Potifare?

¹⁴ Elukuluku mwaara a Potifare eerenryeiye omukhinyererya Yosefe wi amukonihe, owo mwawaakuveya aahimukhooca. Mwawooneya, Yosefe aahuupuwelela mukhalelo Yehova onooneiye othela. (Mwaalakhanye Maphatxuwelo 39:8, 9.) Yosefe aahimuleela mwaara Potifare: “Nkinawerya wera yònanara ni omutxhekela Muluku!” Ela enooniherya wi Yosefe aaheeriha moonelo wa Muluku okhala wawawe. Hanka vooloca sa hiyo? Tiheeni munahaalaanyu opaka wakhala wi nthamwene oomutekoni oopacerya wookareelaani? Naari hanka wakhala wi muchu ohoorumihelaani muchaka vooloca sa ocapaheya naari eruku mu telefoni anyu? * (Moone masu avathi.) Onamukhala wookhweya wiikhalelaru oororomeleya wa Yehova wakhala wi noohuserya woosiilo vooloca sa yeeyo ni weemererya moonelo awe mmiyaha sintoko seiya ni olakelela woosiilo echu nnahaalaahu opaka.

15. Nni ntitelele hai wiikhalelaru oororomeleya wa Yehova, hiiha ntoko Aheepiri araru yenraaya?

¹⁵ Muthokororye tho yootakiherya ya Aheepiri araru yaawo asuweliwe ntoko Satraki, Mesaki, ni Apeteneko. Elukuluku Mwene Napukotonosori aalamulenleiye wi ekokhorele eruku ya ewooro yeeyo owo aapankeiye, awo yaahikhooca moolipa murima. Naakhulo naya nookwakwaleya wa mwene naahooniherya wi yaahuupuwela vooloca sa yeeyo yaahaala okhumelela waakhanle wi aatitelela okhala oororomeleya wa Yehova. (Mukwaha 20:4, 5; Daniyeli 3:4-6, 12, 16-18) Hanka vooloca sa olelo? Tiheeni mwaahaalaanyu opaka waakhanle wi patarawu anyu ohoovekani oveleela ikhorowa ntakhara yaweereya vyakala yeeyo eniiwanana ni malapelo atheru? Ohiya oweherya wi echu si yeela yeereye, yaahaala  okhala yaphaama opacerya wuupuwele hiihaano mmukhalelo Yehova onooneiye miyaha sintoko seiya. Voocharela, waakhala wi nri mmukhalelo ntoko yoola, onamukhala wookhweya wa hiyo opaka naari oloca echu yawookololowa, hiiha ntoko Aheepiri araru yenraaya.

16. Wiiwexexa mookwakwaleya muupuwelo wa Yehova eni enikhaviherye hai wiirehererya ntakhara ereca yootutusa?

¹⁶ Wuupuwela mmukhalelo Yehova onuupuweleiye enamunikhaviherya otitelela okhala oororomeleya wa yoowo wakhala wi yookhumelela ereca yootutusa. Mweeparipari, hiyo nri oolakelela okhooca oheliwa nikhami naari makupa aya masese oopacerya. (Saweriwa T’arummwa 15:28, 29) Nyenya aakhalavo meerelo makina aniiwanana nnikhami yaawo Mukristu ti Mukristu oneereiye opake yoolakelela mukhateiye yeeyo enathipeleya mu malakiheryo a Piipiliya. Elukuluku taani eri yoophwanelela olakelela echu yaweera? Apwanne eri elukuluku yeeyo nryaahu osipitaale, akhweya vaavaa nnoonaahu wiicela nave nikhinyereryiwaka opaka yoolakelela mwawaakuveya? Mweeparipari hooye. Hiihaano teri elukuluku ya otholathola, orepela epaso yeeyo enathariha mwawooneya oloola yoowo nnachunaahu, nave nloce ni totore ahu. * (Moone masu avathi.)

17-19. Ntakhara heeni oryaaya woochuneya wuupuwela hiihaano mukhalelo Yehova onooneiye miyaha? Mvahe yootakiherya.

