1, 2. (1) Yesu aakhunle hai vaavaa Petro aalonceiye wi iimorele ikharari meekheiye? (Moone eruku yoopacerya.) (2) Ntakhara heeni Yesu aakhunleiye mmukhalelo yoola?

VAAVAA Yesu aaloceiye wi moohilekela aahaala ohooxeya ni okhwa, amuhuseryaawe hiyaawenrye weemererya. Mweeparipari, awo yuupuwela wi Yesu aahaala otikitherya omwene wo Isarayeli .Murummwa Petro mwawaakuveya aaloca: “Vakhale ikharari va Nyuwo, Apwiya: herwa-yihihá wa Nyuwo hoe.” Nto arukunuwelaka wa Petro, Yesu aaloca: “Hawe ochuli waka Satana weyo: wá yokikwachuliha Miyo; ntakhara hamunakhapelela sa Muluku, nyenya sa atchu.”—Mateu 16:21-23, NN; Saweriwa T’arummwa 1:6.

² Naakhulo na Yesu nohooniherya vanlakani wi muupuwelo wa Yehova onnahiyana ni miruku sa elapo enalamuleliwa ni Satana. (1 Yohani 5:19) Yeeyo Petro aalonceiye wa Yesu yaahooniherya nrima nawunlaana na elapo yeela. Nyenya Yesu aanasuwela wi hiwaari mukhalelo Tiithi awe uupuweleiye. Muluku aachuna wi Yesu akhale oorehererya wi ahooxeye nave akhwe. Vaavaa  aamwaakhunleiye Petro, Yesu aahiya vanlakani wi haachuna wuupuwela ntoko elapo, nyenya ntoko Yehova.

3. Ntakhara heeni wuupuwela ntoko elapo ti wookhweya opwaha wuupuwela ntoko Yehova?

³ Hanka hiyo? Tuuvi ori mukhalelo ahu wa wuupuwela? Apwanne nrino muupuwela wa Muluku naari weelapo? Eparipari wi ninnawetha vancipale wi saweera sahu simuhakalalihe Muluku. Vano hanka vooloca sa muupuwelo ahu? Apwanne ninniilipiserya wuupuwela ntoko Yehova? Eyo echu enachuneya wiilipiherya otokweene. Nto wuupuwela mmukhalelo wa elapo onnatepa okhweya, ntakhara wi nrukureryiwe ni munepa wa elapo. (Éfeso 2:2) Navetho, munepa wa elapo onaaceenyerya achu wi yuupuweleke pahiru wa vaya mukhataaya, nave eyo enamukhala yaweeha. Moothananiha, wuupuwela hiiha ntoko Yehova onanwerya okhala woovila, nyenya wuupuwela mmukhalelo wa elapo honachuneya wiilipixerya.

4. (1) Tiheeni enahaala weereya wakhala wi noohiya elapo wi yuupe muupuwelo ahu? (2) Ti mwawiihai mwaha ola oneeraaya onikhaviherye?

⁴ Nave wakhala wi noohiya wi elapo yuupe muupuwelo ahu, nnamwiihela va yawoopiha ya okhala anrima. Nnamphiyera ochuna olakelelaka mukhatiihu yeeyo eri yaphaama ni yoonanara. (Marko 7:21, 22) Mwa yeeyo, ti woochuneyaxa ohuserya okhalano ‘mupuwelo wa Muluku,’ ohiya ‘wa atxhuru.’ Mwaha yoola onahaala onikhaviherya. Onahaala wooniherya ntakhara heeni wuupuwela ntoko Yehova honanaakha otaphuwa wahu, nyenya ti yamphurelo ahu. Navetho onahaala wooniherya ochuneya waya ohihiya wi elapo yuupe muupuwelo ahu. Nave mmwaha woocharela onahaala onihusiha mukhalelo Yehova onuupuweleiye vooloca sa miyaha mikina ni mukhalelo nneeraahu nuupuwele ntoko yoowo.

