1, 2. (1) Muchaka orempwe mu Isaiya 41:10 waamvolowenle hai murokora oniichaniwa Yoshiko? (2) Yehova aakhapelenle muchaka yoola ntakhara taani?

MUROKORA oororomeleya oniichaniwa Yoshiko, aahaakhela muchaka woothananiha. Totore awe aalonce wi pahiru aahanleno miyeeri vakhaani wi akhwe. Owo aakhulenle hai? Yoshiko aahuupuwela eciciri ya Piipiliya yavamurimani, Isaiya 41:10. (Mwaalakhanye.) Moomaaleleya owo aahimuleela totore wi owo haari awoova, nthowa nawi Yehova aahipharela ntata nawe. * Muchaka woolipiha onaphwanyeya mu eciciri yeela waahimukhaviherya murokora ahu oosiveliwa omuroromela Yehova moomalela. Eciciri emohamoha enamunikhaviherya otitelela okhala oomaaleleya elukuluku nnakumanahuno makacamiho mancipale. Wi niiwexexe mukhalelo ela eneeraaya yeereye, voopacerya hankooni nthokororye ntakhara heeni Muluku ayaaka omvahererya Isaiya muchaka yoola.

² Wuupaceryani, Yehova aahimuleela Isaiya orepa masu yaala wi aahakararye Ayuta yaawo ohoolo waya yaahaala okerihiwa o Papulu ntoko akapuro. Mwawiihiiha, Yehova aahikhapelela muchaka yoola wi oruuhe mphurelo ohiya pahiru wa Ayuta nyenya tho wa achu awe ovinyerya mu elukuluku yeele ophiyerya hiihaano. (Isa. 40:8; Aro. 15:4) Olelo nnakhala mu “ilukuluku sa sookacamiha,” nave opwaha khalai, ninnachuna nlipiho nenlo nnaphwanyeya mu liivuru a Isaiya.—2 Tim. 3:1.

3. (1) Soororomeliha taani sinaphwanyeya mu Isaiya 41:10, yoorepa ethanliwe ntakhara eyaakha ya 2019? (2) Ntakhara heeni ninnachuna soororomeliha seiya?

³ Mmwaha yoola, nnahaala othipeleya mu soororomeliha chaaru sa Yehova sirempwe mu Isaiya 41:10 seiyo sini sinikhaviherye olipiha nroromelo nahu: (1) Yehova onamukhala ni  hiyo, (2) owo Muluku ahu, nave (3) owo onahaala onikhaviherya. Ninnachuna yoororomeliha yeeyo * woona wi, ntoko Yoshiko, ninnahoolela makacamiho mu okumi ahu. Hiyaano nookhalano makacamiho nthowa na ichu soonanara sineereya mweelaponi. Ophiyerya wi akina a hiyo annavilela ni wiikariwa onarweela wa alamuleli oowerya. Hankooni nthokororye soororomeliha seiya emoha ti emoha.

4. (1) Yoororomeliha taani yoopacerya nnahaalaahu othokororya? (Moonetho masu avathi.) (2) Mmikhalelo taani Yehova onooniheryeiye miyoonelo sawe ntakhara hiyo? (3) Masu a Muluku anaweerihaani woona hai?

⁴ Voopacerya Yehova onnanihakararya ni masu: “Ohoove, miyo kiri ni weyo.” * Yehova onnooniherya wi ori ni hiyo moorweela wa onipwacha ni onilopola moosivela. Moone mukhalelo owo onooniheryeiye opwacha wawe ni miyoonelo sawiiseela ntakhara hiyo. “Wa ookhweleyasha vamiithoni vaka,” Yehova tonaloca. “Onnacicimiheya, nave miyo kinnookhwela.” (Isa. 43:4) Mwa soopatusiwa soothene hiyaavovo enahaala omuhiiha Yehova waasivela yaale anamurumeela yoowo; ororomeleya wawe ntakhara hiyo horwa ovinyavo. (Isa. 54:10) Osivela ni onthamwene awe sinnanivaha olipa murima. Owo onamunikhapelela olelo, hiiha ntoko aamukhapelenleiye nthamwene awe Aparahamu. Yehova aahi wa yoowo: “Ohoove Aaparahamu, miyo kinnawaakiha.”—Map. 15:1.

5, 6. (1) Nnasuwela hai wi Yehova onnachuna onikhaviherya elukuluku nnahoolelaahu makacamiho? (2) Tiheeni nnahuseryaahu orweela wa yootakiherya ya Yoshiko?

