1, 2. (1) Tiheeni Yehova onooneiye vaavaa amilyawu aachu anathukumanaaya ntakhara Yoolya Yoohiyu ya Apwiya? (Moone eruku va ekaapa.) (2) Tiheeni nnahaalaahu othokororya mmwaha yoola?

MWAANYIHERYE yeeyo Yehova onooneiye vaavaa amilyawu aachu orukurerya elapo anathukumanaaya ntakhara Yoolya Yoohiyu ya Apwiya. Owo onnavarerya ohiya pahiru waaca wa nunturu naachu; nyenya onnamoona muchu ti muchu yoowo ophwanye’ye va muthukumano. Ntoko yootakiherya owo onnoona yaawo moororomeleya anaphwanyeya muyakha ti muyakha. Variyari va yaawo akhweya annakhalavo yaawo anarwa eniiha ehoolelaka wiikariwa otokweene. Akina hanaphiya mookilaatheya mmithukumano, nyenya annaphwanyeya va Yawuupuserya ntoko echu yookhweleya yeeyo awo ahinaphwanelaaya oyeleela. Yehova onnawoonatho yaale anaphwanyeya va Yawuupuserya mu ekwaha yoopacerya, akhweya nthowa nawi aakhalano nchuno vooloca sa muthukumano yoowo.

² Mweeparipari, Yehova onnahakalala vaavaa onawooneiye achu ancipale ephiyaka va Yawuupuserya. (Luka 22:19) Naamwiihiiha, Yehova hanapwacha pahiru waaca wa achu yaawo anarwa. Owo onapwacha nthowa nenlo nnaweeriha orwa; eyo teri yookhweleya wa Yehova. Mmwaha yoola, nnahaala othokororya nikoho nri nookhweleyasa: Ntakhara heeni ninnaphwanyeya ohiya pahiru va yaweereya ya vayaakhani nyenya tho mmithukumano sa esumana ti esumana seiyo Yehova onavahereryeiye wa yaale anamusivela?

3, 4. (1) Ntakhara heeni ninnaphiya mmithukumano? (2) Ophiya wahu mmithukumano onooniherya eheeni vooloca sa hiyo? (3) Mwawiiwanana ni yeeyo 1 Korinto 11:23-26 onaloceiye, ntakhara heeni hannaphwanela oyeleela Yawuupuserya?

³ Ninnaphwanyeya mmithukumano nthowa nawi sinnapaka makupa  a malapelo ahu. Ninnaphwanyeyatho mmithukumano woona wi mwemmo ninnahusihiwa ni Yehova. Achu awiirumiha annakhooca moonelo wawi awo annaphwanela ohusihiwa echu. (3 Yoh. 9) Moohiyana, nri oolakelela ohusihiwa ni Yehova ni marehereryo yaawo owo onaphariheleiye muteko.—Isa. 30:20; Yoh. 6:45.

⁴ Ophwanyeya wahu mmithukumano onnooniherya wi naachu awiiyeviha, ooreheryeya ni oochuna ohusihiwa. Mu ohiyu wa Yawuupuserya ya okhwa wa Yesu, ninnaphwanyeya va yaweereya yeela yoochuneya ohiya nthowa nawi nri ookhinyereryeya nyenya nthowa nawi mwawiiyeviha nniiwelela nlamulo na Yesu: “Mweerekeno yeela mukuupuwelaka miyo.” (Mwaalakhanye 1 Korinto 11:23-26.) Muthukumano yoowo onnalipiha ewehereryo ahu ya muhoolo nave onnanuupuserya ophiyerya mweeryo taani Yehova onansiveleiye. Mwawiihiiha, Yehova oosuwela wi ninnachuna olipihiwa ni ohakararyiwa opwaha ekwaha emoha vayaakhani. Mwa yeeyo owo onnanivahererya mithukumano esumana ti esumana nave onnanceenyerya ophwanyeya mmithukumano seiyo. Wiiyeviha onnaneeriha wiiwelela. Ninnamaliha iwora sincipale esumana ti esumana niirehereryaka nave niphwanyeyaka mmithukumano seiyo.

