1, 2. (1) Ntakhara heeni Yesu ootikitherya mukhalelo wookhweya wi nuupuweleke okhwa wawe? (2) Mikhalelo taani sa Yesu nnahaalaahu othokororya?

APWANNE mwanwerya othariha yeeyo eneereya va Yawuupuserya ya okhwa wa Kristu? Moohikhwa minikwa ancipale a hiyo nnanwerya wuupuwelela ichu seeren’ye va Yoolya Yoohiyu ya Apwiya. Ntakhara heeni? Nthowa nawi yoolya eyo ti yookhweya. Mwawiihiiha, ela yaweereya yeeyo erino yootaphulela. Mwa yeeyo nnaphwanela wiikoha, ‘Ntakhara heeni yoolya eyo eryaaya yookhweya?’

² Variyari va orummwa awe veelaponi yavathi, Yesu aahisuweliwa nthowa na ohusiha wawe iparipari soochuneya mmukhalelo yoowo waari wookhweya, wookwakwaleya, ni wookhweya wiiwexexa. (Mat. 7:28, 29) Moolikana, owo oonivaha mukhalelo wookhweya nyenya orino yootaphulela wi nuupuweleke * okhwa wawe. Hankooni nuupuwelele moopwacha yoolya yeela Yawuupuserya ni ichu ikina seiyo Yesu aalonceiye ni aapankeiye. Nnahaala wiiwexexa moopwaha mukhalelo Yesu oreiye awiiyeviha, oolipa murima, ni oosivela, nave nnahaala ohuserya mukhalelo nneeraahu nimutakiherye phaama.

3. Ntoko elociwaaya mu Mateu 26:26-28 mukhalelo taani yoolya ya Yawuupuserya yeeyo Yesu opacerinheiye eryaaya yookhweya, nave ichu piili sinaphariheliwa inasiphela eheeni?

³ Yesu aahipaceryiha Yawuupuserya ya okhwa wawe ni arummwa awe oororomeleya khumi nammoha. Owo aahikusa yoolya yeeyo yaahanle va Paskha nave aahipakano yawuupuserya yeela yookhweya. (Mwaalakhanye Mateu 26:26-28.) Pahiru owo  aapharihenle ephaawu yoohiruruvalihiwa ni eviinyu yeeyo yaahanle. Yesu aahaaleela arummwa awe wi ichu seiye piili saasiphela mwiili nnikhami nawe, seiyo owo aahaaleiye ovaha moohilekela wa nthowa naya. Akhweya arummwa hiyaatikhinne ni okhweihiwa wa yoolya yeele evyaani yoochuneya. Ntakhara heeni?

4. Ti mwawiihai ekano yeeyo Yesu aamvanheiye Marta enanikhaviheryaaya wiiwexexa ntakhara heeni Yesu aahipaka yoolya ya Yawuupuserya yookhweya?

⁴ Muthokororye yeeyo yeeren’ye mu miyeeri muculi, variyari va eyaakha yaneeraru ya muteko wa Yesu, vaavaa aaphin’yeiye vaate va asinthamwene awe awaacameleya—Lasaro, Marta, ni Mariya. Vaavaa aakirantheiye iichuwaaka, Yesu aahipacerya ohusiha. Marta aari vaava, nyenya owo aahitepa weeteteya arehereryaka yoolya yincipale ntakhara muleco awe oocicimiheya. Oonaka yeela, Yesu aahimookolola Marta, amukhaviheryaka osuwela wi orehererya yoolya yincipale hiwaari woochuneya. (Luka 10:40-42) Ohoolo waya, mu iwora vakhaani ohaakumve okhwa wawe wa woopola, Yesu aahipharihela ekano awe. Owo aahipaka yoolya ya Yawuupuserya yookhweya. Tiheeni ela enanleelaaya vooloca sa Yesu?

5. Okhweihiwa wa yoolya yeela enooniherya eheeni vooloca sa Yesu nave ela eniiwanana hai ni Filipi 2:5-8?

⁵ Mu echu eri yoothene yeeyo Yesu aalonceiye ni aapankeiye, owo aari awiiyeviha. Mwawiihiiha eyo tahi yootikhiniha wi aahooniherya wiiyeviha otokotoko mu ohiyu yoole wookuchula wa ekumi awe veelaponi yavathi. (Mat. 11:29) Owo aahisuwela wi aahaala ovaha mukucho awe mutokotoko ntakhara achu nave wi Yehova aahaala omviiha wi akhale mwene wirimu. Naamwi aasuwenle yeeyo, haapwanche ocicimihiwa yene mukhateiye moorweela wa opaka yaweereya yoovila ntakhara wuupuwelela okhwa wawe. Ohiya yeeyo, owo aahaaleela arummwa awe wi emuupuweleke ekwaha emoha muyakha ti muyakha moorweela wa yoolya yeela yookhweya. (Yoh. 13:15; 1 Kor. 11:23-25) Yoolya yookhweya nyenya yoochuneya ennooniherya wi Yesu haari awiirumiha. Ninnahakalala osuwela wi wiiyeviha ti mukhalelo yoowo onooniheryiwa ni Mwene ahu awirimu.—Mwaalakhanye Filipi 2:5-8.