¹⁷ Vookuchula, muupuwele vooloca sa mukhalelo Yesu aakhulenleiye ekano yoololo ya Petro: “Vakhale ikharari va Nyuwo, Apwiya.” Mwawooneya Yesu aahuupuwelela vancipale yeeyo Muluku aachuneiye wi owo apake ni sooloherya vooloca sa okumi ni okhwa wawe veelaponi. Osuwela wuuwu waahimvaha ikuru wi iikhaleleru oororomeleya wa Yehova wi avahe okumi awe ntoko mukucho ntakhara oothene hiyo.—Mwaalakhanye Mateu 16:21-23, NN.

¹⁸ Olelo, Muluku onachuna wi nikhale asinthamwene awe nave nipake owetha wahu wi nlaleerye michaka saphaama. (Mateu 6:33; 28:19, 20; Tiyako 4:8) Nyenya achu akina ni  mathowa aphaama anamweererya onimaaliha hiiha ntoko Petro aamweerenleiye Yesu. Ntoko yootakiherya, patarawu anyu onamoovahaani ikhorowa sincipale nyenya moosuwela wi munahaala olapaka iwora sincipale nave hamuni mukhaleno elukuluku yincipale wi mphiye mmithukumano naari oya mmuteko woolaleerya. Naari waakhanle wi muri osikola, mwaanyiherye wi muhusiha anyu ohoovahaani ekari ya ovinyavo vaate vanyu wi mwaakhele mahusiheryo awaaceererya. Wakhala wi ela yoheereya, apwanne munahaala ochuna ovekela, opaka otholathola, ni waaleela achu aveemusini vanyu naari atokweene a mmulokoni muhaakumve opaka yoolakelela? Enamukhala yoophwanelela wakhala wi moohuserya mukhalelo Yehova onooneiye miyaha seiyo hiihaano ni weeriha muupuwelo awe okhala wawinyu. Voocharela, wakhala wi moovahiwa ichu seiya, munamoona wi iho tahi saweeha chiryene. Nyuwo moosuwela chiryene echu yaweera nthowa nawi moolakelela woosiilo otitelela omurumeela Yehova.

¹⁹ Akhweya munanwerya wuupuwela mikhalelo mikina seiyo mootutusa sinahaala weeha ororomeleya wanyu wa Yehova. Nave, hinni niwerye wiirehererya ntakhara mikhalelo soothene. Nyenya wakhala wi ninnuupuwelela muupuwelo wa Yehova variyari va yoohuserya ahu, nnahaala okhala oorehererya wuupuwela yeeyo nihusenryaahu nave nnamusuwela mukhalelo wa opharihela mmwaha vyakala. Mwawiihiiha vaavaa nnahuseryaahu, nnaphwanela osuwela mukhalelo Yehova onooneiye miyaha, neerihe muupuwelo awe okhala wawihu, ni wuupuwela mukhalelo eyo enahaalaaya onikhaviherya opaka soolakelela mwamiruku hiihaano ni omwaahiyu.

20, 21. (1) Ntakhara heeni nnahaalaahu opuha otaphuwa wahu mu elapo evyaani? (2) Nni nipuhe hai ekumi hiihaano?

²⁰ Oothene ahu ninnaweherya ovolowa mu elapo evyaani. Ancipale a hiyo nnaweherya okhala ni ekumi okhala wookhala mu Parataiso veelaponi yavathi. Mu olamulelo wa Omwene wa Muluku, nnahaala okhala ootaphuwa wa ireca ni ohooxeya woothene yoowo nnakumanaahuno mu elapo yeela. Mweeparipari, nlelo nnahaala otaphuwa opaka soothanla mwawiiwanana ni soochuna sahu.

²¹ Nyenya ela henataphulela wi otaphuwa wahu honi okhaleno mphimo. Awiiyeviha nlelo anahaala opaka soolakelela inathipeleya mmalamulo ni mmuupuwelo wa Yehova. Nave ela enamuruuha ohakalala otokotoko ni murecele wawaaca. (Salumu 37:11) Naamwi ehaakumve ophiya elukuluku eyo, nnanwerya okhalano ohakalala elukuluku nneerihaahu muupuwelo wa Yehova okhala wawihu.