1. Ntakhara heeni akina hanachuna ohuserya?

OLELO achu anniilipixerya vatokovene wi ewerye ophwanya ikhorowa soophwanelela wi yiikhaviheryeno. Annihu ancipale annalapa mu iwora sincipale wi ekhaleno yeeyo eri yoochuneya mu okumi aya ni wa emusi aya. Ancipale annamaliha iwora sincipale nihiku ti nihiku eyaaka omutekoni ni ekookelaka owaani. Akina anniivakulela moorweela wa olapa muteko yoowo sinachuneya ikuru. Omakuchuwelo wa nihiku, anna ni arokora yaala analapa mwakuru annakhala oovelavela! Woona wi aavelavela hanakhalano elukuluku ya ohuserya.

2. Elukuluku taani munahuseryaanyu?

² Mweeparipari, nnaphwanela ophwanya elukuluku wi nihuserye—chiryene ohuserya—Masu a Muluku ni soolaleeryiwa Seekristu. Wi nikhaleno onthamwene ni Yehova ni ekumi yoohimala nnaphwanela ohuserya! (1 Tim. 4:15) Akina anavinya woosiiselo ene wi ehuserye vaavaa veechokoni onakhalaayavo woomaaleleya nave muupuwelo aya ori wooreheryeya emanle wiichuuwa ohiyu. Akina annaavya nipuro noomaaleleya mu aminutu avakhaani vanihikuni wi elye yoolya yoomunepani ni wuupuwelela.

3-4. Matorokelo taani apakiwe vooloca sa sooleeliherya nnachunaahu waalakhanya ni woona?

³ Moohikhwa minikwa munneemererya wi ti yoochuneyaxa ophwanya elukuluku ya ohuserya. Nyenya tiheeni nnaphwanelaahu ohuserya? Akhweya nyuwo munamuloca: ‘Sookhalavo ichu sincipale sa waalakhanya, onnakivila waalakhanya soothene.’ Annihu akina annawerya waalakhanya ni woona ixilema sahu soothene seiyo sinathipeleya Mpiipiliyani, nave anna akina hanawerya weerano yeeyo. Nikhuuru Noolamulela ninnasuwela yeela. Wa nthowa na yeela, hiihaanoru woovahereryiwa ohoolela wawi sivukuliwe opakiwa soolaleeryiwa sa wimprimiriwa ni samukhankoonyani.

⁴ Ntoko yootakiherya, noohiya ompaka Anuário das Testemunhas de Jeová, woona wi saweereya sincipale soolipiha sinnaphwanyeya mu jw.org^® hiiha ntoko marehereryo a mweeri ti mweeri a  JW Broadcasting^®. Irevista ntoko Mulipeleli a vanlakani ni Vinyani! Vano sinalaleeryiwa ikwaha chaaru vayaakhani. Matorokelo yaala hapakiwe wi nikhaleno elukuluku yincipale nipakaka ichu seiyo sihinapaka makupa mu omulapela wahu Yehova. Yoolakelela ya matorokelo yaala ti yawi nikhaleno elukuluku ya okhala ootikitheryeya mwa “yeeyo eri yaphaamasha.” (Fil. 1:10) Hankooni nthokororye mukhalelo muneeraanyu mulakelele yeeyo eri yaphaamasa ni mukhalelo muneeraanyu mphure moorweela wa yoohuseraanyu ya Piipiliya.

5-6. Soolaleeryiwa taani hiyo nnaphwanelaahu ohuserya moopwacha?

⁵ Tiheeni nnaphwanelaahu ohela vanipuro noopacerya? Hiyo nnaphwanela omaliha elukuluku nihiku ti nihiku nihuseryaka Masu a Muluku. Vano iversikulu vooloca sa waalakhanyiwa wa Piipiliya wa esumana soovukuliwa wi nikhaleno elukuluku yincipale ya wuupuwelela yeeyo naalakhannyaahu ni opaka otholathola. Yoolakelela ahu enaphwanela okhala, ohiya pahiru waalakhanya ikapitulu seiyo ithanliwe wi saalakhanyiwe va esumana, nyenya omweemererya Piipiliya otannya mmurima ahu.—ni ovolowela moonelo ahu nave voocharela nnahaala omwaacamela Yehova.—Sal. 19:14.

⁶ Tiheeni nnaphwanelaahu ohuserya mmukhalelo woomaaleleya? Mweeparipari, nnaphwanela orehererya mwaha wa Mulipeleli Oomuhuserya ni mwaha wa Yoohuserya ya Piipiliya ya Muloko hiiha ntoko miyaha mikina sa muthukumano wa veeri va esumana. Hiyo nnaphwanela tho waalakhanya mwaha ti mwaha wa Mulipeleli ni Vinyani!