⁵ Noosuwela wi Yehova ookhalano nchuno na onikhaviherya ni makacamiho ahu woona wi ohaaroromeliha achu awe: “Waalapuwaka mihice, kiri ni weyo; maahi herwa yoomirya. Waaviraka mmooroni, hovya; makalume herya eweeyela” Yehova tonaloca. (Isa. 43:2) Masu yaala anataphulela eheeni?

⁶ Yehova hananiroromeliha oviihavo makacamiho yaawo aneeriha okumi okhala woovila, nyenya owo harwa eemererya “mihice” sa makacamiho onimirya hiyo naari “makalume” a saweeha oneeyela moomalela. Owo onnaniroromeliha wi onamukhala ni hiyo,  anikhaviheryaka ‘olapuwa’ mmakacamiho yaawo. Tiheeni Yehova onahaaleiye weera? Owo onahaala onikhaviherya omaaliha woova wahu wi nihiyeleele ororomeleya wahu wa yoowo, naamwi nihoolelaka okhwa. (Isa. 41:13) Yoshiko, yoowo oromoliwe wuupaceryani, oohoona wi ela eparipari. Mwanawe amwaamuthiyana ooloca: “Naahitannyeya murima ni mukhalelo amama yaaryaaya oomaaleleya. Mweeparipari naahoona wi Yehova aahaavaha murecele wampuwa. Ophiyerya nihiku amama yaakhwilaaya, awo yaanaloca ni alipa murece moopisa murima vooloca sa Yehova ni soororomeliha sawe.” Tiheeni nnahuseryaahu orweela wa yootakiherya ya Yoshiko? Vaavaa nnaroromelaahu yeeyo Muluku olonceiye yawi “kiri ni weyo,” hiyotho nnamukhala oolipa murima ni akuru elukuluku nnahoolelaahu makacamiho.

7, 8. (1) Tiivi eri yoororomeliha yanaawiili nnahaalaahu othokororya, nave tiheeni eyo enataphulelaaya? (2)  Ntakhara heeni Yehova aalonceiye wa Ayuta yaari wookapuroni: “Ohuukhuwe”? (3) Masu anaphwanyeya mu Isaiya 46:3, 4 yaamaalinhe hai mirima sa achu a Muluku?

⁷ Moone yoororomeliha yanaawiili yaarempwe ni Yesaya: “Ohuukhuwe, ka Muluku aa.” Masu ala vooloca sa wuukhuwa anataphulela eheeni? Mu eciciri yeela masu a elocelo yoopacerya “okhala awuukhuwa” anooniherya “oweha oculi moohihiyererya nthowa na woova wi echu naari muchu awoopiha oohooseeni naari okhala oohaleeliheya ntoko muchu yoowo ori va yawoopiha etokweene.”

⁸ Ntakhara heeni Yehova ayaaka waaleela Ayuta yaawo yaahaala okerihiwa wookapuroni o Papulu wi ‘ehuukhuwe?’ Ti nthowa nawi owo aahisuwela wi akaneene a elapo yeele yaahaala okhala awoova. Tiheeni yaahaala otannya woova iwo? Omakuchuwelo wa iyaakha makhumi mathanu napiili ya Ayuta yaari wookapuroni, Papulu aahaala ohipheliwa ni akhoco oowerya o Meto Persiya. Yehova aahaala waapharihela akhoco yaawo wi ewoopole achu awe wookapuroni o Papulu. (Isa. 41:2-4) Vaavaa Apapulu ni achu a maloko makina yaakhanle mu elukuluku yeele yaasuwenlaaya wi amwiicani aya annaacamela, awo yaaheererya otitelela okhala oolipa murima moorweela mwa oloca wa mukina ni mukhwaawe: “Olipe.” Nave awo yaahaapaka amuluku ancipale oopachiwa, ewehereryaka wi yaahaala waakhapelela. (Isa. 41:5-7) Mu elukuluku emohamoha, Yehova aahimaaliha mirima sa Ayuta oophariwa orweela mwa oloca: “Weyo Isarayeli, [moohiyana ni mwaacamani aa wa] namuteko aka . . . Ohuukhuwe, ka Muluku aa.” (Isa. 41:8-10) Moone wi Yehova alonce wi: “Ka Muluku aa.” Ni masu yaala, Yehova aahaaroromeliha alapeli oororomeleya wi haahaala waacuwala yaawo—nlelo owo aari Muluku aya, nave awo nlelo yaari achu awe. Owo aahaaleela yaawo: “Kini kinooteeshaani, . . . Ni owaakihaani.” Masu yaala oohakararya ni oolipiha moohikhwa minikwa yaahaalipiha Ayuta yaari wookapuroni.—Mwaalakhanye Isaiya 46:3, 4.

9, 10. Ntakhara heeni hannaphwanela okhala awoova? Mphwanaphwanihe.