5. Ntakhara heeni akina hanasiveliwa ni moonelo wa wuupiwa ni muchu vyakala?

⁵ Achu akina annaloca: “Haavo orinono owerya wa wuupa naari ovolowela muupuwelo aka.” Nave echu anachunaaya oloca ti yawi anachuna opakaka soolakelela mukhataaya nave wi aakhalano ophwanelela wa opaka yeeyo. Awo hanachuna ovareryeliwa ni muchu mukina naari ohiya omuchu aya. * (Moone masu avathi.)

6. (1) Otaphuwa taani Yehova onanivaheiye? (2) Apwanne otaphuwa yoowo hiwaanono mphimo?

⁶ Wuupuwela ntoko Yehova honataphulela ohiya omuchu ahu naari moonelo ahu. Yoorepa ya 2 Korinto 3:17 ennaniroromeliha wi “weiwo oneraya okhalewo Munepa wa Apwiya, wokhalawo onethi [naari otaphuwa].” Hiyo nookhalano otaphuwa wa okhala ntoko nnachunelaahu. Nnawerya okhalano soochuna sahu ni othanla ichu nnoonaahu okhala soochuneya. Mweeparipari, Yehova aapatunxe achu wi ekhaleke hiiha. Nyenya eyo henataphulela wi otaphuwa wahu hiwaanono mphimo. (Mwaalakhanye 1 Pedro 2:16.) Vaavaa nnachunaahu opaka yoolakelela, Yehova onachuna wi niphariheleke Masu awe ntoko yoohoolela wa yeeyo eri yawookololowa ni yoonanara. Apwanne eyo henanaakha otaphuwa wahu? Naari apwanne eyo ennakumiherya mphurelo wa hiyo?

7, 8. Apwanne wuupuwela ntoko Yehova ennanaakha otaphuwa wahu? Mvahe yootakiherya.

 ⁷ Muupuwele yootakiherya ela. Asitiithi anniilipiserya vancipale wi yaahusihe anaya ikano saphaama. Awo akhweya annaahusiha okhala ororomeleya, oolapa nave wi yaapwacheke akina. Apwanne mwahaala oloca wi weerano yeeyo ori owaakha anamwane otaphuwa? Mweeparipari hooye. Asitiithi anaarehererya anaya wi ekhale oohakalala yunnuwa. Vaavaa anamwane eneeraaya yunnuwe nave epwahevo vaate, awo anamukhalano otaphuwa wa opaka soothanla saya. Wakhala wi aathanla ochara miruku saphaama ahusenryaaya ni asitiithi aya, anampaka soolakelela saphaama nave anamurapela makacamiho, sawiipiha murima naari okhalano ekeerelani.

⁸ Yehova ori ntoko tiithi aphaama. Owo onachuna wi anaawe ekhaleno okumi woohakalala. (Isaiya 48:17, 18) Mwa yeeyo, owo onnanivaha malakiheryo vooloca sa meecelo ahu ni mukhalelo wa waakhaliha akina. Yehova onachuna wi hiyo nuupuweleke ntoko owo nave nikhaleno mikhalelo mimohamoha ni sawawe. Nyenya eyo henaviihavo otaphuwa wahu. Mweeparipari, enanihusiha wuupuwela mmukhalelo waweemereryeya nave ennanikhaviherya okhala amiruku. (Salumu 92:5; Masiposipo 2:1-5; Isaiya 55:9) Vaavaa nnuupuwelaahu ntoko Yehova, ninnawerya opaka soolakelela saphaama, nave mu elukuluku emohamoha, ninnakhalano ichu sinanisivela ni soothanla sahu. (Salumu 1:2, 3) Moohikhwa minikwa, wuupuwela ntoko Yehova ti yamphurelo wa hiyo!

9, 10. Tiheeni enooniherya wi mukhalelo Yehova onuupuweleiye ti woophwanelela opwaha wa elapo?