5. Achu awiiyeviha anaakhulela hai nwopelo wa Yehova?

⁵ Muyakha ti muyakha, Yehova onnaawopa achu wi ehusihiwe ni yene, nave achu ancipale awiiyeviha anneemererya nwopelo awe. (Isa. 50:4) Annapuha ophwanyeya va Yawuupuserya, nave awo annapacerya ophiya mmithukumano mikina. (Zak. 8:20-23) Akina a hiyo nri mu eparipari vamoha ni avyaani ninnasiveliwa ohusihiwa ni ohooleliwa ni Yehova, ‘mukhaviheryi ni mvulusha ahu.’ (Sal. 40:17) Chiryene, echu taani yaahaala okhala yoopuheya—naari yoochuneyaxa—opwaha weemererya nwopelo wa ohusihiwa ni Yehova vamoha ni Yesu, Mwaana yoowo onamusiveleiye vancipale?—Mat. 17:5; 18:20; 28:20.

6. Wiiyeviha waamukhavihenrye hai mulopwana ophwanyeya va Yawuupuserya?

⁶ Muyakha ti muyakha, ninniilipiserya waawopa achu ancipale wakhala wooweryeya wi ephiye va Yawuupuserya ya okhwa wa Yesu. Achu ancipale awiiyeviha annaphura moorweela wa waakhulela nwopelo ahu. Muthokororye yootakiherya emoha. Mu iyaakha sincipale muculi, mulopwana mmoha ahaakhela nwopelo ahu ntakhara Yawuupuserya, koma owo aahimuleela munna yoowo amvanhe nwopelo ole wi haahaala oyawo o muthukumano. Nyenya, mu ohiyu wa Yawuupuserya, munna aahitikhiniheya vaavaa aamonneiye mulopwana ole ari mu Empa ya Omwene. Mulopwana aahitannyeya murima ni mukhalelo owo aakheliweiye ophiyerya apacerya ophiya mmithukumano sa esumana ti esumana. Mweeparipari, ovinyerya vaavale owo aayeleenle pahiru mithukumano miraru mu eyaakha yoocharela. Tiheeni yaamukhavihenrye olakelela ophwanyeya mmithukumano soothene? Owo aahipaka sincipale wi atoroke muupuwelo awe. Ohoolo waya munna yoowo aanwompe aahiloca: “Owo mulopwana awiiyevihaxa.” Moohikhwa minikwa Yehova oomuruuha mulopwana yoole wi amulapele Yene, nave hiihaano munna oopatisiwa.—2 Sam. 22:28; Yoh. 6:44.

7. Yeeyo nnahuseryaahu mmithukumano ni yeeyo nnaalakhanyaahu Mpiipiliyani enanikhaviherya hai okhala awiiyeviha?

⁷ Yeeyo nnahuseryaahu mmithukumano ni yeeyo nnaalakhanyaahu Mpiipiliyani enamunikhaviherya okhala awiiyeviha. Mu isumana ehakumve weereya Yawuupuserya, wiiliwiili mithukumano sahu sinathipeleya mu yootakiherya ya Yesu ni wiiyeviha yoowo oonihenryeiye mu ovaha ekumi awe ntoko yawoopola. Nave variyari va mahiku ehaakumve weereya Yawuupuserya, ninnaceenyeryiwa waalakhanya saweereya sa Mpiipiliyani seiyo sinaloca ichu seeren’ye mu okhwa ni ovinya mookhwani wa Yesu. Yeeyo nnahuseryaahu mmithukumano ni yeeyo nnaalakhanyaahu mu saweereya sa Mpiipiliyani sinnannuwiha othamalela  wahu mukucho yoowo Yesu ovanheiye wa hiyo. Ninnaceenyeryeya otakiherya moonelo awe wawiiyeviha ni opaka yookhwela ya Yehova, naamwi eyo eri yoovila wa hiyo.—Luka 22:41, 42.

8. Yesu oonihenrye hai olipa murima?

⁸ Ninneererya tho omutakiherya Yesu moorweela wa wooniherya olipa murima. Muupuwele olipa murima oonihenryeiye mmahiku ahaakumve okhwa. Owo aahisuwela phaameene wi amwiicani awe moohilekela yaahaala omuuliha muru, ommana, ni omwiipha. (Mat. 20:17-19) Naamwi hiiha, owo aahiiveleela ohoolela okhwa. Vaavaa elukuluku yaaphin’yaaya, owo aahiloca wa arummwa awe oororomeleya, yaawo yaari ni yoowo mu emaca ya Ketsemani: “Mvinye, nnapwaha, yoole onakivelela, onnaacamela.” (Mat. 26:36, 46) Nave vaavaa nikhuuru na achu yaawo yaakunxe mavaka yaarwiilaaya wi emphare, owo aaheemela mwawaakuveya, iisuwanyeiha, nave aaleela anakhoco wi yaahiye arummwa awe wi epwaheke. (Yoh. 18:3-8) Ola waari olipa murima otokotoko yoowo Yesu oonihenryeiye! Olelo, Akristu oothanliwa ni a ipucepuche ikina anniilipiserya omutakiherya Yesu mu wooniherya olipa murima. Mwawiihai?