6. Nni ntakiherye hai wiiyeviha wa Yesu elukuluku nnahoolelaahu makacamiho?

⁶ Nni ntakiherye hai wiiyeviha wa Yesu? Orweela wa ohela soochuna sa akina vanipuro noopacerya ohiya sawihu. (Fil. 2: 3, 4) Nkuupuwelani vooloca sa ohiyu wookuchula wa Yesu veelaponi yavathi. Yesu aahisuwela wi moohilekela aahaala ohoolela okhwa woowaawa; naamwiihiiha, owo aari awuukhuwa ni arummwa awe ororomeleya, yaawo moohilekela yaahaala othanana ntakhara yoowo. Mwa yeeyo owo aahimaliha ohiyu wookuchula aahusihaka, aalipihaka, ni aahakararyaka yaawo. (Yoh. 14:25-31) Yesu mwawiiyeviha aahooniherya othanana ntakhara akina opwaha wa yoowo mukhateiye. Ela yootakiherya yaphaamaxa yeeyo otikithenryeiye wa hiyo!

7. Ti mwawiihai Yesu oonihenryeiye olipa murima amanle opaceryiha Yoolya Yoohiyu ya Apwiya?

⁷ Yesu amanle opaceryiha Yoolya Yoohiyu ya Apwiya, owo aahooniherya olipa murima wootikhiniha. Mwawiihai? Yesu aaheemererya yookhwela ya Tiithi awe wa yoowo, naamwi aasuwela wi weerano yeeyo yaahaala otaphulela wiiphiwa ootheriwaka wi aahikhalano mulacu wa ophuca. (Mat. 26:65, 66; Luka 22:41, 42.) Yesu aahititelela wooniherya ororomeleya woophaameya wi acicimihe nsina na Yehova, akhaviheryaka otokweene wa Muluku, ni weeriha wi achu oocharuwa soocheka ewerye okhala wookhala. Mu elukuluku emohamoha, Yesu aahaarehererya oomuchara awe wa yeeyo yaahaalaaya ohoolela moohilekela.

8. (1) Tiheeni Yesu aaleenleiye arummwa awe oororomeleya? (2) Mu iyaakha ohoolo waya Yesu amanle okhwa, arummwa awe yaacharinhe hai yootakiherya awe ya olipa murima?

⁸ Yesu aahooniheryatho olipa murima moorweela wa ohuupuwelela wuukhuwa vyakala akhweya aareiyeno nave oweiwa ni soothowa sa arummwa awe oororomeleya. Yoolya yookhweya, yeeyo aapaceryinheiye amanle omwiikara Yutasi, yaahaala okumiherya mphurelo wa yaale yaahaala okhala oomuchara awe oothanliwa, yaale yaahaala opaka makupa mu nlakano na hiihaano. (1 Kor. 10:16, 17) Wi aakhaviherye arummwa wi etitelele okhala  oororomeleya nave ekhale ni Yesu wirimu, Yesu aahaaleela oomuchara awe yeeyo owo ni Tiithi awe yaaweheryaaya wa yaawo. (Yoh. 15:12-15) Yesu aahaaleelatho arummwa awe saweeha seiyo awo yaahaalaaya okumanano muhoolo. Voocharela aaceenyeryaka ochariha yootakiherya awe, owo aahaalopola ariki: “mulipe murima!” (Yoh. 16:1-4a, 33) Iyaakha sincipale ohoolo waya, amuhuserya a Yesu nlelo yaanachariha yootakiherya awe ya wiikhooca nave yooniheryaka olipa murima. Naamwi eyo yaataphulela wi yaahaala ohooseya, yaanakhaviheryana mukina ni mukhwaawe mu saweeha saya soohiyanahiyana.—Ahe. 10:33, 34.

9. Nni nimutakiherye hai Yesu mu wooniherya olipa murima?

⁹ Moolikana tho olelo, ninnachariha yootakiherya ya Yesu ya wooniherya olipa murima. Ntoko yootakiherya, onnachuneya olipa murima wi naakhaviherye annihu yaawo aniikariwa nthowa na nroromelo naya. Mu ilukuluku ikina, annihu anamphiyerya owaleliwa mukalaposo. Vaavaa eyo eneereyaaya, nnaphwanela opaka soothene nnaweryaahu ntakhara yaawo, ophitaanyerya owaakiha. (Fil. 1:14; Ahe. 13:19) Mukhalelo mukina nnooniheryaahu olipa murima ori otitelela olaleerya “moohoovelela.” (Saw. 14:3) Hiiha ntoko Yesu, nri oolakelela olaleerya michaka sa Omwene, naamwi achu enaakaahaka nave eniikaraka. Mu ilukuluku ikina, ninnayeleela olipa murima. Tiheeni nnaphwanelaahu opaka?