7. Apwanne nnaphwanela okhala oocecheya wakhala wi hannawerya woona naari waalakhanya soolaleeryiwa seiho sinaphwanyeya mu site ahu ni JW Broadcasting?

⁷ ‘Mweeparipari’ nyuwo munanwerya oloca, ‘vano hanka vooloca sa miyaha ni soolaleeryiwa soothene sinaphwanyeya mu site ahu, jw.org, hiiha ntoko miyaha inoonihiwa mu JW Broadcasting? Sookhalavo sincipale sa seiho!’ Muthokororye niphwanaphwaniho nimoha: Muupuwele wi munaya mu nipuro onatumihiwamo soolya soosiva soohiyana hiyana. Alipa oothuma a nipuro nlo noolya hanawerya olawiha soothene sinavahereryiwa. Nyenya awo anathanla soolya savakhaani anaweryaaya olya. Moolikana, wakhala wi nyuwo hamunawerya waalakhanya naari woona soolaleeryiwa sa mukhankoonya, muhiceecheye. Mwaalakhanye ni woona seiyo munaweryaanyu. Vano hankooni nthokororye yeeyo enavolowela ohuserya ni mukhalelo nneeraahu niphure yoohuserya ahu.

8. Makhalelo taani nnaphwanelaahu ochariha vaavaa nnamuhuseryaahu Mulipeleli, nave weerano yeeyo eni yookhaviheryeeni hai?

⁸ Elukuluku muchu onahusereiye, onatikitheryeya mu yeeyo onaalakhanyeiye, mwawiihiiha onnahuserya echu yookhweleya. Ohuserya tahi pahiru waalakhanya mwaha wammoori mwawaakuveya ni oceka maakhulo. Ntoko yootakiherya, vaavaa munamureheryaanyu Mulipeleli Oomuhuserya, yoopacerya munaphwanela ovareryela yoolakelela ya mwaha yoowo nnahaalaahu ohuserya onaphwanyeya omapacereryo wa mwaha. Voocharela, muthokororye muru wa mwaha owo, hiiha ntoko miru mikhaani ni makoho a wuuluulela. Mwaavinyaka vaavaa, mwaalakhanye vakhaani-vakhaani mwaha nave mmukhalelo woopwacha. Muthokororye phaama isentensa seiyo sinooleelaani yeeyo eparakrafo enathokororyaaya, wiiliwiili enakhala omapacereryo wa eparakrafo eri yoothene. Esentensa eyo enamookhaviheryaani osuwela yeeyo eparakrafo enatharihaaya. Elukuluku munaalakhanyaanyu mwaha woothene, muupuwele mukhalelo eparakrafo enakhaviheryaaya muru mukhaani ni mwaha. Murepele masu oothene muhiniiwexexaanyu ni mahusiheryo yaawo muhisuwenlaanyu mmanle waalakhanya, ni yeeyo munachunaanyu otholathola mwawiiseela.

9. (1) Ntakhara heeni nave mwawiihai nnaphwanelaahu othokororya phaama soorepa vaavaa nnamuhuseryaahu Mulipeleli? (2) Hiiha ntoko elociwaaya mu Yosuwa 1:8, echu taani yawaaceererya nnaphwanelaahu weera ni soorepa sa waalakhanyiwa?

 ⁹ Yoohuserya ya Mulipeleli eri yoohuserya ya Piipiliya. Mwa yeeyo mpwache phaama soorepa, xaxaxa seiye sinahaala waalakhanyiwa vaavaa muloko oneeraaya othokororyeke mwaha owo. Muthokororye phaama mukhalelo soorepa seiyo iri mathipelo naari masu mu soorepa anakhaviheryaaya yeeyo enalociwa mu eparakrafo. Opwaha yeeyo, mmalihe elukuluku muupuwelelaka mu soorepa seiyo mwaalakhannyaanyu, nave muupuwele mukhalelo munahaalaanyu opharihela mweekumi anyu.—Mwaalakhanye Yosuwa 1:8.

10. Mwawiiwanana ni Ahebri 5:14, ntakhara heeni asitiithi annaphwanela omalihaka elukuluku variyari va malapelo eechoko wi yaahusihe anaaya mukhalelo wa ohuserya ni opaka otholathola?