9. (1) Ntakhara heeni nnaphwanelaahu okhala oolipa murima wi niphiye mmithukumano moohihiyererya? (2) Yootakiheryaahu enaavolowela hai anna yaale awaleliwe ntakhara nroromelo naya?

⁹ Wi niphwanyeye mmithukumano ilukuluku soothene akhweya onamuchuneya wooniherya olipa murima mu elukuluku nnahoolelaahu mikhalelo soovila. Anna ni arokora akina annaphiya mmithukumano moohipwacha othanana, oceecheya, naari makacamiho ookumi. Akina moolipa murima annaphiya mmithukumano moohipwacha waakaahiwa ni achu a veemusini naari alamuleli eelapo. Muupuwele vooloca sa mukhalelo yootakiheryaahu enaavolowelaaya anna akina yaawo awaleliwe nthowa na nroromelo naya. (Ahe. 13:3) Vaavaa aniiwaaya wi ninnatitelela omurumeela Yehova naamwi nihoolelaka saweeha, awo annalipiheya otitelela okhala oororomeleya, ni oolipa murima. Murummwa Paulo aahikhalano yaweereya yoolikana. Elukuluku owo aareiye mukalaposo o Roma, owo aahihakalala vaavaa iiwaleiye wi annawe yaanamurumeela Muluku moororomeleya. (Fil. 1:3-5, 12-14) Mu elukuluku vakhaani ahaakumve naari amanle otaphuliwa, Paulo aahirepa ekaarata awe ntakhara Aheepiri. Mu ekaarata yeeyo owo aahaaceenyerya Akristu oororomeleya “mutitelele, anna, okhwelana” navetho wi ehicuwale othukumana vamoha.—Ahe. 10:24, 25; 13:1.

10-11. (1) Taani nnaphwanelaahu onwopa ntakhara Yawuupuserya? (2) Nthowa taani Éfeso 1:7 onanivaheiye na weerano yeela?

¹⁰ Ninnooniherya olipa murima vaavaa nnaawopaahu amusi, asinthamwene omutekoni, ni amwaacamani ntakhara Yawuupuserya. Ntakhara heeni nnaawopaahu achu yaala? Ninnathamalela vatokovene yeeyo Yehova ni Yesu apankaaya ntakhara hiyo ophiyerya wi hannaphwanela woovelela waawopa akina wi ephiye va Yawuupuserya. Nnachuna wi awotho ehuserye mukhalelo eneeraaya ephure “mahala” a Yehova moorweela wa yawoopola.—Mwaalakhanye Éfeso 1:7; Wup. 22:17.

¹¹ Vaavaa nnooniheryaahu olipa murima moorweela wa othukumana vamoha, ninnooniheryatho  mukhalelo mukina, yoowo Yehova ni Mwanawe anooniheryaaya mmukhalelo woophwanelela.

12. (1) Mithukumano sahu sinalipiha hai omusivela wahu Yehova ni Yesu? (2)  2 Korinto 5:14, 15 onanceenyerya hai omutakiherya Yesu?

¹² Omusivela wahu Yehova ni Yesu onnanceenyerya ophwanyeya mmithukumano. Voocharela, yeeyo nnahuseryaahu mmithukumano ennannuwiha osivela wahu ntakhara Yehova ni Mwanawe. Mmithukumano ilukuluku soothene ninnuupuxeryiwa yeeyo awo apankaaya wa hiyo. (Aro. 5:8) Xaxaxa, Yoolya Yoohiyu ya Apwiya ennanuupuxerya mukhalelo osivela waya oryaaya woopwahasa, ophitaanyerya yaale ahinavaha esisapo yawoopola. Ni othamalela otokotoko, ninneererya omutakiherya Yesu moorweela wa mukhalelo nnakhalaahu nihiku ti nihiku. (Mwaalakhanye 2 Korinto 5:14, 15.) Mu waaceererya, murima ahu onnaneeriha omucicimiha Yehova nthowa na onivaha yawoopola. Mukhalelo mmoha nnahaalaahu omucicimiha ori ovaha maakhulo oovinyerya vathi va murima mmithukumano.