⁹ Nookhalavo nthowa nikina nnaneeriha ochuna wuupuwela ntoko Yehova. Muupuwelo awe ti wavasulu moohiyana ni wa elapo. Achu ancipale annavaha ikano vooloca sa ichu sa meecelo, emusi, ohakalala omutekoni ni ichu ikina. Nave ikano sincipale sa seiho ti soohiyana ni mukhalelo Yehova onuupuweleiye. Ntoko yootakiherya, elapo enaaceenyerya achu wiilipiserya ophwanya soochuna saya pahiru. Awotho analoca wi ocapaheya echu yaweemereryeya. Ophiyerya wi annaloca wi, wakhala wi mutheli hanahakalala, owo onaphwanela ohiyana naari omwalana. Miruku sintoko seiha sinnavaanyihana ni yeeyo Piipiliya onahusiheiye. Nyenya apwanne mmahiku ahu miruku sa elapo ti soophwanelela opwaha sa Piipiliya?

¹⁰ Yesu ooloca: ‘Nto miruku inoneya wi iri separipari mwa miteko saya.’ (Mateu 11:19) Eparipari wi elapo yooya vahoolo mmakupa a ikhankoonya. Nyenya makacamiho yaawo anaakanyerya ohakalala, ntoko ikhoco, nthalu, nlala, anamvira yaacaka. Nave ancipale anneemererya wi moonelo wa elapo vooloca sa ocapaheya, onnapahula imusi, onnatannya ireca nave onnaruuha makacamiho mancipale. Mmukhalelo mukina, achu yaawo anuupuwela ntoko Muluku aakhalano imusi soohakalala, okumi waphaamaxa, nave orukurerya elapo yoothene, annakhala mmureceleni ni akapuro akina a Yehova. (Isaiya 2:4;  Saweriwa T’arummwa 10:34, 35; 1 Korinto 6:9-11) Nalikanyiha mukhalelo Yehova onuupuweleiye ni wa elapo, enakhala yawooneya tuuvi ori mukhalelo waphaama, tahi yeeyo?

11. Taani Mose aamweemerenryeiye wi uupe muupuwelo awe, nave teevi yaari yookhumelela?

¹¹ Alapeli a Yehova mu elukuluku yakhalai yaahoonatho wi muupuwela wa Yehova ti woophwanelela. Moone yootakiherya ya Mose. Owo “àhusihiwa miruku sothene sa atxhu a w’Egipitu.” Nyenya owo aahimveka Muluku wi amukhaviherye okhalano “murima wa miruku”. (Saweriwa T’arummwa 7:22; Salumu 90:12) Owo aahimvekatho Yehova: “Mukisuwelihe itxhu munupuwelanyu.” (Mukwaha 33:13) Mose aahimuhiya Yehova wi uupe muupuwela awe, nave Yehova aahimpharihela mmuteko wavameekhaaya. Piipiliya onamuloca Mose ntoko yootakiherya etokweene ya nroromelo.— Ahebri 11:24-27.

12. Paulo aathipelen’ye mu eheeni wi apake yoolakelela?

¹² Murummwa Paulo aaritho mulopwana oosuwelaxa ni oovyakihiwa. Akhweya owo aanaloca ilocelo piili. (Saweriwa T’arummwa 5:34; 21:37, 39; 22:2, 3) Nave owo haachariha moonelo wa elapo wi asuwele yeeyo yaari yawookololowa naari yoonanara. Owo aathipelen’ye Mmasu a Muluku. (Mwaalakhanye Saweriwa T’arummwa 17:2; 1 Korinto 2:6, 7, 13.) Wa nthowa na yeela, owo aahipaka muteko waphaama wa olaleerya nave aahikhalano ewehereryo ya waakhela ekumi yoohimala.—2 Timóteo 4:8.

13. Taani orino murici wa oneeriha wuupuwela ntoko Yehova?

¹³ Hinaano minikwa wi mukhalelo wa wuupuwela wa Yehova ti woophwanelela ohiyana ni wa elapo. Ochariha malakiheryo a Yehova enahaala onikhaviherya okhalano ekumi yoohakalaliha ni yamphurelo. Nyenya Yehova hanamukhinyererya muchu wuupuwela ntoko yene. Naari mano “mulapeli òroromeleya ni awisuwela” naari atokweene hanalamulela muupuwelo wa anna. (Mateu 24:45; 2 Korinto 1:24) Mweeparipari, ohuserya wuupuwela ntoko Muluku, murici wa muchu ti muchu a hiyo. Nyenya nni niwerye hai weerano yeeyo?