¹⁰ Mweeparipari, asitiithi anaphwanela weeriha wi elukuluku ya Malapelo Eechoko a esumana ti esumana ekhaleke yaweereya yoohakalaliha wa anamwane aya. Mwawiihiiha, naamwi ikwaha soothene asitiithi ephwanelaka opaka mareheryo mwa yeeyo anahaalaaya othokororya mu malapelo eechoko, hanaphwanela opaka marehereryo wi ekhale avameekhaaya naari opaka ichu soohakalaliha. Vakina vaya, ilukuluku sa Malapelo Eechoko onamuchuneya omoona JW Broadcasting, mu ikwaha ikina opharihela meerelo makina, ntoko omuteka mwaaceya a Nowa a ntakiheryo, eyotho ti yoochuneya wa anamwane wi esuwele mukhalelo wa ohuserya. Awo annachuna ohuserya mukhalelo wa orehererya mithukumano sa muloko, ntoko yootakiherya, naari mukhalelo wa opaka otholathola mwaha yoowo okhumelenle osikola. (Mwaalakhanye Ahebri 5:14.) Wakhala wi awo annamaliha elukuluku epakaka owaani miteko seiho sinalociwa Mpiipiliyani, awo anahaala okhala ooreheryeya mu miyaha sinahaala operekhiwa mmithukumano sa muloko, sa ekulucu, naari sa miceche seiho sihinaphitaanyerya ixilema. Elukuluku yeeyo asitiithi anaphwanelaaya omaliha ehuseryaka ni anaaya, awo anahaala olakelela mwawiiwanana ni iyaakha sa anamwane.

11. Ntakhara heeni oryaaya wookhweleya waahusiha oohuserya ahu a Piipiliya mukhalelo wa opaka yoohuserya ya muchu mukhateiye yoophwanelela?

¹¹ Oohuserya ahu a Piipiliya annachunatho osuwela mukhalelo wa opaka yoohuserya. Vaavaa awo anapaceryaaya ohuserya, hiyo ninnahakalala owoona pahiru ecenke maakhulo elukuluku anarehereryaaya yoohuserya aya ya Piipiliya naari ntakhara mithukumano sa muloko. Nyenya nnaphwanela waahusiha oohuserya ahu a Piipiliya mukhalelo wa otholathola ni mukhalelo wa opaka yoohuserya ya mphurelo. Mmukhalelo yoowo, vaavaa anakhumelelaaya makacamiho, heni yaakuvele omveka nikhaviheryo muchu a mmulokoni, awo anahaala osuwela mukhalelo wa ophwanya ekano yoophara muteko moorweela wa opaka otholathola mu soolaleeryiwa sahu.

12. Soolakelela taani nnaphwanelaahu okhalano vaavaa nnahuseryaahu?

¹² Wakhala wi hamunasiveliwano ohuserya, akhweya munamuupuwela wi hamurwa musiveliwano ohuserya. Nyenya munanwerya. Mpacerye muhuseryaka mu ilukuluku vakhaani, nave ohoolo waya mwaaceererye elukuluku munamalihaanyu. Mukhaleno yoolakelela mmuupuweloni. Mweeparipari, yoolakelela yookhweleyasa nnaphwanelaahu okhalano, ori omwaacamela vancipale Yehova. Yoolakelela yawaakuveya nnaphwanelaahu okhalano ori owerya waakhula nikoho nenlo muchu onipakenleiye naari opaka otholathola ntakhara nikacamiho nenlo nryaahuno.

13. (1) Mutharihe meerelo yaawo mmiravo onahaaleiye ochariha wi aakihe soororomela sawe osikola. (2) Muni mpharihele hai ekano enaphwanyeya mu Kolosi 4:6?

¹³ Ntoko yootakiherya, apwanne mwa mmiravo yoowo onaya osikola? Asinthamwene anyu ananwerya ororomela nihusiheryo na othatuwa. Akhweya munnachuna waakiha iparipari sa Mpiipiliyani, nyenya munniisoona wi himwaanono mavyakelo a weerano eyo. Eyo enooniherya wi onnachuneya opaka marehereryo a ohuserya! Nyuwaano munanwerya okhalano soolakelela piili: (1) olipiha nroromelo nanyu wi Muluku oopatuxa ichu soothene ni (2) orehererya mavyakelo anyu a waakiha eparipari. (Aro. 1:20; 1 Ped. 3:15) Munaphwanela opacerya wiikoha mukhatiinyu, ‘Miyaha taani asinthamwene aka oosikola analocaaya wi ekhaviherye nihusiheryo na othatuwa?’ Voocharela mpharihelaka soolaleeryiwa sahu, mpake otholathola. Waakiha soororomela sanyu honi okhale woovila ntoko munuupuwelaanyu. Achu ancipale annaroromela othatuwa pahiru nthowa nawi muchu yoowo anamuroromelaaya ohaaleela wi eyo eparipari. Wakhala wi moophwanya mwaha mmoha naari miili munaphwanelaanyu wuuka ni yaawo, munanwerya ovaha naakhulo noophara murima wa yaale anachuna ohuserya.—Mwaalakhanye Kolosi 4:6.