⁹ Hiihaano opwaha khalai, achu yaawo anirukurenrye ari awuukhuwa vooloca sa mikhalelo soohiciha sa mulaponi. Mweeparipari, hiyotho ninnavoloweliwa vancipale ni makacamiho mamohamoha. Nyenya hiyo hannaphwanela okhala awoova. Yehova onnanleela: “Ka Muluku aa.” Ntakhara heeni masu yaala aryaaya nthowa noolipa na otitelela okhala oomaaleleya?

¹⁰ Muthokororye yootakiherya ela: Achu eeli ari va mukwahani, Ximi ni Peni, awo awenle nceeke nenlo nnakakhiwa ni echeku yawuupa. Vaavaa nceeke nnakakhiwaaya ni echeku, mulipa a weeciha nceeke onnaloca ni nsu noovuwa wa muchu ti muchu ori mu nceeke: “Mutitelele olipiha nrampa nanyu. Nnahaala weeca mu  echeku yeela yawoopiha mu elukuluku yawaaca.” Ximi onnasareya woova. Nyenya voocharela mulipa aweeciha nceeke onnaaceererya: “Ti miyaano mulipa aweeciha nceeke onaloca. Muhikhale awuukhuwa, ichu soothene iri mmapuroni mwaya.” Mu elukuluku yeele Ximi onnacikinya muru awe alocaka, “apwanne ninnaphwanela oororomela chiryene wi ichu iri mmapuroni mwaya?” Owo onnasuwela wi Peni hari awuukhuwa naari vakhaani. Ximi onnamukoha Peni: “Ntakhara heeni oryaawe oomaaleleya?” Peni onnatheya nave onnaloca: “Ti nthowa nawi koomusuwela phaama mulipa aweeciha nceeke ola. Ola tiithi aka!” Voocharela Peni onnaloca: “Nkamaala koolele vooloca sa tiithi aka. Kinnaroromela wi wakhala wi woomusuwela phaama ni mavyakelo awe aweeciha nceeke, weyotho onahaala okhala oomaaleleya.”

11. Tiheeni nnahuseryaahu orweela wa niphwanaphwaniho na alipa mukwaha eeli?

¹¹ Tiheeni nnahuseryaahu orweela wa niphwanaphwaniho nenla? Moolikana ni Peni, nri oomaaleleya woona wi noomusuwela phaama Tiithi ahu awirimu, Yehova. Hiyo noosuwela wi owo onamunikhapelela elukuluku nnahoolelaahu makacamiho matokweene ntoko nayuupuru variyari va mahiku ookuchula a elapo yeela. (Isa. 35:4) Ninnamuroromela Yehova, mwawiihiiha nnanwerya otitelela okhala oomaaleleya vaavaa achu anasareyaaya woova. (Isa. 30:15) Ninnakhala ntoko Peni elukuluku nnuukaahu ni amwaacamani ahu mathowa nryaahuno a omuroromela Muluku. Voocharela awotho ananwerya ororomela wi moohipwacha makacamiho anahoolelaaya, Yehova onamwaakhaviherya.

12. (1) Yoororomeliha taani yaneeraru nnahaalaahu othokororya? (2) Masu awi “moono” wa Yehova ananuupuserya eparipari taani?

¹² Muthokororye yoororomeliha yaneeraru yeeyo Yesaya orempeiye: ‘Kinamoolipiha,  [nave] kinamookhaviherya.’ Yesaya aahithariha mukhalelo Yehova eereiye aalipihe achu awe, alocaka: “Apwiya [Yehova ], anarwa wa nyuwo ni ikuru saya; ni moono aya annalamula.” (Isa. 40:10) Piipiliya wiiliwiili onnapharihela nsu nawi “moono” moosiphela etaphulelaka owerya. Mwawiihiiha masu awi ‘moono wa Yehova onnalamulela’ annanuupuserya wi Yehova tori Mwene ooweryaxa. Owo aahipharihela owerya wawe otokotoko wi aakhaviherye ni owaakiha akapuro awe akhalai, nave owo onnatitelela waalipiha ni waakhapelela yaale anamuroromela olelo.—Malam. 1:30, 31; Isa. 43:10.

13. (1) Elukuluku taani xaxaxa Yehova onaniroromeliheiye onilipiha nave Yesaya 25:4, 5 onakhaviherya hai yeela? (2) Yoororomeliha taani enanivaha nlipiho ni nroromelo nawaaca?