10. Mu isumana ehaakumve Yawuupuserya, tiheeni nnaphwanelaahu opaka nave ntakhara heeni?

¹⁰ Ninnaacererya olipa wahu murima moorweela wa wuupuwela ewehereryo yeeyo mukucho wa woopola wa Kristu weerinhaaya okhala yooweryeya wa hiyo. (Yoh. 3:16; Éfe. 1:7) Mu isumana ehaakumve Yawuupuserya, nookhalano ekari yavameekhaaya ya olipiha othamalela wahu yawoopola. Variyari va elukuluku yeeyo, mutitelele waalakhanya makupa a Piipiliya ntakhara Yawuupuserya nave mukhaleno moonelo woophwanelela vaavaa munuupuwelelaanyu ichu seiyo seeren’ye waacamela elukuluku ya okhwa wa Yesu. Voocharela vaavaa nnahaalaahu othukumana ntakhara Yoolya Yoohiyu ya Apwiya, nnahaala wiiwexexa moopwahaxa yootaphulela ya ineneeryo sinaphariheliwa va Yawuupuserya ni mukucho yoowo sineemelelaaya. Vaavaa nnathamalelaahu yeeyo Yesu  ni Yehova apankaaya ntakhara hiyo ni wiiwexexa mphurelo nnakhalaahuno vamoha ni yaale nnaasivelaahu, ewehereryo ahu ntakhara muhoolo ennakhala yoolipa, nave ninnaceenyeryeya ovilela moolipa murima ophiyerya omakuchuwelo.—Ahe. 12:3.

11, 12. Tiheeni nihusenryaahu ophiyerya vaava?

¹¹ Ophiyerya vaava noohuserya wi Yoolya Yoohiyu ya Apwiya ennanuupuserya ohiya pahiru ochuneya wa yawoopola nyenya tho mikhalelo sookhweleya sa Yesu ntoko wiiyeviha ni olipa murima. Nnaphwanela othamalela woona wi Yesu onnatitelela wooniherya mikhalelo seiya ntoko Namukucho ahu Mutokotoko awirimu, yoowo onanaakiha! (Ahe. 7:24, 25) Wi nooniherye othamalela wahu ni murima woothene, nnaphwanela wuupuwela moororomeleya okhwa wa Yesu, hiiha ntoko owo aalamulenleiye. (Luka 22:19, 20) Nnapaka yeela mu nihiku nenlo nniiwanana ni 14 a Nisani, nihiku noochuneyaxa na eyaakha.

¹² Nnanwerya ohuserya orweela wa okhweya wa Yoolya Yoohiyu ya Apwiya mukhalelo mukina waamweerinhe Yesu okhwa ntakhara hiyo. Ntoko muchu veelaponi yavathi, owo aahisuweliwa ni mukhalelo yoowo. Waari mukhalelo taani?

13. Yohani 15:9 ni 1 Yohani 4:8-10 onathariha hai osivela Yehova ni Yesu yoonihenryaaya, nave taani onaphura orweela wa osivela waya?

¹³ Moophaameya Yesu aahooniherya osivela otokotoko wa Yehova ntakhara hiyo moorweela wa echu vyakala owo aapankeiye. (Mwaalakhanye Yohani 15:9; 1 Yohani 4:8-10.) Opwaha soothene, Yesu aahiceenyeryeya ni murima woothene ovaha ekumi awe ntakhara hiyo. Moohipwacha waakhanle wi na oothanliwa naari a “ipucepuche ikina,” ninnaphura orweela wa osivela yoowo Yehova ni Mwanawe yoonihenryaaya wa hiyo moorweela wa mukucho yoowo. (Yoh. 10:16; 1 Yoh. 2:2) Muupuweletho vooloca sa ineneeryo soochuneya seiyo sinaphariheliwa va yoolya Yawuupuserya; ihotho sinnooniherya osivela wa Yesu ni waapwacha wawe amuhuserya awe. Mwawiihai?

14. Mmukhalelo taani Yesu oonihenryeiye osivela ntakhara amuhuserya awe?

¹⁴ Yesu aahooniherya osivela wa oomuchara awe oothanliwa moorweela wa otikitherya yaweereya yookhweya wi eweryeke wuupuwelela. Vaavaa elukuluku yaaviraaya, arummwa oothanliwa ale yaaphwanela opakaka Yawuupuserya muyakha ti muyakha, yeerakano yeeyo mu mikhalelo soohiyanahiyana, ophitaanyerya mukariposo. (Wup. 2:10) Apwanne awo yaahiwerya omwiiwelela Yesu? Aai, awo yaahiwerya!