13. Nni nooniherye hai osivela wahu wawiiseela ntakhara Yehova ni Mwanawe? Mutharihe.

¹³ Nnanwerya wooniherya osivela wahu wawiiseela ntakhara Yehova ni Mwanawe moorweela wa okhala ooreheryeya opaka mikucho ntakhara yaawo. Wiiliwiili, nnaphwanela opaka mikucho mmikhalelo soohiyanahiyana wi niphiye mmithukumano sahu. Miloko mincipale sinnapaka mithukumano omakuchuwelo wa nihiku na muteko vaavaa nnakhalaahu oovelavela. Nave mithukumano mikina sinapakiwa omakuchuwelo wa esumana elukuluku yeeyo achu aniichuuwaaya. Apwanne Yehova onnoona wi ninnaphwanyeya mmithukumano naamwi nivelavenle? Chiryene owo onnoona! Mweeparipari, vaavaa nniilipiseryaahu vatokovene, Yehova onnathamalela moopwahasa osivela yoowo nnooniheryaahu wa yoowo.—Mar. 12:41-44.

14. Yesu otikithenrye hai yootakiherya mu wooniherya osivela otokotoko?

¹⁴ Yesu ootikitherya yootakiherya wa hiyo mu wooniherya osivela otokotoko. Owo aari ooreheryeya okhwa ohiya pahiru wa arummwa awe nyenya tho aanakhala mmukhalelo yoowo aaheleiye va nipuro noopacerya soochuna saya nihiku ti nihiku ohiya sawawe. Ntoko yootakiherya, owo aanathukumana ni oomuchara awe naamwi vaavaa aakhaleiye oovelavela ni awuukhuwa mmuupuweloni. (Luka 22:39-46) Nave owo aatikitheryeya mwa yeeyo aahaaleiye waavaha akina, ohiya yeeyo owo aahaaleiye ophwanya orweela wa yaawo. (Mat. 20:28) Vaavaa osivela wahu ntakhara Yehova ni annihu onalipaaya, nnampaka  soothene nnaweryaahu wi niphiye va Yoolya Yoohiyu ya Apwiya hiiha ntoko mithukumano mikina sa muloko.

15. Taani xaxaxa nnachunaahu omukhaviherya?

¹⁵ Pahiru hiyaano nnapaka makupa a onna wa elapo yoothene wa Akristu eeparipari, nave ninnasiveliwa omaliha elukuluku yincipale wakhala wooweryeya naawopaka avyaani wi ekhale ni hiyo. Mwawiihiiha, nookhalano nchuno na waakhaviherya xaxaxa yaale ari “a mweemusini ya nroromelo” nyenya ari ooceecheya. (Gal. 6:10) Ninnooniherya osivela wahu ntakhara yaawo moorweela wa waaceenyerya ophwanyeya mmithukumano, xaxaxa Yawuupuserya. Hiiha ntoko Yehova ni Yesu, ninnakhala oohakalalaxa vaavaa ooceecheya onakookeleiye wa Yehova, Tiithi ahu oosivela ni mukukhula ahu.—Mat. 18:14.

16. (1) Nni nlipihane hai mukina ni mukhwaawe, nave tiheeni mithukumano sahu sinahaalaaya opaka wa hiyo? (2) Ntakhara heeni eryaaya elukuluku yaphaama ya eyaakha ya wuupuwela masu a Yesu anaphwanyeya mu Yohani 3:16?

¹⁶ Mu isumana inoorwa, mwaawope achu ancipale wakhala wooweryeya wi ephiye va Yawuupuserya mu 19 a Apirili a 2019, Naneethanu osekuwa. (Moone ekaaxa “ Apwanne Munahaala Waawopa?”) Mu eyaakha yoothene, nnachuna opaka soothene nnaweryaahu wi nlipihane mukina ni mukhwaawe moorweela wa ophiya mmithukumano soothene Yehova onanivahereryeiye. Vaavaa makuchuwelo a elapo yeela anaacamelaaya, nnachuna wi mithukumano sahu sinikhaviherye okhala awiiyeviha, oolipa murima, ni oosivela. (1 Tes. 5:8-11) Ni murima ahu woothene, hankooni nooniherye mukhalelo nnoonaahu vooloca sa osivela otokweene yoowo Yehova ni Mwanawe anoonihenryaaya.—Mwaalakhanye Yohani 3:16.