14-16. (1) Tiheeni munaphwanelaanyu weera wi muhuserye moopwahasa vooloca sa aliivuru a Piipiliya yaawo muhaasuwenlaanyu phaama? (2) Mutharihe mukhalelo soorepa seiyo iphariheliwe sinahaalaaya wookhaviheryaani omwiiwexexa mookwakwaleya liivuru a Amosi. (Moone tho ekaaxa “ Mweerihe wi Piipiliya Akhale Eeparipari.”)

¹⁴ Nkaanyiheryani wi mmithukumano sa muloko nnahaala omwaalakhanya ni omuthokororya liivuru orempwe ni mmoha a yaawo aniichaniwa alipa a miririmo akhaani, akhweya yoowo muhimukhovelenlaanyu phaama. Echu yoopacerya weera enaphwanela okhala wunnuwiha nchuno mwa yeeyo mulipa a miririmu owo orempeiye. Muni mweereno hai eyo?

¹⁵ Voopacerya, mwiikohe: ‘Tiheeni kisuwenlaaka vooloca sa namarepa a liivuru? Aari muchu a mukhalelo taani, aakhala woowi, nave tuuvi waari muteko awe?’ Vaavaa nnahuseryaahu vooloca sa namarepa, nnanwerya wiiwexexa mookwakwaleya ntakhara heeni opharihenleiye masu naari niphwanaphwaniho nammoori orempeiye. Elukuluku munamwaalakhanyaanyu Piipiliya, mvarerye masu yaawo anooniherya omuchu wa namarepa.

¹⁶ Yoocharela, nyuwo munahaala okhaviheryeya osuwela elukuluku ni mpuro liivuru owo orempweiye. Nyuwo munanwerya weerano yeela mookhweya moorweela mwa ovarerya “Etapela ya Aliivuru a Piipiliya” yeeyo enaphwanyeya omapacereryo wa Tradução do Novo Mundo da Bíblia Sagrada. Mwawaacererya, munanwerya ovareryela makupa yaawo orempwevo eliista ya alipa a miririmu ni mamwene mu Apêndice A6. Wakhala wi liivuru a Piipiliya munamuhuseryaanyu ta miririmu, yaamukhala yaphaama osuwela mukhalelo okumi waaryaaya mu elukuluku liivuru owo aarempweiye. Tuuvi waari muupuwelo naari meerelo oonanara a achu yeerinhe orumihiwa mulipa a miririmu wi aakhaviherye osepa? Achu taani yaakhanle mu elukuluku emohamoha ya namarepa owo? Wi mwiiwexexe mwaha owo mwawaakhwanela, munaphwanela  ovareryela mu aliivuru akina a Piipiliya. Ntoko yootakiherya, wi mwiiwexexe mookwakwaleya mikhalelo seiyo saari sawunlaana mu elukuluku ya mulipa miririmu Amosi, munahaala okumihavo mphurelo moorweela wa waalakhanya makupa makina a liivuru a 2 Mamwene ni 2 Matharihelo, yaawo yooniheryiwe mu ireferensiya mu liivuru a Amosi 1:1. Mwawaacererya, munaphwanela ovareryela yeeyo Oseya orempeiye, yoowo akhweya aakhanle mu elukuluku emohamoha ni Amosi. Wakhala wi moovareryela mu aliivuru yaala, munahaala wiiwexexa mukhalelo ekumi yaaryaaya mu elukuluku ya Amosi.—2 Mam. 14:25-28; 2 Math. 26:1-15; Ose. 1:1-11; Amo 1:1.

17-18. Mpharihelaka sootakiherya siri mu iparakrafo naari yootakiherya anyu, mutharihe mukhalelo oopwacha sooleeliherya ikhaani inahaalaaya weeriha yoohuserya ya Piipiliya ya muchu mukhateiye okhala yoohakalaliha.