¹³ Xaxaxa vaavaa amwiicani ananiikaraaya, Yehova onnatitelela oniroromeliha: “Kinamoolipiha.” Mu makupa makina a elapo olelo, amwiicani ahu anneererya moowetha omaaliha muteko ahu woolaleerya naari omaliha marehereryo ahu. Naamwi hiiha, hannakhala awuukhuwaxa vooloca sa ohiphela sintoko yoowo. Yehova onnanivaha yoororomeliha yeeyo enanivaha nlipiho ni nroromelo nawaaca. Owo onnaniroromeliha: “Mavaka oothene oorehereliwaa ekaamookuvya.” (Isa. 54:17) Masu yaala annanuupuxerya iparipari raru soochuneya.

14. Ntakhara heeni hannatikhiniheya vaavaa amwiicani a Muluku ananihiphelaaya?

¹⁴ Yoopacerya, ntoko oomuchara a Kristu nnaweherya wiiciwa. (Mat. 10:22) Yesu aahilaiherya wi amuhuserya awe yaahaala wiikariwaka variyari va mahiku oomaliherya. (Mat. 24:9; Yoh. 15:20) Yanawiili, yooloherya ya Yesaya ennanlopola wi amwiicani ahu anahaala opaka sincipale opwaha oniica, awo anahaala opharihelaka mavaka oohiyanahiyana. Mavaka yaawo yaahaala ophitaanyerya soohuweliha soovitheya, wootheriwa ni wiikariwa otokotoko. (Mat. 5:11) Yehova hani aamaalihe amwiicani ahu wi ehiphariheleke mavaka yaawo wi ewane ni hiyo. (Éfe. 6:12; Wup. 12:17) Nyenya hannaphwanela okhala awoova. Ntakhara heeni?

15, 16. (1) Eparipari taani yaneeraru nnaphwanelaahu wuupuwela nave Isaiya 25:4, 5 onakhaviherya hai yeela? (2) Isaiya 41:11, 12 otharinhe hai vooloca sa yookhumelela ya yaale anawana ni hiyo?

 ¹⁵ Muthokororye eparipari yaneeraru nnaphwanelaahu wuupuwelela. Yehova ooloca wi “mavaka” eni ereheryiwe ntakhara hiyo eni ‘enaamunikuvya.’ Hiiha ntoko exiri enanikhapelelaaya ntakhara echeku etokweene, Yehova onnanikhapelela wa “miwiya ya achu oowali.” (Mwaalakhanye Isaiya 25:4, 5.) Amwiicani ahu herwa ekhumelela phaama mu ontolosa moomalela.—Isa. 65:17.

¹⁶ Yehova onnalipiha tho nroromelo nahu mwa yoowo moorweela wa othariha mookwakwaleya yeeyo eni yeereye ni yaawo “annanariwa ni” hiyo. (Mwaalakhanye Isaiya 41:11, 12.) Moohipwacha mukhalelo amwiicani ahu anawethaaya owana ni hiyo naari mukhalelo yoolakelela aya eryaaya, yookhumelela ene emoharu: Amwiicani oothene aachu a Muluku “anamutoloshiwa, ecakanela.”

17, 18. (1) Omwaalakhanya Piipiliya onannuwiha hai omuroromela wahu Muluku? Mvahe yootakiherya. (2) Wuupuwelela yoorepa ethanliwe ntakhara eyaakha ya 2019 eni enikhaviherye hai?

¹⁷ Ninnannuwiha omuroromela wahu Yehova moorweela mwa omusuwela phaama. Nave mukhalelo mmoharu nneeraahu nimusuwele phaama Muluku ori omwaalakhanya Piipiliya moopwacha nave voocharela wuupuwelela mwawiiseela yeeyo naalakhannyaahu. Piipiliya onnathariha miyaha seeparipari vooloca sa mukhalelo Yehova aakhapelenleiye achu awe khalai. Miyaha seiyo sinnanivaha nroromelo wi onahaala onikhapelela hiihaano.

¹⁸ Muthokororye yootakiherya ya masu ooreera Yesaya opharihenleiye wi aphwanaphwanihe mukhalelo Yehova onanikhapeleleiye. Owo oomulikanyiha Yehova ntoko mukukhula nave akapuro a Muluku ntoko ipucepuche. Yesaya ooloca sa Yehova: “Onàtxukhula asana a iputxeputxhe mmiwononi, onnawupàra.” (Isa. 40:11, BNM) Vaavaa nnoonaahu miwono sa Yehova inuupaaraka, ninnakhala ookhapeleleya ni oomaaleleya. Wi anikhaviherye otitelela okhala oomaaleleya moohipwacha makacamiho nnahoolelaahu, Kapuro oororomeleya ni awiisuwela oomuthanla Isaiya 41:10 ntoko yoorepa ya eyaakha ya 2019, “ohuukhuwe, ka Muluku aa.” Muupuweleleke masu yaala oororomeliha. Awo anahaala woolipihaani elukuluku munahoolelaanyu makacamiho anoorwa.