14, 15. (1) Naachunaka wuupuwela ntoko Yehova, tiheeni nnaphwanelaahu wuupuwelela? (2) Ntakhara heeni hannaphwanela weemererya wi moonelo woonanara ovolowele muupuwelo ahu? Mvahe yootakiherya.

¹⁴ Aroma 12:2 onnanivaha ekano ela: “Muhitxharihe makhalelo a elapo yela. Mutatuse murima anyu, wi murukunuse mupuwelo anyu, wi n’werye othalela . . . okhwela wa Muluku.” Masu ala anooniherya wi, naamwi ekhalaka wi elapo yaahuupa muupuwelo ahu nihaakumve ohuserya eparipari, nlelo owo onanweryeya wuupiwa ni Yehova. Naamwi muyareriwo ahu naari saweereya nihoolenlaahu mu okumi sivolowelaka mukhalelo nnuupuwelaahu, muupuwelo ahu onnaakuvela otorokeya. Nave tiheeni eneeriha muupuwelo ahu otorokeya? Mu ikwaha sincipale, onakhala muupuwelo yoowo nnahiyaahu ovolowa ni okhala mmuruni mwahu. Wakhala wi nohuupuwelela mukhalelo Yehova onuupuweleiye, nnahaala osuwela wi miyoonelo sawe wiiliwiili ti soophwanelela. Voocharela eyo enahaala onceenyerya ochuna wuupuwela hiiha ntoko yene.

¹⁵ Moone wi yoorepa elonce wi muupuwelo ahu pahiru onahaala ‘otatuseya’ wakhala wi ‘hannatxhariha makhalelo a elapo yela’. Eyo tiwi, hannaphwanela weemererya wi moonelo wooheseya wa elapo ela ovolowe mmuupuweloni  mwahu. Wi niiwexexe mukhalelo eyo eryaaya yookhweleya, muupuwele yootakiherya ela: Muchu onachuna okhalano okumi waphaama. Mwa yeeyo, owo onnalakelela olya yoolya yaphaama. Nyenya mu elukuluku emohamoha owo onnalya soolya soonanara. Apwanne weerano hiiha enamukumiherya mphurelo? Mmukhalelo mmohamoha, olyiha muupuwelo ahu ni muupuwelo wa Yehova nave mu elukuluku emohamoha ni miruku seelapo onahaala okhala wiilipiserya wasiiyo.

16. Nnaphwanela wiisaakiha wa eheeni?

¹⁶ Apwanne ti wooweryeya okwatelela moomalela muupuwelo wa elapo? Hooye. Pahiru waakhanle wi noovinyamo mweelaponi, nyenya eyo ti yoohiweryeya. Mmukhalelo mmoha naari mukina, nnahaala okhala oovoloweliwa ni moonelo wa elapo yeela. (1 Korinto 5:9, 10) Ophiyerya tho muteko woolaleerya onnanivoloweliha ni soororomela satheru. Naamwi hiiha, hannaphwanela wuupuwelaka miruku sa elapo yeela, naari weemererya. Nnaphwanela weerano ntoko Yesu enreiye. Wakhala wi Satana oheererya ohela moonelo woonanara mmuupuweloni mwahu, nnaphwanela oviihamo mwawaakuveya. Nave echu ekina enahaala onaakiha ori okwatelela ovolowela vyakala woohiphwanelela wa muupuwelo wa elapo.— Mwaalakhanye Masiposipo 4:23.