15, 16. Akina anawerya hai wuupuwelela Yoolya Yoohiyu ya Apwiya naamwi mmikhalelo soovila?

¹⁵ Ovinyerya mu nsana noopacerya ophiyerya olelo, Akristu eeparipari aanapaka wiilipiserya wi yuupuwelele okhwa wa Yesu. Awo annachariha meerelo a Yoolya Yoohiyu ya Apwiya ophiyerya anaweryelaayavo, ikwaha ikina mmikhalelo soovila. Moone yootakiherya enacharela. Elukuluku munna Harold King aareiye mukhateiye mukariposo o Xina, owo aahiilipiserya wi apake Yawuupuserya. Wiiphiini, aahiirehererya ineneeryo sa Yawuupuserya, apharihelaka ichu seiyo aareiyeno. Owotho aahaalakhanyerya moopwacha nihiku na yawuupuserya ntoko aawereleiyevo. Vaavaa yaaphin’yaaya elukuluku, owo—meekheiye mukariposo—aahiipa macipo, avekela, nave aaperekha mwaha wa mu Soorempwa.

¹⁶ Moone yootakiherya ekina. Nikhuuru na arokora yaawo yaawaleliwe mu nipuro na achu oophariwa variyari va Ekhoco Etokweene Yanawiili yaahihela ikumi saya va yawoopiha wi yuupuwelele Yoolya Yoohiyu ya Apwiya. Mwawiihiiha, woona wi ichu sinaphariheliwa mu elukuluku yeeyo ti sookhweya, awo yaahiwerya  opaka Yawuupuserya wiiphiini. Awo yaahiloca: “Naahikhala vamoha nrukurenrye meesa makhaani vaavaa naakunhaahuvo ephaawu ni eviinyu nikhuneenle ni ekuwo yaweela. Naahipariha eveela mu ekwartu yeele, eyo yaananimwaleela yooneihaka yeeyo naapakaahu. . . . Naahuuluulela nlakano nahu wa Tiithiihu vooloca sa opharihela ikuru sahu ntakhara ovuwihiwa wa nsina Nawe naweela.” Chiryene awo yaahooniherya nroromelo noolipa! Nave Yesu aahooniherya osivela vaavaa eerinheiye okhala wooweryeya wa hiyo opakaka Yawuupuserya naamwi nihoolelaka mikhalelo soovila!

17. Makoho taani nnaphwanelaahu wiipakela?

¹⁷ Vaavaa Yawuupuserya enaacamelaaya, nnahaala weerano phaama wiipakela makoho anacharela: ‘Kini kimutakiherye hai Yesu phaama mu wooniherya osivela? Apwanne kinnuupuwela soothowa sa anna ni arokora opwaha sa miyaano mukhataaka? Apwanne Kinnaweherya sincipale wa anna ni arokora aka opwaha seiyo anaweryaaya opaka, naari kinnasuwela okotakota waya?’ Nnaphwanela omutakiherya Yesu ilukuluku soothene ni wooniherya “niphwanya.”—1 Ped. 3:8.

18, 19. (1) Tiheeni nnaphwanelaahu ororomela? (2) Tiheeni mulakelenlaanyu opaka?

¹⁸ Nlamulo na wuupuwela okhwa wa Kristu honi weereye mu elukuluku yincipale. Vaavaa Yesu oneereiye ‘arwe’ variyari va yoohooxa etokotoko, owo onahaala waathukumanya “oothanliwa awe” eni ekhale veelaponi wi eye wirimu, nave Yawuupuserya enahaala omaala wuupuweliwa.—1 Kor. 11:26; Mat. 24:31.

¹⁹ Naamwi elukuluku yoolya ya Yawuupuserya eneeraaya ehuupuweleliweke, nnaphwanela ororomela wi achu a Yehova anahaala wuupuwelaka yoolya yeela yookhweya ntoko eneneeryo ya wiiyeviha otokweene, olipa murima, ni osivela yoowo wooniheryiwe ni muchu. Mu elukuluku yeeyo, yaale eni eniiha yuupuwelenle yoolya yeela ya vasuluxa heni ekhwe minikwa waaleela akina yaawo anahaala okhala akumi mu elukuluku yeeyo. Nyenya wi niphure ovinyerya hiihaano orweela wa yoolya yeela, nnaphwanela olakelela otakiherya wiiyeviha, olipa murima, ni osivela wa Yesu. Wakhala wi noheerano yeela, nroromele wi nnahaala waakhela mareeliho orweela wa Yehova.—2 Ped. 1:10, 11.