¹⁷ Vaavaa nnamwaalakhanyaahu Piipiliya, ti yaphaama wakhala wi nookhalano nchuno na ohuserya sincipale. Ntoko yootakiherya, mwaanyiherye wi munaalakhanya ekapitulu khumi napiili ya yooloherya ya mulipa a miririmu Zakariya, yeeyo yaaloherya okhwa wa Mesiya. (Zak. 12:10) Vaavaa munaphiyaanyu mu eversikulu khumi napiili, munnaalakhanya wi ‘nloko na [echoko ya] Natani’ naahaala othanana wa nthowa na okhwa wa Mesiya. Ohiya opwaha makupa ene yaawo mwawaakuveya, munaphwanela omaala vakhaani nave mwiikohe: ‘Wiiwanana taani orivovo variyari va nloko na echoko ya Natani ni Mesiya? Apwanne wookhalavo mukhalelo mukina wa ophwanya sooleeliherya sincipale?’ Munaphwanela wiilipiserya opaka otholathola okina. Yoothoonyerya naari ereferensiya enookerihaani va 2 Samuwele 5:13, 14, vaavaa nyuwo munahaalaanyu ohuserya wi Natani aari mmoha a anamwane a Mwene Tavite. Yoothoonyerya yanawiili, ti Luka 3:23, 31, yoowo onanleela wi Yesu aari a muyareriwo wa Natani moorweela mwa Mariya. (Moone “Yosefe, mwaana a Eli,” masu oohuserya mu Luka 3:23.) Mootutusa, munnasiveliwa! Nyuwo moosuwela wi yaaloheryiwa wi Yesu aahaala okhala muyareriwo wa Tavite. (Mat. 22:42)  Nyenya Tavite aahikhalano anamwane opwaha makhumi meeli. Apwanne tahi yootikhiniha wi Zakariya ahooniherya xaxaxa wi echoko ya Natani yaahaala okhalano nthowa na othanana mu okhwa wa Yesu?

¹⁸ Muthokororye yootakiherya ekina. Mu ekapitulu yoopacerya ya Luka, ninnaalakhanya wi munkeelo Kapriyele aahimuxekurya Mariya nave aalokoha sa mwaana aahaala oyariwa: “Owo onarwa akhala mutokweene, awiichaniwa mwaana a Awirimurimu. Apwiya Muluku, anammuvaha munyukhu woomwene wa nikholo nawe Tavite. Onamulamula muloko wa Yakopo mahiku oothene.” (Luka 1:32, 33) Akhweya nnahaala otikitheryeya pahiru mu nikupa noopacerya na muchaka wa Kapriyele, xaxaxa, mmasu awi Yesu ahaala wiichaniwaka “mwaana a Awirimurimu.” Nyenya Kapriyele aahiloherya tho wi Yesu ahaala okhalano “munyukhu woomwene.” Ela ennaneeriha wuupuwela tiheeni Mariya akhweya aanyiheryeiye vaavaa iiwaleiye masu yaala. Apwanne owo uupuwela wi masu a Kapriyele yaataphulela wi Yesu ahaala omuraceela Mwene Herote—naari muchu mukina aahaala omuraceela mulamuleli o Isarayeli? Waakhanle wi Yesu aahikhala mwene Mariya aahaala okhala mai a mwene, nave emusi awe yaahaala okhala mu empa ya mwene. Nyenya hinaavo nipuro Mpiipiliyani nnooniherya wi Mariya aahuupuwela yeela. Nave Piipiliya hanaloca wi aahiveka nipuro noocicimiheya mu Omwene, ntoko yeerenlaaya oohuserya eeli. (Mat. 20:20-23) Yaweereya yeela ennahiya vanlakani wi Mariya ari muthiyana awiiyeviha!

19-20. Mwawiiwanana ni Tiyako 1:22-25 ni 4:8, teevi eri yoolakelelaahu vaavaa nnahuseryaahu?

¹⁹ Hankooni nuupuwele yoolakelelaahu ya ohuserya Masu a Muluku ni soolaleeryiwa sahu Seekristu ori omwaacamela Yehova. Hiyo tho nnaphwanela woonaka mookwakwaleya “tuuvi ori mukhalelo ahu” ni osuwela matorokelo yaawo nnaphwanelaahu opaka wi nimuhakalalihe Muluku. (Mwaalakhanye Tiyako 1:22-25; 4:8.) Elukuluku eri yoothene nnapaceryaahu ohuserya, nnaphwanela omveka Yehova wi anivahe munepa awe waweela. Nnaphwanela omveka wi anikhaviherye okumiha mphurelo vaavaa nnahuseryaahu ni wiisoona mukhatiihu hiiha ntoko owo onanooneiye.

²⁰ Oothene ahu nikhale ntoko muchu a Muluku otharihiwe ni mulipa a salumu: “Nto yoowo onahakalala mmalamulo a Apwiya, onnuupuwelela othana ni ohiyu. . . Soothene oneeraiye eere ikanamuhakalaliha.”—Sal. 1:2, 3.