17. Tisivi siri mikhalelo mikina sa okwatelela ovolowela vyakala wa muupuwelo wa elapo yeela?

¹⁷ Ntoko yootakiherya, nnaphwanela okhalano kasope vaavaa nnaathanlaahu asinthamwene. Piipiliya onnanleela wi omaliha elukuluku ni achu yaawo ahinamulapela Yehova enamuneeriha wuupuwela ntoko yaawo. (Masiposipo 13:20; 1 Korinto 15:12, 32, 33) Nnaphwanela tho othanla phaama mathatelo ahu. Mathatelo mancipale anavuwiha mahusiheryo a othatuwa, owali ni ocapaheya. Wakhala wi hinnachuna onanariha mukhalelo ahu wa wuupuwela ni moonelo “onawana ni osuwela wa Muluku,” nnaphwanela okwatelela yoowo.—2 Korinto 10:5.

18, 19. (1) Ntakhara heeni ninnaphwanela okhalano kasope ni muupuwelo woonanara wa elapo? Mvahe yootakiherya (2) Makoho taani nnaphwanelaahu wiipakela, nave ntakhara heeni?

¹⁸ Mu ikwaha ikina, muupuwelo wa elapo  onanwerya orwa mmukhalelo woovitheya, nave nnaphwanela okhalano kasope. Ntoko yootakiherya, iyornali ikina inanwerya operekha muchaka onacicimiherya epoliitika emoha. Naari oloca yaweereya ya muchu, yoowo mmooneloni wa achu, aakhumelenle phaama mookumini. Aliivuru akina ni ixilema sinneeriha wi moonelo wawi “miyo mu nipuro noopacerya” naari “emusi opwaha soothene” ikhale ntoko soophwanelela. Nyenya awo annahiya muculi yeeyo Piipiliya onaloceiye wi, achu ni imusi anahaala okhala oohakalala pahiru wakhala wi annamusivela Yehova opwaha soothene. (Mateu 22:36-39) Ophiyerya tho wi miyaha sa anamwane seiyo ikwaha sincipale sinakhala wi ti saphaama, sinanweeriha anamwane moohisuwela weemererya meecelo oocapaheya.

¹⁹ Eyo henataphulela wi ti yoonanara othata. Nyenya nnaphwanela wiikoha: ‘Kinnawerya osuwela waakhanle wi muupuwelo ti woonanara, naamwi owo operekhiwaka mmukhalelo woovitheya? Apwanne kinnaakhapelela anaaka—ophiyeryatho miyaano—wa michaka sa TV naari sawaalakhanya seiho sinaakiha muupuwelo wa elapo? Apwanne kinnaakhaviherya anaaka wi ekhaleno moonelo wa Yehova vaavaa awo anahoolelaaya muupuwelo wa elapo?’ Vaavaa nniiwexexaahu ohiyana orivovo variyari va muupuwelo wa Muluku ni muupuwelo wa elapo, ninnasepa ‘otxhariha [naari wuupiwa ni] makhalelo a elapo yela.’

20. Tiheeni enahaala olakelela waakhanle wi nnuupiwa ni Yehova naari ni elapo?

²⁰ Ikwaha soothene muupuwele wi pahiru irivo ihime piili sa miselo: Yehova ni elapo yeeyo enalamuleliwa ni Satana. Ehime taani ya seiya enawuupaani nyuwo? Eyo eniiwanana ni weiwo munakumihaanyuwo miselo. Wakhala wi pahiru nnahooleliwa ni muupuwelo weelapo, ti yoowo oni onuupe. Nnamukhala va yawoopiha ya wuupuwela ni opaka ichu ntoko achu yaawo anapaka makupa a elapo. Mwa yeeyo, muthanle phaama tiheeni munahaalaanyu wiiwa, woona, waalakhanya naari wuupuwela.

21. Tiheeni nnahaalaahu woona mmwaha onacharela?

²¹ Ntoko elociwaaya, wakhala wi nnachuna wuupuwela ntoko Yehova, nnaphwanela wiilipiserya vancipale ohiya pahiru okhooca muupuwelo wa elapo. Nnaphwanela olyiha muupuwelo ahu ni muupuwelo wa Yehova. Neerano hiiha, nnanwerya wuupuwela vancipale ntoko yene. Nni neerano hai yeela? Nnahaala woona mmwaha onacharela.